SAK 43
Kiris-nebã tagsg segd n yɩɩ wãn ne rãamã yũubu?
Dũniyã gill zugu, nebã tagsg pa yembr rãamã yũub wɛɛngẽ ye. Kẽer yũuda rãam, b sã n wa tigim ne b zo-rãmba. Sanda yãka yam n pa na n tol n yũ ye. Neb a taab me yũuda wʋsgo, hal n mi n su. Biiblã pʋgẽ, bõe la b yet rãamã yũub wɛɛngẽ?
1. Rãamã yũub yaa wẽng bɩ?
Biiblã pʋgẽ, b pa gɩdg rãam yũub ye. B sẽn wa sõdgd kũun toor-toorã Wẽnnaam sẽn kõ tõndã, b yeelame tɩ ninsaalbã paamda “reezẽ rãam n yũud n noogd b sũuri.” (Yɩɩn-sõamyã 104:14, 15) B leb n gomda rap la pagb sẽn da maand sɩd ne a Zeova sẽn da yũud rãam yelle.—1 Tɩmote 5:23.
2. Biiblã pʋgẽ, sagl-bʋg la b kõt neb nins sẽn yãk yam n yũud rãamã?
A Zeova gɩdga rãamã yũ tɩ loogã. (Galat-rãmbã 5:21) Biiblã pʋgẽ, b yetame yaa: “Ra tũ sẽn yũud-b rãam n tɩgdã” ye. (Yel-bũn 23:20) Dẽnd d sã n yãka yam n yũud rãam, d yaa d yembr tɩ d bee ne neb a taaba, d pa segd n yũ wʋsgo, hal n pa le tõe n tags neere, n pa le mi d sẽn yet la d sẽn maande, pa rẽ bɩ tɩ wa wa ne bãas n kõ-d ye. D sã n pa mi tõnd mengã sẽn tõe n yũ rãamã n tekẽ, d segd n sak n basa yũub fasɩ.
3. Wãn to la d tõe n wilg tɩ d sakda neb a taabã yam-yãkrã rãamã yũub wɛɛngẽ?
Yaa ned fãa n yãkd a sã n na n yũu rãam, bɩ a pa na n yũ. Ned sã n yãk yam n yũud n zemsdẽ, d pa segd n kao a bʋʋd ye. D leb n pa segd n modg ned sẽn pa yũud rãam t’a yũ ye. (Rom dãmbã 14:10) Tõnd rãamã yũub sã n na n kɩtame tɩ neb a taabã lak n lʋɩ, d yãkda yam n pa yũ ye. (Karm-y Rom dãmb 14:21.) D pa baood d “meng nafr ye.” D baooda d “taabã nafre.”—Karm-y 1 Korẽnt rãmb 10:23, 24.
D BAO N BÃNG N PAASE
D na n yãa noy la sagls sẽn be Biiblã pʋgẽ, n tõe n sõng-y tɩ y yãk y sã n na n yũu rãam bɩ y pa na n yũ, la y sẽn segd n yũ n tekẽ. Sẽn paase, y na n yãa y sẽn tõe n maane, rãamã yũub sã n yaa y zu-loɛɛga.
4. Yãk yam n na n yũ rãam, bɩ n pa na n yũ wã
A Zeezi tagsg ra yaa wãn ne rãamã yũubu? Sẽn na yɩl n bãnge, d ges pipi yel-solemdã a sẽn maanã. Karm-y Zã 2:1-11, tɩ rẽ poor bɩ y leok sogsgã:
Yel-solem-kãngã sõngda tõnd tɩ d bãng t’a Zeezi tagsg yaa wãn ne rãamã yũubu, la ne neb nins sẽn yũud rãamã?
Sẽn mik t’a Zeezi pa yeel tɩ rãamã yũub yaa wẽngã, kiris-ned tagsg segd n yɩɩ wãn ne ned sẽn yãk yam n yũud rãam?
Baa kiris-ned tar lohorem n tõe n yũ rãam, pa rat n yeel tɩ wakat fãa yaa sõma t’a yũ ye. Karm-y Yel-bũn 22:3, tɩ rẽ poor bɩ y gom bũmb nins sẽn pʋgdã yelle, tɩ tõe n sõng-y lame tɩ y yãk y sã n na n yũu rãam bɩ y pa na n yũ:
Y na n wẽna mobilli, wall n tʋm ne masĩni.
Y tʋtame.
Logtor n yeel yãmb tɩ y ra yũ rãam ye.
Rãamã yũub yaa y zu-loɛɛga.
Tẽngã laloa pa kõt-y sor tɩ y tõe n yũ rãam ye.
Yãmb bee ne ned sẽn yãk yam n pa yũud rãam, bala pĩndã, rãamã yũub ra yaa a zu-loɛɛga.
Y yi-kãadem kibs sasa, wall y sã n wa tigim ne neb a taaba, y segd n yiisa rãam bɩ? Sẽn na yɩl n bãng bũmb ning sẽn tõe n sõng-y tɩ y bãng n yãke, bɩ y ges VIDEO wã.
Karm-y Rom dãmb 13:13 la 1 Korẽnt rãmb 10:31, 32. Vɛrse fãa kareng poor bɩ y leok sokrã:
Wãn to la sagl-kãngã tũubã tõe n sõng yãmb tɩ y yãk yam sẽn na n noog a Zeova sũuri?
Yaa kiris-ned fãa n yãkd a sã n na n yũu rãam bɩ a pa na n yũ. Baa a sã n yũuda wakat-wakate, a tõe n yãka yam n pa yũ sasa kẽere
5. Yãk-y y sẽn na n yũ n tekẽ
Y sã n yãka yam n yũud rãam, bɩ y tẽege: A Zeova pa yeel tɩ rãamã yũub yaa wẽng ye. Yaa rãamã yũ tɩ loogã la a yeel tɩ yaa wẽnga. Bõe yĩnga? Karm-y Ooze 4:11, 18, tɩ rẽ poor bɩ y leok sokrã:
Ned sã n yũ rãam tɩ looge, tõe n kɩtame t’a maan bõe?
Bõe n tõe n sõng-d tɩ d ra yũ rãam tɩ looge? D segd n yɩɩ sik-m-meng soaba, n bãng d sẽn tõe n yũ rãam n tekẽ. Karm-y Yel-bũn 11:2, tɩ rẽ poor bɩ y leok sokrã:
Bõe yĩng tɩ pĩnd n yãk y sẽn na n yũ n tekẽ wã yaa bõn-sõngo?
6. Bõe n tõe n sõng ned t’a bas rãamã yũ tɩ loogã?
Ges-y bũmb ning sẽn sõng rao a yembr t’a bas rãamã yũ tɩ loogã. Ges-y VIDEO wã, tɩ rẽ poor bɩ y leok sogsgã.
Video wã pʋgẽ, a Dimitri sã n da wa yũ rãam, kɩtdame t’a maan bõe?
A tõogame n bas rãamã yũub zĩig pʋgẽ bɩ?
Bõe n sõng-a t’a wa tõog n bas rãamã yũ tɩ loogã?
Karm-y 1 Korẽnt rãmb 6:10, 11, tɩ rẽ poor bɩ y leok sogsgã:
Biiblã pʋgẽ, bõe la b yet rã-tɩgrã wɛɛngẽ?
Bõe n wilgd tɩ ned sẽn yũud rãam tɩ loog tõe n toeemame?
Karm-y Matiye 5:30, tɩ rẽ poor bɩ y leok sokrã:
A Zeezi sẽn dɩk makrã ne nugã fiuugrã, a ra rat n yeelame tɩ tõe n wa yɩɩ tɩlɛ tɩ d bas bũmb fasɩ, sẽn na yɩl n ta a Zeova yam. Yãmb sã n maood n na n basa rãamã yũ tɩ loogã, bõe la y tõe n maane?a
Karm-y 1 Korẽnt rãmb 15:33, tɩ rẽ poor bɩ y leok sokrã:
Y zo-rãmbã tõe n wa kɩtame tɩ y tall manesem-bʋg rãamã yũub wɛɛngẽ?
NINA TÕE N SOKAME YAA: “Rãamã yũub yaa wẽng bɩ?”
Y na n leokame tɩ bõe?
KƲMSGO
Rãamã naaga bũmb nins a Zeova sẽn kõt tõnd d sũ-noog yĩngã, la a gɩdga rãamã yũ tɩ loogã ne rã-tɩgrã.
Lebg-n-gese
Biiblã pʋgẽ, bõe la b yet rãamã yũub wɛɛngẽ?
Rãamã yũ tɩ loogã wata ne zu-loe-bʋse?
Wãn to la d tõe n wilg tɩ d sakda neb a taabã yam-yãkrã rãamã yũub wɛɛngẽ?
BŨMB A TAABA
Wãn to la kom-bɩɩsã tõe n bãng n yãk yam rãamã yũub wɛɛngẽ?
Bũmb toor-toor y sẽn tõe n maane, n tõog n paam y meng ne rãamã.
“Ra sak-y tɩ rãamã soog-y ye” (Yʋʋmd 2010 yʋʋm-vẽkr kiuug pipi daar Gũusg Gasgã)
Kiris-ned tõe n naag n kogsa vɛɛr-dãmb bɩ?
“Karemdbã sogsgo” (Yʋʋmd 2007 wao-fugdg kiuug rasem 15 Gũusg Gasgã)
Rao a yembr sẽn maan to-to n tõog n bas rãamã yũ tɩ loogã.
“Biiblã toeemda neba” (Yʋʋmd 2012 sig-noy kiuug pipi daar Gũusg Gasgã)
a Tõe n wa yɩɩ tɩlɛ ne neb nins sẽn yũud rãam tɩ loogã tɩ b bao logtor sõngre, sẽn na yɩl n tõog n base. Logtoɛɛmb wʋsg yetame tɩ neb nins sẽn tar zu-loɛɛg ne rãamã pa segd n le yũ baa-baa.