SAK 19
A Zeova Kaset rãmbã yaa kiris-neb hakɩɩk bɩ?
Tõnd a Zeova Kaset rãmbã kɩsa sɩd tɩ d yaa kiris-neb hakɩɩka. Bõe yĩnga? D gom d tẽebã sẽn tik bũmb ning zugã yelle, d yʋʋrã sẽn kɩt tɩ d yaa toorã, la d sẽn nong taab to-to wã yelle.
1. A Zeova Kaset rãmbã sẽn tẽed bũmb ninsã tika bõe zugu?
A Zeezi yeelame: “Yãmb gomdã yaa sɩda.” (Zã 17:17) Wa a Zeezi, a Zeova Kaset rãmbã tikda b sẽn tẽed bũmb ninsã Wẽnnaam Gomdã zug wakat fãa. Wala makre, d gom d sẽn da maand dẽ to-to hal sɩngrẽ wã yelle. Yʋʋmd 1870 wã sẽnese, neb sull b sẽn da boond tɩ Biiblã Zãmsdbã maaga b yĩng n sɩng Biiblã vaeesgo. B tika bũmb nins b sẽn tẽedã Biiblã goam zugu, baa ne rẽ sẽn da yaa toor ne bũmb nins b sẽn zãmsd nebã egiliiz-rãmbã pʋsẽ wã. Rẽ poore, b sɩngame n wilgd neb a taab bũmb nins b sẽn bãngã.a
2. Bõe yĩng tɩ d boond d mens t’a Zeova Kaset rãmba?
A Zeova boonda neb nins sẽn tũud-a wã t’a Kaset rãmba, bala b togsda sɩdã yẽ zugu. (Ebre-rãmbã 11:4–12:1) Wala makre, pĩnd wendẽ wã, Wẽnnaam yeela a nin-buiidã yaa: “Yãmb yaa mam kaset dãmba.” (Karm-y Ezayi 43:10.) B boonda a Zeezi tɩ “Kaset soab ning sẽn maand sɩdã.” (Vẽnegre 1:5) Rẽ n so tɩ yʋʋmd 1931 wã, d pʋd d mens t’a Zeova Kaset rãmba. D sũur yaa noog wʋsg ne yʋ-kãngã.
3. Wãn to la a Zeova Kaset rãmbã rɩkd a Zeezi togs-n-taar nonglmã wɛɛngẽ?
A Zeezi ra nonga a karen-biisã wʋsgo, hal n da get-b wa a zak rãmba. (Karm-y Mark 3:35.) Woto me, a Zeova Kaset rãmbã sẽn be dũniyã gill zugã yaa wa zak a ye rãmb sẽn zemsd taaba. Rẽ n so tɩ d boond taab tɩ saam-biis la saam-bi-pogse. (Filemo 1, 2) Sẽn paase, d tũuda noor b sẽn kõ Biiblã pʋgẽ. B yeelame yaa: “Nong-y saam-biisã fãa.” (1 Pɩyɛɛr 2:17) A Zeova Kaset rãmbã wilgdame tɩ b nonga taab woto ne manesem buud toor-toore. Wala makre, d sõngda d tẽed-n-taasã sẽn be dũniyã gill zugã, b sã n wa be sõngr daab pʋgẽ.
D BAO N BÃNG N PAASE
D bao n bãng a Zeova Kaset rãmbã kibarã n paase, la d ges bũmb a taab sẽn wilgd tɩ d yaa kiris-neb hakɩɩka.
Kiris-neb hakɩɩkã tikda b sẽn tẽed bũmb ninsã Biiblã goam zugu, la b gomd rẽ yell ne neb a taabã
4. Tõnd sẽn tẽed bũmb ninsã tika Biiblã zugu
A Zeova ra pĩnd n togsame tɩ yaoolem wakatã, d na n maneg n wʋma Biiblã goam võor n paase. Karm-y Dãniyɛll 12:4, tɩ rẽ poor bɩ y leok sokrã:
Wẽnnaam nin-buiidã sẽn na n ket n wɩngd ne Biiblã vaeesgã, bõe la b na n paam n paase?
D ges neb sull b sẽn da boond tɩ Biiblã Zãmsdbã sẽn zãms Wẽnnaam Gomdã to-to. B nin-yend yʋʋr da yaa a Charles Russell. Ges-y VIDEO wã, tɩ rẽ poor bɩ y leok sokrã.
Video wã pʋgẽ, wãn to la a Charles Russell ne a tũud-n-taasã ra zãmsd Biiblã?
Yãmb miime bɩ?
D mi n toeema bũmb kẽer d sẽn tẽede. Bõe yĩnga? Wa sõor sẽn pukdi, t’a vẽenemã paasdẽ tɩ d maneg n ne zĩigã sõma wã, Wẽnnaam me sõngda tõnd tɩ d maneg n wʋmd a Gomdã võor n paasdẽ. (Karm-y Yel-bũn 4:18.) Dẽnd baa ne Biiblã goamã sẽn pa toeemdã, d sã n maneg n wʋm a goamã võor n paase, d toeemda bũmb nins d sẽn tẽedã tɩ zemse.
5. D sẽn vɩ to-to wã zemsa ne d yʋʋrã
Bõe yĩng tɩ d boond d mens t’a Zeova Kaset rãmba? Ges-y VIDEO wã, tɩ rẽ poor bɩ y leok sokrã.
Bõe yĩng tɩ d sẽn boond d mens t’a Zeova Kaset rãmbã yaa yʋʋr sẽn zemse?
Bõe yĩng t’a Zeova yãk neb tɩ b na n yɩ a Kaset rãmba? Bala b na n wilgdame tɩ yẽ la Wẽnnaam sɩd-sɩdã, sẽn mik tɩ nebã togsda bũmb wʋsg sẽn pa sɩd yẽ zugã. D gom ziri a yiib yelle
Tũudum kẽer pʋgẽ, b zãmsda nebã tɩ Wẽnnaam ratame tɩ b tũnugd ne bõn-naands la imaaz-rãmb n pʋʋsd-a. Rẽ yaa sɩd bɩ? Karm-y Maan-kʋʋr 26:1, tɩ rẽ poor bɩ y leok sokrã:
Vɛrse wã wilgdame t’a Zeova tagsg yaa wãn ne bõn-naandsã la imaaz-rãmbã?
Tũudum kẽer taoor dãmb zãmsda nebã t’a Zeezi yaa Wẽnnaam. Rẽ yaa sɩd bɩ? Karm-y Zã 20:17, tɩ rẽ poor bɩ y leok sogsgã:
Vɛrse wã wilgdame tɩ Wẽnnaam ne a Zeezi yaa yembr bɩ?
Yãmb tagsg yaa wãna, y sẽn mi t’a Zeova tʋma a Kaset rãmbã tɩ b moond sɩdã yẽ la a Bi-riblã zugã?
6. D nonga taaba
Biiblã pʋgẽ, b wilgame tɩ kiris-nebã segd n zemsda taaba, wa yĩngã wilã fãa sẽn naagd taab n tʋmd to-to wã. Karm-y 1 Korẽnt rãmb 12:25, 26, tɩ rẽ poor bɩ y leok sogsgã:
Kiris-neb hakɩɩkã manesem segd n yɩɩ wãna, b tẽed-n-taas sã n namsdẽ?
Bõe la yãmb yã a Zeova Kaset rãmbã sẽn nong taab to-to wã wɛɛngẽ?
A Zeova Kaset rãmb sã n namsd zĩig ninga, b tẽed-n-taasã sẽn be dũniyã gill zugã modgdame n maan bũmb tao-tao n sõnge. Ges-y VIDEO wã, tɩ y na n yãa makr a ye. Rẽ poor bɩ y leok sokrã.
Wãn to la a Zeova Kaset rãmbã sẽn modgd n sõngd taab sabab-wẽns poorã wilgd tɩ b nonga taaba?
Kiris-neb hakɩɩkã wilgdame tɩ b nonga neb nins sẽn be sõngr daab pʋgẽ wã
NEB KẼER SẼN YETE: “A Zeova Kaset rãmbã yaa tũudum-paalle.”
Hal sẽn sɩng wakat bʋg la a Zeova boond neb nins sẽn tũud-a wã t’a Kaset rãmba?
KƲMSGO
A Zeova Kaset rãmbã yaa kiris-neb hakɩɩka. Tõnd ne d tẽed-n-taasã sẽn be dũniyã gill zugã yaa wa zak a ye rãmba, d sẽn tẽed bũmb ninsã tika Biiblã goam zugu, la d sõngda nebã me tɩ b bãngd sɩdã a Zeova zugu.
Lebg-n-gese
Bõe yĩng tɩ d boond d mens t’a Zeova Kaset rãmba?
D manesmã yaa wãn ne taaba?
Yãmb tagsdame t’a Zeova Kaset rãmbã yaa kiris-neb hakɩɩk bɩ?
BŨMB A TAABA
Video sẽn gomd a Zeova Kaset rãmbã kibar yelle.
A Zeova Kaset rãmbã—B tʋmda ne tẽebo, pipi babga: B yii likã pʋgẽ (1:01:27)
Makr sẽn wilgd a Zeova Kaset rãmbã sẽn puk yɛl sẽn pa sɩd b sẽn zãmsd nebã.
Sogsg kẽer nebã sẽn mi n sokd a Zeova Kaset rãmbã zugu, la b leoore. Tõe tɩ yaa sogsg yãmb me sẽn mi n sok y menga.
“Sogsg nebã sẽn wae n sokd a Zeova Kaset rãmbã zugu” (Bee jw.org)
A Stephen ra kisa buud a taab neb hal n da maand-b wẽnga. Ges-y bũmb ning a sẽn yã a Zeova Kaset rãmbã sʋka, tɩ kɩt t’a toeeme.
“Mam vɩɩmã ra tara sãoong n debda” (Yʋʋmd 2015 sa-sik kiuug pipi daar Gũusg Gasgã)
a Yʋʋmd 1879 wã tɛka, a Zeova Kaset rãmbã yiisda Gũusg Gasgã n bilgd Biiblã goamã võore.