A Zeova barkã n kɩtd tɩ tõnd yɩ arzɛgs rãmba
1 B nong n makda ned tõogr ne a korgã tagem. Yaa rẽ yĩng la neba wʋsg sẽn get sẽn tar-b ligdã wa neb nins sẽn tar sũ-noog n yɩɩdã. Baasg zãnga, neb nins sẽn tagsd tɩ ligd tõe n daa sũ-noogã tudga hal wʋsgo. (Koɛ. 5:1112 in NW) ‘Neb nins sẽn dat n yɩ arzɛgs rãmb’ laogã wɛɛngẽ wã ka tõe n paam sũ-noog sẽn kaoosd ye. (1 Tɩm. 6:9) Sẽn yaa lebende, a Zeova sõgen dãmbã sɩd tara sũ-noogo, la b yaa dũniyã neb nins sẽn tar arzɛgs n yɩɩdã. (Yel. 10:22; Wil. 2:9) Bõe yĩng tɩ yaa woto?
2 Kaset sẽn wilgd tɩ d tara arzɛgse: Tõnd tara yam wʋsg tẽebã wɛɛngẽ la d wʋmd Wẽnnaam Gomdã sẽn yaa Biiblã võore. Ne a tẽng zug siglgã maasem, a Zeova ket n zãmsda tõnd yẽ mengã ne a Biriblã wɛɛngẽ, tõnd wakat sẽn ka sɛt nafa yĩnga. Võor-wʋmb sẽn yaa takɩ a woto kɩtdame tɩ d tõe n pẽneg a Zeova n paam zems-n-taar sẽn tar pãng ne-a. (Zak 4:8) Sõma ne wẽng bãng n welgã la Wẽnnaam noyã tũub kogenda tõnd ne bãas la yɛl kẽere. D tara bas-yard t’a Zeova na n dɩka segls n pids tõnd ratem, tɩ rẽ na n wa ne sũ-noog la yam gãandg sẽn yit Wẽnnaam nengẽ.—Mat. 6:33.
3 D tara laafɩ la zems-n-taar tõnd tẽeb saam-biirã pʋgẽ, bala d bɩɩsda Wẽnnaam vʋʋsem sõngã biisi. Nonglmã sẽn yaa loɛtg sẽn tar pãng sẽn lagem tõnd taabã yĩngã, d ka segd abada n tags tɩ Wẽnnaam bɩ d saam-biisã bas-d lame, d sã n wa seg yel-beed ye.—Gal. 6:10.
4 Tõnd vɩɩmã tara võor la bõn-datl meng-menga. D getame tɩ yaa zu-noog sẽn yaa kãseng d sẽn kẽesd d mens koe-noogã mooneg zĩig fãa wã pʋgẽ wã. Rẽ wata ne sũ-noog sẽn kaoosde, d sẽn sõngd neb a taabã tɩ b wa paam zems-n-taar ne Wẽnnaam la b lagem tõnd n sõgen baleng yɩlemdã pʋgẽ wã. Tõnd arzɛkã yõod b sẽn ka tõe n bãng n bilgã sẽn yaa ministɛɛrã waoogda a Zeova la kõt tõnd sũ-noogo, d sẽn sõngd n sõmsd a yʋʋrã yĩnga. D tallda yam-sõng ne yɛlã, n miẽ tɩ ka la bilfu tõnd saagrã ne beoog-daarã na n pidsame.
5 D wilg d nanebo: Bɩ d tall naneb wakat fãa ne a Zeova barkã, sẽn kɩtd tɩ tõnd yaa neb nins sẽn tar-b arzɛgs n yɩɩd tẽngã zugã. (Yel. 22:4) D sã n dɩk sẽk raar fãa n bʋgs bũmb nins tõnd sẽn tarã zugu, rẽ tusda tõnd tɩ d pʋʋs a Zeova bark a sẽn wilgd nonglem wʋsgã la d kell n sak-a zãng-zãnga.