“Bũmb Fãa Tara A Wakate”
“Bũmb fãa tara a wakate. Bũmb nins fãa sẽn maand dũniyã zuga tara b wakate.”—KOƐƐG SOABA 3:1.
1. Bõe n pa tõe ne ninsaalbã sẽn pa zems zãngã, la rẽ waa ne yɛl kẽer bʋse?
NEBA nong n yetame: “M da segd n deng n maan-a lame.” Bɩ b tõeeme n wa yeel woto bũmb b sẽn maan poore: “M da segd n yaas n gũume.” Manesem a woto wilgdame tɩ yaa toog ne ninsaalb sẽn pa zems zãng tɩ b bãng yɛl kẽer sẽn segd n maan wakat sẽn zems pʋgẽ wã. Koak kãngã kɩtame tɩ neb ne taab zems-n-taar sãame. A waa ne sũ-sãams hal wʋsgo. La sẽn yaa wẽng n yɩɩd fãa, a maaga neb kẽer tẽeb b sẽn tar ne a Zeova la ne a siglgã.
2, 3. a) Bõe yĩng tɩ yaa yam tʋʋmd tɩ d sak wakat nins a Zeova sẽn yãkã? b) Tags-bʋg sẽn kɩls tɩ zems la d segd n tall ne Biiblã bãngr-goam pidsgu?
2 A Zeova sẽn tar yam la yam-welgr ning ninsaalbã sẽn pa tarã kɩtame t’a tõe n deng n togs tʋʋmd fãa baasgo, a sã n data. A tõe n bãnga ‘bũmb nins sẽn nan ka naana hal sɩngr wakate.’ (Ezai 46:10) Woto yĩnga, a tõe n yãkame n maan bũmb ning fãa a sẽn datã wakat ning sẽn zems n yɩɩdã sasa n pa tudg ye. Woto yĩnga, wall tɩ d teeg d mengã tagsg sẽn yaa tudgr ne yɛlã wakatã, yaa yam tʋʋmd ne-do, d sã n sak wakat nins a Zeova sẽn yãkã!
3 Wala makre, ne kɩs-sɩda, kiris-neb sẽn bɩ wã gũuda wakat ning a Zeova sẽn yãk Biiblã bãngr-goam kẽer pidsg yĩngã. B ket n tʋmda wʋsg a sõgenegẽ wã, la b ket n ningd noor ning sẽn yit Wiisgu 3:26 pʋgẽ wã b yamẽ: “Ned sã n sĩnd bala n gũ Zusoaba fãagre, yaa neere.” (Mak-y ne Habakuk 3:16.) B sẽn maand rẽ wã sasa me, b kɩsa sɩd ne a Zeova sẽn togs bʋ-kaoor ningã, “ba a sã n wẽnd wa a kaoosdame, . . . a na n maaname n ka vaal ye.”—Habakuk 2:3.
4. Wãn-wãn la Amos 3:7 la Matɩe 24:45 sõngd tõnd tɩ d gũ a Zeova ne maag-m-menga?
4 La sã n yaa Biiblã verse kẽer võore, bɩ Sosiete Watstawa võor-wilgr kẽer sẽn be sɛbẽ wã võor la d pa wʋmd zãnga, d tara bʋʋm n na n lebg yãg-yãg soab bɩ? Yaa yam tʋʋmde, d sã n gũ wakat ning a Zeova sẽn yãk n na n kõ vẽenem yɛlã zutã. “Tɩ bõe, Zusoaba ka maand bũmb n ka wilg b no-rɛɛsdba sẽn yaa b tʋm-tʋmdba ye.” (Amos 3:7) Ad sɩd yaa kãabg sẽn yaa kãseng menga! La yaa d bãng t’a Zeova pukda a yel-solgdsã wakat ning a sẽn get tɩ zemsame wã. Sẽn na yɩl tɩ yɩ woto, Wẽnnaam kõo a “kɩs-sɩd la gũusd yambã” sor t’a kõ a nin-buiidã “b [tẽebã] rɩɩbã wakat sẽn zems pʋgẽ.” (Matɩe 24:45, NW) Baasg zãnga, d pa tar bʋʋm n na n maan tɩ rẽ lebg yel-pakr ne-d tɩ loog noore, bɩ n maan yɩɩr yɛl kẽer võor b sẽn pa wilg zãngã yĩng ye. Sẽn yaa lebende, d tõe n kɩsa sɩd tɩ d sã n gũ a Zeova ne maag-m-menga, a na n tũnuga ne kɩs-sɩd yambã sull n kõ bũmb ning sẽn yaa tɩlaeyã “wakat sẽn zems pʋgẽ.”
5. Koɛɛg Soaba 3:1-8 vaeesgã yõod yaa bõe?
5 Rĩm sẽn tar yam a Salomo goma bõn-yood toɛ-toɛ 28 yelle, t’a yembr fãa tar a “wakate.” (Koɛɛg Soaba 3:1-8) D sã n wʋm a Salomo sẽn yeel bũmb ningã võore, la rẽ sẽn baood tɩ tõnd maanegã võore, na n sõng-d lame tɩ d bãng tʋʋm kẽer wakat sẽn zemse, la wakat sẽn pa zems ne tʋʋm kẽere, sã n yaa ne Wẽnnaam nif gesgẽ. (Hebre dãmba 5:14, NW) Rẽ me na n sõnga tõnd tɩ d vɩɩmd tɩ zems ne rẽnda.
‘Yãbr wakat la laad wakate’
6, 7. a) Bõe n kɩt tɩ neb nins sẽn tagsd b taab yell rũndã-rũndã wã ‘yãbda’? b) Wãn-wãn la dũniyã makd n na n mao ne yɛlã sẽn pa reem yell pʋgẽ a sẽn beẽ wã?
6 Baa ne ‘yãbr la laad wakat’ sẽn be wã, ãnd n pa rat laad wakate? (Koɛɛg Soaba 3:4) Zu-bʋko, d vɩɩ dũni pʋgẽ sẽn wat ne yãbr n yɩɩda. Yɛl sẽn sãamd sũyã pida kɩbayã n yɩɩda. D sũy sãamda wʋsgo, d sã n wʋmd kamb sẽn tãood b karen-bi-taas ne bug-raado, roagdb sẽn tʋmd wɩɩbd tʋʋmd ne b kamba, teroris rãmb sẽn kʋʋd bɩ sẽn komsd bʋʋm dãmba, la b sẽn boond tɩ tẽngã pãens yel-beed sẽn yãgsd yõy wʋsg la sãamd arzɛgsã. Kamb ne nin-kond kom sẽn kʋʋdã, neb sẽn yi b sẽn beẽ n zoetẽ n soondedẽ kɩbar pukda televiziõ n wã tɩ tõnd neẽ. Goam sẽn da pa wɛ pĩndã wala buud vargrã, SƖDA wã, tũnug ne bãas biis zabr pʋgẽ wã, la El Niño wã wata ne yɩɩr masã tõnd yamẽ wã la d sũyẽ wã, t’a yembr fãa rẽnd yaa toore.
7 Sãmbg sẽn ka be, masã dũni wã pida ne yel-beed la yɩɩre. Baasg zãnga, wala a sã n da wilgdame tɩ yellã sẽn be zĩig ningã pa dem-dem, b yiisda reem buud toor-toor sẽn wilgd bõn-yood sẽn ka yõodo, yel-yaalse, naoor wʋsgo yaa yoob la nen-kɛglem yɛla, sẽn na yɩl n tudg tõnd tɩ d yĩm neb a taabã namsgo. Yalem kʋʋsem ne laad sẽn ka yõod sẽn pukd toog kae yamã reem a woto sẽn wat ne wã pa segd n dɩk n naag ne sũ-noog hakɩkã ye. Sũ-noog ning sẽn yaa Wẽnnaam vʋʋsmã biigã yaa bũmb a Sʋɩtãan dũniyã sẽn pʋd n pa tõe n kõ ye.—Galat dãmba 5:22, 23; Efɛɛz rãmba 5:3, 4.
8. Sẽn segd n pak kiris-nebã n yɩɩd rũndã-rũndã yaa yãbr bɩ laado? Wilg-yã.
8 D sẽn sak n deeg tɩ dũniyã bee zĩ-wẽng pʋgẽ wã, d tõe n bãngame tɩ rũndã wakatã pa wakat d sẽn segd n lʋɩɩs laadã taoor ye. Masã pa wakat ning d sẽn segd n vɩɩmd pemsem kokr la reem yĩnga, bɩ n ‘deem’ tɩ wa lim tẽebã yɛl ye. (Mak-y ne Koɛɛg Soaba 7:2-4.) “B rãmb nins sẽn dɩt dũniyã” segdame n “yɩ wala b rãmb nins sẽn ka rɩt dũniyã tɩ pid ye,” woto la tʋm-tʋmd a Poll yeel-yã. Bõe yĩnga? Bala “dũni-kãngã halhaal tara toeengo.” (1 Korẽnt dãmba 7:31, NW) Sɩd kiris-nebã vɩɩ daar fãa n sakd n deeg zãng tɩ wakat ning d sẽn vɩyã pʋgẽ pa reem yell ye.—Filip rãmba 4:8.
Baa ne b sẽn yãbdã b sɩd tara sũ-noogo!
9. Yel-bʋg sẽn yaa kaeto n da be ray nins sẽn deng Sa-kãsengã wakate, la rẽ võor ne tõnd yaa bõe rũndã-rũndã?
9 Neb nins sẽn vɩɩmd dũni gill Sa-kãsengã wakatã pa ges vɩɩmã wa bũmb sẽn tar yõod ye. B tʋma b daar fãa tʋʋm n pa yãb ‘dũniyã neba sẽn lebg bõn-põaasã’ yĩng ye, la ‘dũniyã neba sẽn da maand taab pãngã yell ra pa pak-b ye. (Sɩngre 6:5, 11) A Zezi goma yel-kãngã sẽn yaa kaeto wã yelle, la a reng n togsame tɩ tõnd wakatã, neba na n talla manesem sẽn wõnd woto. A keoogame: “Sẽn deng sãoong sa-kãsengã, neba ra dɩtame la b yũuda, la b peesd pagba, la b kõt b kamb sɩdba hal tɩ ta daar ning a Nowe sẽn kẽ koom-koglga pʋgẽ. La bãmb ka bãng hal tɩ sãoong sa-kãsenga wa n loog ne bãmb fãa. A na n yɩɩ woto me ne Ninsaal Biiga waoongo.”—Matɩe 24:38, 39.
10. Wãn-wãn la Israɛll neb nins sẽn vɩɩmd a Azze wakatã wilg tɩ b ra pa tar naneb ne wakat ning a Zeova sẽn yãkã?
10 Sẽn na maan yʋʋm 1 850 Sa-kãsengã poore, a Azze wakatã, Israɛll neb wʋsg wilga yam-kaalg woto buud ne tẽebã yɛla. B sẽn tʋm wʋsg b mensã raab pidsg yĩngã b pa bãng tɩ wakat ning pʋgẽ bãmb sẽn da vɩyã yaa sasa b sẽn segd n lʋɩɩs a Zeova raabã taoor ye. D karemdame: “Nin-kãens yeelame tɩ m dooga meeb wakat nan ka ta ye. Yaa woto yĩng la Zusoaba kõ b no-rɛɛs a Azze koe-kãng n yeel neba yaa: ‘Togame tɩ yãmb zĩ y ro-neeba pʋsẽ tɩ mam dooga lʋɩ? La masã, tags-y neer n ges y sẽn na n maan to-to.’ ”—Azze 1:1-5.
11. Zemsame tɩ d sʋk d mens sʋgs-bʋse?
11 D sẽn yaa a Zeova Kaset rãmb rũndã-rũndã, n tar zɩɩb la zu-nood a Zeova taoor wala Israɛll nebã a Azze wakatã, tõnd me na maan neer n tags d soyã yell ne d sũy fãa, n get d vɩɩm manesmã sẽn yaa to-to n da reem ye. Tõnd ‘yãbda’ dũniyã yɛl sẽn yaa to-to wã, la taal ning b sẽn wat ne Wẽnnaam yʋʋrã zugã bɩ? Tõnd sũy sãamdame, nebã sã n kɩɩsd Wẽnnaam belmã bɩ b kɩɩsd a no-tɩrsã vẽeneg bɩ? Tõnd maanda wa neb nins sẽn paam bãnd a Ezekɩɛll sẽn yã yãabã pʋgẽ yʋʋm 2 500 sẽn loogã bɩ? D karemda woto nin-kãens wɛɛngẽ: “Wẽnnaam boola ned ninga sẽn yer fu-pɛɛlg n zãad bũmb sẽn tar n gʋlsdẽ wã n yeel-a t’a kẽng n saag zĩiga fãa Zerizalɛm n ning neb nins fãa sẽn wõosd n yãbd bõn-wẽns nins sẽn maand tẽnga pʋgẽ wã yĩnga rĩ bãnde.”—Ezekɩɛll 9:4.
12. Ezekɩɛll 9:5, 6 võor ne nebã yaa bõe rũndã-rũndã?
12 Kɩba-kãngã võor ne tõnd rũndã-rũndã lebgda vẽenega, d sã n karem noy nins b sẽn kõ roap a yoobã ne zab-teed sẽn bõgsdã: “Pʋgl-y yẽ poor n saag tẽnga pʋgẽ n kʋ nebã. Ra zoe-y bãmb nimbãaneg ye. Ra bas-y bãmb ye. Kʋ-y nin-kẽemba ne rasãmba la pʋg-sadba ne kom-bõonega la pagbã. La y ra kʋ ned sẽn tar bãnd ye. Bɩ y sɩng n maan m zĩ-sõnga pʋgẽ.” (Ezekɩɛll 9:5,6) Tõnd põsbã to-kãseng kãngã sẽn kolgd tao-tao wã sasa bee ne tõnd sẽn na n sak n deeg tɩ sẽn yɩɩd fãa, yaa wakat kãngã la d segd n yãbã.
13, 14. a) Nin-bʋs buud la a Zezi yeel tɩ b tara sũ-noogo? b) Wilg-y bũmb ning sẽn kɩt tɩ y tagsdẽ tɩ bilgr kãngã zemsa sõma ne a Zeova Kaset rãmbã.
13 Yaa sɩda, a Zeova sõgen dãmbã sẽn “yãbd” dũniyã yɛl sẽn sãamd sũurã pa kɩtd tɩ b pa tar sũ-noog ye. Yaa lebend ne rẽ menga! B sɩd yaa neb sull ning sẽn tar sũ-noog n yɩɩd tẽngã zugã. A Zezi wilga bũmb ning sẽn wat ne sũ-noog a sẽn wa n yeel tɩ: “Sũ-noog rãmb la neb nins sẽn mi tɩ b tara tẽeb ratmã, . . . sũ-sãoong rãmba . . . sũ-maasem dãmbã . . . tɩrlem kom la ko-yũud sẽn tar-b rãmba . . . ninbãan-zoetba . . . pʋ-peelem dãmba . . . zab-paasdba . . . neb nins . . . neb sẽn namsd bãmb tɩrlem yĩnga.” (Matɩe 5:3, NW, 4-10) Kaset bee wʋsg n na n wilg tɩ bilgr kãngã zemsa ne a Zeova Kaset rãmbã sull n yɩɩd tũudum siglg a to fãa.
14 Sẽn yɩɩd fãa, sɩd balengã luglg tɛk yʋʋmd 1919, a Zeova nin-buiidã sẽn tar sũ-noogã tara bʋʋm n na n ‘la.’ Tẽebã wɛɛngẽ b talla sũ-noog ning neb nins sẽn yi Babilon n wa yʋʋm kob-gĩnd a yoob soab S.D.T.W. sẽn paama: “Wakat ning Zusoaba sẽn le tall tõnd n wa Siõ, tõnd da yaa wa neb sẽn zãmsd zãmsdo. La tõnd noeyã pida ne laado tõnd zɛlma pida ne sũ-noog kaasgo. . . . Zusoaba maana bõn-kãsems n kõ tõndo, tõnd maanda sũ-noogo.” (Yɩɩl Sõamyã 126:1-3) La baa ne a Zeova Kaset rãmbã sẽn be laad wʋsg pʋgẽ tẽebã wɛɛngẽ wã, b bãnga yam n ningd b yamẽ tɩ wakat ning pʋgẽ d sẽn vɩyã pa reem yell ye. Dũni paalgã sã n sɩd wa wa tɩ tẽngã neb wa “paam vɩɩm sẽn yaa sɩda,” rẽ, wakat kãngã tɩ laadã ledga yãbrã wakat sẽn-kõn-sa yĩnga.—1 Tɩmote 6:19; Wilgri 21:3, 4.
‘Mobg taab wakate, la ra mobg taab wakate’
15. Bõe yĩng tɩ kiris-nebã tũusd b zo-rãmbã?
15 Kiris-nebã tũusda b zo-rãmba. B ningda a Poll keoogrã b yamẽ: “Da belg-y y mens ye, tũud-n-ta-wẽns sãamda nin-sõamyã.” (1 Korẽnt dãmba 15:33) La Rĩm sẽn tar yam a Salomo wilga woto: “Ned sã n tũud yam dãmba, a na n lebga yam soaba. La ned sã n tũud yalma, a na n paama toogo.”—Yelbũna 13:20.
16, 17. Wãn-wãn la a Zeova Kaset rãmbã get zoodo, roob la kãadem, la bõe yĩnga?
16 A Zeova sõgen dãmbã yãkda neb sẽn nong a Zeova la a tɩrlmã wa bãmba, tɩ b yɩ b zo-rãmba. Baa ne b sẽn nand la b nong b zo-rãmbã tũud-n-taarã, n bãngd yam n lakd b mens ne bas-yaar tagsgã roobã wɛɛngẽ, sẽn wɛ tẽns kẽer pʋsẽ rũndã-rũndã wã. Wala b na kẽes b mens a pʋgẽ n tẽed tɩ yaa reem sẽn ka yellã, b geta roobã wa zĩ-loangdg sẽn pa reem yell sẽn tar n debd kãadmẽ. B getame tɩ f pa segd n sɩng a maaneg tɩ sã n pa f bɩɩ yĩngã, yamã la tẽebã wɛɛngẽ tɩ seke, la f tara sor Gʋlsg Sõamyã wɛɛngẽ, n na n kẽ kãadem sẽn yaa bõn-paadgã pʋgẽ ye.—1 Korẽnt dãmba 7:36, NW.
17 Kẽer tõe n tagsame tɩ tags-kãngã buudã roobã la kãadmã wɛɛngẽ yaa tags-kʋdgo. La a Zeova Kaset rãmbã pa basd tɩ b taabã tus-b tɩ b toeem b sẽn yãkd b zo-rãmbã bɩ b sẽn dɩkd b sardã roobã la kãadmã wɛɛngẽ wã ye. B miimi tɩ “yam soab tʋʋma n wilgd t’a tara yam.” (Matɩe 11:19) A Zeova n mi n yɩɩd wakat fãa, rẽ n so tɩ b pa reemd ne saglg ning a sẽn kõ tɩ d kẽ kãadem “Soaalã pʋgẽ bala” ye. (1 Korẽnt dãmba 7:39, NW; 2 Korẽnt dãmba 6:14) B gũusdame n da yãg n kẽ kãadem pʋgẽ n belg b mens n tags tɩ kãadem kaoob bɩ welg taab yaa tɩɩm sẽn sakde, kãadmã sã n wa wulumd ye. B rɩkda sẽk n bao kẽed-n-taag sẽn zemse, n miẽ tɩ b sã n wa pʋlem taab kãadem n sa, b segd n tũu a Zeova no-kãngã: “Woto yĩnga, bãmb ka leb n ya a yiib yɛs ye, b yaa yĩng a yembre. Dẽ yĩnga, bɩ ned da welg bũmb nins Wẽnnaam sẽn lagem ne taaba ye.”—Matɩe 19:6; Mark 10:9.
18. Bõe n tõe n kɩt tɩ kãadem sɩng ne sũ-noogo?
18 Kãadem yaa pʋleng f sẽn maand f vɩɩmã tõre, sẽn baood tɩ d reng n geel yɛlã sõma. Zemsame tɩ rao sʋk a meng woto: ‘A sɩd yaa bipugl ning sẽn zems ne maamã bɩ?’ La a segd n sʋka a meng woto me: ‘Mam sɩd yaa ned ning sẽn zems ne-a wã bɩ? Mam yaa kiris-ned sẽn bɩ sẽn tõe n ges a tẽebã ratem yelle?’ Sẽn dat-b n kẽ kãadmã b yiib fãa tara zɩɩb a Zeova taoor n na n tall pãng tẽebã wɛɛngẽ, n tõe n kẽ kãadem t’a tall pãng n zems ne Wẽnnaam na sak-a. Kẽed-n-taas tusa sẽn yaa kiris-neb tõe n kõo kaset tɩ wakat fãa ministɛɛrã yaa bũmb sẽn yaa sõma wʋsg sẽn na yɩl tɩ kãadem sɩng ne sũ-noogo bala a gomd n tadgda kũunã lakae, pa reegrã zug ye.
19. Bõe yĩng tɩ kiris-neb kẽer ket n yaa rakõapa?
19 Kiris-neb kẽer ‘basda mobgre,’ n yãkd n na n pa rakõap koe-noogã yĩnga. (Koɛɛg Soaba 3:5) A taab viigda b kãadmã hal tɩ b wa ges tɩ b tara tẽeb zʋg sẽn sek kẽed-n-taag sẽn zems ne-b na rat-ba. La bɩ d tẽeg rakõap nins me sẽn sɩd rat kãadem zoodã la a nafa wã n yaool n pa yãt kẽed-n-taagã yelle. D tõe n kɩsa sɩd t’a Zeova sũur noomame, b sẽn zãgsd tɩ b kõn kɩɩs Wẽnnaam noyã sã n yaa ne bao n kẽ kãadmã wɛɛngẽ wã. D na maan neer me n tall naneb ne b kɩs-sɩdã la d kõ-b teelg sẽn zems ning b sẽn segd ne wã.
20. Bõe yĩng tɩ baa kẽed-n-taas ‘basd taab mobgr’ wakat-wakate?
20 Baa kẽed-n-taas tõee wakat-wakat n ‘bas taab mobgr’ bɩ? Vẽenega, yaa woto ne manesem buudu, bala a Poll wilgame: “M ba-biisi, mam yeta yãmb woto tɩ wakat lebga bilfu, la sẽn sɩng masã bɩ neb nins sẽn tar pagba yɩ wa b sẽn ka tar pagb ye.” (1 Korẽnt dãmba 7:29) Wa sẽn zems ne rẽ, kãadem sũ-noodã la a barkã segd n leba teokaratik zɩɩbã poorẽ wakat kẽere. Tagsg sẽn kɩls tɩ zems yel-kãngã wɛɛngẽ pa na n boog kãadem pãng ye, la a na n paasa a pãngã, bala woto sõngdame n tẽegd kẽed-n-taas a yiibã fãa tɩ yaa a Zeova n segd wakat fãa n lʋɩ taoor b vɩɩmã pʋgẽ.—Koɛɛg Soaba 4:12.
21. Bõe yĩng tɩ d pa segd n bʋ kẽed-n-taas bʋʋd kambã paoong wɛɛngẽ?
21 Sẽn paase, kẽed-n-taas kẽer basa kamb paoong sẽn na yɩl n paam sẽk n kẽng taoor ne Wẽnnaam sõgenegã. Rẽ kɩtame tɩ b mong b mense, la a Zeova na n keo-b lame tɩ zems ne rẽ. Baa ne Biiblã sẽn daoond tɩ b pa rakõt pʋgẽ koe-noogã yĩngã, a pa yet baa fʋɩ zãgs n da paam kamb bʋʋm kãng yĩngã zug ye. (Matɩe 19:10-12; 1 Korẽnt dãmba 7:38; mak-y ne Matɩe 24:19 la Luk 23:28-30.) Woto, kẽed-n-taasã segd n dɩka b toorẽ sard n tik bãmb mensã yɛl la b sẽn tags b sũur pʋgẽ tɩ bɩ wã zugu. Baa sard kãng sẽn wa n yaa to-to, neb a taabã pa segd n sãbg-b ye.
22. Bõe n tar yõod ne tõnd tɩ d bãnge?
22 N-yẽe, “bũmb fãa tara a wakate. Bũmb nins fãa sẽn maand dũniyã zuga tara b wakate.” “Zabr wakat beeme, la laafɩ wakat me beeme” menga. (Koɛɛg Soaba 3:1, 8) Sõsg ning sẽn pʋgdã na n wilga bũmb ning sẽn kɩt tɩ tar yõod ne tõnd tɩ d bãnge, zabrã la laafɩ wã sʋka, yaa bʋg wakat la masã wã.
◻ Bõe yĩng tɩ tar yõod wʋsg ne tõnd tɩ d bãng tɩ “bũmb fãa tara a wakate”?
◻ Bõe yĩng tɩ sẽn yɩɩd fãa, rũndã-rũndã yaa ‘yãbr wakate’?
◻ Bõe yĩng tɩ baa ne kiris-nebã sẽn ‘yãbdã,’ b sɩd tar sũ-noogo?
◻ Wãn-wãn la kiris-neb kẽer wilgd tɩ b geta masã wakatã wa ‘bas taab mobgr wakate’?
[Picture on page 17]
Baa ne kiris-nebã sẽn “yãbd” dũniyã yɛl sẽn yaa to-to wã yĩngã, . . .
[Picture on page 18]
. . . b sɩd yaa neb nins sẽn tar sũ-noog n yɩɩd dũniyã pʋgẽ wã
[Picture on page 19]
Wakat fãa ministɛɛrã yaa yẽbgr sẽn yaa sõma wʋsg sẽn na yɩl n paam kãadem sẽn tar sũ-noogo