D WILG TƖ D YAA KIRIS-NEB HAKƖƖKA

Bõn-paall d sẽn paas d tigissã na-kẽndrẽ

Yʋʋmd 2018 yʋʋm-vẽkr kiuugã tɛka, d na n ningda not-rãmba, fot-rãmb la video-rãmb d tigissã na-kẽndrẽ. Not-kãens yita Les Saintes Écritures—Traduction du monde nouveau édition d’étude soabã sẽn be sɩtẽ wã (nwtsty), baa a sã n nan pa be yãmb buud-gomdã pʋgẽ. Not-rãmbã na n sõng-y lame tɩ y tõog n segl tigissã sõma. Sẽn yɩɩd fãa, d tʋllame tɩ b paas yãmb ne d Ba a Zeova zoodã pãnga.

NOT-RÃMBÃ

Yaa vaeesg sẽn na n sõng-d tɩ d wʋm Biiblã vɛrse-rãmb kẽer võor n paase.

Matye 12:20

Fɩtl laong sẽn ket n nusdẽ: Pĩnd lãmp-rãmbã ra maana ne yagdo. B ra ningda oliiv kaam a pʋgẽ wã n sagl laong n yõgen tɩ wita. Gɛrkã gom-bil ning b sẽn lebg tɩ “fɩtl laong sẽn ket n nusdẽ” wã tog n bilgda fɩtl bugum sẽn boog wʋsg n dat n ki, wall sẽn ki n wisdẽ. Ezayi 42:3 wã pĩnd n goma a Zeezi nimbãan-zoeerã yelle, n yeel t’a pa na n kiis fɩtl peend bugum sẽn yaa bilf ye. Woto rat n yeelame t’a pa na n koms sik-m-mens rãmb nins sẽn da namsdã raood n baas ye.

Matye 26:13

Sɩd-sɩda: Yaa amen sẽn yaa gɛrk gom-bil b sẽn dɩk Ebre wã pʋgẽ t’a võor yaa “bɩ a yɩ woto,” wall “sɩda.” A Zeezi ra mi n yeela “sɩd-sɩdã” a gomd sɩngrẽ a sã n na n pʋlem bũmbu, wall a togs bãngr-gomde, sẽn na yɩl n wilg tɩ b tõe n tẽe a sẽn yetã. Wẽnnaam Gomdã pʋgẽ, a sã n pʋd gom-bilã n yɩlem wa a sẽn maan a Zã evãnzillã zĩis wʋsgã, a rat n wilgame t’a gomdã yaa sɩda, tɩ b segd n basa b yam ne a sẽn yeelã.—Zã 1:51.

FOT-RÃMB LA VIDEO-RÃMBA

Fot-rãmba, video-rãmb sẽn pa naag ne goama, la bũmb toor-toor yell b sẽn gomd Biiblã pʋgẽ.

Bɛtfaaze, oliiv tɩɩs tãngã, la Zerizalɛm

Video-kãngã sẽn pa kaoosdã wilgda sor sẽn yit wĩndg sẽn pukdẽ Et-Tur, zĩig ning Bɛtfaaze sẽn da be wã, n teesd Zerizalɛm. Sorã rʋʋgda tãng ning b sẽn boond tɩ oliiv tɩɩs tãngã. Betani bee Bɛtfaaze yaanga, oliiv tɩɩs tãngã sigdgẽ. A Zeezi ne a tʋm-tʋmdbã ra mi n gãanda Betani, El-Azariyeh sẽn beẽ dũndã-rũndã wã. Yʋ-kãngã sẽn yaa ne araabã rat n yeelame t’a “Lazaar zĩiga.” Vẽenega, a Zeezi ra sigda a Mart ne a Maari la a Lazaar nengẽ. (Mat. 21:17; Mark 11:11; Luk 21:37; Zã 11:1) A Zeezi sã n da yi be n debd Zerizalɛm, tõe tɩ yaa sor ning b sẽn wilgd video wã pʋgẽ wã la a tũuda. Yʋʋmd 33 Nizã kiuug rasem a 9 wã a Zeezi sẽn zomb bõang n yi oliiv tɩɩs tãngẽ wã n na n kẽ Zerizalɛmmã, tõe t’a tũu so-kãng sẽn yit Bɛtfaaze wã.

Sor sẽn yit Betani n digd Bɛtfaaze
Bɛtfaaze
Oliiv tɩɩs tãngã
Kidrõ longã
Wẽnd-doogã sẽn da be tãng ning zugã

Põent b sẽn ka ned na-kãsenkãar kõbrẽ

Yaa foto sẽn wilgd ned na-kãsenkãar kõbre, b sẽn ka ne kut põent woglem sẽn yɩɩd sãntɩmetr 11. Yaa yʋʋmd 1968 soabã b sẽn da wa n tuud Zerizalɛm nug-rɩtg la b yã põentã b sẽn ka kõbrã. Yaa Rom sẽn da wa n so Zerizalɛmmã wakatẽ kõbre. Põent-kãngã b sẽn yã wã wilgdame tɩ b ra mi n kaada neb ra-lugds zut ne põent-rãmb n kʋʋda. Wõnda yaa põent-kãensã buud la Rom sodaasã sẽn tall n ka a Zeezi Kirist ra-lukã zugã. Yaa kees b sẽn maan ne kugr pʋgẽ la b yã kõbrã. B ra wae n bĩngda ninsaalb kõb kees-rãmb a woto buud pʋgẽ. Woto wilgdame tɩ b sã n da ka ned ra-luk zug n kʋ, b tõe n wa sik-a lame n tɩ solge.—Mat. 27:35.