B yaa ãnd rãmba?

A ZEOVA KASET RÃMBÃ ratame tɩ y bãng-b sõma n paase. Tõe tɩ y mi-b lame, b sẽn yaa y yags bɩ y tʋmd-n-taasã yĩnga. Tõeeme me tɩ y seg-b-la zĩig a to. Tõe tɩ y seg-b-la sor zug tɩ b kãabd b sɛbã kẽn-kẽndbã. Tõeeme me tɩ y sõsa ne-b bilf y yiri.

Sɩda, a Zeova Kaset rãmbã rat n sõnga yãmba, la b rata y neere. B ratame n yɩ yãmb zo-rãmba, la b sõng-y tɩ y bãng-b n paase, la y bãng b sẽn tẽedã la b sẽn sigl to-to wã. B leb n dat n wilga yãmb b tagsg sẽn yaa to-to ne nebã la dũni ning pʋgẽ d fãa sẽn vɩyã. Yaa sẽn na yɩl n maan woto la b sẽn yiis seb-kãngã yãmb yĩngã.

Ne yɛl wʋsgo, a Zeova Kaset rãmbã yaa wa neb a taabã. Bãmb me tara zu-loees wa neb a taabã: ligdã la yĩnsã laafɩ wã wɛɛngẽ. La b tar b sũ-noog la b sũ-sãamse. B tudgda wakat-wakate, b sẽn pa zems zãngã, la b sẽn pa paamd vʋʋsem sõng vẽnegr wa Biiblã gʋlsdbã yĩnga. La b maoodame n na n dɩk yam ne b sẽn zoe n yã wã. B modgdame n zãmsd Biiblã neere, sẽn na yɩl n dems b mense. B rɩka b mens n kõ Wẽnnaam, sẽn na yɩl n maan a raabã, la b maoodame n na n vɩɩmd tɩ zems ne b sẽn dɩk b mens n kõ wã. B baooda sagls sẽn yit Wẽnnaam Gomdã pʋgẽ la a vʋʋsem sõngã nengẽ b tʋʋmã fãa pʋgẽ.

Sã n yaa ne bãmba, tara yõod wʋsg tɩ b tẽebã tik Biiblã zugu, la pa ninsaalb tagsg bɩ tũudum rog-n-mik zug ye. B tagsda wa tʋm-tʋmd a Polle, vʋʋsem sõngã sẽn wa n vẽneg-a t’a yeel woto wã: “Baa neba fãa sã n yaa ziri yagdba, Wẽnnaam yaa sɩd soaba.” (Rom dãmba 3:4, Wẽnnaam Sebrea) Kaset rãmbã sã n wa zãmsd nebã sɩdã sẽn yit Biiblã pʋgẽ wã, b maanda wa Beere rãmbã, b sẽn wa n kelgd tʋm-tʋmd a Poll moonegã: “Bãmb deega Wẽnnaam koɛɛga ne b sũyã fãa. La bãmb baoo Gʋlsg Sõamyã pʋgẽ daar fãa tɩ bãng bũmb nins b sẽn yet bãmba sã n yaa tɩrga.” (Tʋʋma 17:11) A Zeova Kaset rãmbã tẽedame tɩ tũudum zãmsg fãa segd n zemsa ne Gʋlsg Sõamyã, yaa bãmb n kõt zãms-kãng tɩ yaa ned a to me. B ratame tɩ b sã n wa sõsd ne-y bɩ y ges sã n yaa woto.

Rẽ wilgda vẽeneg t’a Zeova Kaset rãmbã tẽedame tɩ Biiblã yaa Wẽnnaam Gomde. B getame tɩ Biiblã sɛb 66 yaa vʋʋsem sõngã n vẽneg tɩ b gʋls-ba, la tɩ pĩnd yɛl nins a sẽn togsdã yaa sɩda. Nebã nong n boonda Gʋlsg Sõamyã kiris-nebã sẽn gʋls ne Gerɛkã tɩ Kãab Paalgã, la b boond Hebre Gʋlsg Sõamyã tɩ Kãab Kʋdgã. A Zeova Kaset rãmbã tara bas-yard ne Gerɛk la Hebre Gʋlsg Sõamyã fãa. B sɩd tẽeda a goamã sẽn yetã. La b miime tɩ zĩis kẽere, goamã yaa makr goama. B miime tɩ Biiblã bãngr-goam wʋsg paama pidsgu, t’a taab paamd pidsg masã, t’a taab me na n wa paam pidsgu.

B YƲƲRÃ

A Zeova Kaset rãmba. Sɩd yaa woto la b boond b mense. Yʋ-kãngã wilgda b sẽn yaa neb ninsi. A wilgdame tɩ b kõta kaset a Zeova, a sẽn yaa Wẽndã la a raabã wɛɛngẽ. “Wẽnnaam,” “Soaala,” la “Naand” yaa waoogr yʋy wala “Perzidã,” “Rĩma” la “Zenerall,” la b boonda nin-kãsems buud toor-toor ne yʋ-kãensã. La “Zeova” wã yaa yʋ-peelle. Yʋ-kãngã yaa Wẽnnaam sẽn yaa ãndũniyã Naandã yʋʋre. Yʋ-kãng bee Yɩɩl Sõamyã 83:18 pʋgẽ, sã n yaa ne Biibl lebgr b sẽn boond tɩ Bible de Crampon (1905). Be b gʋlsa woto: “Sẽn na yɩl tɩ nebã bãng tɩ foo f yembr yʋʋr sẽn ya a Zeova wã, n yaa zãntlem sẽn-kã-to soab tẽngã fãa zugu.”

Yʋʋr ning sẽn yaa Zeova (bɩ Yahweh sẽn be La Bible de Jérusalem mitb kẽer sẽn nong n yɩɩdã pʋgẽ wã) bee sẽn na ta naoor 7000 Hebre Gʋlsg Sõamyã b sẽn gʋls pipi wã pʋgẽ. Buud-goam wʋsg pʋsẽ, Biibl dãmb wʋsg sẽn yɩɩd pa wilgd yʋ-kãng woto ye, la b ledgd-a-la ne “Wẽnnaam” bɩ “Soaala,” bɩ “Zusoaba.” La baa Biibl kãensã pʋsẽ, naoor wʋsgo, ned tõe n wilga zĩig ning Hebre Gʋlsgã verse sẽn tar a Zeova yʋʋrã, bala zĩ-kãense, yʋʋr ning b sẽn ledgã gʋlsa woto: WẼNNAAM, la SOAALA bɩ ZUSOABA. Rũndã-rũndã Biibl lebgr kẽer tũnugda ne yʋʋr ning sẽn ya a Zeova bɩ Yahweh wã. Woto yĩnga, d karemda woto Traduction du monde nouveau wã pʋgẽ Ezai 42:8 “Mam ya a Zeova. Mam yʋʋr la woto.”

Biiblã zĩig ning a Zeova Kaset rãmbã sẽn tik n yãk b yʋʋrã bee Ezai sak 43. Beenẽ, b bilgda dũniyã wa bʋ-kaoor zĩiga: B boonda tẽn-tẽnsã wẽnnaam dãmb tɩ b wa ne kaset rãmb tɩ b wilg tɩ wẽn-kãens yaa tɩrs wa b sẽn yetã. Sã n pa rẽ, bɩ b wa kelg a Zeova Kaset rãmbã n sak sɩdã. Zĩ-kãnga, a Zeova yeta a nin-buiidã woto: “[A Zeova, NW ] yeelame: ‘Yãmb yaa mam kaset dãmba la mam tʋm-tʋmdba mam sẽn yãke, tɩ y bãng maam la y tẽ maam la y bãng tɩ yaa maam. Wẽnnaam a to ka be sẽn deng maam, la a to ka be sẽn na n yaool n wa me ye. Mam yaa [a Zeova, NW ]. Fãagd a to ka be tɩ ka maam ye.’ ”—Ezai 43:10, 11.

Wẽnnaam a Zeova ra tara kaset rãmb tẽng zug yʋʋm tusa t’a Zezi nan pa rog ye. Hebre dãmb sak 11 sẽn togs nin-kãens sẽn tall tẽebã kẽer yʋyã poore, Hebre dãmb 12:1 yetame: “Woto yĩnga, tõnd me sẽn tar kaset dãmb wʋsg sẽn gũbg tõndã, bɩ tõnd bas zɩɩb fãa la yel-wẽna sẽn gɩdgd tõnd naana wã, la d zoe zoees ninga sẽn be tõnd taoorã n da yɛ ye.” A Zezi yeela a Põns Pɩlat taoor woto: “Yaa bõn-kãng yĩng la mam dog-yã, la yaa bõn-kãng yĩng la mam wa dũniyã n na n kɩs sɩd kaseto.” B boond-a lame tɩ “kaset soab sẽn yaa tɩrga la sɩda.” (Zã 18:37; Wilgri 3:14) A Zezi yeela a karen-biisã: “Sɩɩg Sõng sã n wa yãmb zutu, yãmb na reeg pãnga. La yãmb na n yɩɩ mam kaset dãmb Zerizalɛm, ne Zide la Samari ne dũniyã tɛk fãa.”—Tʋʋma 1:8.

Woto, yaa sẽn zems neb 6 000 000 n moond koe-noogã a Zeova Rĩungã Kirist Zezi sẽn dɩt naam a pʋgẽ wã wɛɛngẽ. B maanda woto sẽn yɩɩd tẽns 230 pʋsẽ, n getẽ tɩ b sẽn boond b mens t’a Zeova Kaset rãmbã yaa bũmb sẽn zemse.

[Tẽngr note]

[Goam sẽn tar pãngã, seb-neng a 4]

B rɩka b mens n kõ Wẽnnaam sẽn na yɩl n maan a raabã

[Goam sẽn tar pãngã, seb-neng a 4]

B tẽedame tɩ Biiblã yaa Wẽnnaam Gomde

[Goam sẽn tar pãngã, seb-neng a 5]

Yʋʋrã bee bʋʋd zĩigẽ

[Goam sẽn tar pãngã, seb-neng a 5]

Kaset rãmb 6 000 000 n be sẽn yɩɩd tẽns 230 pʋsẽ

[Foto, seb-neng a 3]

B rat n sõnga yãmba

[Foto, seb-neng a 4]

Wẽnnaam yʋ-peellã pĩnd Hebre goama pʋgẽ