-
Yãmb tõe n yɩɩ a Zeova zoaVɩɩmd-y wakat sẽn kõn sa!—Biiblã zãmsg sebre
-
-
5. A Zeova sẽn dat t’a zo-rãmbã maane
D mi n datame tɩ d zo-rãmbã maan bũmb kẽere.
Bõe la yãmb dat tɩ y zo-rãmbã maan n kõ-yã?
Karm-y 1 Zã 5:3, tɩ rẽ poor bɩ y leok sokrã:
Bõe la a Zeova rat t’a zo-rãmbã maane?
Sẽn na yɩl n sak a Zeova, tõe tɩ d segd n toeema d yel-manesmã la d zʋgã. Karm-y Ezayi 48:17, 18, tɩ rẽ poor bɩ y leok sokrã:
Bõe yĩng t’a Zeova rat t’a zo-rãmbã toeem bũmb kẽere?
Zoa hakɩɩk tẽegd-f-la bũmb nins sẽn tõe n kogl-f la naf-fã. A Zeova me maanda woto ne a zo-rãmbã
-
-
Wãn to la d tõe n wilg a Zeova tɩ d nong-a lame?Vɩɩmd-y wakat sẽn kõn sa!—Biiblã zãmsg sebre
-
-
SAK 34
Wãn to la d tõe n wilg a Zeova tɩ d nong-a lame?
Yãmb getame tɩ y sẽn sɩng Biiblã zãmsgã tɛka, y maneg n nonga Wẽnnaam n yɩɩd pĩndã bɩ? Y ratame tɩ yãmb ne Wẽnnaam zoodã ket n paasdẽ bɩ? Sã n yaa rẽ, tẽeg-y t’a Zeova sã n neẽ tɩ yãmb sẽn nong-a to-to wã pãng paasdame, a na n maneg n nong-y lame, la a ges y yelle. Wãn to la y tõe n wilg tɩ y nong-a lame?
1. D maanda wãn n wilg a Zeova tɩ d nong-a lame?
D sã n sakd a Zeova, d wilgdame tɩ d nong-a lame. (Karm-y 1 Zã 5:3.) A pa modgd ned baa a ye t’a sak-a ye. A pʋd n basda tõnd ned kam fãa t’a tõe n yãk a sã n na n sak-a lame bɩ a pa na n sak-a. Bõe yĩnga? Bala a Zeova ratame tɩ d sakd-a “ne d sũy fãa.” (Rom dãmbã 6:17) Rat n yeelame t’a ratame tɩ y sak-a, y sẽn nong-a yĩnga, la pa tog n yɩ modgr yĩng ye. B segla seb-kãngã babg a 3 ne a 4 n na n sõng-y tɩ y maand bũmb nins sẽn tat a Zeova yamã, la y zãagd y mens ne bũmb nins sẽn pa tat a yamã, n wilg tɩ y nong-a lame.
2. Bõe yĩng tɩ tõe n yɩ toog tɩ d wilg a Zeova tɩ d nong-a lame?
“Nin-tɩrg tõe n paama tood wʋsgo.” (Yɩɩn-sõamyã 34:20) Tõnd ned kam fãa tara a pãn-komsem. D tõe n maooda ne ligd zu-loees me, wall b tõe n maan-d-la kɛgre, bɩ yɛl a taaba. D sã n wa maood ne zu-loeese, tõe n yɩɩ toog tɩ d maan a Zeova sẽn datã. Bala sasa kãnga, wẽngã maaneg tõe n yɩɩ nana. La y sã n maan a Zeova sẽn datã, y wilgdame tɩ y nong-a lame n yɩɩd bũmb fãa. Leb n wilgdame tɩ y maanda sɩd ne-a, la yẽ me na n maana sɩd ne yãmba. A pa na n tol n daag-y n bas a bada.—Karm-y Yɩɩn-sõamyã 4:4.
D BAO N BÃNG N PAASE
D ges tõnd sẽn sakd a Zeova wã sẽn tar yõod a nifẽ wã võore, la bũmb nins sẽn tõe n sõng-d tɩ d kell n maan sɩd ne-a wã.
3. A Sʋɩtãan rõda yãmba
Biiblã sebr ning b sẽn boond tɩ Zoob sebrã wilgdame t’a Sʋɩtãan rõda a Zoobe, la neb nins fãa sẽn dat n tũ a Zeova wã. Karm-y Zoob 1:1, 6–2:10, tɩ rẽ poor bɩ y leok sogsgã:
Ne a Sʋɩtãana, a Zoob ra sakda a Zeova bõe yĩnga?—Ges-y Zoob 1:9-11.
Bõe la a Sʋɩtãan yeel ninsaalbã fãa wɛɛngẽ, yãmb sẽn naage?—Ges-y Zoob 2:4.
Karm-y Zoob 27:5, tɩ rẽ poor bɩ y leok sokrã:
Wãn to la a Zoob wilg t’a sɩd nonga a Zeova?
A Zoob kell n maana sɩd ne a Zeova, tɩ wilg t’a nong-a lame
D sã n kell n maan sɩd ne a Zeova, d wilgdame tɩ d nong-a lame
4. Maan-y t’a Zeova sũur yɩ noogo
Karm-y Yel-bũn 27:11, tɩ rẽ poor bɩ y leok sogsgã:
A Zeova tagsg yaa wãna, y sã n tall yam n sak-a? Bõe yĩnga?
5. Yãmb tõe n maana sɩd ne a Zeova
D sẽn nong a Zeova wã kɩtame tɩ d gomd a yell ne d taabã. Baa sã n wa pa nana, d gomda a yelle, d sẽn dat n kell n maan sɩd ne-a wã yĩnga. Ges-y VIDEO wã, tɩ poor bɩ y leok sogsgã.
Mi n yaa toog ne yãmb tɩ y gom a Zeova yell ne y taabã bɩ?
Video wã pʋgẽ, bõe n sõng a Gersõn t’a tõog a rabeemã?
D sã n nong a Zeova sẽn nonge, la d kis a sẽn kisi, yɩta nana tɩ d tõog n kell n sak-a. Karm-y Yɩɩn-sõamyã 97:10, tɩ rẽ poor bɩ y leok sogsgã:
Sẽn zems ne bũmb nins yãmb sẽn bãngã, togs-y bũmb kẽer a Zeova sẽn nonge, la bũmb kẽer a sẽn kisi.
Bõe n tõe n sõng yãmb tɩ y nong sẽn yaa sõma, la y kisg sẽn yaa wẽnga?
6. D sã n sakd a Zeova, nafda tõndo
Wakat fãa, a Zeova sakrã la sõma n tɩ yɩɩda. Karm-y Ezayi 48:17, 18, tɩ rẽ poor bɩ y leok sogsgã:
Yãmb tagsdame tɩ d tõe n kɩsa sɩd tɩ wakat fãa, a Zeova mii sẽn yaa sõma ne tõnd n tɩ yɩɩd bɩ? Bõe yĩnga?
Yãmb sẽn sɩng Biiblã zãmsg n bãngd a Zeova sẽn yaa Wẽnnaam sɩd-sɩdã, wãn to la nafd yãmba?
NINA TÕE N SOKAME YAA: “Mam tʋʋm-tʋmdɩ wã tõe n nooga Wẽnnaam sũur sɩda?”
Biiblã vɛrse-bʋg la y tõe n karem n wilg tɩ bũmb nins d sẽn maandã tõe n nooga a Zeova sũuri, pa rẽ bɩ n sãam a sũuri?
KƲMSGO
Y sã n sakd a Zeova, la y ket n maand sɩd ne-a baa ne zu-loeesã, y wilgdame tɩ y nong-a lame.
Lebg-n-gese
A Zoob kibarã sõnga yãmb tɩ y bãng bõe?
Wãn to la y na n wilg tɩ y nonga a Zeova?
Bõe n na n sõng yãmb tɩ y kell n maan sɩd ne a Zeova?
BŨMB A TAABA
Y sẽn tõe n maan sɩd ne a Zeova la ne tigingã to-to.
Bũmb a taab a Sʋɩtãan sẽn dõd ninsaalbã.
“A Zoob kell n talla a burkĩnda” (La Bible : quel est son message ?, partie 6)
Baa kambã tõe n wilgame tɩ b nonga a Zeova. Wãn to?
Wãn to la bi-bɩɩg tõe n kell n maan sɩd ne a Zeova, baa a kom-bɩ-taas sã n pẽdgd-a n dat t’a maan wẽnga?
-
-
D sẽn tõe n maan to-to tɩ d yam-yãkr yɩ sõmaVɩɩmd-y wakat sẽn kõn sa!—Biiblã zãmsg sebre
-
-
SAK 35
D sẽn tõe n maan to-to tɩ d yam-yãkr yɩ sõma
D fãa yãkda yam bũmb toor-toor wɛɛngẽ. D yam-yãkr kẽer tõe n manega tõndo, wall n wã tõndo, pa rẽ bɩ n maneg tõnd ne a Zeova zoodã wall n sãam-a. Wala makre, d segd n yãka zĩig ning d sẽn na n vɩɩmde, d sẽn na n maan to-to n paam ligd n ges d meng yelle, la d sã n na n kẽe kãadem. D sã n bãng n yãk yam, d tõe n paama sũ-noog d vɩɩmã pʋgẽ, la d ta a Zeova yam.
1. Wãn to la Biiblã tõe n sõng-y tɩ y yãk yam tɩ yɩ sõma?
Nand tɩ y yãk yam, pʋʋs-y a Zeova n kos-a sõngre, la y maan vaeesg Biiblã pʋgẽ, n bao n bãng a tagsg rẽ wɛɛngẽ. (Karm-y Yel-bũnã 2:3-6.) Yɛl kẽer wɛɛngẽ, a Zeova kõo noy vẽenega. Y sã n yãk yam n tũ no-kãense, rẽ la sõma n tɩ yɩɩda.
La sã n mikame tɩ Biiblã pʋgẽ, b pa kõ noor takɩ sẽn wilgd y sẽn segd n maanã? Baa sã n wa yaa woto, a Zeova na n ‘tɛɛ yãmb sor ning yãmb sẽn be wã zugu.’ (Ezayi 48:17) Wãn to? Sagls n be n tõe n sõng-y tɩ y bãng y sẽn na n maane. Sagls nins sẽn be Biiblã pʋgẽ wã yaa sɩda, la wilgd Wẽnnaam tagsgo, la a raabo. Naoor wʋsgo, d sã n karem kibar sẽn be Biiblã pʋgẽ, d bãngda Wẽnnaam tagsg sẽn yaa a soab yell ning wɛɛngẽ. D sã n bãng a Zeova tagsg sẽn yaa a soaba, d bãngd n yãka yam sẽn noogd a sũuri.
2. Nand tɩ y yãk yam, bõe yell la y segd n tagse?
Biiblã pʋgẽ, b yetame yaa: “Yam soab maanda gũusg ne a yel-manesmã fãa.” (Yel-bũnã 14:15) Woto rat n yeelame tɩ nand tɩ d yãk yam, d segd n maaga d yĩng n tags bũmb toor-toor d sẽn tõe n yãk yelle. D sã n wa magd n get d sẽn na n yãk a soaba, d tõe n soka d meng yaa: ‘Sagl-bʋs sẽn be Biiblã pʋgẽ la m tõe n tũ? Yam-yãkr bʋg n na n kõ-m sũur pʋgẽ bãane? M yam-yãkrã na n nafa m taabã bɩ, bɩ na n wã-b lame? Sẽn tar yõod n yɩɩda, na n kɩtame t’a Zeova sũur yɩ noog bɩ?’—Tõodo 32:29.
A Zeova tara sor n na n wilg tõnd sẽn yaa sõma, la sẽn yaa wẽnga. D sã n tõog n bãng a noyã la a saglsã sõma, la d rat ne d sũur fãa n tũ rẽ, d kibinda d sũur-kãsetã ne Biiblã maasem. Yaa tõnd sũur-kasetã n sõngd tõnd tɩ d bãng sẽn yaa sõma bɩ sẽn yaa wẽnga. (Rom dãmbã 2:14, 15) D sã n kibind d sũur-kasetã ne Biiblã maasem, na n sõnga tõnd tɩ d bãngd n yãkd yam.
D BAO N BÃNG N PAASE
D ges noy la sagls nins sẽn be Biiblã pʋgẽ wã, la y sũur-kãsetã sẽn tõe n sõng-y to-to y sã n wa rat n yãk yam.
3. Tũ-y noy la sagls nins sẽn be Biiblã pʋgẽ wã
Wãn to la noy la sagls nins sẽn be Biiblã pʋgẽ wã tõe n sõng-yã, y sã n wa na n yãk yam? Ges-y VIDEO wã, tɩ rẽ poor bɩ y leok sogsgã.
A Zeova naana tõnd tɩ d tõe n maan bõe?
Bõe yĩng t’a Zeova naan tõnd tɩ d tõe n yãk d toorẽ yam?
Bõe la a Zeova kõt tõndo, tɩ sõngd tõnd tɩ d bãngd n yãkd yam?
Bɩ d rɩk makr ne saglg a ye sẽn be Biiblã pʋgẽ. Karm-y Efɛɛz rãmb 5:15, 16, tɩ rẽ poor bɩ y gom “y sẽn tõe n maan to-to n da sãam y sẽkã,” sẽn na yɩl . . .
n karemd Biiblã wakat fãa.
n modgd n na n yɩ pʋg-sõngo, sɩd-sõngo, roagd sẽn get a kamb yell sõma, wall bi-sõngo.
n kẽnd tigissã.
4. Kibind-y y sũur-kasetã, sẽn na yɩl n bãngd n yãkd yam
Noor takɩ sã n bee Biiblã pʋgẽ bũmb ningã wɛɛngẽ, yɩl n bãng n yãk yamã tõe n yɩɩ nana. La noor takɩ sã n pa be? Ges-y VIDEO wã, tɩ rẽ poor bɩ y leok sokrã.
Video wã pʋgẽ, bõe la saam-bi-poakã maan sẽn na yɩl n kibl a sũur-kasetã, n tõog n yãk yam sẽn noom a Zeova?
Bõe yĩng tɩ yɛl nins wɛɛngẽ sẽn yaa tõnd n segd n yãk yamã, d pa segd n kos neb a taab tɩ b yãk yam n kõ-do? Karm-y Ebre-rãmb 5:14, tɩ rẽ poor bɩ y leok sogsgã:
Baa sã n wõnda yaa nana tɩ d kos neb a taab tɩ b yãk yam n kõ-do, bõe la tõnd mengã segd n modg n bãngd n bakdẽ?
Bõe n be n tõe n sõng-y tɩ y kibl y sũur-kasetã sõma, n tõog n bãngd n yãkd yam?
Wa kart sẽn sõngd ned t’a bãng n yãk so-sõngã, tõnd sũur-kasetã me sõngda tõnd tɩ d yãk d sẽn na n maan d vɩɩmã pʋgẽ
5. D gũus ne neb a taabã sũur-kaseto
Ned yam-yãkr pa yembr ne a to ye. Wãn to la d tõe n wilg tɩ d gũusda ne d taabã sũur-kaseto? D rɩk makr a yiibu:
Makr a 1: Saam-bi-poak n nong n ningd pãntalõ-rãmba, a sã n wa kokd pemsem, wall a sã n tʋmd tʋʋm kẽere. A wa n yikame n tɩ be tiging a to. La tigin-kãng saam-bi-pogs wʋsg sã n yã pag sẽn ning pãntalõ, namsd-b lame.
Karm-y Rom dãmb 15:1 la 1 Korẽnt rãmb10:23, 24, tɩ rẽ poor bɩ y leok sogsgã:
Sẽn zems ne vɛrse-kãensã goamã, bõe la saam-bi-poakã tõe n yãk yam n na n maane? Yãmb manesem na n yɩɩ wãna, y sã n wa be ne ned t’a sũur-kasetã pa kõt-a sor t’a maan bũmb yãmb sũur-kasetã sẽn kõt-y sor tɩ y maane?
Makr a 2: Saam-biig a ye n yãk yam n pa na n yũ rãam, baa ne a sẽn mi tɩ Biiblã pʋgẽ, b pa gɩdg rãamã yũ n zemsã. Saam-biig n bool yẽ ne neb a taab tɩ b wa tɩ b naag taab n dɩ. Rɩɩbã sasa, kẽer da yũuda rãam.
Karm-y Koɛɛg soab 7:16 la Rom dãmb 14:1, 10, tɩ rẽ poor bɩ y leok sogsgã:
Sẽn zems ne vɛrse-kãensã goamã, bõe la saam-biigã tõe n yãk yam n na n maane? Yãmb manesem na n yɩɩ wãna, y sã n ne ned a to sẽn maand bũmb yãmb sũur-kasetã sẽn pa kõt-y sor tɩ y maane?
Bõe la y tõe n maane, tɩ sõng-y tɩ y bãngd n yãkd yam?
1. Kos-y a Zeova t’a sõng-y tɩ y yãk y sẽn na n maanã.—Zak 1:5.
2. Maan-y vaeesg Biiblã pʋgẽ la siglgã sɛbã pʋgẽ, n paam sagls sẽn na n sõng-yã. Y tõe n sõsa ne kiris-neb tẽeb sẽn bɩ me.
3. Tags-y n ges-y y yam-yãkrã sẽn na n maan yãmb la y taabã sũur-kasetã bũmb ninga.
NEB KẼER SẼN YETE: “F tara sor n tõe n maan f sẽn dat fãa. Neb a taabã tagsg pa tar yõod ye”
Bõe yĩng t’a Zeova tagsgã, la neb a taabã me tagsg segd n pak tõndo?
KƲMSGO
D sã n bao n bãng a Zeova tagsg sẽn yaa a soab yell ning wɛɛngẽ, la d tags n ges d tʋʋm-tʋmdɩ wã sã n na n sõnga d taabã wall n wã-ba, sõngdame tɩ d bãng n yãk yam.
Lebg-n-gese
Wãn to la y tõe n yãk yam sẽn noogd a Zeova sũuri?
Wãn to la y tõe n kibl y sũur-kasetã?
Wãn to la d tõe n wilg tɩ d gũusda ne neb a taabã sũur-kaseto?
BŨMB A TAABA
Wãn to la y tõe n yãkd yam sẽn na n paas yãmb ne Wẽnnaam zoodã pãnga?
“D yãk yam sẽn waoogd Wẽnnaam” (Yʋʋmd 2011 tʋʋl-nif kiuug pipi daar Gũusg Gasgã)
Wãn to la a Zeova maanda, n kõt tõnd saglse?
Bõe n sõng rao a ye t’a yãk yam sẽn pa nana?
A Zeova getame tɩ d paamd bũmb nins fãa sẽn yaa sõma wã (5:46)
Bũmb a taab sẽn tõe n sõng-y tɩ y bãng y sẽn tõe n maan n ta a Zeova yam, baa a sã n pa kõ noor takɩ bũmb ning wɛɛngẽ.
“Yaa tɩlɛ tɩ b kõ yãmb noor bũmb fãa wɛɛngẽ bɩ?” (Yʋʋmd 2003 yʋʋm-sar kiuug pipi daar Gũusg Gasgã)
-