SAK 54
“Tʋm-tʋmd sẽn tũud sɩd la sẽn tar yamã” tʋʋmd yaa bõe?
A Zeezi n yaa kiris-neb tigingã zu-soaba. (Efɛɛz rãmbã 5:23) Rũndã-rũndã, a Zeezi bee saasẽ n get a poorẽ dãmbã yell ne “tʋm-tʋmd sẽn tũud sɩd la sẽn tar yamã” maasem. (Karm-y Matiye 24:45.) A Zeezi mengã n yãk tʋm-tʋmdã n kõ-a sor t’a tõe n yãk yam bũmb kẽer wɛɛngẽ. La a segd n ket n sakda a Zeezi, la a tʋm Kiristã ba-biisã yĩnga. Ãnda la tʋm-tʋmdã? Wãn to la a get tõnd yelle?
1. Ãnda la “tʋm-tʋmd sẽn tũud sɩd la sẽn tar yamã”?
Wakat fãa, a Zeova tũnugda ne raoa, wall rap sẽn yaa sul-bila, tɩ b lʋɩt a nin-buiidã taoore, n wilgd-b sore. (Malaki 2:7; Ebre-rãmbã 1:1) A Zeezi kũumã poore, tẽn-tʋmdbã ne kãsem-dãmbã sẽn da be Zerizalɛmmã n da yaa kiris-nebã taoor lʋɩtbã. (Tʋʋma 15:2) Woto me, rũndã-rũndã, a Zeova Kaset rãmbã taoor lʋɩtb sull sẽn yaa kãsem-dãmb sul-bilã n get tɩ Wẽnnaam nin-buiidã paamd bũmb nins sẽn yaa tɩlɛ b tẽebã kengr yĩngã, la b get koɛɛgã mooneg yelle. Sul-kãng n yaa “tʋm-tʋmd sẽn tũud sɩd la sẽn tar yamã, a zu-soabã [a Zeezi] sẽn yãke.” (Matiye 24:45a) Siglgã taoor lʋɩtb sull nebã fãa yaa kiris-neb sẽn paam vʋʋsem sõngã zaeebo. B kũumã poore, b na n tɩ naaga a Zeezi saasẽ, n dɩ naam a Rĩungã pʋgẽ.
2. Bõe la tʋm-tʋmd sẽn tũud sɩdã kõt tõnd d tẽebã kengr yĩnga?
A Zeezi yeelame tɩ tʋm-tʋmd sẽn tũud sɩdã kõta kiris-nebã “rɩɩb wakat sẽn zemse.” (Matiye 24:45b) Wa rɩɩbã d sẽn dɩtã sẽn sõngd tõnd yĩngã t’a tar pãng la keelmã, tẽebã rɩɩbã, rat n yeel tɩ zãmsgã d sẽn paamd ne Wẽnnaam Gomdã maasmã, kõta tõnd pãng ning d sẽn dat sẽn na yɩl n kell n sak a Zeova, la d tʋm tʋʋmd ning a Zeezi sẽn kõ-dã. (1 Tɩmote 4:6) D paamda tẽebã rɩ-kãng ne tigissã, tigis-kãsemsã, sɛbã sẽn wɛgsd Biiblã goamã la video-rãmbã maasem. Rẽ fãa sõngda tõnd tɩ d bãngd Wẽnnaam daabã, la d paasd tõnd ne yẽ zoodã.
D BAO N BÃNG N PAASE
D ges bũmb ning sẽn kɩt tɩ d rat “tʋm-tʋmd sẽn tũud sɩd la sẽn tar yamã,” rat n yeel tɩ siglgã taoor lʋɩtb sullã sõngrã.
Siglgã taoor lʋɩtb sull geta a Zeova Kaset rãmbã sẽn be dũniyã gill zugã yelle, n kõt-b tẽebã rɩɩbo, la saglse
3. A Zeova nin-buiidã segd n sigla sõma
A Zeezi wilgda siglgã taoor lʋɩtb sull sore, tɩ b sigind a Zeova Kaset rãmbã tʋʋmdã. A Zeezi maana woto me pipi kiris-nebã wakatẽ. Ges-y VIDEO wã.
Karm-y 1 Korẽnt rãmb 14:33, 40, tɩ rẽ poor bɩ y leok sokrã:
Wãn to la vɛrse-kãensã wilgd t’a Zeova ratame t’a nin-buiidã sigl sõma?
4. Tʋm-tʋmd sẽn tũud sɩdã siginda koe-moonegã tʋʋmde
Koɛɛgã mooneg n yaa tʋʋmd ning sẽn da tar yõod n yɩɩd pipi kiris-nebã sẽn da tʋmde. Karm-y Tʋʋm 8:14, 25, tɩ rẽ poor bɩ y leok sogsgã:
Ãnd dãmb n da lʋɩt pipi kiris-nebã taoore, n get koɛɛgã mooneg yelle?
Tẽn-tʋmdbã sẽn kõ a Pɩyɛɛr ne a Zã noorã, b manesem yɩɩ wãna?
Koɛɛgã mooneg n yaa tʋʋmd ning sẽn tar yõod n yɩɩd siglgã taoor lʋɩtb sull sẽn sigli. Ges-y VIDEO wã.
A Zeezi wilga koɛɛgã mooneg yõod sẽn ta zĩig ninga. Karm-y Mark 13:10, tɩ rẽ poor bɩ y leok sogsgã:
Bõe yĩng tɩ koe-moonegã tʋʋmd tar yõod wʋsg woto ne siglgã taoor lʋɩtb sullã?
Bõe yĩng tɩ yaa tɩlɛ tɩ d paamdẽ tɩ siglgã taoor lʋɩtb sull sigind tʋʋm-kãngã sẽn yaa tʋʋmd b sẽn tʋmd dũniyã gill zugã?
5. Tʋm-tʋmd sẽn tũud sɩdã kõta tõnd noy la saglse
Siglgã taoor lʋɩtb sull kõta kiris-nebã sẽn be dũniyã gill zugã noy la saglse, n wilgd-b b sẽn tog n maanega. B maanda wãn n bãng noy la sagls nins b sẽn na n kõ wã? D ges pipi kiris-nebã taoor lʋɩtb sullã sẽn da maand rẽ to-to wã. Karm-y Tʋʋm 15:1, 2, tɩ rẽ poor bɩ y leok sogsgã:
Bõe n da wa ne no-koeemd pipi kiris-neb kẽer sʋka?
A Poll ne a Barnabas la neb a taab talla yellã n kẽng ãnd dãmb nengẽ tɩ b na n welge?
Karm-y Tʋʋm 15:12-18, 23-29, tɩ rẽ poor bɩ y leok sokrã:
Nand tɩ pipi kiris-nebã taoor lʋɩtb sull yãk yam yellã pʋgẽ, bõe la b maan sẽn na yɩl n paam tɩ Wẽnnaam wilg-b sore? —Ges-y vɛrse 12, 15, ne 28.
Karm-y Tʋʋm 15:30, 31; 16:4, 5, tɩ rẽ poor bɩ y leok sogsgã:
Pipi kiris-nebã masesem yɩɩ wãn ne noor ning taoor lʋɩtbã sull sẽn kõ wã?
Wãn to la a Zeova ning b sakrã barka?
Karm-y 2 Tɩmote 3:16 la Zak 1:5, tɩ rẽ poor bɩ y leok sokrã:
Yɛ la siglgã taoor lʋɩtb sull baood sõngre, b sã n wa na n yãk yam rũndã-rũndã?
NEB KẼER SẼN YETE: “F sã n kelgd siglgã taoor lʋɩtb sulli, yaa ninsaalb la f tũuda.”
Bõe n kɩt tɩ y kɩs sɩd t’a Zeezi wilgda siglgã taoor lʋɩtb sull sore?
KƲMSGO
Siglgã taoor lʋɩtb sull n yaa “tʋm-tʋmd sẽn tũud sɩd la sẽn tar yamã” a Zeezi sẽn yãkã. B wilgda kiris-nebã sẽn be dũniyã gill zugã sore, la b sõngd-b tɩ b paamd tẽebã rɩɩbo.
Lebg-n-gese
Ãnda n yãk “tʋm-tʋmd sẽn tũud sɩd la sẽn tar yamã”?
Bõe la siglgã taoor lʋɩtb sullã maand n get tõnd yelle?
Yãmb kɩsa sɩd tɩ siglgã taoor lʋɩtb sullã n yaa “tʋm-tʋmd sẽn tũud sɩd la sẽn tar yamã” bɩ?
BŨMB A TAABA
Siglgã taoor lʋɩtb sull sẽn sigl to-to n tʋmd a tʋʋmã.
“A Zeova Kaset rãmbã taoor lʋɩtb sullã tʋʋmd yaa bõe?” (Bee jw.org)
Wãn to la siglgã taoor lʋɩtb sull maanda, tɩ d paamd tẽebã rɩɩbo?
Siglgã taoor lʋɩtb sull neb manesem yaa wãn ne tʋʋmd ning a Zeezi sẽn kõ-bã?
Wãn to la d tigissã la d tigis-kãsemsã yaa kaset t’a Zeova wilgda siglgã taoor lʋɩtb sull sore?