A Zã mengã sẽn da yaa to-to wã la a no-goamã kɩtame t’a ra yaa toor fasɩ. A futã wʋga ne yʋgemd kõbdo. A sẽbdgã yaa gãongo. A rɩɩb ra yaa sʋy ne weoogẽ sɩɩdo. A ra moond n yetame tɩ bõe? A ra yeta woto: “Tek-y yam n kos sugr tɩ arzãn [“saasẽ,” MN] soolem kolgame.”—Matye 3:2.

A Zã goamã kẽe neb nins sẽn wat n kelgd-a wã. Wʋsg bãngame tɩ yaa tɩlɛ tɩ b tek yam n kos sugri, rat n yeel tɩ n toeem b tagsa wã la b yel-manesmã, n bas tʋʋm-wẽnsã. Nebã yii Zeruzalɛm ne Zʋʋde la tẽns nins sẽn gũbg Zʋrdẽ kʋɩlgã n wa a Zã nengẽ. (Matye 3:5) Wʋsg sẽn kelg a Zã goamã, b teka yam n kos sugri. A lis-b-la Zʋrdẽ kʋɩlgẽ wã. Bõe yĩnga?

Dẽnd a Zã sẽn da moond n yet nebã tɩ b “tek yam n kos sugr tɩ arzãn soolem kolgame” wã, a ra bee bʋʋm. (Matye 3:2) Yaa sẽn na yɩl tɩ nebã fãa bãng t’a Zeezi Kirisi, Wẽnnaam sẽn yãk a soab t’a na n yɩ Rĩmã na n sɩnga a tʋʋmdã ka la bilfu.