Zĩm gãmbrã yel-bũndã

15, 16. a) Kʋms-y zĩm gãmbrã yel-bũndã. b) Zĩm gãmbrã makda bõe, la wilgda bõe karen-biisã sõor wɛɛngẽ?

¹⁵ Ka neb nins sẽn yet tɩ b yaa a Zezi Kirist karen-biisã sõorã waooglem n tar yõod ye. Sẽn tar yõod n yɩɩdã yaa b sẽn na n sɩd yaa a Zezi karen-biis hakɩka. A Zezi goma rẽ yell a yel-bũnd ning sẽn gomd zĩm gãmbr yellã pʋgẽ. A yeela woto: “[Saasẽ rĩungã, NW ] leb n wẽnda wa zĩm gãmbre b sẽn lob ko-kãsengã pʋgẽ n wʋk zĩm buud fãa.”—Mat. 13:47.

¹⁶ Zĩm gãmbrã sẽn makd koɛɛgã moonegã sɩd yõgda zĩm buud fãa. A Zezi paasa woto: “La [zĩm gãmbrã] sẽn pidi, b vuug-a lame n ta koomã noore, la b zĩndame n tũus sẽn yaa sõma wã n ning yaas pʋsẽ, la b lob sẽn ka sõma wã. A na n yɩɩ woto dũniyã sɛɛb wakat me. Malɛk rãmbã na n wa welga nin-wẽnsã ne nin-tɩrsã. La b na n loba bãmb wʋng sẽn wɩng wʋsg pʋgẽ. La yãbr ne yẽn-wãbr na n zĩnda be.”—Mat. 13:48-50.

17. Sasa bʋg la welgr ning yell b sẽn gomd zĩm gãmbrã yel-bũndã pʋgẽ wã na n zĩndi?

¹⁷ Rẽ yĩnga yaa a Zezi sẽn yeel t’a sã n wa rɩt naam saasẽ wã, a na n welga piisã ne bʋʋsã n bʋ wã yell la b sẽn gomd ka wã bɩ? (Mat. 25:31-33) Ayo. Rẽ na n yɩɩ to-kãsengã sasa a sẽn na n sãam nin-wẽnsã. Welgr ning yell b sẽn gomd zĩm gãmbrã yel-bũnd pʋgẽ wã na n zĩnda “dũniyã sɛɛb wakate.”a Sẽn dat n yet tɩ masã tɛk n tall n tɩ tãag to-kãsengã sɩngre. La yaa wãn to la b maand welg-kãng rũndã-rũndã?

18, 19. a) Bõe yĩng tɩ d tõe n yeel tɩ b welgda zĩm sõma wã ne sẽn ka-b sõma wã rũndã-rũndã? b) Bõe la pʋ-peelem dãmbã segd n maane? (Ges-y tẽngr notã sẽn be seb-neng 29 wã me.)

¹⁸ Dũniyã gill zugu, neb milyõ rãmb b sẽn mak ne zĩm n wat n naagd a Zeova nin-buiidã rũndã-rũndã. Kẽer wata a Zezi kũumã tẽegr sasa, sãnda wata tigissã, tɩ kẽer me sakd n zãmsd Biiblã ne-do. La yaa b fãa n wilgd tɩ b yaa kiris-neb hakɩk bɩ? D tõe n yeela wa a Zezi yel-bũndã pʋgẽ wã tɩ yaa wa b “vuug-b lame n ta koomã noore.” La d tẽeg t’a Zezi yeelame tɩ b tũusa “sẽn yaa-b sõma wã” bal n ning yaas pʋsẽ. Yaasã makda tigimsã. A paasame tɩ b loba sẽn ka-b sõma wã, n na n wa baas n ning-b wʋng sẽn wɩng wʋsg pʋgẽ. Rẽ makda b sẽn na n wa sãam-b beoog daarã.

¹⁹ Neb wʋsg sẽn da zãmsd Biiblã ne a Zeova Kaset rãmbã basame tɩ d tõe n mak-b ne zĩm sẽn ka sõma. Kiris-neb kẽer kamb me yãka yam n pa rat n lebg a Zezi karen-biis ye. B pa rat n maan a Zeova raabã ye. Kẽer me ra sakame, la pa yã n kaoos la b bas a Zeova ye.b (Eze. 33:32, 33) La yaool n yaa tɩlae tɩ pʋ-peelem dãmbã fãa sak n wa tigimsã sẽn makd yaasã pʋsẽ, tɩ yaoolem bʋ-kaoorã raar nan pa ta ye. La b segdame me n kell n pa be sẽn yaa koglg zĩigã.

20, 21. a) A Zezi yel-bũn a tãabã d sẽn vaeesã zãmsa tõnd bõe? b) Bõe la yãmb na n modg n maan masã tɛka?

²⁰ A Zezi yel-bũn a tãabã d sẽn vaeesã zãmsa tõnd bõe? Pipi, d bãngame tɩ wala mutard bil b sẽn bʋd sẽn yikd to-to wã, dũniyã gill zugu, neb nins sẽn sakd n kelgd koɛɛgã sõor lebgda wʋsg n paasdẽ. Baa fʋɩ pa tõe n gɩdg a Zeova tʋʋmdã tɩ pa kẽng taoor ye. (Ezai 54:17) Sẽn paase, a Zeova kogenda neb nins fãa sẽn wat “[tɩɩgã] maasmẽ” wã, tɩ bũmb baa a ye pa tõe n sãam b zoodã ne-a ye. Yiib-n-soaba, d bãngame tɩ yaa Wẽnnaam n kɩtd tɩ bɩ. Wala rabɩllã b sẽn ning zomã pʋgẽ t’a fãa wuk bilf-bilf tɩ d pa wʋmd a võorã sõma wã, d pa mi sẽn sɩngd to-to tɩ ned wa lebg a Zezi karen-biig ye. La d neeme bal tɩ karen-biisã sõor tara paasgo! Tãab-n-soaba, d bãngame tɩ pa neb nins fãa sẽn sakd n kelgd koɛɛgã n wilgd tɩ b yaa a Zezi karen-biis hakɩk ye. Kẽer wõnda a Zezi yel-bũndã pʋgẽ zĩm nins sẽn ka sõma wã.

Wãn to la y na n leoke?