Baa ne a yel-soalmã, Nazarɛt nebã pa tẽ-a ye

Yaa daar ning a Zeezi sẽn yi Dekapoll n wa Kapɛrnawomã la a sẽn sãoog pag sẽn da bẽed t’a zɩɩm yitã, la a vʋʋg a Zayiruus biigã. A pa tol n vʋʋs ye. La nan pa sa ye. A sẽn yi a Zayiruus zakẽ wã, rap a yiib sẽn yaa zoens n seg-a, n kelemd n kot-a woto: “Davɩɩd Bi-ribla, zoe-y tõnd nimbãanega!”—Matye 9:27.

Rapã sẽn bool a Zeezi t’a “Davɩɩd Bi-riblã,” wilgdame tɩ b miime t’a Zeezi n tog n deeg a Davɩɩd naamã, la tɩ yaa yẽ la Mesi wã. A Zeezi maana wa a pa wʋmd b kosgã ye. Tõe tɩ yaa sẽn na n ges b sã n na n pẽdgame. Sɩd me, b pẽdgame. A Zeezi tɩ kẽe zakẽ, tɩ bãmb me pʋg n kẽ. Dẽ masã la a sok-b woto: “Yãmb tẽedame tɩ mam tõe n maana bõn-kãnga?” La b leoka ne bas-m-yam, n yeele: “N-yẽe Zu-soaba.” Dẽ, a Zeezi sɩɩsa b ninã n yeele: “Bɩ a yɩ ne yãmb a wa yãmb sẽn tẽedã.”—Matye 9:28, 29.

Zĩig pʋgẽ bala, b ninã pukame! A Zeezi keooga bãmb me wa a sẽn minim n maandẽ wã, n yeel-b tɩ b ra togs nebã bũmb ning sẽn maanã ye. La sũ-noogã yĩnga, b wa n baas n goma a Zeezi yell zĩig fãa.

Rapã sẽn loogã bala, nebã talla rao a ye zĩn sẽn kɩt t’a lebg muka, n wa a Zeezi nengẽ. A Zeezi riga zĩnã, tɩ raoã zɩlemd lak zĩig pʋgẽ, t’a sɩng goama. Linga kʋʋngã tɩ b yeel yaa: “Ned nan ka yã bũmb a woto Israyɛll pʋgẽ ye.” Rẽ tɩ Fariizẽ-rãmb n da be be. Yel-solemdã sẽn yaa vẽeneg tɩ b pa tõe n kɩɩsã, b yeela wa b sẽn da yeel pĩndã bal tɩ “yaa ne zĩn-dãmbã naab pãng la a Zeezi digd zĩn-dãmbã.”—Matye 9:33, 34.

Rasem a wãn poore, a Zeezi kula a ba-yirã Nazarɛte. A karen-biisã tũ-a lame. Sẽn zems yʋʋmd woto, a ra kẽe Nazarɛt karen-doogẽ wã n zãms nebã bũmb wʋsgo. Baraarã, a goamã reng n yɩ-b-la noog wʋsgo, la a wa n yeela bũmb tɩ puug b sũyã tɩ b bao n na n kʋ-a. So-kãnga, a Zeezi le makame n na n sõng a ba-yirã neba.

Vʋʋsg daar sẽn ta, a le kẽnga karen-doogẽ wã n na n tɩ zãms nebã. Nebã sẽn kelg a goamã, wʋsg yɛɛsame n sokdẽ: “Bãmb yamã ne b bõn-bãnã yita yɛɛne?” B ra yetame: “Ka bãmb la ra-wãadã biigã wɛ? Ka b ma wã yʋʋr la a Maari wɛ? La ka b ma-biis la a Zak ne a Zozɛf la a Sɩmo ne a Zuud wɛ? B tãopã fãa ka be tõnd sʋk ka sɩda? Dẽ, bãmb paama bõn-kãensã fãa yɛɛnẽ?”—Matye 13:54-56.

Nazarɛt nebã sẽn mi a Zeezi hal a yaadmẽ wã, b ninga b yamẽ t’a pa tõe n yɩ Mesi wã ye. Rẽ kɩtame tɩ baa a Zeezi yel-soalmã la a yamã, n paas bũmb a taab sẽn da wilgd vẽeneg tɩ yẽ la Mesi wã, b pa sak n deeg ye. A Zeezi ba-yirã neb sẽn minim-a wã yĩnga, b pa tẽ-a ye. A Zeezi kong n yeel-b-la woto: “No-rɛɛs ka kongd waoogre, sã n ka a meng tẽngẽ la a roagdbã sʋk ye.”—Matye 13:57.

Sɩd me, b sẽn pa tall tẽebã linga a Zeezi wʋsgo, hal t’a pa tõog n maan bõn-bãnd beenẽ, sã n ka a sẽn tik bãad-dãmb kẽer ne a nus n sãoog-bã.—Mark 6:5, 6.