Wẽnnaam soolmã yaa bõe?

“Wẽnnaam soolem koe-no-kãngã . . .”—MATƖE 24:14.

AZEZI sẽn wa n sõsd ne nebã tãngã zugã, a wilg-b-la b sẽn tõe n pʋʋs to-to. A wilgame tɩ b pʋʋsgã pʋgẽ b tõe n kosa Wẽnnaam woto: “Tɩ yãmb soolem wa.” Neb wʋsg mii pʋʋs-kãngã ne zugu, n mi n togsd-a n yɩlemdẽ. Sebr a ye pʋgẽ b wilgame tɩ “kiris-nebã fãa nong n pʋʋsda pʋʋs-kãngã.” La neb nins sẽn togsd pʋʋs-kãngã n yɩlemdẽ wã wʋsg pa mi Wẽnnaam soolmã bɩ a Rĩungã sẽn yaa bũmb ninga, bɩ a sẽn na n wa maan bũmb ning n kõ nebã ye.—Matɩe 6:9, 10.

Woto pa lingr ye. Kiris-neb ne yʋʋrã tũudmã taoor dãmb sẽn wilgd nebã Wẽnnaam Rĩungã võor to-to wã pa vẽenega, la b goamã pʋd n kɩɩsda taaba. B sʋkã ned a yembr yeelame tɩ Wẽnnaam Rĩungã yaa yel-solemde, la tɩ yaa bũmb sẽn be ninsaal pʋgẽ sẽn kɩt t’a miẽ tɩ Wẽnnaam bee ne-a. A to me yeelame tɩ Wẽnnaam Rĩungã koe-noogã yaa egiliizã wɛɛngẽ yɛl zãmsgo. Sebr a ye (Catéchisme de l’Église catholique) yeelame tɩ “Wẽnnaam rĩungã yaa tɩrlem la laafɩ la sũ-noog Vʋʋsem Sõng pʋgẽ.”

B wilgda Wẽnnaam Rĩungã sẽn yaa bũmb ningã vẽeneg seb-kãngã neng a 2. Be b yeelame tɩ “Wẽnnaam Rĩungã sẽn yaa goosneem b sẽn zoe n lugl saasẽ wã na n kɩtame tɩ wẽnem buud fãa sa, la a kɩt tɩ tẽngã lebg arzãna.” D ges Biiblã sẽn sɩd wilgd rẽ to-to.

Neb nins sẽn na n dɩ naam dũniyã gill zugã

Rĩung yaa goosneema, t’a taoor soabã yaa rĩma. Yaa a Zezi Kirist sẽn vʋʋgã n yaa Wẽnnaam Rĩungã Rĩma. Wẽnnaam vẽnega no-rɛɛs a Daniɛll t’a yã b sẽn kõt a Zezi naamã saasẽ, n yeel woto: “M yʋng bõn-makrã pʋgẽ, mam yãa bũmb sẽn wẽnd ninsaal [rat n yeel t’a Zezi] n zao sawat n watẽ. Yẽ kolga wakat fãa naabã [a Zeova] tɩ b bool-a t’a kẽng b nengẽ. La b kõo yẽ soolem ne waoogr la naam, tɩ tẽnsã fãa neb sẽn yaa soolem toɛy-toɛy n gomd goam toor-toorã sak-a. A na n dɩɩ naam wakat fãa n ka bas ye, la a soolmã ka na n tol n sɛ ye.”—Daniɛll 7:13, 14.

Daniɛll sebrã sẽn be Biiblã pʋgẽ wã leb n wilgdame tɩ yaa Wẽnnaam meng n na n lugl Rĩungã, la tɩ Rĩungã na n menesa ninsaalbã goosneem dãmbã fãa, la t’a na n yalsa wakat fãa. Daniɛll sebrã sak a 2 wã wilgdame tɩ Wẽnnaam kɩtame tɩ Babilon rĩmã yã bõn-naandg kãseng zãmsd pʋgẽ. Bõn-naandgã makda dũniyã pãn-soaadb sẽn na n pʋgl taab n dɩ naam. No-rɛɛs a Daniɛll wilga zãmsdã võore, n yeel tɩ yaa “bũmb nins sẽn na n wa zĩnd yaoolem wakatã.” A paasame tɩ “Wẽnnaam sẽn be yĩngrã na n kɩtame tɩ soolem sẽn ka tõe n sãam la buud a taab sẽn ka tõe n deeg zĩndi. A na n wãa soolem kãens fãa tɩ b menem n bas-a t’a yaas wakat fãa.”—Daniɛll 2:28, 44.

Wẽnnaam Rĩungã Rĩmã pa rɩt naamã a yembr ye. A Zezi sẽn wa n be tẽngã zugã, a wilga a tʋm-tʋmdbã tɩ bãmb ne neb a taab sẽn yaa wẽn-sakdb na n vʋʋgame n kẽng saasẽ n tɩ zĩnd naam gɛy zutu. (Luk 22:28-30) Ra pa naam gɛy sɩd-sɩd ye. Bala a Zezi wilgame tɩ Rĩungã na n zĩnda saasẽ. Biiblã yeelame tɩ neb nins sẽn na n naag a Zezi n dɩ naamã na n yii “buud sẽn yaa toor-toore,” la “soolem sẽn yaa toor-toor” pʋgẽ. B na n yɩɩ “rĩm dãmb la maan–kʋʋdb tõnd Wẽnnaam yĩnga, la bãmb na n dɩɩ naam dũniyã zugu.”—Wilgri 5:9, 10.

Bũmb ning sẽn kɩt tɩ Rĩungã koɛɛg yaa noogã

Bãng-y tɩ b kõo a Zezi Kirist naam “tẽnsã fãa neb sẽn yaa soolem toɛy-toɛy n gomd goam toor-toorã” zugu, la tɩ neb nins sẽn na n naag-a wã “na n dɩɩ naam dũniyã zugu.” Neb nins zug b sẽn na n dɩ naamã yaa ãnd dãmb takɩ? Yaa neb nins sẽn na n sak n kelg koe-noogã b sẽn moond rũndã-rũndã wã. La neb nins sẽn na n vʋʋg tẽng zug n wa paam n vɩɩmd wakat sẽn kõn sa wã me naagame.

Biiblã wilgda bark nins nebã sẽn na n paam Rĩungã naam sasa wã vẽenega. Bark kãens kẽer la woto:

“Bãmb kɩtdame tɩ zabr sɛ hal dũniyã tɛk fãa. Bãmb kaooda tãbdo, la b kʋʋsda kãna la b yõogda saar dãmb bugum.”—Yɩɩl Sõamyã 46:10.

“B na n mee zags n zĩnd b pʋsẽ. Bãmb na n sela tɩɩs n dɩ b biisã. Bãmb ka na n me yir tɩ ned a to reeg n kẽ ye. Bãmb ka na n sel tɩɩs tɩ ned a to reeg n wob ye.”—Ezai 65:21, 22.

“[Wẽnnaam] na n yẽesa nintãmã fãa t’a ra le zĩnd bãmb ninẽ ye, la kũum ka na n le zĩnd ye, la sũ-sãoong bɩ yãbr walla toog kõn le zĩnd yɛs ye, tɩ bõe, dẽenem bũmb fãa loogame.”—Wilgri 21:3, 4.

“Dẽ, zoens nin na n pukame la wʋms tʋb na n yoosame. Dẽ, wobs na n yɩkame n tĩims wa yãgse la mugs zɛlma na n laka ne sũ-noog yɩɩla.”—Ezai 35:5, 6.

“Wakat watame tɩ [neb nins] fãa sẽn be yaad pʋsẽ na n wʋm bãmb [a Zezi] koɛɛg n yi. Neb nins sẽn da maan neerã na n vʋʋg n paama vɩɩm.”—Zã 5:28, 29.

“Sũ-maasem dãmbã na n sooga dũniyã, n maan sũ-noog laafɩ wʋsg yĩnga.”—Yɩɩl Sõamyã 37:11.

Ad woto sɩd yaa koe-noogo! Sẽn paase, Biiblã bãngr-goam sẽn pidsdã wilgdame tɩ wakat ning Rĩungã sẽn na n soog tẽngã tɩ tɩrlem zĩnd a zugã ta n saame.

Koe-noogã yaa bõe?

“Koe-no-kãngã . . .”—MATƖE 24:14.

KIRIS-NEBÃ segd n moona Wẽnnaam Rĩungã koe-noogã n wilg nebã tɩ Rĩungã yaa goosneem sẽn na n soog dũniyã tɩ tɩrlem zĩnd a zugu. B gomda koe-noog yell Biiblã zĩis a taaba. Wala makre, Ezai 52:7 pʋgẽ b gomda “koe-noog” yelle. Rom dãmb 15:16 pʋgẽ, b gomda “Wẽnd koe-noog” yelle. Vɛrse a to me gomda “koe-noog ning sẽn togsd a Zezi Kirist yɛlã” yelle.—Mark 1:1.

Koɛɛg-koɛɛga, koe-noogã yaa koɛɛg ning a Zezi sẽn moon t’a karen-biisã gʋls Biiblã pʋgẽ wã. Nand t’a Zezi rʋ saasẽ, a yeela a karen-biisã woto: “Bɩ y kẽng n maan nebã buud fãa tɩ b yɩ mam karen-biisi n lis bãmb ne Ba la Biigã la Sɩɩg Sõng yʋʋre. La y zãms bãmb tɩ b sak bũmb nins fãa mam sẽn da togs yãmbã.” (Matɩe 28:19, 20) Dẽnd kiris-neb hakɩkã tʋʋmdã pa gom Rĩungã yell ne nebã bal ye. B segd n modgame me n maan karen-biisi.

Bõe la egiliiz rãmbã taoor dãmb maand rẽ wɛɛngẽ? B wʋsg pa mi Rĩungã sẽn yaa bũmb ninga, la rẽ kɩtame tɩ b pa tõe n zãms neb a taabã bũmb rẽ wɛɛngẽ ye. B sẽn moond bal yaa yel-wẽnã sugr kũuni, la tẽeb ne a Zezi sẽn na yɩl n noog nebã sũyã. B meta logto-yiya, lekoll dãmba, la rot naong rãmb yĩnga. B sẽn maand woto wã kɩtame tɩ b paamd neb wʋsgo, la nin-kãens pa kiris-neb hakɩka, sẽn sɩd rat n tũ bũmb nins a Zezi sẽn zãms nebã ye.

Tũudum taoor soab a ye yeela woto: “Tũudmã taoor dãmb wʋsg sak n deegame tɩ kiris-nebã segd n maana karen-biis la b zãms-b tɩ b maan bũmb nins a Zezi sẽn yeelã. . . . A Zezi sẽn yeel bũmb ning rẽ wɛɛngẽ wã yaa vẽeneg fasɩ. Yellã yaa tɩ tõnd pa maand a sẽn yeelã ye. D pa makd rẽ maaneg meng ye. D pʋd n pa mi d sẽn tog n maan rẽ to-to ye.”

Etazĩni, b soka katolik rãmb n gese, n mik tɩ bãmb 100 zugu, 95 wã sak n deegame tɩ koe-noogã mooneg yaa tɩlae ne kiris-ned fãa. La b fãa la bal tagsdame tɩ f sã n tar manesem sõngo sekame, tɩ pa tɩlae tɩ f gom ye. B sẽn sok-b rãmbã ned a ye wilgame tɩ koe-noogã mooneg pa goam woo goam ye. La tɩ yaa ne d manesem sõngã la d moonda. Zʋrnall ning (U.S. Catholic) neb sẽn sok nebã n gesã yeelame tɩ neb wʋsg pa sakd n gom b tẽebã yell ne neb a taabã ye. Bala b egiliizã taoor dãmb yʋʋr sãamame, b sẽn yõg kamb tɩ yellã puk sẽn nan pa kaoosã yĩnga. Sẽn paase, b pa wʋmd b taoor dãmbã zãmsgã võor ye.

Egiliiz metodist evɛk a ye me yeela ne sũ-sãoong tɩ yẽ egiliizã neb pa zemsd taab zãmsgã wɛɛngẽ ye. La tɩ rẽ kɩtame tɩ b pa tar raood n na n moon koɛɛgã, la tɩ b manesmã pa toor ne neb a taabã rẽnd ye. A soka ne sũ-sãoong woto: “Ãnd dãmb n segd n yɩ Rĩungã koe-noogã moondba?”

Evɛkã pa leok a sokrã ye. La a sokrã leoor yaool n beeme. Bee sõsg ning sẽn pʋgdã pʋgẽ.

[Goam sẽn tar pãngã, seb-neng a 6]

Koe-noogã tika Wẽnnaam Rĩungã yell zugu, la fãagrã sẽn tũud ne a Zezi Kirist tẽebã