Yãmb “datame” n sõng neb a taab bɩ?
1 A Zezi ra sɩd maana yɩɩr neb a taabã yĩnga. Wãoor n da wa n bõos-a sõngre, t’a tẽeg a nugã n sɩɩs rao wã, n yeel-a: ‘‘Mam datame. Bɩ f paam f menga n yɩ yɩlemde.” (Mark 1:40-42) Wãn-wãn la d tõe n dɩk togs-n-taar ne a Zezi manesmã n sõng neb a taaba?
2 Neb nins sẽn yaa sɩdã ratbã: Tigingã ned fãa tõe n sõnga sɩda ratb tɩ b lebg a Zeova balemdba. Nin-paals sã n wa tigissẽ wã bɩ y pʋʋs-b la y bao n bãng-ba. Bao-y soay n keng b raoodo. B sã n kõ leoor bɩ y pẽg-ba. Pẽg-y-ba, b sẽn modgd n tũud Biiblã noy b vɩɩmã pʋgẽ wã yĩnga. Sõng-y-b tɩ b bãng tɩ b tõe n paama zo-rãmb hakɩk tigingã pʋgẽ.
3 D tẽed-n-taasã: Sẽn yɩɩd fãa ‘neb nins sẽn yaa tõnd saam-biis tẽebã pʋgẽ’ wã segda ne tõnd sõngre, ne manesem toɛy-toɛya. (Gal. 6:10) Neb wʋsg maooda ne bãase. Y sã n tɩ kaag-ba, b na n paama tũud-n-taar ning b sẽn da ratã, la rẽ na n kenga b pɛlga, la y tõe n leb n sõng-b-la zĩis takɩ wɛɛngẽ. Neb kẽer tõeeme n tar zu-loees a taab b vɩɩmã pʋgẽ. Wilg-y tɩ b yell pak-y lame, n dɩk sẽk n kelg-b la y keng b tẽebo. (1 Tes. 5:14) Kãsem dãmbã ratame tɩ tõnd lagem n tʋm ne-ba, b taoor-sobendã tʋʋm pʋsẽ. (Heb. 13:17) Yaa d sẽn na n yaa neb sẽn sakd n kõt sõngre, la d tõe n lebg ‘neb sẽn paasd [d tẽed-n-taasã] raoodo.’—Kol. 4:11, Kãab-paalgã Koe-noogo.
4 Zakã nebã: A Zezi ra maanda yɩɩr neba yĩnga, dẽ d segd n modgame n dɩk a togs-n-taar n maan yɩɩr d zakã neb yĩnga. Roagdbã sã n maand yɩɩr wʋsg woto b zaka rãmb yĩnga, rẽ na n tus-b lame tɩ b ‘wub b kambã ne Zusoaba saglg la a zãmsg’ pʋgẽ. (Ef. 6:4) Kambã me tõe n sõngame, b sã n segend b mens tao-tao zak pʋgẽ zãmsgã yĩngã, tigissã kẽngr bɩ koe-moonegã yiib yĩngã. Kamb nins sẽn lebg bɛdã wilgdame tɩ b yaa nimbãan-zoɛtb wa a Zezi, b sã n sõng b roagdbã ne nonglem tɩ b mao ne zu-loees nins kʋʋlmã sẽn wat ne wã. Ne manesem kãensã la a taab pʋsẽ, tõnd fãa tõe n “wilga wẽn-sakr d [meng] zakã neb sʋka.”—1 Tɩm. 5:4, NW.
5 D sã n dɩkd togs-n-taar ne a Zezi n sõngd neb a taabã, tõe tɩ d tõog n boog zu-loeesã, sẽn paase d pẽnegda d zakã neb la tigingã neb ne taab n paase. Sẽn yɩɩd fãa, ya a Zeova, “sẽn yaa nimbãan-zoeer Ba wã” la d waoogda.—2 Kor. 1:3.