“B na n yɩɩ wãn n wʋm?”
1 A Zezi yeela woto vẽenega: “Yaa tɩlae tɩ Koe-nooga reng n moon buuda fãa sʋka.” (Mark 13:10) Baa ne d sẽn maand modgr sõma-sõma wã, neb milyõ kobs n be n nan ka paam tɩ b kõ-b kasetã ye. Goosneema rãmb kẽer n gɩdgd tõnd tʋʋmdã. Tẽns wʋsg tara neb wʋsgo, tɩ b sõorã ket n tar fɩɩgr tʋʋll-tʋʋlle. Dẽ, “b na n yɩɩ wãn n wʋm?”—Rom 10:14.
2 Tall-y bas-yard ne a Zeova: D tog n tẽegame t’a Zeova mii neba fãa sũyã. Ned yell ne a sẽn sõs n yaa to-to fãa, a sã n baood sɩdã Wẽnnaam wɛɛngẽ ne pʋ-peelem, a na n yã-a lame.—1 Kɩb. 28:9.
3 A Abrahaam ra maanda yɩɩr Sodom la Gomoor neba yĩnga. La Wẽnnaam kɩtame t’a tall bas-m-yam, n yeel-a tɩ baa yaa nin-tɩrs piig bal la a yã Sodom pʋgẽ, a ka na n sãam-a ye. (Sɩng. 18:20, 23, 25, 32) A Zeova sẽn fãag a Lot ne a kompugli wã wilgdame t’a zɩ n lagem nin-tɩrs ne nin-wẽns n sãam abada.—2 Pɩɛ. 2:6-9.
4 Wakat n zĩnd t’a Eli ra tags tɩ yaa yẽ a ye bal n yaa sɩd Wẽnnaamã sõgena. Baasg zãnga, a Zeova kɩtame t’a tall bas-m-yam, n yeel t’a ka a yembr ye, la tɩ tʋʋmd ning a sẽn sɩngã na n baasame. (1 Rĩm 19:14-18) La yaa wãn to yẽ tõnd wakatã?
5 Tʋmd-y Wẽnnaam tʋʋma wʋsgo: Tõnd ka mi kasetã kũun tʋʋmd sẽn ketã waooglem sẽn ta zĩig ning ye. A Zeova n so tʋʋm-kãngã, la a tũnugda ne a malɛgsã n get-a yelle. (Wil. 14:6, 7) Yaa yẽ n segd n wilg b sẽn segd n kõ tẽn-tẽnsã fãa kasetã n ta zĩig ninga. A Zeova sã n data, a tõe n kɩtame tɩ b tũnug ne soay tõnd sẽn nan ka mi masã n yelg Rĩungã koɛɛga, tɩ neb wʋsg sẽn yɩɩd tõog n ‘wʋm koe-nooga la b tẽ.’ (Tʋʋ. 15:7) Bũmb ning a Zeova sẽn na n maanã na n zemsa ne a sẽn yaa nonglem, yam, la tɩrlem Wẽnnaamã.
6 Yaa waoogr n kõ tõndo, tɩ d tʋm tɩ zems ne a Zeova raabã, n maand d sẽn tõe fãa n kɩtdẽ tɩ ned kam fãa wʋmd koe-noogã.—1 Kor. 9:16.