A Zeezi vʋʋga pʋg-kõor biiga

A Zeezi sẽn sãoog sodaas naabã tʋm-tʋmdã, pa kaoos la a yi Kapɛrnawom ye. A rɩka sor n dabd Nayin. Kapɛrnawom ne Nayin taa kilo 32. A Zeezi ra pa a yembr ye. A karen-biisã n paas neb kʋʋng n da tũud-a. Wõnda b sẽn wa n kolg Nayinã tɩ yaa zaabre. B sega zʋɩf-rãmb kʋʋng sẽn dabd yaadẽ. Yaa bi-bɩɩg n ki tɩ b rabd n na n tɩ mum.

Nebã sũy ra sãama wʋsgo. La bi-bɩɩgã ma n da tar toog n yɩɩda. Ra yaa pʋg-kõore. Biigã me ra yaa a bi-yende. A sɩdã kaalmã namsd-a lame, la a biigã sẽn da ket n vɩ wã, ra belsd-a lame. Tags-y n ges-y a sẽn da nong a biigã to-to. A ra teeg-a lame, bala yaa yẽ n da na n ges a yelle. Yẽ n da yaa a fãa-fãa, la yẽ me sẽn ki n bas-a wã. Masã ãnd n na n zĩnd ne-a, n sõngd-a?

A Zeezi sẽn yã pagã sũ-sãangã la a toogã, yẽ me sũurã sãama wʋsgo. Sẽn na yɩl n bels pagã, a maaga a yĩng n gom ne-a, n yeel-a yaa: “Ra yãb ye!” La a maana bũmb n paase. B ra gãnega kũumã pãndar zug tɩ neb tʋke. La a Zeezi kolgame n sɩɩs pãndarã. (Luk 7:13, 14) A manesmã kɩtame tɩ tẽngã nebã yalse. Tõe tɩ neb wʋsg ra sokda b mens woto: ‘Bõe yĩng t’a sɩɩs pãndarã? Bõe la a rat n maane?’

La rẽ yĩnga sẽn da tũud-b a Zeezi wã me ra sokda b mens woto bɩ? Bãmb da zoe n yãa a sẽn maan yel-soalem n sãoog bãad-rãmba. La wõnda b ra nan pa yã a sẽn vʋʋg kũum ye. Yaa sɩd tɩ pĩnd wẽndẽ wã, Wẽnnaam kõo neb tõog tɩ b vʋʋg kũum. La rẽ yĩnga, a Zeezi me tõe n vʋʋga kũum bɩ? (1 Rĩm-dãmbã 17:17-23; 2 Rĩm-dãmbã 4:32-37) A Zeezi yeelame: “Bi-bɩɩga, mam yeta foom tɩ f yiki.” (Luk 7:14) Biigã sɩd yikame n zĩndi, n sɩng goam. A Zeezi lebsa biigã a ma. Pagã yɛɛsame, la a sũ-noogã me pa tõe n bãng n bilg ye. A pa na n le yɩ a yembr ye.

Nebã sẽn yã tɩ bi-bɩɩgã vʋʋgame wã, b pẽga a Zeova sẽn yaa vɩɩmã kõatã, n yeele: “Wẽnnaam no-rɛɛs kãseng puka tõnd sʋka.” Neb kẽer bãnga a Zeezi yel-solemdã sẽn wilgd bũmb ningã. B yeelame: “Wẽnnaam waa n gesa b nebã.” (Luk 7:16) Tao-tao bal tɩ kibarã saaga tẽn-yagsã. Tõe meng tɩ taa a Zeezi ba-yirã Nazarɛt sẽn zems kilo 10 ne Nayinã. Hal baa Zʋʋde soolmã neb wʋma a Zeezi sẽn maanã.

Wakat kãng t’a Zãmbatiis ra keta bãens roogẽ. A rata ne a sũur fãa n bãng bũmb nins a Zeezi sẽn maandã. A karen-biisã wa n togs-a-la a Zeezi yel-soalmã. Bõe la a na n maane?