7. Bilg-bʋg la a Zezi togs kʋʋngã sẽn wa n na n kelg-a wã?

⁷ A Zezi yel-bũnd a yembr pʋgẽ, b wilga vẽeneg tɩ tara yõod wʋsg tɩ d tall tagsg sẽn zems ne Wẽnnaam Gomdã. A Zezi sẽn da wa n moond koe-noogã Palɛstinã, kʋʋng n tigim n na n kelg-a. (Luk 8:1, 4) La yaool n pa b fãa n sɩd ra nong Wẽnnaam Gomdã ye. Sãmbg sẽn ka be, neb wʋsg wa n na n kelg-a lame, bala b ra rat n yãa yel-soalem bɩ b ra rat n kelga a zãmsgã a sẽn kõt ne manesem sẽn be yamleoog wʋsgã. Woto yĩnga, a Zezi togsa kʋʋngã bilgri: “Ka-fẽrgd a ye kẽngame n na n tɩ fẽrg a ki. Yẽ sẽn fẽrgda, ka-buud kẽer lʋɩɩ sor kɩrenga tɩ neb tab-ba, tɩ liuuli wa n dɩ-ba. La kẽer lʋɩɩ kugr zugu. La b sẽn yi, b zelgame maasr sẽn ka waooga yĩnga. La kẽer lʋɩɩ gõos sʋka; la b sẽn yi, gõos me yi n dɩɩ bãmba. La kẽer lʋɩɩ zĩ-sõngẽ n yi n wom biisi tɩ ta koabga.”—Luk 8:5-8.

9. Bõn-buud ning sẽn lʋɩt a) sorã kɩrengã, b) kugrã zugã, d) gõosã zĩigẽ wã, makda bõe?

⁹ A Zezi yeelame tɩ bõn-buud kẽer n dʋʋg sorã kɩreng tɩ b tab-ba. Rẽ tɩ loee ne neb nins sẽn pa tar sẽka, tɩ Rĩungã bõn-buud pa tõe n kɩ yẽg b sũyẽ wã. B ne b yet b na n tõog n bɩɩs nonglem ne Wẽnnaam Gomdã tɩ “Sʋɩtãana wa n yiisa Wẽnnaam koɛɛga bãmb sũyã pʋsẽ tɩ bãmb kõn tẽ n paam fãagr ye.” (Luk 8:12) Bõn-buud kẽer lʋɩta kugr zugu. Rẽ tɩ loee ne neb nins Biiblã koɛɛg sẽn tar yamleoog ne, tɩ b yaool n pa basd-a t’a kẽ b sũyã. Kɩɩsg sã n wa fãa, bɩ b sã n mik tɩ yaa toog tɩ b tũ Biiblã sagls fãa, “bãmb lʋɩtame,” bala b pa tar yẽgr ye. (Luk 8:13) Rẽ poore, neb sẽn wʋmd gomdã n basd tɩ “yɩɩr ne arzɛgse la dũniyã vɩɩm sũ-noog” lim-ba. Wala bõn-bɩts gõos sẽn dɩ, b wat n baasame n “ka wom[d] bi-moaam ye.”—Luk 8:14.