Ninsaal Bi-riblã waoongo

A Zeezi tog n keta Samaari bɩ Galɩle. Fariizẽ-rãmbã sok-a lame n na n bãng Wẽnnaam soolmã sẽn na n wa wakat ninga. Bãmb tẽedame tɩ na n yɩɩ kibs-kẽenga. La a Zeezi yeel-b lame yaa: “Wẽnnaam soolmã ka wate, n yaa wa bũmb ned sẽn tõe n gẽnes ye. B ka na n yeel tɩ ges-y-yã! Wẽnnaam soolem bee ka wall a bee ka sẽnẽ ye. Bala, ad-y Wẽnnaam soolmã bee yãmb sʋka.”—Luk 17:20, 21.

Kẽer tõe n tagsame t’a Zeezi gomdã rat n yeelame tɩ Wẽnnaam soolmã bee neb nins sẽn tũud Wẽnnaamã sũyẽ. La pa woto ye. Bala yaa Fariizẽ-rãmbã la a Zeezi sẽn da gomd ne wã. Soolmã pa tõe n zĩnd nin-kãensã sũyẽ ye. La soolmã yaool n da bee bãmb sʋka, bala a Zeezi sẽn yaa soolmã Rĩm Wẽnnaam sẽn yãkã ra yasa bãmb sʋka.—Matye 21:5.

Wõnda Fariizẽ-rãmbã sẽn loogã, a Zeezi sõnga a karen-biisã tɩ b bãng bũmb wʋsg soolmã waoong zug n paase. A goma a sẽn na n deeg naamã yelle, n yeel woto: “Wakat n wat tɩ yãmb na n dat n yãnd Ninsaal Bi-riblã rayã daar a yembr la yãmb kõn yã ye.” (Luk 17:22) A gomdã wilgdame tɩ ra na n kaoosame tɩ Ninsaal Biigã yaool n deeg naamã. Tõe tɩ karen-biis kẽer na n wa ratame tɩ ra-kãng ta tao-tao, la b tog n talla sũ-mar n tãag wakat ning Wẽnnaam meng sẽn yãkã.

A Zeezi paasame: “B na n yeela yãmb tɩ b bee ka, wala b bee ka sẽnẽ. Da kẽng-y be ye, la y ra babs-b ye. A wa sa-yãgb sẽn yit kɩreng a yembr n yãg n tɩ ta kɩreng a to wã, Ninsaal Bi-riblã me na n yɩɩ a woto b waoongã daare.” (Luk 17:23, 24) Bõe la a Zeezi karen-biisã ra na n maan tɩ ziri-n-be-mesi rãmbã ra tõog n belg-ba? A Zeezi yeelame tɩ Mesi sɩd-sɩdã waoong na n yɩɩ wa saag sẽn yãgd zĩig fãa, tɩ nebã fãa tõe n yã. Rat n yeelame t’a sã n wa reeg naamã, neb nins fãa sẽn da gũud rẽ wã na n bãnga vẽenega.

A Zeezi tẽega yɛl sẽn zĩnd pĩndã, n wilg nebã manesem sẽn na n yɩ to-to, yẽ sã n wa reeg naamã. A yeelame: “Bũmb ning sẽn zĩnd a Nowe wakatã na n zĩnda Ninsaal Bi-riblã waoongã wakat me. . . . A na n yɩɩ wa a Lot wakatã. Nebã rag n dɩtame la b yũuda, n daadẽ la b koosdẽ, n bʋtẽ la b metẽ. La daar ning a Lot sẽn yi Sodom tẽngã, bugum yii yĩngr n ni wa saaga, ne kidbri n sãam bãmb fãa. Na n yɩɩ a woto me daar ning Ninsaal Bi-riblã sẽn na n puk b mengã.”—Luk 17:26-30.

A Zeezi gomdã pa rat n yeel tɩ yaa a Nowe ne a Lot wakatẽ nebã sẽn da rɩt la b yũuda, n koosdẽ la b raadẽ, n bʋtẽ la b metẽ wã yĩng la Wẽnnaam sẽn sãam-bã ye. A Nowe ne a Lot n paas b zakã rãmb me ra maanda woto. La neb a taabã ra maanda rẽ bala, tɩ b toog kae ne Wẽnnaam ye. B leb n da pa sak n deeg tɩ pa na n kaoos la Wẽnnaam sãam nin-wẽnsã ye. Dẽnd a Zeezi gomdã yaa sẽn na n sagl a karen-biisã tɩ b bao n bãng Wẽnnaam daabã, la b tũ ne b sũy fãa. A ra ratame me n wilg b sẽn segd n maan n paam n põse, Wẽnnaam sã n na n wa sãam nin-wẽnsã.

Karen-biisã pa tog n bas tɩ bũmb nins sẽn be dũniyã pʋgẽ wã tiis-b ye. A Zeezi yeelame: “Badaare, bɩ ned ning sẽn be roog zug t’a teed be roogã pʋg ra sig n dɩgs-b ye. La bɩ ned ning sẽn be pʋtẽ da lebg n leb poorẽ me ye. Tẽeg-y-yã a Lot pagã yelle.” (Luk 17:31, 32) A Lot pagã lebga yamsem kugri.

A Zeezi le wilga a karen-biisã bũmb a taab sẽn na n maane, Ninsaal Biigã sã n wa rɩt naam. A yeel-b lame: “Mam yeta yãmb tɩ baraar yʋngo, neb a yiib sẽn na n gõe gãag a yembr zugu, b na n dɩka a ye, n bas a ye.” (Luk 17:34) Dẽnd b na n fãaga neb kẽere, la b sãam sãnda.

Karen-biisã soka a Zeezi yaa: “Zu-soaba, na n yɩɩ zĩ-bʋgo?” A leokame: “Dɩgr sẽn be zĩig ninga, yɩbrend tigimda beenẽ.” (Luk 17:37) Sɩd me, karen-biisã kẽer na n yɩɩ neb sẽn ne yɩɩga, wa yɩbrendã. Karen-bi-kãens na n wa naaga taab n sak Kirisã, sẽn yaa Ninsaal Bi-riblã. Wakat kãnga, a Zeezi na n sõng-b lame tɩ b wʋm Biiblã goam võor sõma, tɩ b tẽebã pãng paase.