Biiblã Võor-wilgri: Yaa ãnd pãn-tusdg pʋgẽ?
GOM-BIIG ning sẽn yaa “wilg võorã” võor a yembr yaa “wilg bũmb võor tɩ zems ne f tagsg la bala, n tik f sẽn ne zugu.” (Le grand Rober de la langue française) Woto, ned sẽn vɩɩmd bũmb ningã, a sẽn paam zãmsg la wubr ningã nong n tara pãn-tusdg a sẽn wilgd yɛlã võor to-to wã zugu.
La yaa wãn to yẽ ne Biiblã võor-wilgri? B kõ-d-la sor tɩ d wilg Biiblã babs võor tɩ zems ne d mensã ‘tẽebo, d meng sẽn get yɛlã to-to wã bɩ ne yɛlã sẽn yaa to-to wã’ bɩ? Yaa vẽeneg tɩ Biiblã mitb la a lɛbgdb wʋsg sẽn yɩɩd yetame tɩ b pa maand woto, la tɩ b basdame tɩ Wẽnnaam wilg-b sore.
Makr a yembr yaa bũmb ning b sẽn yeel seb-vã-neng tẽngrẽ Zã 1:1 zugã, sã n yaa ne A New Version of the Four Gospels a John Lingard sẽn yiis yʋʋmd 1836 n tũnug ne yʋʋr sẽn yaa “Katolikã.” Ad seb-kãng sẽn yete: “Tũudum buud fãa neb getame tɩ Gʋlsg Sõamyã wilgdame tɩ b tagsa wã sẽn welgd-b toorã sɩd zemsame: la sɩd-sɩda, pa Gʋlsg Sõamyã n wilgd-b woto ye, la bãmb mensã n yãkd Gʋlsg Sõamyã goam võore.”
Baa ne a makrã sẽn sɩd zemsã, gʋlsdã raab ra yaa bõe? A ra gomd n teenda a sẽn wilg verse kãnga võor to-to wã. A lebga verse kãng woto: “Sɩngrẽ wã ‘gomdã’ ra beeme, la ‘gomdã’ ra bee ne Wẽnnaam; la ‘gomdã’ ra yaa Wẽnnaam,” tɩ woto yaa lebgr sẽn zems ne Tãablmã.
Yaa bõe n tus gʋlsdã t’a lebg Zã 1:1 n teel Tãablmã zãmsgo? Yaa ‘Gʋlsg Sõamyã n wilg-a’ t’a maan woto bɩ? Pa tõe n yɩ woto ye, bala Tãablmã zãmsg pa be Biiblã zĩig ba a yembr pʋgẽ ye. Ges-y The New Encyclopædia Britannica sẽn yet bũmb ning yel-kãngã zugu: “Gom-biig ning sẽn yaa Tãablmã bɩ tẽeb kãngã pa pukd Kãab Paalgã pʋgẽ vẽeneg ye.” Sẽn paase, Yale Inivɛrsite wã porfesɛɛr a E. Washburn Hopkins wilgame: “Wõnda a Zezi la a Poll ra pa mi tãablmã zãmsg ye, . . . b pa yeel baa fʋɩ a zug ye.”
Rẽ, bõe la d tõe n baas n yeel neb nins sẽn sakd võor-wilgr ning sẽn teend Tãablmã Zã 1:1 pʋgẽ bɩ Biiblã verse a taab wɛɛngẽ wã? Sã n yaa ne a Lingard mengã noyã, “pa Gʋlsg Sõamyã n wilgd-b woto ye, la bãmb mensã n yãkd Gʋlsg Sõamyã goam võore.”
Zu-noogo, d tara Wẽnnaam mengã Gomd sẽn wilgd tõnd sor yel-kãngã pʋgẽ. Tʋm-tʋmd a Pɛɛr yeelame: “Bɩ y bãng tɩ bãngr-goam ba a ye ka be Gʋlsg Sõng pʋgẽ ned sẽn tõe n bilg tɩ zems a meng tagsg ye. Tɩ bõe, bãngr-goama ka yɩ ne ned yam ye. La yaa Sɩɩg Sõng sẽn tʋm neb nins pʋsẽ wã n togs Wẽnnaam yĩnga.”—2 Pɩɛɛr 1:20, 21.