Wẽnnaam biigã yaa “dũni vẽenem”

Zãn kibsã rasem a yopoe soabã sẽn yaa a yaoolem daarã, a Zeezi zĩnda wẽnd-doogã “ligd lobrã koglg sɛɛgẽ,” n zãms nebã Wẽnnaam goamã. (Zã 8:20; Luk 21:1) Wõnda yaa pagbã zak pʋgẽ, zĩig ning nebã sẽn wat n ningd b kũunã.

Kibsã sasa, yʋng fãa, wẽnd-doogã zĩ-kãng tolg n yaa vẽenem. Fɩtl-dogends bɛd-bɛd a naas n be be, t’a ye fãa tar tʋgd a naas sẽn pid ne kaam. Fɩtl-dãmbã bugum tara pãnga, hal tɩ b vẽenemã zãagd zĩiga. Wõnda a Zeezi sẽn togs gomd ning baraarã kɩtame tɩ nebã tags vẽenem kãng yelle. A yeelame: “Mam yaa dũni vẽenem. Ned ning sẽn tũud maam kõn kẽn lik pʋgẽ ye, la a na n paama vɩɩm vẽenem.”—Zã 8:12.

Fariizẽ-rãmbã kɩɩsa a Zeezi gomdã, n yeele: “Fo kɩta f meng kaseto, fo kaset ka sɩd ye.” A Zeezi leok-b-la woto: “Baa ne mam sẽn kɩt m meng kasetã, mam kasetã yaa sɩda. Bala, mam mii m sẽn yiẽ, la m sẽn dabdẽ. La yãmb ka mi mam sẽn yiẽ, wall m sẽn dabdẽ ye.” A paasame: “B gʋlsa yãmb tõogã pʋgẽ tɩ neb a yiib kaset yaa sɩda. Mam kɩta m meng kaseto, la m ba, sẽn tʋm-a maamã kɩta mam kaseto.”—Zã 8:13-18.

Fariizẽ-rãmbã kell n pa reeg a Zeezi gomdã ye. B sok-a-la woto: “F ba bee yɛ?” A Zeezi leok-b-la vẽeneg yaa: “Yãmb zɩ mam sẽn yaa a soaba, la y zɩ m ba sẽn yaa a soab me. Yãmb sã n dag n miẽ-la maam, y dag n na bãng m ba me.” (Zã 8:19) Baa ne Fariizẽ-rãmbã sẽn da ket n dat tɩ b yõk a Zeezi wã, ned baa a ye pa sɩɩs-a ye.

A Zeezi le yeel-b-la bũmb a sẽn da zoe n togs-ba. A yeelame yaa: “Mam loogdame, la yãmb na n baoo maam, la yãmb na n kii y yel-wẽndã pʋgẽ. Yãmb ka tõe n wa mam sẽn kẽndẽ wã ye.” Zʋɩf-rãmbã pa wʋm a gomdã võor baa bilfu. B soka b mens yaa: “A sẽn yet tɩ tõnd ka tõe n wa zĩig ning a sẽn kẽndẽ wã, a na n kʋʋ a meng la?” B ra pa tõe n wʋm a Zeezi gomdã võore, bala b ra pa mi a sẽn sɩd yitẽ ye. A yeel-b lame yaa: “Yãmb yaa tẽngr ka nebã, la mam yaa yĩngr neda. Yãmb yaa dũni-kãngã nebã, la mam ka dũni-kãngã ned ye.”—Zã 8:21-23.

A Zeezi ra gomda a sẽn deng n vɩɩmd saasẽ wã yelle, n le paas a sẽn yaa Mesi bɩ Kiris b sẽn da togs t’a watame, tɩ tũudmã taoor dãmb da segd n gũ-a wã. Baa ne rẽ, b paooga a Zeezi n sok yaa: “Foom la ãnna?”—Zã 8:25, Sebr Sõngo.

Fariizẽ-rãmbã sẽn pa tẽ a Zeezi, la b pʋd n kɩɩs a goamã, a yeel-b lame yaa: “Bõe yĩng tɩ m na n gom ne yãmba?” La a kell n goma a Ba wã yelle, n wilg bũmb ning sẽn kɩt tɩ zʋɩf-rãmbã segd n kelg yẽ wã. A yeelame: “Sẽn tʋm-a maamã yaa sɩd soaba, la mam togsda dũni wã bũmb ning m sẽn wʋm bãmb nengẽ.”—Zã 8:25, 26.

Rẽ poore, a Zeezi togsa gomd sẽn wilgd t’a kɩsa a Ba wã sɩda. Tũudmã taoor dãmb yaool n pa kɩs Wẽnnaam sɩd ye. A Zeezi yeel-b lame yaa: “Yãmb sã n wa n zẽk Ninsaal Bi-riblã n sa, y na yaool n bãng tɩ mam yaa m sẽn yaa a soaba, la tɩ mam ka maand baa fɩ m toor ye, la tɩ mam gomda wa m ba sẽn zãms maamã. Sẽn tʋm-a maamã bee ne maam. B ka bas maam m yembr ye, bala, wakat fãa, mam maanda sẽn noom bãmba.”—Zã 8:28, 29.

Zʋɩf-rãmb kẽer yẽ tẽe a Zeezi. A yeela nin-kãens woto: “Yãmb sã n tall mam goamã, yãmb sɩd yaa mam karen-biisi. Yãmb na bãng sɩdã, la sɩdã na kɩt tɩ yãmb lebg burkĩmba.”—Zã 8:31, 32.

Sã n yaa ne sãnda, a Zeezi sẽn yeel tɩ bãmb na n lebga burkĩmbã pa tar neng ye. Rẽ n so tɩ b yeele: “Tõnd yaa a Abrahaam yagense, la tõnd zɩ n yɩ ned yamb ye. Bõe tɩ yãmb yetẽ tɩ tõnd na n lebga burkĩmba?” Zʋɩf-rãmbã ra miime tɩ naoor wʋsgo, tẽns a taab n soog-ba. Baasgo, b zɩ n sak tɩ b bool-b tɩ yembs ye. La a Zeezi wilg-b lame tɩ b ket n yaa yembse. A yeel-b lame yaa: “Mam yeta yãmb sɩd-sɩd tɩ ned ning fãa sẽn maand yel-wẽn yaa yel-wẽn yamba.”—Zã 8:33, 34.

Zʋɩf-rãmbã sẽn pa sak n deeg tɩ b yaa yel-wẽnã yembsã yaa yell menga. A Zeezi yeel-b lame yaa: “Yamb ka paad yir wakat fãa ye. La yirã bi-ribl paada be wakat fãa.” (Zã 8:35) Yamb ka tar sor n na n paam rogem-pʋɩɩr ye. Sẽn yaa wakat ning fãa me, a zu-soabã tõe n dig-a lame. Yaa zakã biiga n paad zakẽ wã, pa rẽ bɩ ned zakã soab sẽn deeg n maan a biiga. Yẽ soab n paad zakẽ wã “wakat fãa,” rat n yeel t’a yõor tɛka.

Dẽnd yaa ned sã n tõog n bãng Biigã sẽn yaa a soabã la a na n paam a meng wakat sẽn kõn sa ne yel-wẽnã sẽn wat ne kũumã. A Zeezi yeelame: “Bi-riblã sã n yols yãmba, yãmb na n yɩɩ burkĩmb meng-menga.”—Zã 8:36.