Saagr sẽn ka wõnd a taaba!
“Ned ninga fãa sẽn vɩ n tẽed maam, a kõn ki abada ye.”—ZÃ 11:26.
1. B na n vʋʋga neb milyõ rãmb sẽn ki masã zĩ-bʋs buud pʋsẽ?
NEB milyõ rãmbã sã n wa yik vʋʋgrã wakate, ka na n yɩ tẽn-vɩʋʋg pʋgẽ la b na n kɩt tɩ b le vɩɩmd ye. (Tʋʋma 24:15, NW) B na n neka zĩis rasãndlem b sẽn maan tɩ yaa sõma n paas pʋgẽ n yã ro-gãadse, futu, la rɩɩb wʋsg b sẽn segl b yĩnga. Ãnda n na n maan segl-kãensã fãa? Vẽenega, neb n segd n vɩ dũni paalgã pʋgẽ sẽn deng tẽng zug vʋʋgrã sɩngre. La yaa ãnd dãmba?
2-4. Saagr sẽn yaa zall bʋg n gũud b rãmb nins sẽn vɩ “yaoolem dayã” pʋsẽ?
2 Biiblã bãngr-gomd pidsg wilgdame tɩ tõnd vɩɩ yɛl siglg kãngã ‘yaoolem day’ pʋsẽ.a (2 Tɩmote 3:1, NW) Ka la bilf bala, a Zeova Wẽnnaam na n kẽesa a toog ninsaalbã yɛlẽ n yiis wẽngã tẽngã zugu. (Yɩɩl Sõamyã 37:10, 11; Yelbũna 2:21, 22) Wakat kãnga, bõe n na n paam b rãmb nins sẽn sõgend Wẽnnaam ne kɩs-sɩdã?
3 A Zeova ka na n lagem nin-tɩrsã ne nin-wẽnsã n sãam ye. (Yɩɩl Sõamyã 145:20) A zɩ n maan bũmb a woto ye, la a kõn maan woto me a sã n na n wa yɩlgd tẽngã ne wẽng buud fãa wã ye. (Mak-y ne Sɩngre 18:22, 23, 26.) Sɩda, Biiblã yaoolem sebr gomda “kʋʋng [kãseng, NW] [sẽ]n be be tɩ ned ka tõe n sõd n sɛ ye, sẽn yi soolem fãa, la buud fãa, la neb sẽn gomd goam toɛ-toɛya fãa,” sẽn yit “to-kãsenga” pʋgẽ yelle. (Wilgri 7:9-14) N-ye, kʋʋng kãseng n na n põs to-kãseng ning pʋgẽ rũndã-rũndã dũni wẽngã sẽn na n taa a tɛkã, la b na n kẽe Wẽnnaam dũni paalgã pʋgẽ. Beenẽ, ãdem-bi-sakdsã tõe n dɩɩ Wẽnnaam segls kãsemsã a sẽn dɩk sẽn na yɩl n kõ ãdem-biisã paam-m-meng ne yel-wẽnd la ne kũumã nafa tɩ pidi. (Wilgri 22:1, 2) Dẽ, ka na n yɩ tɩlae tɩ “kʋʋng kãsengã” tol n bãng kũum ye. Ad yaa saagr sẽn ka wõnd a taaba!
4 D tõe n talla bas-yard ne saag-kãngã sẽn lingdã bɩ? Hal tɩ sik kaẽ ye! A Zezi meng wilgame tɩ wakat n da na n zĩnd tɩ neb ra na n wa vɩɩmd n pa tol n ki ye. Sẽn deng bal t’a vʋʋg a zoa a Lazaare, a Zezi togsa a Marte: “Ned ninga fãa sẽn vɩ n tẽed maam, a kõn ki abada ye.”—Zã 11:26.
Yãmb me tõe n vɩɩmda wakat sẽn-kõn-sa
5, 6. Y sã n datame n vɩɩmd wakat sẽn-kõn-sa tẽng zug Arzãnã pʋgẽ, bõe la y segd n maane?
5 Yãmb datame n vɩɩmd wakat sẽn-kõn-sa tẽng zug Arzãnã pʋgẽ bɩ? Yãmb tʋlla ne y sũur fãa n yã y nin-nongdsã yɛs bɩ? Dẽ y tog n bao n paama Wẽnnaam daabã la a bõn-datɩ wã bãngr sẽn yaa takɩ. A Wẽnnaam pʋʋsg pʋgẽ, a Zezi yeelame: “Vɩɩm sẽn-ka-sɛta yaa woto, tɩ bãmb na bãng yãmb sẽn yaa sɩd Wẽnnaam sẽn-ka-to la a Zezi Kirist yãmb sẽn tʋm a soabã.”—Zã 17:3.
6 Wẽnnaam daab yaa tɩ “neb buud fãa segd n paama fãagr la b wa paam sɩda bãngr sẽn yaa takɩ wã.” (1 Tɩmote 2:3, 4, NW) Masã la wakat ning y sẽn segd n zãms n bãng yãmba, n paas neb milyõ rãmb a taabã sẽn zoe n maand Wẽnnaam daabã, sẽn tõe n vɩɩmd tẽng zug Arzãnã pʋgẽ to-to. A Zeova Kaset rãmbã sũy na n yɩɩ noog tɩ b sõng-y tɩ y zãms n paas Wẽnnaam la a sẽn baood tɩ b maan bũmb ninsã wɛɛngẽ. Bõe yĩng tɩ y ka na n tɩ yã-b Rĩung Roog ning sẽn pẽ-a yãmbã, bɩ y gʋls adɛrs ning sẽn pẽ-a yãmb n yɩɩdã b sẽn ning seb-vã-neng ning sẽn pʋgdã pʋgẽ?
[Tẽngr not rãmbã]
a Ges-y Bãngr Sẽn Tar n Debd Vɩɩm Sẽn-Kõn-Saẽ Wã, s.v.n. 98-107, Watchtower Bible and Tract Society of New York, Inc. sẽn yiisã.
[Foto, seb-neng 31]
Ka na n yɩ tɩlae tɩ ‘kʋʋng kãseng’ tol n bãng kũum ye