SAK 30
Yãmb neb nins sẽn ki wã tõe n le vɩɩmdame!
Kũum wata ne yɩɩr la sũ-sãams wʋsgo. Yaa rẽ yĩng la b sẽn boond kũum tɩ bɛ Biiblã pʋgẽ wã. (1 Korẽnt rãmbã 15:26) Sak 27 wã pʋgẽ, yãmb bãngame t’a Zeova na n sãama bɛ-kãnga. La neb nins sẽn zoe n ki wã nengẽ na n yɩɩ wãna? Sag-kãngã pʋgẽ, y na n bãnga a Zeova pʋleng a to sẽn be rasãnde. A na n vʋʋga neb ka tɛka, tɩ b paam n vɩɩmd wakat sẽn kõn sa. Woto sɩd tõe n yɩɩme bɩ? B na n vʋʋgame n vɩɩmd saasẽ bɩ, bɩ tẽngã zugu?
1. Bõe la a Zeova rat n maan d neb nins sẽn ki wã yĩnga?
A Zeova yãgdame n dat n vʋʋg sẽn ki-bã. Rao a ye sẽn da tar tẽeb ra kɩsa sɩd tɩ Wẽnnaam pa na n yĩm a yell a kũumã poor ye. A yʋʋr la a Zoob. A yeela Wẽnnaam yaa: “Yãmb sã n bool maam [m sã n wa be yaoogẽ wã], mam na n sakame.”—Karm-y Zoob 14:13-15.
2. Bõe n kɩt tɩ d miẽ tɩ sẽn ki-bã tõe n vʋʋgame?
A Zeezi sẽn wa n be tẽngã zugã, Wẽnnaam kõ-a-la tõog t’a tõe n vʋʋg ned sẽn ki. A Zeezi vʋʋga bi-pugl sẽn da tar yʋʋm piig la a yiibu, la pʋg-kõor a ye bi-ribla. (Mark 5:41, 42; Luk 7:12-15) Kaoosg zugẽ, a Zeezi zoa a Lazaar wa n maana kaalem. Baa a Lazaar sẽn ki tɩ b mum-a t’a maan rasem a naas yaoogẽ wã, a Zeezi vʋʋg-a lame. A Zeezi pʋʋsa Wẽnnaam, la a zẽk a koɛɛg n yeel yaa: “Lazaare, wa yi!” La “sẽn da ki-a wã yiime.” A Lazaar vʋʋgame! (Zã 11:43, 44) Mams-y n ges-y a Lazaar zakã rãmb la a zo-rãmbã sũur sẽn yɩ noog to-to!
3. Koe-no-bʋg n be y neb nins sẽn ki wã yĩnga?
Biiblã pʋgẽ, b pʋlmame tɩ kũum vʋʋgr n na n zĩndi. (Tʋʋma 24:15) Neb nins a Zeezi sẽn vʋʋge, a sẽn wa n be tẽngã zugã pa kẽng saasẽ ye. (Zã 3:13) A vʋʋg-b lame tɩ b na n vɩɩmd tẽngã zug ka, la b sũy ra yaa noog ne rẽ. Woto me, ka la bilfu, a Zeezi na n vʋʋga neb milyaar-dãmba, tɩ b vɩɩmd wakat sẽn kõn sa tẽngã zugu, arzãnã pʋgẽ. A yeelame tɩ neb nins fãa Wẽnnaam sẽn tẽr b yellã na n vʋʋgame, baa neb nins ninsaalbã sẽn yĩm b yellã.—Zã 5:28, 29.
D BAO N BÃNG N PAASE
D ges bũmb toor-toor sẽn be Biiblã pʋgẽ n wilgd vẽeneg t’a Zeezi tõe n vʋʋga sẽn ki-bã, la t’a na n maana rẽ. Y na n yãa kũum vʋʋgrã sẽn tõe n bels-y to-to, la sõng-y tɩ y tẽ tɩ manegr n wate.
4. A Zeezi wilgame t’a tõe n vʋʋga kũum
D bao n bãng a Zeezi sẽn maan bũmb ning a zoa a Lazaar yĩngã n paase. Karm-y Zã 11:14, 38-44, tɩ rẽ poor bɩ y leok sogsgã:
Bõe n wilgd t’a Lazaar sɩd ra kiime?—Ges-y vɛrse 39.
A Lazaar sã n da kẽnga saasẽ, yãmb tagsdame t’a Zeezi ra na n kɩtame t’a lebg n wa tẽngã zug bɩ?
5. Neb ka tɛk n na n vʋʋge!
Karm-y Yɩɩn-sõamyã 37:29, tɩ rẽ poor bɩ y leok sokrã:
Neb milyaar-dãmbã sẽn na n vʋʋgã na n vɩɩmda yɛ?
Pa neb nins sẽn da tũud a Zeova wã bal la a Zeezi na n vʋʋg ye. Karm-y Tʋʋm 24:15, tɩ rẽ poor bɩ y leok sokrã:
Ãnda soab la yãmb dat n yã kũum vʋʋgrã sasa?
Tags-y n ges-y-yã: Ned sẽn ki vʋʋgr yaa nana ne a Zeezi, wa biig sẽn gõe t’a ba tõe n nek-a nana-nana to-to wã
6. Kũum vʋʋgrã tõe n bels-y lame, la kɩt tɩ y tẽ tɩ manegr n wate
A Zayirus bi-puglã kibarã sẽn be Biiblã pʋgẽ wã belsa neb wʋsg b neb kaalem poore, la keng b raoodo. Karm-y kibarã Luk 8:40-42, 49-56.
Nand t’a Zeezi vʋʋg a Zayirus bi-puglã, a yeela a Zayirus yaa: “Ra maan dabeem ye. Fo we n tall tẽebo.” (Ges-y vɛrse 50.) Wãn to la y sẽn tẽed kũum vʋʋgrã tõe n sõng yãmba, . . .
y ned sã n wa maan kaalem?
y sã n wa be yell sẽn tõe n tũ ne y yõor taoore?
Ges-y VIDEO wã, tɩ rẽ poor bɩ y leok sokrã.
A Felisiti roagdbã sẽn tẽed kũum vʋʋgrã, wãn to la rẽ bels-ba, la keng b raoodo?
NEB KẼER SẼN YETE: “Yaa toog ne maam tɩ m tẽ tɩ sẽn ki-bã na n vʋʋgame.”
Yãmb tagsg yaa wãn ne rẽ?
Biiblã vɛrse-bʋg la y tõe n tik n wilg tɩ kũum vʋʋgr na n zĩndame?
KƲMSGO
Biiblã pʋgẽ, b pʋlmame tɩ neb milyaar-dãmb sẽn ki na n vʋʋgame. A Zeova ratame tɩ b le vɩɩmde. A kõo a Zeezi tõog t’a na n vʋʋg-ba.
Lebg-n-gese
Bõe n kɩt tɩ d miẽ t’a Zeova ne a Zeezi yãgdame, n na n vʋʋg sẽn ki-bã?
Yɛ la neb milyaar-dãmbã sẽn na n vʋʋgã na n vɩɩmde: saasẽ bɩ, bɩ tẽngã zugu? Bõe yĩng tɩ y yet woto?
Bõe n kɩt tɩ y kɩs sɩd tɩ y neb nins sẽn maan kaalmã na n vʋʋgame?
BŨMB A TAABA
Bũmb toor-toor y sẽn tõe n maan tɩ keng y raoodo, y ned kaalem poore.
“D ned sã n maan kaalem” (Yʋʋmd 2018 Réveillez-vous ! No a 3)
Sagls nins sẽn be Biiblã pʋgẽ wã sɩd tõe n sõnga ned sẽn paam sũ-sãang bɩ?
Bõe n tõe n sõng biig t’a paam belsgo, a ned kaalem poore?
Neb n na n vʋʋg n kẽng saasẽ bɩ? Nin-bʋs n pa na n vʋʋge?