Ad a sẽn yeele: “Will ning fãa sẽn tão mam zug n yaool n ka womd biisi, m ba kɛɛgd-a lame. La will ning fãa sẽn womd biisi, m ba yosd-a lame t’a tõe n wom biis n paase. . . . A wa reezẽ tɩɩg will sẽn ka tõe n wom biis a toore, a sã n ka kell n tong ne reezẽ tɩɩgã, woto me, yãmb ka tõe n wom biisi, y sã n ka pa mam pʋgẽ ye. Maam la reezẽ tɩɩgã menga, tɩ yãmb ya wilã.”—Zã 15:2-5.

A Zeezi wilga a võore, n yeele: “Ned ning sẽn paad mam pʋgẽ, tɩ mam paad a soab pʋgẽ womda biis wʋsgo. Bala, sã n ka ne maam, yãmb ka tõe n maan bũmb baa fɩ ye.” “Wilã” sẽn makd a karen-biis hakɩɩkã na n woma biis wʋsgo, bala b na n dɩka a Zeezi togs-n-taar n tall zʋg-sõma, la b wɩng ne Wẽnnaam Rĩungã koɛɛg moonego, la b maan karen-biisi. La ned sã n bas a Zeezi, n pa wom biisi, bõe n na n paam-a? A Zeezi yeelame: ‘Ned sã n ka paad mam pʋgẽ, b na n lob-a-la yɩnga.’ A paasame: “Yãmb sã n pa mam pʋgẽ, tɩ mam goamã pa yãmb pʋgẽ, bɩ y kos bũmb ning fãa y sẽn data, la b na kõ yãmba.”—Zã 15:5-7.