• A Zeova nonga neb nins sẽn “womd biis ne sũ-marã”
    Gũusg Gasgã (Zãmsgã rẽnda)—2018 | Sig-noy kiuugu

    • 7. a) A Zeezi yel-bũndã pʋgẽ, “reezẽ tɩɩgã koaadã,” “reezẽ tɩɩgã,” la “wilã” makda ãnd dãmba? b) Sok-bʋg la d segd n bao n leoke?

      7 Karm-y Zã 15:1-5, 8. Tẽeg-y t’a Zeezi yeela a tʋm-tʋmdbã yaa: “Yãmb sã n wom biis wʋsgo, m ba na n paama waoogre, la yãmb na n yɩɩ mam karen-biisi.” A wilgame tɩ “reezẽ tɩɩgã koaadã” makda a Zeova, tɩ yẽ yaa “reezẽ tɩɩg meng-mengã,” la t’a karen-biisã la “wilã.”b Woto wã, biis nins Kiristã karen-biisã sẽn segd n womã yaa bõe? Yel-bũndã pʋgẽ, a Zeezi pa wilg rẽ vẽeneg ye. La a togsa bũmb sẽn tõe n sõng-d tɩ d bãnge.

      8. a) A Zeezi yel-bũndã pʋgẽ, bõe yĩng tɩ biisã womb pa tõe n mak karen-biisã maanego? b) Bõe la d mi a Zeova sẽn dat tɩ d maanã wɛɛngẽ?

      8 A Zeezi goma bũmb a Ba wã sẽn na n maan yelle, n yeel yaa: ‘Will ning fãa sẽn tão mam zug n yaool n ka womd biisi, m ba kɛɛgd-a lame.’ Rat n yeelame tɩ yaa tõnd sã n womd biis bal la wilgd tɩ d tũuda a Zeova. (Mat. 13:23; 21:43) Dẽnd yel-bũndã pʋgẽ wã, biisã womb pa makd karen-biisã maaneg ye. (Mat. 28:19) Sã n pa rẽ, na n yɩɩ wa wil nins sẽn pa womd biisã makda a Zeova Kaset rãmb nins sẽn pa tõog n sõng ned t’a lebg a Zeezi karen-biigã. La tagsg a woto pa zemse ye! Bala, d pa tõe n modg ned t’a lebg a Zeezi karen-biig ye. A Zeova yaa nonglem. A pa na n tol n yeel tõnd tɩ d maan bũmb sẽn yɩɩd d pãng ye. Wakat fãa, a sẽn yet tõnd tɩ d maanã zemsda d panga.—Tõo. 30:11-14.

      9. a) Yaa d sã n tʋʋmd tʋʋm-bʋg la d womd biisi? b) Bõe yell la d na n gom masã?

      9 La biis nins d sẽn segd n womã yaa bõe? Yaa vẽeneg tɩ tog n yaa bũmb tõnd fãa sẽn tõe n maane. Tʋʋm-bʋg la a Zeova kõ sẽn tũud-b yẽ wã fãa? Yaa Wẽnnaam Rĩungã koe-noogã moonego.c (Mat. 24:14) A Zeezi yel-bũnd ning pʋgẽ a sẽn gom ned sẽn fẽrgd bõn-buud yellã wilgda rẽ vẽenega. Bɩ d gom yel-bũn-kãng yell masã.