SAK 23

Y sã n modg n wa reeg lisgu, y na n paama bark wʋsgo!

B sẽn ẽnprimi

A Zeezi wilgame tɩ ned sã n dat n lebg yẽ karen-biiga, yaa tɩlɛ t’a reeg lisgu. (Karm-y Matiye 28:19, 20.) La reeg lisg rat n yeelame tɩ bõe? Bõe la ned segd n maan n wa tõog n deeg lisgu?

1. Reeg lisg rat n yeelame tɩ bõe?

Gɛrk gom-bil ning b sẽn lebg tɩ “lisã” võorã yaa “bõr koomẽ.” A Zeezi sẽn wa n na n deeg lisgã, b bõr-a-la Zʋrdẽ kʋɩlgã pʋgẽ. Rẽ poore, a ‘yii koomẽ wã.’ (Mark 1:9, 10) Woto me, b sã n na n lis ned t’a lebg kiris-ned hakɩɩka, b lisd-a-la zãnga, bɩ b bõrd-a-la koomã pʋgẽ.

2. Ned sã n deeg lisgu, wilgda bõe?

Ned sã n deeg lisgu, a wilgdame t’a rɩka a meng n kõ Wẽnnaam a Zeova. Wãn to la ned rɩkd a meng n kõ Wẽnnaam? Nand tɩ ned reeg lisgu, a segd n pʋʋsa a Zeova yẽ a yembre, n yeel-a t’a rat n tũ-a-la wakat fãa yĩnga. A pʋlemdame t’a na n waooga a Zeova a ye tãa, la tɩ bũmb ning sẽn na n tall yõod n yɩɩd ne-a yaa Wẽnnaam daabã maanego. A yãka yam n na n “kɩɩs a mengã raabo,” la a kell n tũ bũmb ning a Zeezi sẽn zãms nebã, la a rɩk a togs-n-taare. (Matiye 16:24) A sẽn dɩk a meng n kõ a Zeova n deeg lisgã kɩtame t’a tõe n paam zood sõma ne a Zeova, la ne a tẽed-n-taasã.

3. Bõe la ned tog n maan n yaool n tõog n deeg lisgu?

Nand tɩ y tõog n deeg lisgu, tara yõod tɩ y bao n bãng a Zeova, la y bɩɩs y tẽebã. (Karm-y Ebre-rãmb 11:6.) Y bãngrã la y tẽebã sã n paasdẽ, y sẽn nong a Zeova to-to wã me na n paasdame. Y na n dat n moonda koɛɛgã n gomd a yelle, la y tũud a noyã. (2 Tɩmote 4:2; 1 Zã 5:3) Naoor wʋsgo, ned sã n modg t’a sẽn vɩ to-to wã ‘waoogd a Zeova, tɩ tat a yam zãnga,’ a yãkda yam n dɩk a meng n kõ Wẽnnaam, n deeg lisgu.—Kolos rãmbã 1:9, 10.a

D BAO N BÃNG N PAASE

D ges a Zeezi sẽn deeg lisgã sẽn sõngd tõnd tɩ d bãng bũmb ninga, la ned sẽn tõe n segl a meng to-to n wa reeg lisgu.

4. A Zeezi lisgã sẽn sõngd tõnd tɩ d bãng bũmb ninga

Karm-y Matiye 3:13-17, n bãng a Zeezi lisgã sẽn yɩ to-to wã. Rẽ poor bɩ y leok sogsgã:

B sẽn wa n na n lis a Zeezi wã t’a ra yaa bi-pɛɛlg bɩ?
Wãn to la b lis-a? Yaa koom la b yãk n mes-a bɩ?

A Zeezi sɩnga tʋʋmd ning Wẽnnaam sẽn kõ-a t’a tʋm tẽngã zugã, a lisgã poore. Karm-y Luk 3:21-23 la Zã 6:38, tɩ rẽ poor bɩ y leok sokrã:

A Zeezi lisgã poore, tʋʋm-bʋg n da pak-a n yɩɩda?

5. Y tõe n modgame n wa reeg lisgu

Sɩngrẽ wã, y tõe n getame tɩ rɩk y meng n kõ Wẽnnaam n deeg lisgã yaa toog wʋsgo. La y sã n kell n zãms Biiblã, y na n bãnga a Zeova sõma, n wa tõog n dɩk y meng n kõ-a n deeg lisg n pa yɛɛs ye. Sẽn na yɩl n bãng neb kẽer sẽn maan dẽ to-to, bɩ y ges VIDEO wã.

VIDEO: Y sẽn tõe n paas yãmb ne a Zeova zoodã pãng to-to (1:11)

Karm-y Zã 17:3 la Zak 1:5, tɩ rẽ poor bɩ y leok sokrã:

Wãn to la ned tõe n segl a meng n wa reeg lisgu?

A. Pag sẽn pʋʋsd Wẽnnaam n na n dɩk a meng n kõ-a.

B. Pʋg-kãng sẽn deegd lisg n na n lebg a Zeova Kaset soaba.

Rɩk f meng n kõ a Zeova yaa f sẽn na n yeel-a tɩ f na n tũ-a-la wakat fãa yĩnga
D lisgã sasa, d wilgda nebã taoor tɩ d rɩka d meng n kõ Wẽnnaam

6. Ned sã n deeg lisgu, a lebgda a Zeova zakã neda

Ned sã n deeg lisgu, a lebgda a Zeova zakã neb sẽn be dũniyã gill zugã neda. Baa d sẽn yit tẽns toor-toore, tɩ d yɛlã me yaa toor-toorã, bũmb nins d sẽn tẽedã, la noy nins d sẽn tũudã fãa yaa a ye. Karm-y Yel-bũn 3:32 la 1 Pɩyɛɛr 2:17, tɩ rẽ poor bɩ y leok sokrã:

Sã n yaa ne vɛrse-kãensã sẽn yetã, ned sã n deeg lisgu, wãn to la nafd-a?

Fot-rãmbã: Pag sẽn deeg lisg sẽn tagsd yẽ ne tigingã neb a taabã sẽn noom ne taab to-to wã yell t’a sũur noomẽ. 1. A sẽn togsd saam-bi-poak a sũur gomde. 2. A sẽn sõngd saam-bi-poak sẽn kʋʋl t’a kẽnda. 3. A sẽn naag a zo-rãmb yʋʋm sẽn yaa toor-toor n dɩtẽ. 4. A sẽn moond koɛɛgã ne saam-bi-poak a to. 5. A sẽn naag saam-bi-pogs a yiib sẽn yaa buud toɛy-toɛy neb n dat n yõk fot tigis-kãseng sasa.

NEB KẼER SẼN YETE: “Mam nan pa segl n sa n na n deeg lisg ye.”

Sã n yaa woto ne yãmb me, y tagsdame tɩ yɩta sõma tɩ y modg n wa reeg lisg bɩ?

KƲMSGO

A Zeezi wilgame tɩ ned sã n dat n lebg yẽ karen-biiga, yaa tɩlɛ t’a reeg lisgu. Ned sã n dat n wa reeg lisgu, a segd n bɩɩsa a tẽebã, n tũud a Zeova noyã, la a rɩk a meng n kõ-a.

Lebg-n-gese

Reeg lisg rat n yeelame tɩ bõe, la bõe yĩng tɩ rẽ tar yõodo?
Bõe yĩng tɩ rɩk f meng n kõ Wẽnnaam la lisgã reegr tar yõodo?
Bõe la ned segd n maan n yaool n dɩk a meng n kõ Wẽnnaam n deeg lisgu?

Zãmsgã saab daare:

M sẽn tõe n maane

Ges babg a 4 baasgẽ wã, zĩig ning b sẽn gʋls tɩ “Mam segl n saame n na n naag tigingã neb n moon bɩ?” la “Mam segl n saame n na n deeg lisg bɩ?” wã, n bãng bũmb ning sẽn ket y sẽn segd n maane.

Bũmb a to:

Bũmb a to y sẽn dat n maane

BŨMB A TAABA

Reeg lisg sẽn dat n yɛɛlga, la sẽn pa rat n yɛɛlga.

“Reeg lisg rat n yeelame tɩ bõe?” (Bee jw.org)

Bũmb toor-toor ned sẽn tõe n maan n wa tõog n deeg lisgu.

“Ned sã n nong a Zeova la a rat n pʋʋs-a barka, a reegda lisgu” (Yʋʋmd 2020 tʋʋlg kiuug Gũusg Gasgã)

Bũmb ning sẽn kɩt tɩ rao a ye yãk yam n deeg lisgu.

“B sẽn da rat yaa m sak n deeg tɩ Biiblã sẽn yetã la sɩda” (Yʋʋmd 2013 wao-fugdg kiuug pipi daar Gũusg Gasgã)

Bõe yĩng tɩ lisgã reegr tar yõodo, la bõe la y tõe n maan n segl y meng n wa tõog n deeg lisgu?

“M segd n deega lisg bɩ?” (Les jeunes s’interrogent. Réponses pratiques [volume 2], chapitre 37)

a Ned sã n da zoe n deega lisg tũudum a to pʋgẽ, a segd n le reega lisgu. Bõe yĩnga? Bala, tũudum-kãng pa zãmsd nebã sɩdã sẽn be Biiblã pʋgẽ wã ye.—Ges-y Tʋʋm 19:1-5 la seb-kãngã sak 13.