8, 9. A Poll so-toakã sẽn yɩ to-to wã wilgda tõnd bõe?

⁸ Sagl-bʋg la kiba-kãngã kõt tõndo? Yaa a Poll sẽn wa n dɩk sor n na n kẽng Aazi wã bal la vʋʋsem sõngã yaool n sɩng-a sor-wilgri. Leb n yaa a Poll sẽn wa n kolg Bitini wã bal la a Zezi yaool n le wilg-a sor ne vʋʋsem sõngã maasem. Sẽn na n baase, yaa a Poll sẽn ta Torwasã bal la a Zezi yaool n yeel-a t’a segd n sãaga Masedoan. A Zezi sẽn yaa tigingã Zusoabã tõe n maana woto me ne tõnd rũndã-rũndã. (Kol. 1:18) Wala makre, y tõe n magdame n dat n lebg so-pakda, wall y rat n kẽng n tɩ moon koɛɛgã zĩig koe-moondbã sẽn pa waooge. La tõe tɩ yaa y sẽn na n wa maan bũmb takɩ sẽn na yɩl n pids y magbã bal la a Zezi na n yaool n wilg-y sor ne Wẽnnaam vʋʋsem sõngã maasem. D rɩk makre: Mobill sã n yas zĩ-yɛnga, rẽ yĩnga a sofɛɛrã tõe n wẽn-a lame t’a kẽng goabg wall rɩtg sɩda? Yaa tõnd me sã n wa maand bũmb n dat n yalg d koe-moonegã bal la a Zezi na n yaool n wilg tõnd d sẽn tog n maanega.

10. Bõe n wilgd tɩ sẽn na yɩl n tõog n ket n gũudẽ, pʋʋsgã yaa tɩlae?

¹⁰ Masã, bɩ d bao n bãng saglg a yiib-n-soab pipi kiris-nebã mak-sõngã sẽn kõt tõnd gũubã wɛɛngẽ wã: B ra gũudame la b wɩngd ne pʋʋsgo. (1 Pɩɛ. 4:7) Yɩl n tõog n ket n gũudẽ, pʋʋsgã yaa tɩlae. Tẽeg-y tɩ nand tɩ b wa yõk a Zezi Gɛtsemane tɩɩsẽ wã, a yeela a tʋm-tʋmdb a tãab woto: ‘Bɩ yãmb gũ la y pʋʋse.’—Mat. 26:41.