20, 21. Yel-bʋs pʋsẽ la saam-biis sẽn yi Rom keng tʋm-tʋmd a Poll pɛlga?

²⁰ Sẽn be yamleoog n yɩɩd yaa kɩbay nins sẽn wilgd a Zeova sõgen dãmbã sẽn tõog n kõ taab pãng la b keng taab raood to-to wã. Ges-y makr a yembr sẽn tɩ loe ne tʋm-tʋmd a Polle. B sẽn da yõk a Poll n debd Rommã, a tũu Rom sor ning b sẽn boond tɩ Appius sorã. Sẽn tɩ yɩɩd fãa, so-toakã yaoolem babg ra pa be yamleoog lae-lae ye, bala so-toagdbã ra segd n pasga bãoogo.a Rom tigingã saam-biis ra miime t’a Poll watame. Bõe la b ra na n maane? B ra na n kell n paa b ro-neebã pʋsẽ hal t’a Poll wa wa tɩ b yaool n tɩ pʋʋs-a bɩ?

²¹ Biibl gʋlsd a Luk sẽn yãag a Poll a so-toakã sasa wã yeta tõnd bũmb ning sẽn maanã: “Ba-biisa sẽn be Rom sẽn wʋm tõnd kɩbare, bãmb wa n sega tõnd tẽns sẽn boond tɩ Apiyus Forum ne Troa-Tavɛrn.” Y tõe n mams n gesa yɛlã sẽn yɩ to-to wã bɩ? Saam-biisã sẽn da mi t’a Poll watame wã yĩnga, b yãka saam-biis tɩ b yi Rom n na n tɩ seg-a. Sẽn wa-bã kẽer da gũuda Apiyus raagẽ wã, sẽn yaa sik zĩig b sẽn mi sõma sẽn zems kɩlometr 74 ne Rommã. Saam-biis a taabã ra gũuda Troa-Tavɛrn, sẽn yaa sik-zĩig sẽn zãr ne galʋ-tẽngã ne kɩlometr 58 wã. A Poll manesem yɩɩ wãn to? A Luk yeelame: “A Poll sẽn yã bãmba, yẽ pʋʋsa Wẽnnaam bark n keng a [meng] sũuri.” (Tʋʋma 28:15) Mams-y n gese: A Poll sẽn yã saam-biisã sẽn da modg n tog so-wok kãngã fãa wã, kenga a raoodo, la yɩɩ belsg n kõ-a! La yaa ãnd soab la a Poll pʋʋs bark sõng-kãngã yĩnga? A pʋʋsa Wẽnnaam a Zeova, a soab ning nengẽ sõngrã sẽn yitẽ wã barka.