SAK 22
Wãn to la y tõe n taas neb a taabã koe-noogã?
Y sẽn zãmsd sɩdã sẽn be Biiblã pʋgẽ wã, y tõe n wa tagsdame yaa: ‘Ned buud fãa segd n bãnga yãoã.’ Yaa sɩda, ned buud fãa segd n bãnga yãoã! Baasgo, y tõe n yɛɛsda ne y togs neb a taabã bũmb nins y sẽn zãmsdã. Bɩ d bao n bãng y sẽn tõe n maan to-to n tõog y rabeemã, n sɩng koe-noogã sẽn be Biiblã pʋgẽ wã mooneg ne sũ-noogo.
1. Wãn to la y tõe n wilg y mitinsã bũmb nins y sẽn zãmsdã?
A Zeezi karen-biisã ra yeelame yaa: “Tõnd pa tõe n bas n pa gom bũmb nins tõnd sẽn yã la d wʋmã yell ye.” (Tʋʋma 4:20) B ra nonga bũmb nins b sẽn zãms a Zeezi nengẽ wã, hal n dat n togs rẽ nebã fãa. Yaa woto yãmb me nengẽ bɩ? Sã n yaa rẽ, bɩ y bao segb buud fãa n paam n gom bũmb nins y sẽn zãmsdã yell ne y zakã rãmba, la y zo-rãmbã ne waoogre.—Karm-y Kolos rãmb 4:6.
Y sẽn tõe n sɩng to-to
Y sã n wa sõsd ne y zakã rãmba, bɩ y gom Biiblã yelle. Y sã n na n sɩnge, y tõe n yeelame: “Mam bãnga bũmb semen-kãngã tɩ yɩ-m noogo.”
Karm-y vɛrse sẽn kengd raood tɩ y zoa sẽn ka laafɩ, wall sẽn maand yɩɩr kelge.
Y tʋmd-n-taag sã n sok yãmb y wɩkɛnnã sẽn yɩ to-to, bɩ y togs-a bũmb y sẽn bãng y Biiblã zãmsg sasa, wall tigsg sasa.
Wilg-y y zo-rãmbã jw.org sɩtã.
Mi-y n bool-y neb a taab tɩ b wa naag-y y Biibl zãmsgã sasa, wall y wilg-b b sẽn tõe n kos Biibl zãmsg to-to jw.org pʋgẽ.
2. Bõe yĩng tɩ yaa sõma tɩ y bao n naag tigingã n moone?
A Zeezi karen-biisã ra pa taasd neb nins b sẽn mi wã bal koe-noogã ye. A Zeezi ‘tʋm-b-la yiib-yiib tɩ b reng yẽ taoor n kẽng tẽns fãa pʋsẽ’ n tɩ moon koɛɛgã. (Luk 10:1) A sẽn sigl koɛɛgã mooneg woto wã sõngame tɩ neb wʋsg paam n wʋm koe-noogã. Karen-biisã sẽn naag taab n moon koɛɛgã me, kõ-b-la sũ-noog wʋsgo. (Luk 10:17) Yãmb me tõe n baoome n naag tigingã neb n moond koɛɛgã bɩ?
D BAO N BÃNG N PAASE
D ges y sẽn tõe n maan to-to n tõog y rabeemã, n paam n moond koe-noogã ne sũ-noogo.
3. A Zeova na n zĩnda ne yãmba
Neb kẽer sẽn dat n moon koɛɛgã tõe n yɛɛsda neb a taabã sẽn na n ges-b to-to, wall b manesem sẽn na n yɩ a soaba.
Yãmb yɛɛsda ne y togs neb a taabã bũmb nins y sẽn zãmsdã bɩ? Bõe yĩnga?
Ges-y VIDEO wã, tɩ rẽ poor bɩ y leok sokrã.
Bõe la kom-bi-kãensã sẽn yaa a Zeova Kaset rãmbã maan n tõog b rabeemã?
Karm-y Ezayi 41:10, tɩ rẽ poor bɩ y leok sokrã:
Y sã n wa yɛɛsd ne koɛɛgã moonego, wãn to la pʋʋsgã tõe n sõng-yã?
Yãmb miime bɩ?
A Zeova Kaset rãmb wʋsg ra tagsdame tɩ b pa na n tol n tõog n taas neb a taabã koe-noogã ye. Ra yaa woto ne a Sɛrze. A ra yaa ned sẽn da pa nand a menga, la sẽn da pa tõe goam. A wa n sɩnga Biiblã zãmsgo. Ad a sẽn yeele: “Baa mam sẽn zoet rabeemã, m sɩngame n togsd neb a taabã bũmb nins m sẽn zãmsdã. Sɩd-sɩdã, mam sẽn gomd ne neb a taabã Biiblã yellã kɩtame tɩ m nand m meng masã, hal tɩ ling mam mengã. Sẽn paase, mam sẽn da togsd nebã bũmb nins m sẽn tẽedã paasa mam mengã tẽebã pãnga.”
4. Gomd-y ne waoogre
Y sã n wa na n moon koɛɛgã, bɩ y tags bũmb nins yell y sẽn na n yeelã, la y sẽn na n yeel rẽ to-to wã me. Karm-y 2 Tɩmote 2:24 la 1 Pɩyɛɛr 3:15, tɩ rẽ poor bɩ y leok sogsgã:
Y sã n wa moond koɛɛgã, wãn to la y tõe n tũ vɛrse-kãensã sẽn yetã?
Y zakã neb wall y zo-rãmb kẽer tõeeme n pa sak n deeg y goamã ye. Sã n wa yaa woto, bõe la y tõe n maane? Bõe la y pa segd n maane?
Bõe yĩng tɩ yaa sõma tɩ y sok-b sogsg sẽn na n kɩt tɩ b tagse, n yɩɩd y sẽn na n togs-b bũmb nins b sẽn segd n tẽ wã bala?
5. Koe-noogã mooneg kõta sũ-noogo
A Zeova ra yeela a Zeezi t’a moon koe-noogã. A Zeezi tagsg ra yaa wãn ne tʋʋm-kãngã? Karm-y Zã 4:34, tɩ rẽ poor bɩ y leok sogsgã:
D sã n dɩt rɩ-noodo, kõta yĩns laafɩ, la kɩtdẽ me tɩ d sũur noomẽ. Bõe yĩng t’a Zeezi mak Wẽnnaam daabã maanego, wala makre, koe-noogã mooneg ne rɩɩbo?
Bõe yĩng tɩ koe-noogã mooneg tõe n kõ yãmb sũ-noogo?
Saglse
Semennã pipi tigsgã sasa, bɩ y gũus n ges y sẽn tõe n sɩng sõsg ne ned to-to.
Kos-y y karen-saambã t’a wilg-y y sẽn tõe n maan to-to n wa paam n naag karen-biis nins sẽn kẽesd b toog tigis-kãng pʋgẽ wã. Y sã n kẽesd y toog tigis-kãng pʋgẽ, na n sõng-y lame tɩ y segl y meng n tõog n togs neb a taabã bũmb nins y sẽn zãmsdã.
Ges-y zĩis nins b sẽn gʋls tɩ “Neb kẽer sẽn yete,” wall “Nina tõe n sokame yaa” wã sẽn be seb-kãngã pʋgẽ wã, n bao n bãng y sẽn tõe n leok sogsg nebã sẽn wae n sokdẽ to-to, la bũmb kẽer b sẽn yete.
NINA TÕE N SOKAME YAA: “Yaa kiba-bʋg n be?”
Wãn to la y tõe n tũnug ne rẽ, n wilg a soabã bũmb y sẽn bãng Biiblã zãmsg pʋgẽ?
KƲMSGO
Koe-noogã mooneg kõta sũ-noogo. Sẽn paase, koɛɛgã mooneg tõeeme n pa yɩ toog wa y sẽn tagsdã ye.
Lebg-n-gese
Bõe yĩng tɩ d segd n taas neb a taabã koe-noogã?
Wãn to la y tõe n taas ned koɛɛgã ne waoogre?
Y sã n yɛɛsda ne koɛɛgã moonego, bõe n tõe n sõng-y tɩ y tõog y rabeemã?
BŨMB A TAABA
Manesem a naas sẽn tõe n sõng-y tɩ y taas ned koe-noogã ne jw.org kartã maasem.
Zʋg-sõma a naas sẽn tõe n sõng-y tɩ y moon koe-noogã.
Biiblã kibar sẽn tõe n sõng-y tɩ y paam raood n moon koe-noogã, baa y sã n ket n paoodẽ.
Y sẽn tõe n gom Biiblã yell to-to ne y zakã neb nins sẽn nan pa mi a Zeova wã.