SAK 10
Y sã n kẽnd a Zeova Kaset rãmbã tigissã, wãn to la na n naf-yã?
B zoe n boola yãmb tɩ y wa a Zeova Kaset rãmbã tigsg bɩ? Y sã n nan zɩ n kẽnge, tõe tɩ sẽn na n yɩ y pipi wã, y yɛɛsdame. Tõe tɩ y sokda y menga: ‘Bõe la b maand tigissã sasa? Bõe yĩng tɩ tigissã tar yõodo? Bõe yĩng tɩ m segd n kẽnge?’ Sag-kãngã pʋgẽ, y na n bãnga tigissã kẽnd sẽn tõe n paas yãmb ne Wẽnnaam zoodã to-to, la sẽn tõe n naf yãmb mengã to-to.
1. Bõe yĩng t’a Zeova Kaset rãmbã tigimd taaba?
Biibl-gʋlsd a ye wilga bʋʋm-kãseng ning sẽn kɩt tɩ d segd n tigimd taabã. A yeelame yaa: “Mam na n pʋʋsa Sẽn-Ka-Saab barka, nebã tiging pʋga.” (Yɩɩn-sõamyã 26:12) A Zeova Kaset rãmbã me tigimda taaba, tɩ kõt-b sũ-noog wʋsgo. Dũniyã gill zugu, b tigimda taab semen fãa n pẽgd Wẽnnaam, n yɩɩndẽ la b pʋʋsdẽ. Yʋʋmdã pʋgẽ, b tara tigis-kãsems a wãn me.
2. Yãmb sã n wat tõnd tigissã, bõe la y na n bãnge?
D tigissã sasa, yaa Wẽnnaam Gomdã la d karemda, la d “bilgd a võorã tɩ ned kam wʋmd b sẽn karmã sẽn dat n yeel a soaba.” (Karm-y Neemi 8:8.) Y sã n wat tigissã, y na n bãnga a Zeova, la a sẽn yaa Wẽnnaam ning buudã sõma. Y sã n bãngd a sẽn nong-y to-to wã n paasdẽ, yãmb ne yẽ zoodã me pãng na n paasdame. Y leb n na n bãnga a sẽn tõe n sõng-y to-to tɩ y vɩɩmã tall barka.—Ezayi 48:17, 18.
3. Wãn to la y sẽn paamd n naagd neb a taab tigissã sasa wã tõe n naf yãmba?
A Zeova sagenda tõnd tɩ “d tẽegd taab yelle, sẽn na yɩl n sõng taab tɩ d bɩɩs nonglem la d tʋm tʋʋm-sõma,” la tɩ “d ra bas taab tiging” ye. (Ebre-rãmbã 10:24, 25) D tigissã sasa, y na n yãa neb sẽn sɩd baood taab neere, la sẽn dat n bãng Wẽnnaam sõma wa yãmba. Y na n wʋma b sẽn togsd goam sẽn tik Biiblã tɩ kengd raoodo. (Karm-y Rom dãmb 1:11, 12.) Y na n paam n sõsa ne neb sẽn kẽ kãadem la neb sẽn pa kẽ kãadem, n tar sũ-noog baa ne b sẽn maood ne zu-loeesã. Woto yaa bũmb a wãn bal sẽn kɩt t’a Zeova rat tɩ d tigimd taab wakat fãa wã.
D BAO N BÃNG N PAASE
D ges bõe la b maand a Zeova Kaset rãmbã tigissã sasa, la bõe yĩng tɩ tar yõod tɩ d modgd n kẽnd tigissã.
4. A Zeova Kaset rãmbã tigissã
Pipi kiris-nebã ra nong n tigimda taab n waoogd a Zeova. (Rom dãmbã 16:3-5) Karm-y Kolos rãmb 3:16, tɩ rẽ poor bɩ y leok sokrã:
Wãn to la pipi kiris-nebã ra waoogd a Zeova?
Rũndã-rũndã me, a Zeova Kaset rãmbã tigimda taab b tigissã rotẽ. Sẽn na yɩl n bãng b sẽn maand b tigissã to-to wã, bɩ y ges VIDEO wã. Rẽ poor bɩ y ges fotã sẽn wilgd b sẽn maand tigsga, la y leok sogsgã.
Bõe la yãmb yã a Zeova Kaset rãmbã tigsgã zĩigẽ, tɩ wõnd bũmb nins y sẽn karem Kolos rãmb 3:16?
Video wã pʋgẽ, wall fotã zugu, yãmb yãa bũmb a to sẽn noom yãmb tigissã wɛɛngẽ bɩ?
Karm-y 2 Korẽnt rãmb 9:7, tɩ rẽ poor bɩ y leok sokrã:
Bõe yĩng t’a Zeova Kaset rãmbã pa kot nebã ligd b tigissã sasa?
Naag-y y karen-saambã, tɩ y ges bũmb nins yell b sẽn na n gom semen-kãngã tigsg a ye sasa.
Bũmb nins yell b sẽn na n gom tigsgã sasa wã sʋka, y tagsdame tɩ bʋg n na n yɩ-y noogo, wall naf-y n yɩɩda?
Yãmb miime bɩ?
Y sã n kẽ jw.org pʋgẽ, y tõe n yãa zĩis nins la wakat nins b sẽn maand tigissã dũniyã gill zugã.
A. Tõnd tigissã sasa, d kelgda sõssa, la d get mak-n-wilg toor-toor la video-rãmba. Tigissã sɩngda ne yɩɩll la pʋʋsgo, n baasd ne yɩɩll la pʋʋsgo
B. Tigissã babs kẽer sasa, nebã tõe n kẽesa b toogo
D. Neb buud fãa tõe n waame: Pagba, rapa, kãsemb la kamba
E. A Zeova Kaset rãmbã tigissã pa yaood ye. D tigissã sasa, d pa pɩʋʋgd ne lepr n kos ligd ye
5. Tigissã kẽnd baooda modgre
D gom a Zeezi roagdbã mak-sõngã yelle. Yʋʋmd fãa, b ra segd n kẽna kɩlo koabga, n dʋʋg tãms n yi Nazarɛt n kẽng Zerizalɛm wẽnd-doogẽ wã. Karm-y Luk 2:39-42, tɩ rẽ poor bɩ y leok sogsgã:
Yãmb tagsdame tɩ tog sor n kẽng Zerizalɛmmã ra baooda modgr bɩ?
Bõe n tõe n kɩt tɩ tigissã kẽnd yɩ toog ne yãmba?
Yãmb tagsdame tɩ y segd n kẽnda tigissã, baa sã n pa nana bɩ? Bõe yĩnga?
Biiblã pʋgẽ, b yetame tɩ tigissã kẽnd tara yõod wʋsgo. Karm-y Ebre-rãmb 10:24, 25, tɩ rẽ poor bɩ y leok sokrã:
Bõe yĩng tɩ y segd n kẽnd tigissã n pa vaandẽ?
NEB KẼER SẼN YETE: “Pa tɩlɛ tɩ f tigimd ne neb a taab ye. F sã n zãmsd Biiblã f zakẽ, sekame.”
Biiblã vɛrse-bʋg wall a kiba-bʋg n wilgd a Zeova sẽn dat tɩ d maanã?
KƲMSGO
Y sã n kẽnd tigissã, na n sõnga yãmb tɩ y bãng a Zeova n paase, na n paasa yãmb ne yẽ zoodã, la sõng-y tɩ y naag neb a taab n waoog-a.
Lebg-n-gese
Bõe yĩng t’a Zeova sagend tõnd tɩ d tigimd taaba?
Bõe la y na n bãng a Zeova Kaset rãmbã tigissã sasa?
Bõe wɛɛngẽ me la y tagsd tɩ tigissã tõe n naf-y lame?
BŨMB A TAABA
Yãmb yɛɛsda ne tigissã kẽnd bɩ? Ges-y bi-bɩɩg a ye sẽn da yɛɛsd ne tigissã kẽnde, n wa yik n nong tigissã masã.
Bi-bɩɩg a ye sẽn nong tigissã to-to, la a sẽn maan sẽn na yɩl n kẽnd tigissã n pa vaandẽ ye.
Neb kẽer tagsg sẽn yaa a soab ne tigissã kẽnde.
“Bõe yĩng tɩ m tog n kẽnd tigissã Rĩungã roogẽ?” (Bee jw.org)
Rao a ye sẽn da naag bi-bees sull vɩɩm sẽn toeem to-to, a sẽn kẽng a Zeova Kaset rãmbã tigsg poore.
“M da pa yit tɩ m pa zã m bug-raoogã ye” (Yʋʋmd 2014 sẽoog kiuug pipi daar Gũusg Gasgã)