Wẽnnaam yamã pukda a sẽn naanã fãa pʋgẽ

‘Wẽnnaam zãmsda tõnd n yɩɩd rũms sẽn be dũniyã zugu, la a kõt tõnd yam n yɩɩd bõn-yɩgdɩ wã.’—ZOOB 35:11.

BŨMB wʋsg la liuuli wã maanda, tɩ sɩd be yamleoogo. Sẽn maand-b nasaar sɩlsã gesame tɩ liuuli wã sẽn yɩgd to-to wã sɩd bee yamleoogo. Liuuli kẽer yɩgdame n zʋʋg mogrã n kẽng hal kilo tusa n ta zĩig ning b sẽn datẽ wã takɩ.

Bũmb a to me la liuuli kẽer maand tɩ be yamleoog wʋsgo, tɩ sɩd wilgdẽ t’a soab ning sẽn naan-bã tara yam wʋsgo. Yaa b sẽn tõe n yɩɩl la b tar bʋrg n maandẽ n gomd ne taabã. D ges makr a wãna.

Liuuli wã goamã

Liuuli kẽer pʋd n sɩngda goam nand tɩ b nan ket gɛlã pʋsẽ. Wala makre, koadeng buud n be n lobd sẽn na ta gɛl a nii, sẽn dat n yeel tɩ gell a yembr daar fãa. Dẽnd gell a ye n segd n wek daar fãa. Sã n sɩd maanẽ woto, ra na n yɩɩ toog ne b ma wã t’a tõog n ges b fãa yelle. La gɛl a nii wã fãa naagda taab n wek daar a yembre, lɛɛr a yoob pʋgẽ. Bõe yĩng tɩ yaa woto? Bãngdbã wilgame tɩ bʋʋm a ye yaa tɩ nand tɩ gɛlã weke, kambã sẽn be a pʋgẽ wã gomda ne taaba, n zems taab n wek wakat yɛnga.

Liuun-bi wã sã n wa lebg bɛda, nong n yaa raoogã n yɩɩnde. A sã n wa yɩɩndẽ, mi n yaa yãang la a baooda, bɩ a rat n wilga a soolmã tɛka. Liuuli wã fãa yɩɩl pa yembr ye. Woto sõngda yãangã t’a paam raoog sẽn yaa a buudu.

Liuuli wã nong n yɩɩnda yibeoog pĩnda, la wĩndgã sã n wa lʋɩtẽ, bala sasa kãense, zĩigã fãa lebgda sɩɩ, sebgã me pa fugd wʋsg ye. Bãngdbã vaeesame n mik tɩ liuuli wã sã n wa yɩɩnd yibeoog bɩ zaabre, b koeesã zãagdame n yɩɩd b sẽn yɩɩnd wĩndgã hal naoor 20.

Baa ne sẽn yaa raadã n nong n yɩɩndẽ wã, bãmb ne yãansã fãa maanda bʋrg toɛy-toɛya, tɩ bʋrg fãa tar võore. Wala makre, koaab buud n be n tar bʋrg a wɛ b sẽn nong n maande, tɩ yaa toor-toore. B tara bʋrg b sẽn maande, b sã n wa yã bɛ sẽn laand yĩngr n baood n na n maan-b wẽnga. B leb n tara bʋrg b sẽn maande, sã n wa mik tɩ bɛ n be tẽng n dat n maan-b wẽnga.

Kũun sẽn yaa kãsenga

Yam ning Wẽnnaam sẽn kõ liuuli wã sɩd bee yamleoog wʋsgo. La sã n yaa ne goamã wɛɛngẽ, ninsaalbã yɩɩda liuuli wã zĩig sẽn zãre. Zoob 35:11 wã yetame tɩ Wẽnnaam naana ninsaalb n “kõ-b yam n yɩɩd bõn-yɩgdɩ wã.” Yaa ninsaalbã bal la Wẽnnaam naan tɩ b tõe n gom n wilg b sẽn tagsd bũmb ningã ne noor goam la ne bilsgu.

Bi-pɛɛlg tõe n zãmsa buud goam toɛy-toɛya, baa tɩ b zãmsg yaa toogo. Bõn-vɩɩs a taabã yaool n pa tõe n maan dẽ ye. Zʋrnall a ye (American Scientist) yeela woto: “Kom-kɩdsã modgdame n zãms buud gomde, baa tɩ b roagdbã pa gomd ne-b vẽeneg-vẽenega. Kamb nins sẽn dog n yaa mugsã me modgdame n zams b toorẽ muk goama, baa b roagdbã sã n pa zãms-b mugsã goama.”

Yãmb tagsda wãn to Wẽnnaam zug masã?

Yãmb sã n wʋm liuul sẽn yɩɩnd yɩɩn-noog bɩ biig sẽn sɩng goama, y sũur pa noom sɩda? Bũmb nins Wẽnnaam sẽn naanã pa kɩtd tɩ y bãng t’a tara yam wʋsg sɩda?

Yɩɩl-gʋlsd a Davɩɩd sẽn bʋgs Wẽnnaam sẽn naan yẽ to-to wã zug poore, a yeela Wẽnnaam woto: “Mam pʋʋsda yãmb bark bõn-kãsems a woto yĩnga. Mam wẽnda [yel-solemde, NW ], yãmb tʋʋmã yaa bõn-bãna.” (Yɩɩl Sõamyã 139:14) Yãmb sã n bʋgsd Wẽnnaam yamã sẽn puk bũmb nins a sẽn naanã pʋgẽ wã zugu, y na n kɩsa sɩd n paas t’a tõe n wilg-y-la sor tɩ naf-yã.

Ãdsã wilgdame tɩ Wẽnnaam tara pãnga

“Zẽk-y y nens yĩngr n gese. Yaa ãnda n naan ãdsã la a mi b sõore; la a pʋd bãmb fãa b yʋya? Yaa bãmb pãn-kãsengã ne b noorã yĩng n kɩt tɩ bãmb fãa beẽ.”—EZAI 40:26.

WĨNTOOGÃ bedrem pa ta ãds kẽer ye. La a bedrmã yɩɩda tẽngã naoor 330 000. Ãds wʋsg sẽn pẽ tẽngã bedrem pa ta wĩntoogã ye. La kẽer bedrem yɩɩda wĩntoogã sẽn na ta naoor 27.

Wĩntoogã tʋʋlmã taa zĩ-bʋgo? Mams-y n ges bugum sẽn na n be kilo 15 zĩigẽ, t’a tʋʋlmã yaool n tat yãmb ka. Wĩntoogã bee kilo milyõ 150 zĩigẽ. Baa ne rẽ, d fãa mii a sẽn zabd to-to tʋʋlgã sasa. La yaa d bãng t’a tʋʋlmã fĩi-fĩi bal la sẽn tat tẽngã zugã. Baa ne rẽ, a seka a na sõng bõn-vɩɩsã la tɩɩsã tɩ b tõe n vɩɩmde.

Bãngdbã geelame n mik tɩ wĩntoogã tʋʋlmã seka a na zã tõnd tẽngã buud bãmb tus ka tɛka.

Wĩntoogã yaa bedre, la a sẽn yiisd tʋʋlem ningã yaa wʋsgo. Bãngdbã wilga ẽntɛrnetã pʋgẽ tɩ baa wĩntoogã sã n bas n pa kõt a tʋʋlmã, na n maana yʋʋm milyõ 50 tɩ ninsaalbã sẽn be tẽngã zugã pa bãng tɩ bũmb n maan ye.

Zĩigã sã n wa sobg tɩ y zẽk y neng n ges yĩngri, y na n yãa ãds ka tɛka. Bãmb me tʋʋlmã taa wĩntoogã tʋʋlmã. Bãngdbã wilgame tɩ ãdsã yaa wʋsg hal tɩ ninsaal pa tõe n bãng b sõor ye.

Maana wãn tɩ ãdsã fãa wa beẽ? Bãngdb wʋsg tẽedame tɩ ãdsã puka b toor sẽn na maan yʋʋm milyaar 14 la woto. La Biiblã yeta vẽeneg tɩ “hal sɩngr wakate, Wẽnnaam naana saasã la tẽngã.” (Sɩngre 1:1) Vẽenega, d tõe n yeelame tɩ sẽn naan-a wĩntoogã la ãdsã sɩd tara “pãng kãsenga.”—Ezai 40:26.