Y maanda wãn tɩ y zakã pʋgẽ vɩɩm yɩ noogo?​—Pipi babga

Pag ne rao sã n nan kẽ kãadem, b saagdame tɩ sũ-noog ning b sẽn paam b yi-kãadmã daarã na n kaoosa wakat sẽn kõn sa. La yaa bũmb sẽn tõe. Kiris-neb nins sẽn kẽ kãadem hal sẽn kaoose, la sẽn modgd n tũud Biiblã saglsã miime tɩ rẽ tõeeme.

1. Biiblã pʋgẽ, sagl-bʋs la b kõt pʋg-sɩdbã?

A Zeova yãka sɩdã, tɩ yẽ la zakã soaba. (Karm-y Efɛɛz rãmb 5:23.) A Zeova ratame t’a bãngd n yãkd yam sẽn nafd a zakã rãmba. Biiblã pʋgẽ, b yeta sɩdbã yaa: “Kell-y n nong-y y pagbã.” (Efɛɛz rãmbã 5:25) Woto rat n yeelame tɩ bõe? Yaa zakẽ tɩ yaa neb sʋka, rao segd n talla bʋgsem ne a paga. A kogend-a lame la a maand a sẽn tõe fãa n get a yelle, la a getẽ me t’a tar sũ-noogo. (1 Tɩmote 5:8) Sẽn yɩɩd fãa, a geta a tẽebã yelle, n sõngd-a sẽn na yɩl t’a tall zood sõma ne a Zeova. (Matiye 4:4) Wala makre, yẽ ne a pagã tõe n naaga taab n pʋʋse, la b karem Biiblã ne taaba. Rao sã n get a pag yell ne nonglem, kɩtdame tɩ yẽ mengã kell n tall zood sõma ne a Zeova.​—Karm-y 1 Pɩyɛɛr 3:7.

2. Biiblã pʋgẽ, sagl-bʋs la b kõt pagbã?

Wẽnnaam Gomdã pʋgẽ, b yeelame tɩ pag “segd n waoogda a sɩdã ne a sũur fãa.” (Efɛɛz rãmbã 5:33) Wãn to la a tõe n maan rẽ? A tõe n tagsda a sɩdã zʋg-sõma wã yelle, la a sẽn modgd to-to n get yẽ ne b kambã yellã. A sɩdã tũuda a Zeova t’a pa tũud-a me, a wilgdame me t’a waoogd-a lame, a sã n teend-a a yam-yãkr pʋgẽ, n gomd ne-a ne bʋgsem, la a gomd a yell neere.

3. Bõe la pag ne a sɩd tõe n maan n paas b kãadmã pãnga?

Biiblã pʋgẽ, b yeta rao ne pag sẽn kẽ kãadem ne taab wɛɛngẽ yaa: “B yiibã na n yɩɩ yĩng a yembre.” (Matiye 19:5) Woto rat n yeelame tɩ b segd n modgame tɩ baa fʋɩ ra wa kɩt tɩ b pa le nong taab wʋsg ye. B tõogd n maana rẽ, b sã n wae n naagd taab n maand bũmb kẽere, la b pelgd b pʋs n sõsd ne taab ne nonglem, tɩ ned fãa togsd a to sẽn be a sũurẽ. Sã n pa a Zeova bala, b pa segd n bas tɩ bũmb wall ned tall yõod b nifẽ n yɩɩd b to wã ye. B ned kam fãa segd n maana gũusg wʋsgo, n da wa tall zood sẽn pa zems ne ned a to ye.

D BAO N BÃNG N PAASE

4. Pʋg-sɩdba, nong-y y pagbã la y ges b yell neere

VIDEO: Pʋg-​sɩdba, nong-​y y pagbã wa y mense (9:53)

• Togs-y bũmb kẽer rao sẽn tõe n maan n wilg t’a nonga a paga, la a get a yell neere?

Karm-y Kolos rãmbã 3:12, tɩ rẽ poor bɩ y leok sokrã:

• Wãn to la rao tõe n puk zʋg-sõma kãensã a kãadem pʋgẽ?

5. Pagba, nong-y y sɩdbã la y waoogd-ba

Biiblã pʋgẽ, b sagenda pag t’a waoog a sɩda, a tũuda a Zeova t’a pa tũud-a. Karm-y 1 Pɩyɛɛr 3:1, 2, tɩ rẽ poor bɩ y leok sogsgã:

• Y sɩdã sã n pa tũud a Zeova, sãmbg kae tɩ y ratame t’a wa sɩng a tũubu. Yãmb tagsdame tɩ bõe la y tõe n maan tɩ sõng-a n tɩ yɩɩda? Yaa y sẽn na n taasd-a koɛɛgã wakat fãa bɩ, bɩ yaa y sẽn na n modg n tall yel-manesem sẽn yaa sõma ne-a, la y wilgd tɩ y waoogd-a lame? Bõe yĩnga?

Rao ne a pag tagsg sã n yaa a yembr yam-yãkr ning wɛɛngẽ, rẽ yaa sõma. La wakat ninga, pagã tagsg tõeeme n pa yɩ yembr ne a sɩdã ye. Sã n wa yaa woto, a segd n maaga a yĩng n togs a sɩdã a tagsg ne waoogre, la a tẽegd tɩ yaa yẽ la a Zeova yãk t’a tõe n bãng n yãk yam sẽn na n naf zakã rãmb n tɩ yɩɩda. A segd n maana a sẽn tõe fãa n teel-a a yam-yãkrã pʋgẽ. Woto, a sõngdame tɩ zakã rãmb zĩid-n-taarã noomẽ. Karm-y 1 Pɩyɛɛr 3:3-5, tɩ rẽ poor bɩ y leok sogsgã:

• Pag sã n wilgd t’a waoogda a sɩda, a Zeova tagsg yaa wãna?

6. Y tõe n maoo ne y kãadmã pʋgẽ zu-loeese

VIDEO: Pag ne a sɩd sẽn tõe n maan tɩ b zĩid-​n-​taarã yɩ noog n paase (5:44)

• Video wã pʋgẽ, bõe n wilgd tɩ pagã ne a sɩdã ra pa le nong taab wa pĩndã?

• Bõe la b maan n paas b kãadmã pãnga?

Karm-y 1 Korẽnt rãmb 10:24 ne Kolos rãmb 3:13. Vɛrse fãa kareng poore, bɩ y leok sokrã:

• Pag ne a sɩd sã n tũ vɛrse wã sẽn yetã, wãn to la na n paas b kãadmã pãnga?

Biiblã pʋgẽ, b yeelame tɩ d segd n waoogda taaba. Waoog ned rat n yeelame tɩ f tall yel-manesem sẽn yaa sõma ne-a, la f wilgd tɩ f nand-a lame. Karm-y Rom dãmb 12:10, tɩ rẽ poor bɩ y leok sogsgã:

• Pag bɩ a sɩd segd n datame t’a to wã yɩ pipi n waoog yẽ bɩ? Bõe yĩnga?

KƲMSGO

Pag ne a sɩd sã n nong taaba, n waoogd taaba, la b tũud sagls nins sẽn be Biiblã pʋgẽ wã, b paamda sũ-noog b kãadmã pʋgẽ.

Lebg-n-gese

• Bõe la rao tõe n maan tɩ sũ-noog zĩnd a kãadem pʋgẽ?

• Bõe la pag tõe n maan tɩ sũ-noog zĩnd a kãadem pʋgẽ?

• Y sã n kẽe kãadem, sagl-bʋg sẽn be Biiblã pʋgẽ n tõe n sõng-y tɩ y kãadmã pãng paase?

BŨMB A TAABA

Sagls sẽn tõe n sõng-y tɩ sũ-noog zĩnd y zakã pʋgẽ

Yãmb zakã rãmb vɩɩm tõe n yɩɩ noogo (borsiiri)

Mizik sẽn naag ne video sẽn wilgd bark nins pag ne a sɩd sẽn paamde, b sã n tũud Wẽnnaam saglsã b kãadmã pʋgẽ.

Nonglem meng-menga (4:26)

B sẽn yeel tɩ pag segd n saka a sɩd zu-sobendã rat n yeelame tɩ bõe?

“Pagba, bõe yĩng tɩ y segd n sak y sɩdbã zu-sobendo?” (Yʋʋmd 2010 sig-noy kiuug pipi daar Gũusg Gasgã)

Wãn to la sagls nins b sẽn kõ Biiblã pʋgẽ kãadmã wɛɛngẽ wã tõe n sɩd sõng pag ne a sɩda?

Biiblã fãaga tõnd kãadmã (7:12)