Kiris-nebã vɩɩm la b tʋʋma tigissã na-kẽndr not-rãmbã
SIG-NOY RASEM A 6-12
D SẼN BÃNG BIIBLÃ KARENG PƲGẼ | 2 KORẼNT RÃMBÃ 4-6
“Tõnd pa komsd raood n bas ye”
2 Korẽnt rãmbã 4:16; w04-MM 9/1 21 s. 16-17
Tõnd yaame, la pa tẽebã wɛɛngẽ ye
16 Yaa vẽeneg tɩ d tẽebã laafɩ koglg n tar yõod n yɩɩda. D sã n tar zems-n-taar sõma-sõma ne Wẽnnaam a Zeova, yĩnsã wɛɛngẽ d tõe n yaame, la d kõn tol n ya ne a baleng ye. “Ned sã n yɛ, [a Zeova] kõt-a-la pãnga. Ned pãng sã n booge, [a] paasd-a-la pãnga.” (Ezai 40:28, 29) Tʋm-tʋmd a Poll sẽn zoe n yã gom-kãensã pidsg yẽ mengã zugã gʋlsame: “Tõnd ka tadgd ye; la baa tõnd yĩn-kiidsa sã n sãam, tõnd sɩɩga tara manegr daar fãa.”—2 Korẽnt dãmba 4:16.
17 Ges-y tɩ b yeelame tɩ “daar fãa.” Woto baoodame tɩ d rɩt a Zeova seglsã nafa daar fãa. Misioneer a ye sẽn maan yʋʋm 43 a tʋʋmdẽ wã maoa ne yĩngã wɛɛngẽ yaams la sũ-sãamse. La a pa ya tẽebã wɛɛngẽ ye. A yeelame: “Mam minimame n yikd pĩnda, sẽn na yɩl n tõog n pʋʋs a Zeova la m karem a Gomdã, la m yaool n sɩng tʋʋma. Mam sẽn minim woto maaneg daar fãa wã n sõng-m tɩ m mao n tãag rũndã.” N-ye, d sɩd tõe n teega a Zeova t’a sõng-d ne a pãngã, d sã n pʋʋsd-a “daar fãa” la d bʋgsd a zʋg-kãsemsã la a kãabsã zutu.
2 Korẽnt rãmbã 4:17, 18; it-1 759
Sũ-mare
Tõnd sẽn yaa kiris-nebã, d pa segd n yĩm bũmb ning d sẽn saagd n na n wa paamã ye. D na n wa paama d mens ne yel-wẽnã n vɩɩmd wakat sẽn pa sate. Baa ned sẽn namsd tõnd sã n kʋ-do, a pa tõe tɩ d pa paam bõn-kãng ye. (Rom. 5:4, 5; 1 Tes. 1:3; Vẽn. 2:10) D sã n mak namsg ning d sẽn paamd rũndã-rũndã wã ne bũmb ning d sẽn na n wa paamã, d mikdame tɩ pa zem baa fʋɩ. (Rom. 8:18-25) Ne ned ning sẽn tagsd vɩɩm sẽn pa satã yelle, namsg buud fãa “yaa wakat bilf yĩnga, n leb n yaa faasga,” baa a toolmã sẽn yaa to-to. (2 Kor. 4:16-18) Ned sã n ning a yamẽ tɩ namsgã yaa wakat bilf yĩnga, la a tagsd bõn-sõma nins Wẽnnaam sẽn pʋlem kiris-nebã yelle, tõe n sõng-a lame t’a ra wa tẽed t’a yell pa le tar tɩɩm, n pa le maand sɩd ne a Zeova ye.
D bʋgs Wẽnnaam Gomdã zug neere
2 Korẽnt rãmbã 4:7; w12 1/2 28-29 s. a 6-7
“Kɩt-y t’a Zeova sũur yɩ noogo”
A Davɩɩd Splane sẽn yaa Siglgã taoor lʋɩtb Sull nedã wɛgsa gom-zu-kãngã. (2 Korẽnt rãmbã 4:7) Bõn-sõngã yaa bõe? Yaa bãngr wall yam bɩ? Sõsdã leokame: “Ayo. Bõn-sõng ning yell tʋm-tʋmd a Poll sẽn gomã yaa ‘tʋʋm-kãngã’ sẽn yaa ‘kɩt tɩ sɩdã lebgd vẽenegã.’” (2 Korẽnt rãmbã 4:1, 2, 5) Saam-biig a Splane tẽega karen-biisã tɩ kiis a nu wã b sẽn paam zãmsgã yaa sẽn na n segl-b tʋʋmd sẽn yaa zall yĩnga, tʋʋm-kãng pʋgẽ. B segd n talla naneb wʋsg ne tʋʋmd ning b sẽn na n kõ-bã.
Sõsdã wilgame tɩ “tãnd laasã” makda tõnd yĩngã. A wilgame tɩ tãnd laas yaa toor ne sãnem laase. B pa wae n tar sãnem laas n tʋmdẽ ye. La laas nins b sẽn maan ne tãndã yaa tʋʋm yĩnga. D sã n ning bõn-sõng sãnem laag pʋgẽ, d tõe n geta laagã n yɩɩd bõn-sõngã sẽn be a pʋgẽ wã. Saam-biig a Splane paasame: “Yãmb a karen-biisã pa segd n bao tɩ nebã waoog-y ye. Yãmb sẽn yaa misioneer-dãmbã, y segd n sõnga nebã tɩ b waoog a Zeova. Yãmb yaa tãnd laas bala.”
2 Korẽnt rãmbã 6:13; w09-MM 11/1 24 s. a 7
Ket-y n paasd-y y nonglmã ne y saam-biisã
7 La tõnd yẽ? Bõe la d tõe n maan n wilg tɩ d paka d sũyã yaleng n nong d saam-biisã? Neb sã n yaa buud a ye, wall b yaa rog-taase, tõe n yɩɩ nana tɩ b nong taab zĩigẽ la b zemsd taaba. Neb sã n nong bõn-yɛnga, wala makre reem ninga, rẽ me tõe n kɩtame tɩ b nong n tigimd taaba. La yɛl a woto buud sã n kɩt tɩ d nong kiris-neb kẽer bala, n pa baood b taabã zĩigẽ, segdame tɩ d “pak d sũyã yalengo.” Dẽnd tõnd ned kam fãa segd n soka a meng woto: “Koe-moonegã sasa, wall tigingã neb sã n mi n seg taab n na n deem bɩ n maan bũmb a to, yaa m zo-rãmbã bal la m nong n be ne bɩ? La Rĩungã roogẽ yẽ, m modgd n sõsda ne nin-sãamsã me bɩ, bɩ m tagsdame tɩ m pa segd n bao b zood nanda? Rẽ yĩnga m pʋʋsda tigingã nebã fãa, kambã, kom-bɩɩsã la kãsembã fãa bɩ?”
SIG-NOY RASEM 13-19
D SẼN BÃNG BIIBLÃ KARENG PƲGẼ | 2 KORẼNT RÃMBÃ 7-10
“D sõngda d taabã a Zeova waoogr yĩnga”
2 Korẽnt rãmbã 8:1-3; w98 1/11 25 s. a 1
“Wẽnnaam nonga ned ning sẽn kõt ne sũ-noogo”
Pipi, a Poll togsa Korẽnt kiris-nebã Masedoan saam-biisã sẽn kẽes b toog n na n sõng b tẽed-n-taasã tɩ sek pẽgrã. A Poll yeelame: “Baa b sẽn paam toog nams-toaag sasa wã b wilgame tɩ b tara sũ-noogo, la tɩ b yaa kõatb wʋsgo, baa b sẽn yaa naong rãmb wʋsgã.” Masedoan nebã pa gũ tɩ b pẽdg-b ye. A Poll pʋd n yeelame: “Bãmb mens n yãk yam n da bõosd tõnd ne b sũur fãa n dat n paam sor n kõ kũun ne yamleoogo.” D sã n tẽeg tɩ Masedoan nebã ra yaa ‘naong rãmb wʋsgo,’ d yãtame tɩ b sɩd ra yaa kõatb meng-menga.—2 Korẽnt rãmbã 8:2-4.
D sõngda d taabã a Zeova waoogr yĩnga
YƲƲMD 46 a Zeezi rogmã poore, kom n kẽ Zide tẽngã. Koodã ligd rʋʋme, t’a paoong me ra yaa toogo. Zʋɩf-rãmb nins sẽn da tuub n lebg kiris-nebã ra pa tõe n paam dɩɩb ye. Komã ra namsd-b lame hal tɩ yaa nimbãanega. La a Zeova na n maana bũmbu. Sẽn deng rẽ, a ra zɩ n maan a buud n sõng kiris-neb ye. Bõe la a na n maane?
2 Korẽnt rãmbã 8:4; kr 209-210 s. a 4-6
D sõngda d taabã a Zeova waoogr yĩnga
4 Lɛtr a yiib-n-soabã a Poll sẽn tool Korẽnt nebã pʋgẽ, a goma tʋʋm buk a yiib yelle, Wẽnnaam sẽn bobl kiris-nebã. Yaa sɩd tɩ yaa kiris-neb nins sẽn paam vʋʋsem sõngã zaeebã la a Poll tool lɛtrã. La rũndã-rũndã, d tõe n yeelame t’a Poll gomdã paka neb nins a Zeezi sẽn bool t’a “piis a taabã” me. (Zã 10:16) Tʋʋmdã buk a ye yaa “paasg tʋʋmde,” rat n yeel tɩ koɛɛgã mooneg ne nebã zãmsgã. (2 Kor. 5:18-20; 1 Tɩm. 2:3-6) Tʋʋmdã buk a to wã yaa d tẽed-n-taasã “sõngre.” A Poll goma rẽ yell a lɛtrã pʋgẽ. (2 Kor. 8:4) Yaa Gɛrk gom-bil ning sẽn yaa diakonia wã la b sẽn lebg tɩ “tʋʋmde” la b lebg me tɩ ‘sõngrã.’ Bõe yĩng tɩ rẽ bãngr tar yõodo?
5 A Poll sẽn pʋd Gɛrk gom-bi-yɛng zĩis a yiibã fãa wã wilgdame tɩ nebã sõngrã me naaga Wẽnnaam tʋʋm a taabã kiris-nebã sẽn tʋmdã. A pipi lɛtrã pʋgẽ a ra yeelame: ‘Sõngr tʋʋma beeme n yaa toor-toore, la yaa Zu-soab a yembre. . . . Tʋʋma beeme n yaa toor-toore. . . . La yaa sɩɩg sõng a yembr bal n maand bõn-kãense.’ (1 Kor. 12:4-6, 11) Sã n yaa ne a Poll sẽn togsã, tigingã tʋʋm toor-toorã fãa yaa Wẽnnaam waoogr tʋʋma. (Rom 12:1, 6-8) Dẽnd pa lingr la a sẽn da tagsd tɩ rɩk a sẽk n “sõng Wẽnnaam nebã” yaa bũmb sẽn yaa sõma wã ye.—Rom 15:25, 26.
6 A Poll sõnga Korẽnt kiris-nebã tɩ b bãng tɩ nebã sõngrã me yaa tʋʋmd b sẽn tʋmd a Zeova waoogr yĩnga. A sõng-b lame tɩ b bãng tɩ kiris-neb nins sẽn tool sõngrã maana rẽ, b sẽn ‘sakd Kirist koe-noogã’ yĩnga. (2 Kor. 9:13) Sɩd me, kiris-nebã sõngda b tẽed-n-taasã, bala b rat n tũu Kiristã sẽn zãms nebã bũmb ningã. A Poll yeelame tɩ tʋʋm-sõma nins b sẽn tʋmd b tẽed-n-taasã sõngr yĩngã yaa sẽn na yɩl tɩ b bãng “Wẽnnaam bark kãsengã.” (2 Kor. 9:14; 1 Pɩɛ. 4:10) Yʋʋmd 1975 yʋʋm-sar kiuug pipi daar Gũusg Gasgã pʋgẽ, b goma d sẽn sõngd d tẽed-n-taas nins sẽn be sõngr daab pʋgẽ wã yelle. Hakɩɩka, b sẽn yeel bũmb ning be wã yaa sɩda. Ad b sẽn yeele: “Tõnd pa segd n maan sãmb-sãmb tɩ Wẽnnaam a Zeova ne a Biig a Zeezi Kirist nifẽ, nebã sõngr yaa tʋʋmd sẽn tar yõod wʋsg ye.” Sɩd-sɩdã, d tẽed-n-taasã sõngrã yaa tʋʋmd sẽn waoogd Wẽnnaam!—Rom. 12:1, 7; 2 Kor. 8:7; Heb. 13:16.
2 Korẽnt rãmbã 9:7; kr 196 s. 10
D sẽn maand to-to n paamd ligd n tʋmd d tʋʋmã
10 Pipi, d sẽn kõt kũun ne yamleoogã yaa d sẽn nong a Zeova, la d rat n maan ‘sẽn noom-a wã yĩnga.’ (1 Zã 3:22) Sɩd me, sẽn tũud-b a Zeova wã sã n kõt-a kũun ne b sũy fãa, noom-a lame. Bɩ d ges tʋm-tʋmd a Poll sẽn yeel bũmb ning kiris-nebã sẽn kõt kũunã to-to wã wɛɛngẽ. (Karm-y 2 Korẽnt dãmb 9:7.) Kiris-ned hakɩɩk pa kõt ne sũ-toog bɩ ne modgr ye. A sã n wa kõt kũuni, yaa “a sẽn da tags a sũur pʋgẽ.” Woto rat n yeelame t’a reng n gũus n yãa sõngrã raabo, n yaool n tags n ges a sẽn tõe n kõ bũmb ning n sõngã. Ned sẽn maand woto tata a Zeova yam, bala Biiblã yeelame tɩ “Wẽnnaam nonga ned ninga sẽn kõt ne sũ-noogo.” Sebr Sõng pʋgẽ, b yeelame tɩ “sẽn kõt-a ne yamleoog la Wẽnnaam nonga.”
D bʋgs Wẽnnaam Gomdã zug neere
2 Korẽnt rãmbã 9:15; w16.01-MM 12 s. a 2
Bõe la Wẽnnaam ‘kũun ning noor sẽn ka tõe n togsã’ segd n kɩt tɩ d maane?
2 A Poll ra miime t’a Zeezi sẽn ki tɩ yɩ maoongã maasem yĩnga, Wẽnnaam pʋlemsã fãa na n pidsame. (Karm-y 2 Korẽnt-rãmb 1:20.) Rẽnd ‘kũun ning noor sẽn ka tõe n togsã’ paka sore, t’a Zeova na n maan bõn-sõma wʋsg n kõ tõndo, a sẽn nong-dã yĩnga. A na n tũnuga ne a Zeezi n maan bõn-kãense. Kũunã yaa sõma hal wʋsgo, tɩ d pa tõe n paam gom-biis n bilg-a tɩ zems kɛpɩ ye. D sẽn paam kũun-kãngã segd n kɩtame tɩ d maan bõe? La wãn to la a tõe n sõng-d tɩ d segl d mense, n maan a Zeezi kũumã tẽegr yʋʋmd 2016 tʋʋlg kiuugã rasem 23 sẽn yaa arb daarã?
2 Korẽnt rãmbã 10:17; g99 8/7 20-21
Wuk-m-meng yaa wẽng bɩ?
Biiblã babg ning b sẽn da gʋls ne Gɛrkã pʋgẽ, gom-bil ning sẽn yaa kaukhaomai wã b sẽn lebg tɩ “wuk-m-menga, kɩdem sũ-noogo, la pẽg-m-mengã” tõe n bilga manesem sẽn yaa sõma bɩ sẽn pa sõma. Wala makre, a Poll yeelame tɩ “d kɩdem sũ-noogo, d sẽn gũud ziir ning Wẽnnaam sẽn na n kõ-dã yĩnga.” A paasame: “Bɩ ned ning sẽn pẽgd a meng pẽg a meng a Zeova pʋgẽ.” (Rom dãmbã 5:2; 2 Korẽnt rãmbã 10:17) Woto rat n yeelame tɩ d wukd d meng d sẽn paam t’a Zeova yaa tõnd Wẽnnaamã, n kɩdemd sũ-noog a yʋʋrã yĩnga.
SIG-NOY RASEM 20-26
D SẼN BÃNG BIIBLÃ KARENG PƲGẼ | 2 KORẼNT RÃMBÃ 11-13
“A Poll ‘yĩngã pʋgẽ gõaagã’”
2 Korẽnt rãmbã 12:7; w08 15/6 3-4
B tara pãng wʋsgo, baa b sẽn yaa pãn-komsem dãmbã
Wẽn-sakd a to n kos a Zeova t’a yãk ‘gõaag a yĩngã pʋgẽ,’ rat n yeel tɩ zu-loɛɛg sẽn tõt saabo. Tʋm-tʋmd a Poll kosa Wẽnnaam naoor a tãab t’a kɩt tɩ zu-loɛɛgã sa. Sẽn da yaa zu-loɛɛg ning me, ra yaa wa gõaag sẽn be tʋm-tʋmd a Poll yĩngẽ wã, n da tõe n kɩt t’a pa tall sũ-noog a Zeova tʋʋmã pʋgẽ ye. A Poll maka rẽ ne pɛgs b sẽn pãbd-a wakat fãa. A Zeova leok-a lame yaa: “Mam barkã seka foom, bala yaa pãn-komsem pʋgẽ la fo paamd mam pãngã tɩ pidi.” A Zeova pa yãk gõaagã a yĩngẽ wã ye. A Poll ra segd n kell n maoa ne a zu-loɛɛgã. La a yeelame: “Yaa mam sẽn wat n ka pãng sasa la m tar pãng wʋsgo.” (2 Kor. 12:7-10) A gomdã rat n yeelame tɩ bõe?
2 Korẽnt rãmbã 12:8, 9; w06-MM 1/1 17 s. 17-18
A Zeova kõta a vʋʋsem sõngã neb nins sẽn kot-a
17 A Zeova leoka a Poll pʋʋsgã n yeel-a woto: “Mam barka sekda foom; tɩ bõe, yaa pãn-komsem pʋgẽ la ned bãngd mam pãnga.” Rẽ kɩtame t’a Poll yeel woto: “Mam na n maana sũ-noog n yɩɩd m pãn-komsma pʋgẽ tɩ Kirist pãng pid maam [“lud maam wa fu-roogo,”MN].” (2 Korẽnt dãmba 12:9; Yɩɩl Sõamyã 147:5) Dẽnd a Poll bãngame tɩ Kirist maasem yĩnga, Wẽnnaam pãngã kogend-a-la wa fu-roogo. Yaa woto me ne tõnd rũndã-rũndã. A Zeova pãngã luta a sõgen-dãmbã wa fu-roogo, n kogend-ba.
18 Yaa vẽeneg tɩ fu-roog pa gɩdgd saag bɩ sebg ye, la a kogenda ned ne bõn-kãensã. Woto me, koglg ning vʋʋsem sõngã sẽn kõt tõnd ne “Kirist pãngã” pa gɩdgd makr toɛy-toɛyã la toodã ye. La a kogenda tõnd ne dũni-kãngã bũmb nins sẽn tõe n sãam d tẽebã, la a leb n kogend-d ne a naabã sẽn yaa a Sʋɩtãanã sẽn zabd ne-dã. (Wilgri 7:9, 15, 16) Woto yĩnga, baa y sã n maooda ne makr tɩ pa satẽ bɩ y bãng t’a Zeova miime, la t’a leokda “y kelemsã.” (Ezai 30:19; 2 Korẽnt dãmba 1:3, 4) A Poll gʋlsa woto: “Wẽnnaam sẽn yaa sɩd soabã, bãmb ka na n sak tɩ yãmb paam makr sẽn yɩɩd yãmb pãng ye. La ne makre bãmb na n maana sor tɩ yãmb tõe n yi.”—1 Korẽnt dãmba 10:13; Filip rãmba 4:6, 7.
2 Korẽnt rãmbã 12:10; w18.01-MM 9 s. a 8-9
“Bãmb kõta ned ning sẽn yɛ wã pãnga”
8 Karm-y Ezayi 40:30. Baa d bãngr la d minim sẽn yaa to-to fãa, bũmb kẽer la d pa tõe n maan ne d meng pãnga. D ned kam fãa segd n sak n deega rẽ. Tʋm-tʋmd a Poll tõog n maana bũmb toor-toore, la pa a sẽn da ratã fãa la a tõog n maan ye. A goma rẽ yell ne a Zeova, la a Zeova yeel-a lame: “Yaa pãn-komsmã pʋg la mam pãngã maand a tʋʋmde.” A Poll wʋma gomdã võore. Ad a sẽn yeele: “Yaa mam pãn-komsmã wakat la mam tar pãnga.” (2 Kor. 12:7-10) Woto rat n yeelame tɩ bõe?
9 A Poll sɩd bãngame tɩ bũmb kẽer n be a sẽn pa tõe n maan ne a meng pãnga, la tɩ yaa tɩlɛ t’a paam tɩ Wẽnnaam sẽn yaa pãn-kãseng soabã sõng-a. A sã n wa pa tar pãnga, Wẽnnaam vʋʋsem sõngã tõe n kõ-a-la pãnga. Vʋʋsem sõngã pʋd n tõe n sõng-a lame t’a maan a sẽn da pa tõe n maanã. Tõnd me tõe n paama sõngr a woto. A Zeova sã n kõ tõnd a vʋʋsem sõngã, d paamda pãng la raoodo.
D bʋgs Wẽnnaam Gomdã zug neere
2 Korẽnt rãmbã 12:2-4; w18.12-MM 8 s. 10-12
Karemdbã sogsgo
Wõnda “saas a tãab soabã” yell b sẽn gom 2 Korẽnt-rãmb 12:2 pʋgẽ wã yaa a Zeezi Kirist sẽn yaa Mesi wã ne a na-rɩt-n-taas 144 000 Rĩungã, rat n yeel tɩ ‘saasẽ paalgã.’—2 Pɩy. 3:13.
Wẽnnaam Rĩungã yaa “saas a tãab soabã,” bala a yaa naam sõmblem sẽn ka to.
Wõnda “Paraadi” ning pʋgẽ b sẽn zẽk a Poll t’a ta vẽnegr pʋgẽ wã makda 1) arzãn meng-mengã sẽn na n wa zĩnd tẽngã zugã, 2) bark nins Wẽnnaam nin-buiidã sẽn na n paam tũudmã wɛɛngẽ wakat kãngã. B na n yɩɩga bark nins d sẽn paamd rũndã-rũndã wã. La 3) “Wẽnnaam Paraadi” wã sẽn be saasẽ, n na n zĩnd wakat-yɛng ne dũni-paalgã.
2 Korẽnt rãmbã 13:12; it-1 753
Moke
“Mok-y taab ne pʋ-peelem.” Pipi kiris-nebã ra ‘mokda taab ne pʋ-peelem’ (Rom. 16:16; 1 Kor. 16:20; 2 Kor. 13:12; 1 Tes. 5:26) bɩ “ne nonglem,” (1 Pɩy. 5:14) la tõe tɩ ra yaa pagbã ne taaba, rapã me ne taaba. Pipi kiris-nebã sẽn da pʋʋsd taab woto wã, tõe tɩ yaa pĩnd Ebre-rãmbã sẽn da pʋʋsd taab ne mokrã yĩnga. Baa Gʋls-sõamyã sẽn pa gomd ‘mokd taab ne pʋ-peelem’ bɩ “ne nonglmã” yell wʋsgã, b sẽn da maand woto wã wilgdame tɩ nonglem la zems-n-taar da bee b sʋka.—Zã 13:34, 35.
SIG-NOY RASEM 27–SIGR RASEM A 2
D SẼN BÃNG BIIBLÃ KARENG PƲGẼ | GALAT RÃMBÃ 1-3
“Mam yaasa a taoor n gom-a”
Galat rãmbã 2:11-13; w17.04-MM 27 s. 16
Yãmb rɩkda a Zeova togs-n-taar tɩrlmã wɛɛngẽ bɩ?
16 Karm-y Galat-rãmb 2:11-14. Yaa ninsaal zoees n kɩt t’a Pɩyɛɛr tudgã. (Yel. 29:25) A ra mii a Zeova sẽn dat tɩ b tall manesem ning ne bu-zẽmsã. La kiris-neb sẽn yaa Zʋɩf-rãmb n da yi Zerizalɛm n wa, t’a Pɩyɛɛr da yɛɛsd b tagsg sẽn na n yɩ a soaba, b sã n yã t’a naagda bu-zẽmsã n maand bũmb kẽere. Tʋm-tʋmd a Poll togsa a Pɩyɛɛr vẽeneg t’a sẽn maandã pa zems ye. Bõe yĩnga? Bala, tigsg ning sẽn zĩnd Zerizalɛm yʋʋmd 49 wã, a Poll wʋma a Pɩyɛɛr sẽn yeel bũmb ning bu-zẽmsã wɛɛngẽ wã. (Tʋʋ. 15:12) A Pɩyɛɛr sẽn maan woto n sãam kiris-neb nins sẽn yaa bu-zẽmsã sũyã, b manesem na n yɩɩ wãna? B na n basame tɩ koms b tẽebã bɩ? A Pɩyɛɛr tudgrã yĩnga, b na n deega tʋʋm nins a sẽn da tar kiris-nebã sʋkã bɩ?
Galat rãmbã 2:14; w13-MM 3/1 9 s. 12
Sẽn nong-b a Zeova wã pa basd tɩ bũmb kɩt tɩ b lʋɩ ye
12 Baa a Pɩyɛɛr sẽn da sakd a Zeezi ne a Zeova wã, wakat n zĩnd t’a zoe ninsaalba, n maan sẽn pa segde. Wala makre, a kɩɩsa naoor a tãab tõr t’a pa mi a Zu-soabã ye. (Luk 22:54-62) Kaoosg zugẽ, a talla manesem tɩ yaa wa kiris-neb nins sẽn yaa Zʋɩf-rãmbã yɩɩda sẽn ya-b bu-zems nebã. Tʋm-tʋmd a Poll sẽn da mi tɩ neb a taab tõe n wa rɩka a Pɩyɛɛr togs-n-taarã, a wilg-a-la vẽeneg t’a sẽn maandã pa sõma ye. (Gal. 2:11-14) Rẽ yĩnga a Pɩyɛɛr sũur yikame t’a bas vɩɩm sẽn kõn sa wã zoeesã bɩ? Ayo. A kelga a Poll saglgã n toeeme, n kell n zoe zoeesã.
D bʋgs Wẽnnaam Gomdã zug neere
Galat rãmbã 2:20; w14-MM 9/1 16 s. 20-21
D kell n tũ Wẽnnaam baa d sẽn paamd ‘namsg wʋsgã’
20 A Sʋɩtãan sã n wa maand sɩlem n dat n koms d raoodo, bõe la d tõe n maan t’a ra tõog-do? Bũmb a ye d sẽn tõe n maan yaa d bʋgs a Zeezi sẽn ki tɩ yɩ maoongã zugu. Yaa woto la tʋm-tʋmd a Poll maan-yã. A ra mi n tagsdame t’a yaa nimbãan-ned bala. La a ra miime me tɩ Kirist sẽn ki wã, yaa yel-wẽn-maandb wa yẽ yĩnga, pa neb sẽn zems zãng yĩng ye. A yeela woto: ‘Mam vɩɩ Wẽnnaam Biigã tẽeb yĩnga, bãmb sẽn nong maam n kõ bãmb meng mam yĩngã.’ (Gal. 2:20) Vẽenega, a Poll ra kɩsa sɩd t’a Zeezi sẽn ki wã yaa yẽ me yĩnga.
21 Yãmb sã n kɩs sɩd t’a Zeezi sẽn ki wã yaa yãmb me yĩnga, na n naf-y-la wʋsgo. La woto pa rat n yeel tɩ ned pa na n tol le koms raood ye. A Sʋɩtãan na n kell n maana sɩlem n koms kẽer raood hal n tãag dũniyã saabo. La tẽeg-y tɩ yaa sẽn na n kell n sak-b Wẽnnaamã n na n paam keoorã. Wakat ning Wẽnnaam Rĩungã sẽn na n kɩt tɩ laafɩ zĩnd tẽngã zug la a kɩt tɩ wẽn-sakdbã zems zãngã kolgdame. Bɩ d maan d sẽn tõe fãa n wa kẽ Wẽnnaam soolmã pʋgẽ, baa sẽn na n yɩ ne namsg wʋsgã.
Galat rãmbã 3:1; it-1 940
Sebr b sẽn tool Galat rãmbã
Bũmb pa wilgd t’a Poll sẽn yeel tɩ “yãmb a Galasi neb sẽn yaa yam-koees rãmbã,” yaa buud takɩ neb sẽn da yaa Goloa-rãmb yagense, n be Galasi rɩtg babgã yell la a ra gomd ye. (Gal. 3:1) Yaa tẽn-kãng tigimsã neb kẽer la a Poll sẽn da zabdã, bala b basame tɩ b sʋkã neb sãnda sẽn da nong Zidayiismã yɛl belg-ba. Nin-kãens yaa Zʋɩf-rãmb sẽn da modgd n dat n tik a Moyiiz Tõogã n wilg bãmb mens tɩrlem, n bas tɩrlem ning kaool-paalgã sẽn kɩt tɩ d tõe n paam tẽeb maasem yĩngã. (2:15–3:14; 4:9, 10) “Tigims nins sẽn be Galasi” wã (1:2) neb a Poll sẽn tool a lɛtrã ra yaa Zʋɩf-rãmb la bu-zẽmse. Bu-zẽn-kãens sʋka, kẽer kẽe bãong n da sakd Zʋɩf-rãmbã tũudum, tɩ sãnda ra pa kẽ bãong ye. Sãmbg sẽn kae, kẽer da yaa Sɛlt-rãmba. (Tʋʋ. 13:14, 43; 16:1; Gal. 5:2) B ra naaga b fãa n boondẽ tɩ Galasi kiris-neba, bala soolem ning pʋgẽ b sẽn da be wã ra boondame tɩ Galasi. A Poll sẽn gom bũmb ning yellã wilgdame t’a ra gomda ne neb a sẽn mi sõma sẽn da be soolmã goabg sẽnese, pa ne sẽn da be-b rɩtg sẽnesã a sẽn pa tol n miẽ wã ye. Bala, wõnda a zɩ n kẽng rɩtg sẽnesã ye. Galasi ra yaa Rom soolem.