• D sẽn tõe n maan to-to tɩ d yam-yãkr yɩ sõma
    Vɩɩmd-y wakat sẽn kõn sa!—Biiblã zãmsg sebre

    • 5. D gũus ne neb a taabã sũur-kaseto

      Ned yam-yãkr pa yembr ne a to ye. Wãn to la d tõe n wilg tɩ d gũusda ne d taabã sũur-kaseto? D rɩk makr a yiibu:

      Makr a 1: Saam-bi-poak n nong n ningd pãntalõ-rãmba, a sã n wa kokd pemsem, wall a sã n tʋmd tʋʋm kẽere. A wa n yikame n tɩ be tiging a to. La tigin-kãng saam-bi-pogs wʋsg sã n yã pag sẽn ning pãntalõ, namsd-b lame.

      Karm-y Rom dãmb 15:1 la 1 Korẽnt rãmb10:23, 24, tɩ rẽ poor bɩ y leok sogsgã:

      • Sẽn zems ne vɛrse-kãensã goamã, bõe la saam-bi-poakã tõe n yãk yam n na n maane? Yãmb manesem na n yɩɩ wãna, y sã n wa be ne ned t’a sũur-kasetã pa kõt-a sor t’a maan bũmb yãmb sũur-kasetã sẽn kõt-y sor tɩ y maane?

      Makr a 2: Saam-biig a ye n yãk yam n pa na n yũ rãam, baa ne a sẽn mi tɩ Biiblã pʋgẽ, b pa gɩdg rãamã yũ n zemsã. Saam-biig n bool yẽ ne neb a taab tɩ b wa tɩ b naag taab n dɩ. Rɩɩbã sasa, kẽer da yũuda rãam.

      Karm-y Koɛɛg soab 7:16 la Rom dãmb 14:1, 10, tɩ rẽ poor bɩ y leok sogsgã:

      • Sẽn zems ne vɛrse-kãensã goamã, bõe la saam-biigã tõe n yãk yam n na n maane? Yãmb manesem na n yɩɩ wãna, y sã n ne ned a to sẽn maand bũmb yãmb sũur-kasetã sẽn pa kõt-y sor tɩ y maane?

      Bõe la y tõe n maane, tɩ sõng-y tɩ y bãngd n yãkd yam?

      Pag sẽn pʋʋsde.

      1. Kos-y a Zeova t’a sõng-y tɩ y yãk y sẽn na n maanã.​—Zak 1:5.

      Pagã sẽn maand vaeesg ne Biiblã, siglgã sɛbã la ordinatɛɛr maasem.

      2. Maan-y vaeesg Biiblã pʋgẽ la siglgã sɛbã pʋgẽ, n paam sagls sẽn na n sõng-yã. Y tõe n sõsa ne kiris-neb tẽeb sẽn bɩ me.

      Pagã sẽn tagsde.

      3. Tags-y n ges-y y yam-yãkrã sẽn na n maan yãmb la y taabã sũur-kasetã bũmb ninga.

  • Bõe yĩng tɩ d sẽn manegd d mens to-to wã tar yõod wʋsgo?
    Vɩɩmd-y wakat sẽn kõn sa!—Biiblã zãmsg sebre

    • Fu-yerdɩ wã la d sẽn manegd d mens to-to wã wɛɛngẽ, ned fãa tara a sẽn nonge. Sagls n be Biiblã pʋgẽ n tõe n sõng-d tɩ d yãk fut sẽn noom-do, la sẽn tata a Zeova yam me. Bɩ d gom sagl-kãens a wãn yelle.

      1. Sagl-bʋs n tõe n sõng-do, tɩ d bãng n yãk d fu-yerdɩ wã, la d sẽn na n maneg d meng to-to wã?

      D segd n ‘manegda d mens ne sik-m-meng la gũusgu, n yer fut sẽn zemse,’ la d yaa yɩlem wakat fãa, tɩ wilgdẽ tɩ d “tũuda Wẽnnaam.” (1 Tɩmote 2:9, 10) Ad sagls a naase: 1) D segd n yelga “fut sẽn zemse.” Wa y sẽn gũus n ges tigissã sasa wã, fu-yerdɩ wã la mengã manegr wɛɛngẽ, a Zeova nin-buiidã sẽn nong bũmb ninsã pa yembr ye. La d sẽn yelgd fut ninsã, la d manegd d zutã to-to wã waoogda Wẽnnaam ning d sẽn tũudã. 2) ‘Manegd d mens ne sik-m-mengã’ rat n yeelame tɩ d pa na n yelg fut sẽn na n kɩt tɩ d taabã wa tar tags-yoodo, wall sẽn na n kɩt tɩ yaa tõnd bal la b get ye. 3) D wilgdame tɩ d “manegda d mens ne gũusgu,” d sã n pa baood fuug buud fãa sẽn yi, bɩ zug pãneng buud fãa sẽn yi ye. 4) D sẽn manegd d mens to-to wã segd n wilgda wakat fãa tɩ d “tũuda Wẽnnaam. Woto, d taabã na n neeme tɩ tõnd tũuda Wẽnnaam sɩd-sɩdã.​—1 Korẽnt rãmbã 10:31.

      2. Bõe yĩng tɩ d segd n tags d tẽed-n-taasã yelle, d fu-yerdɩ wã yãkr wɛɛngẽ?

      Yaa sɩd tɩ d tara lohorem n tõe n yãk fut nins d sẽn date. La d segd n tags n gesa d fu-yerdɩ wã sã n pa na n nams d taabã. Tõnd ned kam fãa modgda wa a sẽn tõe fãa sẽn na yɩl n da sãam ned sũuri, la sẽn na yɩl n “maan sẽn noom a to a neer yĩnga, n paas a tẽebã pãnga.”​—Karm-y Rom dãmb 15:1, 2.

      3. Wãn to la d fu-yerdɩ wã tõe n kɩt tɩ nebã rat n bao n bãng a Zeova n paase?

      D modgda wakat fãa sẽn na yɩl n yelgd fut sẽn zemse. La sã n yaa sẽn na n kẽng tigissã, wall n yi koɛɛgã moonego, d maanda gũusg n tɩ yɩɩda. D pa rat tɩ d sẽn yelg fut ninsã tiis nebã, tɩ b pa kelg koɛɛgã sẽn tar yõodã ye. D pʋd n datame tɩ d sẽn manegd d mens to-to wã kɩt tɩ nebã rat n bao n bãng Wẽnnaam ning d sẽn tũudã n paase, la kɩt tɩ ‘tõnd Fãagdã zãmsgã paam waoogre.’​—Tɩte 2:10.

      D BAO N BÃNG N PAASE

      D ges bũmb nins sẽn tõe n sõng-d tɩ d modg tɩ d fu-yerdɩ wã, la d sẽn manegd d mens to-to wã wilg tɩ d yaa kiris-nebã.

      Rap a yiib sẽn yas bʋ-kaood taoore. A yembr n yeelg fut sẽn yaa sõma la neere, t’a to wã yeelg fut sẽn pãrs la sẽn yaa rẽgdo, la a fõgen beezboll pugla.

      D sẽn manegd d mens to-to wã tõe n wilga d sã n waoogda neb nins sẽn tar zu-sobendã. Baa ne a Zeova sẽn ne bũmb nins sẽn be d sũurẽ wã, d sẽn manegd d mens to-to wã me segd n waoogd-a lame

      4. D sã n manegd d mens sõma, wilgdame tɩ d waoogda a Zeova

      Sẽn tɩ yɩɩd fãa, yaa bõe yĩng la d sẽn segd n ges tɩ d sẽn manegd d mens to-to wã zemsã? Karm-y Yɩɩn-sõamyã 47:3, tɩ rẽ poor bɩ y leok sogsgã:

      • D sã n tẽegd tɩ d gomda a Zeova yʋʋr yĩnga, wãn to la rẽ na n sõng-d d fu-yerdɩ wã yãkr wɛɛngẽ?

      • Ne yãmba, d segd n sɩd tagsda d sẽn manegd d mens to-to tigissã la koɛɛgã moonegã yĩngã yell bɩ? Bõe yĩnga?

      5. Bõe n tõe n sõng tõnd tɩ d bãng n yãk d fu-yerdɩ wã la d sẽn na n maneg d mens to-to wã?

      Ges-y VIDEO wã.

      VIDEO: “Bɩ y maan fãa Wẽnnaam waoogr yĩnga” (10:18)

      D futã ligd yaa toog tɩ pa toog me, b segd n yɩɩ yɩlma, la zems ne zĩig ning d sẽn be wã, pa rẽ bɩ bũmb ning d sẽn maandã. Karm-y 1 Korẽnt rãmb 10:24 la 1 Tɩmote 2:9, 10. Rẽ poor bɩ y leok sogsgã. Bõe yĩng tɩ d pa yelgd fut  . . .

      • sẽn yaa rẽgdo, wall sẽn pa zemse?

      • sẽn sẽbd yĩngã, wall sẽn wilgd yĩngã zĩis kẽere, bɩ sẽn wat ne tags-yoodo?

      Baa ne kiris-nebã sẽn pa tũud a Moyiiz tõogã, sõngd-b lame tɩ b bãng a Zeova tagsg bũmb wʋsg wɛɛngẽ. Karm-y Tõod 22:5, tɩ rẽ poor bɩ y leok sokrã:

      • Bõe yĩng tɩ d pa segd n yelg fut sẽn kɩtd tɩ rao wõnd paga, wall pag wõnd raoa?

      Karm-y 1 Korẽnt rãmb 10:32, 33 la 1 Zã 2:15, 16, tɩ rẽ poor bɩ y leok sogsgã:

      • Bõe yĩng tɩ d segd n tags n gese, d sẽn manegd d mens to-to wã sã n pa sãamd d sakã neb kẽere, pa rẽ bɩ d tigingã neb kẽer sũya?

      • Yãmb sẽn vɩẽ wã, fu-bʋs buud la nebã nong n yelgdẽ? Wãn to me la b nong n manegd b mense?

      • Yãmb tagsdame tɩ bʋs n pa zems ne kiris-neda? Bõe yĩnga?

      D fu-yerdɩ wã la d sẽn manegd d meng to-to wã tõe n yɩɩ buk toor-toore, la ket n tat a Zeova yam

      Rap la pagb sẽn tar yʋʋm toor-toore, tɩ b yĩn-kõbgã me pa yembre, la sẽn yit tẽns toor-toor sẽn maneg b mense, la b yeelg fut buud toor-toor sẽn zems ne kiris-neda. B sẽn maneg b mens to-to wã, la b sẽn yeelg fut ninsã yaa toor-toore.

      NEB KẼER SẼN YETE: “M tara sor n tõe n yelg fut nins fãa m sẽn date.”

      • Yãmb me tagsda woto bɩ? Bõe yĩnga?

      KƲMSGO

      D sã n bãngd n yãkd d fu-yerdɩ wã la d manegd d meng tɩ yaa sõma, d wilgdame tɩ d waoogda a Zeova la d taabã.

      Lebg-n-gese

      • Bõe yĩng tɩ d sẽn yelgd fut ninsã, la d sẽn manegd d mens to-to wã tar yõod a Zeova nifẽ?

      • Sagl-bʋs la d segd n tũ d mengã manegrã wɛɛngẽ?

      • D sẽn manegd d mens to-to wã tõe n kɩtame tɩ nebã tagsg yɩ wãn ne tũudum hakɩɩkã?

      M sẽn tõe n maane

      BŨMB A TAABA

      Bõe la d fu-yerdɩ wã tõe n kɩt tɩ d taabã tags tõnd zugu?

      “Bõe la mam fu-yerdɩ wã wilgd mam zugu?” (Bee jw.org)

      Nand tɩ d sak tɩ b maan-d tatuwaas-rãmba, bõe yĩng tɩ d segd n deng n tags neere?

      “Bõe la Biiblã yet yĩngã gʋlbã wɛɛngẽ?” (Bee jw.org)

      Sagls a taab sẽn tõe n sõng-yã, y sã n wa na n yãk yam.

      “Y sẽn manegd y meng to-to wã waoogda Wẽnnaam bɩ?” (Yʋʋmd 2016 bõn-bɩʋʋng kiuug Gũusg Gasgã)

      Wãn to la pag a yembr rems a tagsgo, neb a taabã yam-yãkr fu-yerdɩ wã wɛɛngẽ?

      “Mam da tagsdame tɩ maneg f meng sõma wã yaa bũmb sẽn kisi” (Yʋʋmd 2016 yʋʋm-sar kiuug rasem 22 Réveillez-​vous ! wã)