A ZEZI vʋʋgrã pa bũmb sẽn maan pĩnd wẽndẽ bala, la sẽn pa tar yõod ne tõnd rũndã-rũndã ye. Ad tʋm-tʋmd a Poll sẽn yeel dẽ wɛɛngẽ: “Kirist vʋʋgame, bãmb yaa kũum vʋʋgr dẽenem soaba. Tɩ bõe, a wa ned a yembr sẽn wa ne kũumã, woto me, ned a yembr waa ne kũum vʋʋgre. La a wa fãa sẽn kiid a Ãdem pʋgẽ wã, woto me, fãa na n paama vɩɩm Kirist pʋgẽ.”—1 Korẽnt dãmba 15:20-22.

A wilga bũmb ning sẽn na n maan a Zezi vʋʋgrã maasem yĩngã me n yeel woto: “Wa ned a yembr sẽn wa ne kũumã, woto me, ned a yembr waa ne kũum vʋʋgre.” A Ãdem yel-wẽndã sẽn long tõndã kɩtame tɩ d fãa kiidẽ. La a Zezi sẽn yɩ ned sẽn zems zãng n ki ãdem-biisã yel-wẽn yĩngã, a paka sor tɩ ne kũum vʋʋgrã maasem, b tõe n wa paam b mens ne yel-wẽnã la kũumã. A Poll kʋmsa woto fãa Rom dãmb 6:23 wã pʋgẽ n yeel woto: “Yel-wẽnã yaood yaa kũum, la Wẽnnaam kũunã yaa vɩɩm sẽn ka sɛta, tõnd Zusoab a Kirist Zezi maasem yĩnga.”