‘Yãmb tʋʋmdã ka na n yɩ zaalem ye’
1 Ad yaa tagsg sẽn kõt raoodo! Yãmb tʋʋmdã a Zeova sõgenegã pʋgẽ ka na n yɩ zaalem ye. (1 Kor. 15:58) Sẽn yaa lebend ne rẽ, tags-y nebã sẽn namsd n kaoosdẽ la b maood sẽn na yɩl n paas b vɩɩmã sõmblem, bɩ b paam ligd n paasã. Tõeeme tɩ b maand karen-bɛd yʋʋm wʋsgo, bɩ b tʋmda wa b na n ki sẽn na yɩl n yidg laogã wɛɛngẽ. La “wakat la yel-lingdem” yĩnga, b tõeeme n ka tol n paam ziir ning b sẽn da baoodã, bɩ tõeeme tɩ yɩ tɩlae tɩ b wa kong n sak laog sẽn ka ta b sẽn datã ye. Wala “ned sẽn digd sobgo” b modgrã yaa zaalem. (Koɛ. 1:14; 9:11, NW ) Dẽ, ad sɩd be yõodo, tõnd sẽn tʋmd wʋsg tʋʋm yɛng ning bal sẽn ka na n yɩ zaalmã pʋgẽ wã, bala tʋʋm kãng tara yõod sẽn kaoosda!
2 Tʋʋmd ning sẽn sɩd tar-a yõodã: Tʋʋmd ning sẽn tar-a yõod n yɩɩd tẽngã zug yaa Wẽnnaam Rĩungã koe-noog moonego. Neba kelgd tɩ b pa kelgd me, yaa tʋʋmd b sẽn tog n maane. Tõnd ratame n tõog n yeel wala a Poll woto: “Yãmb zɩɩm ka be mam zug ye. Tɩ bõe, mam togsa yãmb Wẽnnaam daab zãnga n ka solg bũmb ye.”—Tʋʋ. 20:26, 27.
3 Ad yaa su-noog menga, nebã sã n kelgdẽ la b sakd Rĩungã koɛɛga! Pʋg-bɩɩg a yembr pʋgdb n maan kaalem. A ra sʋkda a meng a pʋgdbã sẽn da kẽngẽ: saasẽ bɩ bugum yiri? A pʋʋsa Wẽnnaam n kos sõngre, n tũnug ne yʋʋr ning sẽn yaa Zeova wã, wala a ba-bi-poakã sẽn da zãms-a t’a maanã. Pa yã n kaoos la a sɩng Biiblã zãmsg la a rebd tigissã ye. A sẽn da get vɩɩmã to-to wã toeema zãng fasɩ, t’a bas loees nins a sẽn da tar ne soay zut bi-bees sulã. Pʋg-bɩɩgã basa sɩgaare, dorge, la wagdem. A sak n deega woto: “Yaa nonglmã mam sẽn tar ne a Zeova wã bal n kɩt tɩ mam bas vɩ-yook a woto. Yaa a Zeova bal n dag n tõe n kõ maam vɩɩm sẽn-kõn-sa wã saagre, a ninbãan-zoeer sẽn yaa kãsengã yĩnga.” A ka leb n dɩkd a vɩɩmã n maand tʋʋm sẽn na n yɩ zaalem ye.
4 Baa nebã sã n zãgsdẽ tɩ b kõn kelge, baasg zãnga y maanda bũmb sẽn tar yõodo. B miime t’a Zeova Kaset rãmbã wa n ges-b lame. Rẽ wilgdame tɩ y sɩd yaa neb sẽn tar burkĩndlem, kɩs-sɩda, la nonglem. Dẽ, yãmb tʋʋmdã Soaala tʋʋmd pʋgẽ yaa zaalem yĩng bɩ? Abada!