Yãmb yaa ‘bõn-getse’!
1 Tʋm-tʋmd a Poll gʋlsa woto: “Tõnd yaa bõn-gets ne dũniyã la ne malɛk rãmba la ne ninsaalba me.” (1 Kor. 4:9) Gom-kãngã võor yaa bõe, la loees bʋg la a segd n tall ne tõnd koe-moonegã rũndã-rũndã?
2 Gomd ning sẽn yaa ‘bõn-getsã’ tẽegda Korẽnt nebã Rom dãmbã zĩig ning neb sẽn deemd n kʋʋd taabã reem baasgo. Sasa kãnga, b ra saagda ne neb b sẽn kao bʋʋd tɩ b segd n kʋ neb tusa taoor tɩ b ges-ba, n yaool n kʋ- b ne nen- kɛglem. Woto me, gɛtb tusa sẽn yaa ninsaalb la malɛgs n yã b sẽn nams pipi yʋʋm kob-gĩndẽ kiris-nebã b Rĩungã kaset kũun yĩnga. (Heb. 10:32, 33) B burkĩndlmã toeema b gɛtb wʋsg vɩɩm la b tagsgo, wala tõnd sũ-marã toog pʋgẽ wã sẽn maand to-to tõnd wakatã me wã. Tõnd yaa bõn-gets ne ãnd dãmba?
3 Ne dũniyã la ne ninsaalbã: Wakat ninga kɩba-kɩtba yiisda kɩbay sẽn tɩ loe ne a Zeova nin-buiidã tʋʋma. Baa d sẽn tar mi-beoog pẽgr kɩbay nins b sẽn yiisd tõnd tʋʋmdã wɛɛngẽ wã yĩngã, d leb n miimi tɩ wakat-wakate d bɛɛbã na n yelga kɩbay sẽn sãamd tõnd yʋʋre. Ne rẽ fãa, d tog n ket n wilgdame tɩ d zemsa ne yɩ Wẽnnaam tʋm-tʋmdb “yʋ-beed la yʋ-noog pʋgẽ.” (2 Kor. 6:4, 8) Ne pʋ-peelem dãmbã yaa vẽeneg tɩ d ya a Zezi Kirist karen-biis hakɩka.
4 Ne malɛgsã: Malɛgsã me geta tõndo. A Sʋɩtãan ne a zĩn dãmbã geta tõnd ne ‘sũ-puugr sẽn yaa kãsenga,’ n baood n na n yals ‘a Zezi kasetã’ d sẽn kõtã. (Wil. 12:9, 12, 17) Wẽnnaam malɛgsã sẽn tar kɩs-sɩdã kɩdemdame, yel-wẽn maand a yembr sã n tek yam n kos sugri. (Luk 15:10) Sɩd kengda tõnd raoodo, tɩ d miẽ tɩ malɛgsã geta tõnd koe-moonegã wa tʋʋmd ning sẽn ya-a yãgb yell n yɩɩd la sẽn tar-a nafa n yɩɩd tẽng zug rũndã-rũndã wã!—Wil. 14:6, 7.
5 Yãmb sã n seg kɩɩsgo, bɩ y sã n tagsdẽ tɩ y koe-noogã mooneg ka womd biisi, bɩ y tẽeg tɩ y yaa bõn-gɛtg ne ãndũniyã. Y sẽn tõogd toog ne kɩs-sɩdã wilgdame tɩ y yaa burkĩna. Tar-n-tarẽ, y sẽn ‘zabd tẽeb zabr sõama’ wã na n kɩtame tɩ y wa tõog n “gãd vɩɩm sẽn-ka-sɛtã” kãn-kãe.—1 Tɩm. 6:12.