Kiris-nebã vɩɩm la b tʋʋma tigissã na-kẽndr not-rãmbã
SIGR RASEM A 3-9
D SẼN BÃNG BIIBLÃ KARENG PƲGẼ | GALAT RÃMBÃ 4-6
“Makr sẽn tar võor tõnd yĩnga”
Galat rãmbã 4:24, 25; it-1 56 s. a 1
A Agaar
Sã n yaa ne tʋm-tʋmd a Polle, a Agaar makda Israyɛll buudã sẽn da lebg a Zeova nin-buiidu, Tõogã kaool maasem yĩngã. Rẽ sɩnga Sinayi tãngẽ wã. Kaool-kãng roga “kamb yembd yĩnga.” Israyɛll nebã sẽn da yaa yel-wẽn-maandbã yĩnga, b pa tõog n pids kaoolã ye. Israyɛll nebã pa paam lohorem kaoolã maasem yĩng ye. A pʋd n da ningd-b-la taal b yel-wẽnã yĩnga, n wilgdẽ tɩ b segda ne kũum. Rẽnd b ra yaa yembse. (Zã 8:34; Rom. 8:1-3) A Poll wakatẽ wã, Zerizalɛm ra yaa wa a Agaare, bala Zerizalɛm sẽn da yaa Israyɛll na-tẽngã ra makda Israyɛll buudã siglgã, n da be yembd pʋgẽ ne a kambã. La kiris-neb nins sẽn paam vʋʋsem sõng zaeebã yaa “yĩngr Zerizalɛmmã” sẽn yaa wa Wẽnnaam pagã kamba. Zerizalɛm-kãng yaa wa burkĩn-poak a Saara, n zɩ n yɩ yamb ye. A Ismayɛll namsa a Izaake. Woto me, Zerizalɛm ning sẽn be yembd pʋgẽ wã kamb namsa “yĩngr Zerizalɛmmã” kambã sẽn paam lohorem Biigã maasem yĩngã. La b riga a Agaar ne a biigã tɩ b looge. Rẽ makda a Zeova sẽn daag Israyɛll buudã n basã.—Gal. 4:21-31; ges-y Zã 8:31-40 me.
Galat rãmbã 4:26, 27; 28-31; w14-MM 10/1 13 s. 11
Y tẽeda Wẽnnaam Rĩungã ne y sũy fãa bɩ?
11 Kaool ning Wẽnnaam sẽn maan ne a Abrahaamã pidsa sasa ning a Abrahaam yagensã sẽn deeg kãabg tẽngã. La Biiblã wilgame tɩ kaool-kãngã na n le pidsame, tɩ wa ne bark sẽn yɩɩd pipi pidsgã. (Gal. 4:22-25) Tʋm-tʋmd a Poll wilgame t’a Abrahaam yagengã meng-meng yaa a Zeezi Kirist. La a tara yagen-taase, sẽn yaa neb 144000 sẽn yaa kiris-neb sẽn paam vʋʋsem sõng zaeebo. (Gal. 3:16, 29; Wil. 5:9, 10; 14:1, 4) Edɛn bãngr-gomdã pʋgẽ, pagã makda Wẽnnaam siglgã babg ning sẽn be saasẽ wã. Pʋg-kãng b sẽn boond tɩ “Zerizalɛm ning sẽn be yĩngrã” makda malɛgs nins sẽn sakd Wẽnnaamã. (Gal. 4:26, 31) Wa kaool ning Wẽnnaam sẽn maan ne a Abrahaamã sẽn wilgã, pagã yagengã maasem yĩnga, neb wʋsg na n paama barka.
D bʋgs Wẽnnaam Gomdã zug neere
Galat rãmbã 4:6; w09 1/4 13
Yãmb ra miime bɩ?
Bõe yĩng t’a Zeezi pʋʋs a Zeova n bool-a tɩ “Aba, Ba”?
Arameẽ wã gom-bil ning sẽn yaa “aba” wã võor tõe n yaa “ba wã,” wall “Baaba.” Naoor a tãab la d yãt gom-bilã Gʋls-sõamyã pʋgẽ. La naoor a tãabã fãa, a naaga pʋʋsg goama. Yaa d saasẽ Ba a Zeova la b bool woto. Gom-bilã võorã meng-meng yaa bõe?
Sebr a yembr wilgame t’a Zeezi wakatẽ wã, yaa kambã n da wae n boond b ba-rãmbã tɩ aba, tɩ wilgdẽ tɩ b nong-b lame, la tɩ b waoogd-b lame. Ned sã n da bool a to woto, wilgdame t’a nong-a-la wʋsgo. Sẽn paase, gom-bilã naaga pipi gom-biis nins bi-bilf sẽn bãngdã. Yɩɩ a Zeezi sẽn wa n pelg a pʋg n pʋʋsd a Ba wã la a pʋd gom-bi-kãnga. Lɛɛr a wãn sẽn deng a kũumã, a pʋʋsa a Zeova Gɛtsemane tɩɩsã zĩigẽ, n bool-a tɩ “Aba, m Ba.”—Mark 14:36.
Sebr ning yell d sẽn zoe n gomã paasame tɩ Zʋɩf-rãmbã sẽn gʋls sɛb nins Gɛrk-rãmbã ne Rom dãmbã minundã sẽn wa n piuugã pʋsẽ, b ra pa wae n boond Wẽnnaam tɩ aba ye. Sãmbg sẽn kae, b ra tagsdame tɩ b sã n bool Wẽnnaam ne gom-bil kambã sẽn wae n pʋtẽ, b paoogd-a lame. La a Zeezi yẽ pʋʋsa Wẽnnaam n bool-a tɩ “Aba,” sẽn na yɩl tɩ nebã bãng tɩ yẽ ne Wẽnnaam nonga taab wʋsgo. Gʋls-sõamyã pʋgẽ, zĩis a yiib a taabã d sẽn yãt “Aba” wã fãa yaa sɛb nins tʋm-tʋmd a Poll sẽn gʋlsã pʋgẽ. Wilgdame tɩ pipi kiris-nebã me sã n da pʋʋsd Wẽnnaam, b ra wae n boond-a-la woto.—Rom dãmbã 8:15; Galat rãmbã 4:6.
Galat rãmbã 6:17; w10 1/11 15
Yãmb ra miime bɩ?
A Poll sẽn yeel tɩ yẽ tara ‘bãn a yĩngã pʋgẽ sẽn wilgd t’a yaa a Zeezi yambã’ tõe n dat n yeelame tɩ bõe?—Galat rãmbã 6:17.
▪ Neb nins sẽn kelg a Poll goamã pipi kiris-nebã wakatẽ wã ra tõe n wʋma b võor toor-toore. Wala makre, pĩnd wẽndẽ wã, b ra mi n wɩnga bãnga, n ning ned b sẽn yõk zabr sasa bãnde, ned sẽn zu teed wẽnd-doog pʋgẽ, la yamb sẽn zoe n bas a zu-soab bãnde. B sã n da ning ned bãnd a woto, yaa paoogre.
La ra pa bãna fãa n da yaa paoogr ye. Pĩnd wẽndẽ buud wʋsg neb ra ningda bãn sẽn na yɩl tɩ b bãng b buudã wall b tũudmã n bake. Makre, sebr a yembr yeelame: “Siiri nebã ra ningda b nusã wall b yubli wã bãn sẽn na yɩl n wilg tɩ b rɩka b mens n kõ wẽnnaam-dãmb a Hadaad ne a Ataargatis . . . Neb nins sẽn da waoogd a Diyonisuusã bãndã ra yaa tɩɩg buud vãoogo.”
Biibl-mitb wʋsg tagsdame t’a Poll ra gomda a nod-rãand yelle, rat n yeel tɩ b sẽn pãb-a naoor wʋsg a misioneer tʋʋmdã sasa wã sẽn bas nod-rãand ninsã. (2 Korẽnt rãmbã 11:23-27) La tõe t’a Poll ra ratame tɩ b bãng tɩ yẽ sẽn vɩ to-to wã wilgdame t’a yaa kiris-ned hakɩɩka. Pa bãn sɩd-sɩd yell la a ra gomd ye.
SIGR RASEM 10-16
D SẼN BÃNG BIIBLÃ KARENG PƲGẼ | EFƐƐZ RÃMBÃ 1-3
“A Zeova sẽn maand bũmb nins a raabã pidsg yĩnga”
Efɛɛz rãmbã 1:8, 9; it-2 858 s. a 2
Yel-soalgdg sẽn yaa sõngã
Mesi wã Rĩungã. A Poll sɛbã pʋsẽ, a wilga Kiristã yel-soalgdg sẽn yaa sõngã sẽn vẽnegd to-to wã sõma. Efɛɛz rãmb 1:9-11, a goma Wẽnnaam sẽn kɩtd tɩ d bãngd a raabã yel-soalgdg sẽn yaa sõngã yelle, n yeele: “Yel-soalgd-kãng zemsa sẽn noom bãmbã. Leb n yaa rẽ yĩng me la b yãk yam n na n wilg b sẽn dat tɩ yɛlã sigl to-to wã. La yaa wakat ning bãmb sẽn yãkã sã n wa pid la b na n maan bõn-kãnga, n tigim bũmb nins fãa sẽn be saasẽ, la bũmb nins fãa sẽn be tẽngã zugã tɩ b sak Kiristã. Yaa Kiristã pʋgẽ la tõnd sẽn be wã. Leb n yaa ne bãmb la b yãk tõnd tɩ d yaa pʋɩt-n-taase. B pĩnd n yãka tõnd wa sẽn zems Wẽnnaam daabã. Bãmb pidsda bũmb fãa wa sẽn zems b sẽn yãkd yam tɩ zemsd b raabã.” Wẽnnaam Rĩungã a sẽn bobl Mesi wã naaga “yel-soalgd-kãng” sẽn yaa sõngã. A Poll sẽn gom “bũmb nins fãa sẽn be saasẽ” wã yellã, yaa sẽn saagd-b n na n wa naag Kiristã saasẽ n dɩ naam Rĩungã pʋgẽ wã yell la a ra gomda. “Bũmb nins fãa sẽn be tẽngã zugã” na n yɩɩ neb nins Rĩungã sẽn na n soog tẽngã zugã. A Zeezi wilga a karen-biisã tɩ Rĩungã naaga yel-soalgdg sẽn yaa sõngã. A yeel-b lame yaa: “Wẽnnaam sõnga yãmb tɩ y wʋm bãmb Rĩungã yel-soalgdgã sẽn yaa sõngã võore.”—Mark 4:11.
Efɛɛz rãmbã 1:10; w12-MM 7/1 27-28 s. a 3-4
A Zeova tigimda a zakã rãmba
3 Wakat fãa, bũmb nins a Zeova sẽn maandã yaa a raabã pidsg yĩnga. Rẽ so tɩ ‘wakat sẽn ta,’ a sɩnga bũmb toor-toor maanego, sẽn na yɩl n tigim sẽn na n vɩɩmd-b saasẽ wã la sẽn na n vɩɩmd-b tẽngã zugã wa zag-yɛng neba. (Karm-y Efɛɛz rãmb 1:8-10.) A sẽn maand bũmb ninsã yaa bugs a yiibu. Pipi, a zaeeda neb sẽn na n wa tɩ vɩɩmd saasẽ ne a Zeezi Kirist sẽn yaa b Zu-soabã. Yɩɩ yʋʋmd 33 Pãntekotã sasa la a sɩng nin-kãensã sẽn na n wa tɩ rɩ naam ne a Zeezi wã tigingu. (Tʋʋ. 2:1-4) Kiristã maoong maasem yĩnga, b yaa nin-tɩrs Wẽnnaam nifẽ n na n wa paam vɩɩm. B miime tɩ b lebga “Wẽnnaam kamba.”—Rom 3:23, 24; 5:1; 8:15-17.
4 Yiib-n-soaba, a Zeova sõngda neb nins sẽn na n wa vɩɩmd tẽngã sẽn na n lebg arzãnã zug Mesi wã naam sasa, tɩ Kiristã ne sẽn paam-b zaeebã na n soog-bã. “Kʋʋn-kãsengã” sẽn yaa neb nins sẽn na n põs to-kãsengã sasa wã n na n yɩ pipi n vɩɩmd arzãnã pʋgẽ. (Wil. 7:9, 13-17; 21:1-5) A Zeezi naamã sẽn na n kaoos yʋʋm tusrã sasa, neb milyaar-dãmb n na n vʋʋge. (Wil. 20:12, 13) Tags-y n ges-y rẽ sẽn na n kõ-d weer tɩ d maneg n wilg tɩ d zemsda taab to-to wã! La yʋʋm tusrã poore, yaoolem makr n na n zĩndi. B na n maka nebã fãa, tɩ sẽn na n kell n yɩ-b sakdbã paam n lebg “Wẽnnaam kamba.”—Rom 8:21; Wil. 20:7, 8.
D bʋgs Wẽnnaam Gomdã zug neere
Efɛɛz rãmbã 3:13; w13-MM 2/1 25 s. 15
Bao-y waoogr ning sẽn yit Wẽnnaam nengẽ wã
15 Wãn to la d tõe n sõng neb a taab tɩ b paam waoogr ning sẽn yit Wẽnnaam nengẽ wã? Bũmb a ye yaa d sẽn na n tõog toog a Zeova tũudmã pʋgẽ. A Poll gʋlsa Efɛɛz kiris-nebã n yeel-b woto: “Mam kota yãmb me tɩ y keng y mens n da boog y raood mam sẽn paamd namsg yãmb yĩngã yĩng ye. Mam namsgã yaa yãmb waoogre.” (Ef. 3:13) Bõe yĩng t’a Poll yeel tɩ yẽ namsgã yaa Efɛɛz kiris-nebã “waoogre”? Baa a Poll sẽn seg zu-loees wʋsgã, a kell n sõnga a tẽed-n-taasã tigingã pʋgẽ. Rẽ sõng-b lame tɩ b bãng tɩ bũmb ning sẽn tar yõod n yɩɩd ne kiris-neda, yaa Wẽnnaam daabã maanego. A Poll sã n da bas a tʋʋmdã zu-loeesã yĩnga, saam-biisã ra tõe n tagsame tɩ bãmb ne a Zeova zoodã, koe-moonegã la b tẽebã yõod pa waoog ye. A mak-sõngã kɩtame t’a tẽed-n-taasã bãng tɩ paam n yɩ Kiristã karen-biig tara yõod wʋsgo, tɩ sek d na sak namsg buud fãa rẽ yĩnga.
Efɛɛz rãmbã 3:19; cl 299 s. 21
“Bãng Kirist nonglmã”
21 Gɛrk gom-bil ning sẽn yaa “bãngã” rat n yeelame tɩ “f yã wall f maan bũmb” n bãnge. D sã n nong d taabã wa a Zeezi, rat n yeel tɩ d sã n sakd n mongd d mens d taabã yĩnga, n sõngd-b b sẽn wat n dat sõngr sasa, la d kõt-b sugr ne d sũur fãa, d na n bãnga Kirist nonglmã sõma. Rẽ la d tõogd n “bãng Kirist nonglmã sẽn yɩɩd bãngrã,” d sẽn maan bũmb ninsã yĩnga. A Zeezi rɩka Wẽnnaam togs-n-taar kɛpɩ. Woto wã, bɩ d ra tol n yĩm tɩ d sã n dɩkd Kiristã togs-n-taare, tõnd ne Wẽnnaam a Zeova sẽn yaa nonglmã zoodã pãng paasdame ye.
SIGR RASEM 17-23
D SẼN BÃNG BIIBLÃ KARENG PƲGẼ | EFƐƐZ RÃMBÃ 4-6
“Bob-y zab-teed nins Wẽnnaam sẽn kõtã fãa”
Efɛɛz rãmbã 6:11-13; w18.05-MM 27 s. a 1
Kom-bɩɩse, yals-y kãn-kãe n zab ne a Sʋɩtãana
Tʋm-tʋmd a Poll wilgame tɩ kiris-ned vɩɩm yaa wa sodaag vɩɩm. Sɩd me, tõnd tara bɛɛb sẽn zabd ne-do. La pa ninsaalb ye. Yaa a Sʋɩtãan ne zĩn-dãmbã. B yaa zab-zabdb na maan yʋʋm tusa, n tar minim hal sõma. Dẽnd tõe n wõnda d pa na n tõog zabrã ye. Sẽn yɩɩd fãa, d sã n yaa bi-bɩɩga. La rẽ yĩnga, kom-bɩɩsã tõe n zaba ne bɛ-kãensa n tõog bɩ? N-ye, b tõeeme. La b zoe n tõogdame menga! Bõe yĩnga? Bala, b paamda “raood Zu-soabã tũudum pʋgẽ.” La pa b sẽn paamd tɩ Wẽnnaam kõt-b pãngã bal ye. Wa sodaas sẽn paam zãmsg sõma, b ‘boba zab-teed nins fãa Wẽnnaam’ sẽn kõ wã.—Karm-y Efɛɛs-rãmb 6:10-12.
Efɛɛz rãmbã 6:14, 15; w18.05-MM 28-29 s. a 4, 7, 10
Kom-bɩɩse, yals-y kãn-kãe n zab ne a Sʋɩtãana
4 Bũmb nins d sẽn zãms Wẽnnaam Gomdã pʋgẽ wã kogenda tõnd ne ziri nins tũudum-yoodã sẽn zãmsd nebã, wa sẽbdgã sẽn kogend sodaagã. (Zã 8:31, 32; 1 Zã 4:1) D sã n nong bũmb nins sẽn be Wẽnnaam Gomdã pʋgẽ wã ne d sũur fãa, “gãntikã” bob n kẽnã na n yɩɩ nana ne-do, rat n yeel tɩ Wẽnnaam noyã la a saglsã tũub pa na n yɩ toog wʋsg ye. (Yɩɩn. 111:7, 8; 1 Zã 5:3) Sẽn paase, d sã n wʋmd Wẽnnaam Gomdã sẽn yetã võor sõma, d yam gãeeme, tɩ d tõe n tall raood n zab ne d bɛɛbã, n wilg tɩ bũmb nins d sẽn tẽedã yaa sɩda.—1 Pɩy. 3:15.
7 A Zeova noyã sẽn yaa tɩrsã me kogenda tõnd “sũurã,” rat n yeel tɩ d sẽn yaa a soab d sũurẽ wã. (Yel. 4:23) Sodaag pa na n saag n bas gãntik sẽn maan ne kutu, n dɩk gãntik sẽn maan ne bũmb pãng sẽn pa ta kut ye. Tõnd me pa segd n bas noy nins a Zeova sẽn gãneg sõma la wẽngã wɛɛngẽ wã, n sak tõnd mengã sẽn tagsd tɩ yaa sõma wall wẽngã ye. Tõnd mengã yamã pa sek na kogl d sũurã ye. (Yel. 3:5, 6) Rẽ n so tɩ wakat fãa, d segd n gũusd n get “gãntikã” a Zeova sẽn kõ tõndã sogdsã sã n ket n soga taab sõma, n kogend d sũurã.
10 Rom sodaag neooda ra sõngd-a lame t’a tõog n kẽn n kẽng zabrã zĩigẽ. Woto me, “laafɩ koe-noogã togsg ratem” sẽn yaa kiris-ned neooda wã sõngd-a lame t’a tɩ taas laafɩ koɛɛgã. (Eza. 52:7; Rom. 10:15) La wakat ninga, yɩl n moon koɛɛgã, rẽnda f tall raoodo. A Robɛɛr sẽn tar yʋʋm 20 wã yeelame: “M da zoeta rabeem n pa rat n taas m karen-bi-taasã koɛɛgã ye. M tagsdame tɩ yaa yãnd la m da zoeta. M sã n lebg n tẽege, m neeme tɩ m da pa tar bʋʋm n na n zoe yãnd ye. Masã, m taasda m taabã koɛɛgã, tɩ m sũur noomẽ.”
Efɛɛz rãmbã 6:16, 17; w18.05-MM 29-31 s. 13, 16, 20
Kom-bɩɩse, yals-y kãn-kãe n zab ne a Sʋɩtãana
13 ‘Pɛɛm sẽn yaa wa bugum’ a Sʋɩtãan sẽn tãood n dat tɩ yõg yãmbã tõe n yɩɩ ziri nins a sẽn yelgd a Zeova zugã. Wala makre, a ratame tɩ y tẽ tɩ y pa tog ne a Zeova nonglem, la tɩ y yell pa pak-a ye. A Ayida sẽn tar yʋʋm 19 wã yeelame: “Mam wae n tagsdame t’a Zeova pa mam zoa, la t’a pʋd n pa rat m zood ye.” Bõe n sõngd-a? Ad a sẽn yeele: “Tigissã yaa bũmb sẽn kengd m tẽebã hal sõma. M sã n da kẽng tigissã, m da pa zẽkd m nug n leok baa vugr ye. M da tagsdame tɩ ned kae n dat m goam n kelg ye. La masa wã, m segenda tigissã, la m maood n leokd naoor a yiib bɩ a tãabo. Pa nana ye. La m sã n tõog n leoke, yolsd-m lame. M tẽed-n-taasã me kengda m raood wʋsgo. Tigsg poor fãa, m nee vẽeneg t’a Zeova nong-m lame.”
16 Tõnd “fãagrã tẽeb pidsg gũudmã” kogenda d tagsa wã la d yamã wa kut-puglã sẽn kogend sodaagã zugã. (1 Tes. 5:8; Yel. 3:21) D sẽn gũud fãagrã kɩtame tɩ d yamã be bũmb nins Wẽnnaam sẽn pʋlmã zug n tɩ yɩɩda. Woto sõngda tõnd tɩ baa ne zu-loeesã bɩ d pa komsd raood ye. (Yɩɩn. 27:1, 14; Tʋʋ. 24:15) La yaa sodaag sã n da fõgen a kut-puglã, n pa zãad a nugẽ la kogend-a. Dẽnd “fãagrã tẽeb pidsg gũudmã” sẽn yaa tõnd kut-puglã segd n bee d zugẽ wã wakat fãa. Woto la a na n kogl-do.
20 Tʋm-tʋmd a Poll ra yeelame tɩ Wẽnnaam Gomdã yaa wa sʋʋg a sẽn kõ tõndo. La tõnd segd n paama zãmsg sõma, n tõe n tall-a n dems d tagsa wã, tɩ ned sã n sok tõnd d sẽn tẽed bũmb ninsã me, bɩ d bãng n leoke. (2 Kor. 10:4, 5; 2 Tɩm. 2:15) Bõe n na n sõng-y tɩ y minimã paase? A Sebastiyẽ sẽn tar yʋʋm 21 wã yeelame: “M modgdame tɩ m sã n karem Biiblã sak fãa bɩ m gʋls baa yaa vɛrse-yɛng n bĩngi. M tigsda vɛrse nins sẽn na n sõng-m n yɩɩdã. Sõngda maam tɩ m tõe n bãng a Zeova raab sẽn yaa a soab bũmb wʋsg pʋgẽ.” Ad Dãniyɛll ning yell d sẽn da zoe n gomã me sẽn yeele: “M sã n wa karemd Biiblã, m gʋlsda vɛrse nins m sẽn tagsd tɩ tõe n sõnga nebã m sẽn taasd koɛɛgã. M gũus n gesame tɩ nebã sã n neẽ tɩ fo mengã nonga Biiblã, n kɩs sɩd ne a sẽn yetã, la tɩ f maanda f sẽn tõe fãa n na n sõng-ba, b sakd n kelgame.”
D bʋgs Wẽnnaam Gomdã zug neere
Efɛɛz rãmbã 4:30; it-2 859 s. a 5
Sõmblem
Vʋʋsem sõngo. Yaa a Zeova pãngã bɩ a vʋʋsmã. Yaa a Zeova n so-a, t’a maand a raabã wakat fãa. A yaa yɩlemde, sõngo, la a welg toor Wẽnnaam daabã pidsg yĩnga. Yaa rẽ la b sẽn boond-a tɩ “vʋʋsem sõngo,” la “Sõmblem Vʋʋsmã.” (Yɩɩn. 51:13; Luk 11:13; Rom. 1:4, Sebr Sõngo; Efɛ. 1:13) Ned sã n tar vʋʋsem sõngã, kɩtdame t’a maand sẽn yaa sõng bɩ yɩlemde. Ned sã n tʋmd tʋʋm-dẽgd bɩ tʋʋm-wẽnse, a kɩɩsda vʋʋsem sõngã bɩ a ‘sãamda vʋʋsem sõngã sũuri.’ (Efɛ. 4:30) Baa vʋʋsem sõngã sẽn pa nedã, a sẽn maand fãa zemsda ne Wẽnnaam sẽn yaa sõngã raabo, tɩ ned tõe n maan bũmb tɩ sãam a sũuri. Ned sã n maand wẽnga, a ‘kiisda vʋʋsem sõngã bugmã.’ (1 Tes. 5:19) Ned sẽn maand woto sã n pa base, a beegda Wẽnnaam vʋʋsem sõngã, tɩ tõe n kɩt tɩ Wẽnnaam lebg a bɛya. (Eza. 63:10) Ned sẽn sãamd vʋʋsem sõngã sũur yɛl tõe n wa zẽname, hal t’a gom vʋʋsem sõngã wẽnga. A Zeezi Kirist yaool n yeelame tɩ yel-wẽnd a woto pa na n paam sugr dũni-kãngã pʋgẽ, la dũni-paalgã sẽn watã pʋgẽ me ye.—Mat. 12:31, 32; Mark 3:28-30.
Efɛɛz rãmbã 5:5; it-1 237 s. a 4
Yão-beedo
Tʋʋm-tʋmdɩ n wilgd yão-beed sẽn yaa a soaba. Ned tʋʋm-tʋmdɩ n na n kɩt tɩ b bãng t’a yaa yão-beed soaba, bɩ rat wʋsg soaba. Karen-biig a Zak wilgame tɩ rat-m-wẽng sã n dɩk pʋga, a rogda yel-wẽnde. (Zak 1:14, 15) Dẽnd yaa yão-be-ned tʋʋm-tʋmdɩ n tõe n kɩt tɩ b bãng t’a yaa rẽ. Tʋm-tʋmd a Poll wilgame tɩ yão-be-ned ne bõn-naands pʋʋsd yaa a yembre. (Efɛ. 5:5) Ned a woto kɩtdame tɩ bũmb nins a sẽn datã lebg a wẽnnaam, n lʋɩɩsd rẽ taoor n yɩɩd Naandã tũudmã tʋʋm la a waoogre.—Rom. 1:24, 25.
SIGR RASEM 24-30
D SẼN BÃNG BIIBLÃ KARENG PƲGẼ | FILIP RÃMBÃ 1-4
“Da maan-y yɩɩr baa fʋɩ poorẽ ye”
Filip rãmbã 4:6; w17.08-MM 10 s 10
‘Wẽnnaam laafɩ wã yɩɩda ninsaalbã bãngr fãa’
10 Bõe n na n sõng-d tɩ d ‘ra maan yɩɩr ne bũmb baa fʋɩ,’ la d paam “Wẽnnaam laafɩ wã”? A Poll sẽn yeel Filip kiris-nebã bũmb ningã wilgdame tɩ yɩɩrã tɩɩm yaa pʋʋsgã. Rẽnd d sã n wa maand yɩɩre, d segd n pʋʋsa Wẽnnaam, n togs sẽn namsd tõndã. (Karm-y 1 Pɩyɛɛr 5:6, 7.) D segd n pʋʋs-a lame, n kɩs sɩd zãng t’a geta d yelle. Wakat fãa bɩ d pʋʋsd a Zeova barka, a sẽn zoe n maan bũmb nins n kõ-dã yĩnga. D tẽegdẽ me t’a tõe n maana “hal wʋsg n yɩɩg tõnd sẽn kot fãa, wall d sẽn tagsd fãa.”—Efɛ. 3:20.
Filip rãmbã 4:7; w17.08-MM 10 s. a 7
‘Wẽnnaam laafɩ wã yɩɩda ninsaalbã bãngr fãa’
7 Sãmbg kae tɩ Filip kiris-nebã sẽn karem a Poll lɛtrã, b tẽega bũmb ning sẽn da paam yẽ ne a Sɩlasã, la a Zeova sẽn maan yel-solemd n sõng-bã. A Poll gʋlsa lɛtrã n na n sõng-b tɩ b bãng bõe? A ra ratame tɩ b bãng tɩ zu-loees sasa, b pa segd n maan yɩɩr ye. B segd n wɩnga ne pʋʋsgo. Rẽ, b na n paama Wẽnnaam laafɩ wã. A Poll yeel-b lame tɩ ‘Wẽnnaam laafɩ wã yɩɩda ninsaalbã bãngr fãa.’ Rat n yeelame tɩ bõe? Biibl-dãmb kẽer pʋgẽ, b yeelame tɩ Wẽnnaam laafɩ wã ‘zʋʋga tõnd sẽn tõe n mamsã,’ bɩ ‘zʋʋga ninsaal sẽn tõe n magã fãa.’ A Poll gomdã wilgdame tɩ “Wẽnnaam laafɩ wã” yɩɩda tõnd sẽn tõe n tagsã fãa. D sã n wa tar zu-loɛɛga, tɩ wõnd pa tar tɩɩm, d tẽeg t’a Zeova tara a tɩɩm. A tõe n maana bũmb d sẽn pa tẽede.—Karm-y 2 Pɩyɛɛr 2:9.
w17.08-MM 12 s. 16
‘Wẽnnaam laafɩ wã yɩɩda ninsaalbã bãngr fãa’
16 D sã n paam “Wẽnnaam laafɩ wã,” wãn to la na n sõng-do? Biiblã yeelame tɩ ‘Wẽnnaam laafɩ wã na n gũu tõnd sũyã ne d tagsa wã,’ Kirist Zeezi maasem yĩnga. (Fili. 4:7) Gɛrk gom-bil ning b sẽn lebg tɩ “gũ” wã bilgda b sẽn na n yãk sodaas tɩ b gũ tẽnga. Filip nebã sã n da kẽ yʋng fãa, b ra tõe n gũsa tamm, bala b ra miime tɩ sodaas n gũud tẽngã. Tõnd me sã n paam “Wẽnnaam laafɩ wã,” kɩtdame tɩ d yam gãe, tɩ d sũy keemẽ. D miime t’a Zeova geta d yelle, la t’a ratame tɩ d vɩɩmã tall barka. (1 Pɩy. 5:10) Woto kɩtame tɩ d pa basd tɩ d zu-loeesã koms d raoodo, wall kɩt tɩ d maan yɩɩr tɩ loog noor ye.
D bʋgs Wẽnnaam Gomdã zug neere
Filip rãmbã 2:17; it-2 850 s. a 1
Maando
Bõn-yũudl maoongo. Maand buud toor-toorã fãa la bal ra naagda ne bõn-yũudla, sẽn yɩɩd fãa, Israyɛll nebã sẽn wa n kẽ kãabg tẽngã pʋgẽ wã poore. (Sõd. 15:1, 2, 5, 8-10) Ra yaa dɩvẽ (bɩ rãam buud a to) la b pʋdgd tẽn-kugrã zugu. (Sõd. 28:7, 14; Yik. 30:9; Sõd. 15:10; ges-y Yik. 30:9; Sõd. 15:10.) Tʋm-tʋmd a Poll gʋlsa Filip kiris-nebã n yeel yaa: “B sã n pʋdgda maam wa divẽ b sẽn kõ tɩ b kiig maoong zug mam sẽn teend tʋʋmd ning sẽn yaa sõngã yĩnga, mam sũur nooma wʋsg ne yãmb fãa, bala yãmb tẽebã kɩtame tɩ yãmb me tʋmd tʋʋm-kãnga.” Vɛrse-kãngã pʋgẽ a rɩka makr ne bõn-yũudl maoongo, n wilg tɩ yẽ sakame n na n mong a meng zãng a tẽed-n-taasã neer yĩnga. (Fili. 2:17) Bilf sẽn deng a kũumã, a yeela a Tɩmote yaa: “B zoe n pʋdgda maam wa divẽ b sẽn daagd tẽn-kugr zugu, la wakat ning mam sẽn na n paam m mengã kolgame.”—2 Tɩm. 4:6.
Filip rãmbã 3:11; w07-MM 1/1 29 s. a 5
“Dẽenem vʋʋgrã” zoe n sɩngame!
5 Sẽn pʋgde, neb nins sẽn paam vʋʋsem sõng zaeebã, sẽn yaa “Israyɛll sẽn yaa Wẽnnaam dẽnda” me segd n tɩ naaga a Zeezi Kirist saasẽ, la beenẽ b “na n paa ne Zu-soaba daar fãa.” (Galat dãmba 6:16; 1 Tesalonik rãmba 4:17) Yaa rẽ la b sẽn boond tɩ “dẽenem vʋʋgrã.” (Wilgri 20:6, Kãab-paalgã Koe-noogo.) Dẽenem vʋʋgrã loogr poore, neb milyõ rãmb la b na n vʋʋg tɩ b vɩɩmd tẽngã zug arzãn pʋgẽ wakat sẽn kõn sa yĩnga. Yaa tẽngã zug bɩ yaa saasẽ la d saagd n na n vɩɩmde, “dẽenem vʋʋgrã” tara yõod ne-do. La dẽenem vʋʋgrã yaa bõe? Wakat bʋg la a sɩng-yã?