Yãmb maanda sũ-noog ne y tʋʋmdã bɩ?
1. Kiuug fãa kũumẽ, d fãa segd n maana sũ-noog ne bõe?
1 Kiuugã sã n mi n ki tɩ b yeel tɩ koe-moondbã wa ne b rapoor dãmbã, yãmb maanda sũ-noog ne y sẽn gʋls bũmb ning n kɩsã bɩ? (Gal. 6:4) Y yaa zall so-pakd n moond lɛɛr 130 kiuug fãa, tɩ y yaa koe-moond b sẽn kõ sor tɩ baa yaa minit 15 la y moon kiuug fãa bɩ y tõe n gʋlse, tõnd ned kam fãa segd n maana sũ-noog ne a sẽn tõog n maan bũmb ning a Zeova yĩnga.—Yɩɩl 100:2.
2. Bõe yĩng tɩ d segd n wɩng ne a Zeova tʋʋmdã?
2 A Zeova sẽn yaa yĩngr la tẽng naabã yĩnga, d sã n na n kõ-a bũmbu, togame tɩ yɩ d sẽn tar tɩ yaa sõmã n yɩɩdã. (Mal. 1:6) Tõnd rɩka d meng n kõ-a, n na n maan a raabã, d sẽn nong-a wã yĩnga. Dẽnd wĩndg sẽn kẽ fãa bɩ kiuug fãa kũumẽ, d sã n mi d sũurẽ vẽeneg tɩ d kẽesa d sẽkã, d pãngã la d minimã a Zeova tʋʋmdã pʋgẽ tɩ yaa wa d sẽn kõ-a d kood “dẽenem biisi,” d tara bʋʋm n na n maan sũ-noogo. (Yel. 3:9) La sã n mik tɩ tõnd sũur-kasetã ningd-d-la taale, d tog n gesa d sẽn na n maaneg tɩ ra le yɩ woto ye.—Rom 2:15.
3. Bõe yĩng tɩ pa sõma tɩ d makd d sẽn maandã ne d taabã?
3 “Ka ne ned a to ye”: Pa yam bũmb tɩ d makd d sẽn maanã ne neb a taabã rẽnda, wall ne tõnd mengã sẽn da wa n tar keelmã ye. Nebã yɛlã toeemdame, d tõogã me pa yembr ye. D sã n makd d sẽn maandã ne d taabã bɩ ne pĩndã, tõe n waa ne wags-n-taare, bɩ kɩt tɩ d tagsdẽ tɩ d ka võor ye. (Gal. 5:26; 6:4) A Zezi ra pa makd nebã tʋʋm ne b taabã rẽnd ye. A ra geta ned fãa sẽn tõog n maane, n pẽg-a.—Mark 14:6-9.
4. A Zezi sẽn wẽ yel-bũnd ning n gom talã rãmbã yellã zãmsda tõnd bõe?
4 A Zezi sẽn wẽ yel-bũnd ning n gom talã rãmbã yellã pʋgẽ, tʋm-tʋmd fãa reegame tɩ ‘zems ne-a.’ (Mat. 25:15) B zu-soabã sẽn lebg n wa, n sok ned fãa a tʋʋmdã, sẽn tʋm-b ne b sũy fãa tɩ zems ne b tõogã paama pẽgre, la b le paam pʋɩɩr ne b zu-soabã sũ-noogo. (Mat. 25:21, 23) Tõnd me sã n wɩngd ne Rĩungã koɛɛgã moonego, d tõe n kɩsa sɩd t’a Zeova sũur nooma ne-do. Leb n yaa bʋʋm sẽn sek d na maan sũ-noogo!