‘Da ya-y ne tʋʋm sõma maaneg ye’
1 Y maana neer y sẽn lebg Wẽnnaam a Zeova Kaset soabã. La masã wakatã sẽn yaa toogã kɩtame tɩ “tʋʋm sõama maaneg” ka nana ye. (Gal. 6:9) Baa ne tʋʋm sõma maaneg sẽn baood modgr meng-mengã, yaa bũmb sẽn tõe. Wãn-wãn to?
2 Tall-y a Zezi tagsgã buudu: Wala a Zezi, y sã n tik y yamã Rĩungã saagr zugu, y na n tõoga makr toɛ-toɛya. (Heb. 12:2, 3) Bãng-y t’a Zeova nong-y lame, la a rat me tɩ y tõoge. (2 Pɩɛ. 3:9) Teeg-y-yã-a zãng-zãnga, la y kɩs sɩd t’a na n sõng-y lame. (1 Kor. 10:13) Pẽdg-y ne pʋʋsgo, n kot a Zeova t’a sõng-y tɩ y tõog toogo. (Rom 12:12) Maan-y sũ-noog ne y sẽn tar hakɩk tɩ y tõog-toogã na n kɩtame tɩ y ta Wẽnnaam yamã. (Rom 5:3-5) Y sã n sɩd modg n tall ‘yam sõma wa sẽn zems Kirist Zezi mamsgã,’ rẽ na n kõo yãmb la a Zeova sũ-noogo.—Rom 15:5; Yel. 27:11.
3 Ket-y n maand tʋʋm sõma: Tũnug-y ne bũmb nins fãa a Zeova sẽn kõ a nin-buiidã sẽn na yɩl n sõng-b tɩ b maan tʋʋm sõma wã. Karemd-y Wẽnnaam Gomda wakat fãa la y zãmsd tʋm-tʋmd sẽn tũud sɩd la sẽn tar yamã sull sɛb sẽn tik Biiblã zugã. Segend-y la y kẽngd tigingã tigiss fãa, la y kẽesd y meng b pʋsẽ wakat fãa. Sẽn deng tigissã la b poor bɩ y maan tũud-n-taar sõma ne y tẽeb saam-biis la saam-bi-pogsã. Yãk-y bõn-datɩ y sẽn tõe n pids koe-moonegã wɛɛngẽ. Rẽ na n sõng-y lame tɩ y tõog n moon wʋsg n yɩɩda, la tɩ y sẽn moond to-to wã yɩ sõma n paase.
4 Yaa woto la y na n tõog n da ya ne tʋʋm sõma maanego, la y paam sũ-noog me. Zĩ-kãngã wɛɛngẽ, Itali saam-biig a yembr yeelame: “Zaabr sã n ta tɩ m yals a Zeova tʋʋmdã n leb yiri, m neeme tɩ m yaame yaa sɩda, la m tara sũ-noogo. Dẽ m pʋʋsda a Zeova bark a sẽn kõ-m sũ-noog ned ba a yembr sẽn ka tõe n deeg n bas-ma.” Woto yĩnga, bɩ y ra ya ne tʋʋm sõma maaneg tɩ yãmb me na n paama sũ-no-kãsenga.