-
Bõe n tõe n sõng yãmb tɩ y ra bas Biiblã zãmsgo?Vɩɩmd-y wakat sẽn kõn sa!—Biiblã zãmsg sebre
-
-
Bõe n na n sõng-y tɩ y kell n wɩng ne Biiblã zãmsgo?
Biiblã zãmsg tara yõod wʋsgo, la pa wakat fãa la yaa nana ye. Tõe tɩ y mi n sokda y meng y sã n na n tõog n kell n wɩnga ne Biiblã zãmsgo. Bõe yĩng tɩ y segd n kell n modg n da base? Bõe n tõe n sõng-y tɩ y kell n wɩng ne zãmsgã, baa sã n wa pa nana?
1. Bõe yĩng tɩ Biiblã zãmsg tar yõod wʋsgo?
“Wẽnnaam gomdã vɩɩme, la a tara pãnga.” (Ebre-rãmbã 4:12) Biiblã tara yõod wʋsgo, bala a tõe n sõnga yãmb tɩ y bãng Wẽnnaam tagsg sẽn yaa a soab bũmb toor-toor zugu, la y bãng me t’a nong-y lame. A pa sõngd-y tɩ y paam bãngr bal ye. A sõngd-y lame tɩ y paam yam hakɩɩka, la y tẽ manegre. Sẽn tar yõod n yɩɩda, a sõngd-y lame tɩ y lebg a Zeova zoa. Y sã n zãmsd Biiblã, y basdame t’a goamã pãngã sõngd-y tɩ y vɩɩmã lebgd sõma.
2. Bõe yĩng tɩ y segd n sak n deeg tɩ sɩdã sẽn be Biiblã pʋgẽ wã tara yõod wʋsgo?
Sɩdã sẽn be Biiblã pʋgẽ wã yaa wa arzɛka. Yaa rẽ yĩng la b sẽn sagend tõnd Biiblã pʋgẽ tɩ d ‘ra sɩdã, la d ra tol n koos-a’ wã. (Yel-bũnã 23:23, MN) D sã n ning d yamẽ tɩ sɩdã sẽn be Biiblã pʋgẽ wã tara yõod wʋsgo, d na n modg n kell n zãms-a lame, baa d sã n wa segd zu-loeese.—Karm-y Yel-bũn 2:4, 5.
3. Bõe la a Zeova tõe n maan n sõng-y tɩ y kell n wɩng ne Biiblã zãmsgo?
A Zeova sẽn yaa y Naand la y Zoa sẽn tõe fãa wã rat n sõng-y lame tɩ y bãng-a. A tõe n kõo yãmb “raab la tõog sẽn na yɩl tɩ y maan sẽn noom-a.” (Karm-y Filip rãmb 2:13.) Woto wã, y sã n wa rat raood sẽn na yɩl n zãms Biiblã, wall n tũ bũmb nins y sẽn zãmsdã, a tõe n sõng-y lame. B sã n wa namsd yãmb y sẽn zãmsd Biiblã yĩnga, wall yaa zu-loees n kɩt tɩ y rat raood sẽn na yɩl n da base, a tõe n sõng-y lame me. Pʋʋsd-y a Zeova wakat fãa, n kot-a t’a sõng-y tɩ y kell n wɩng ne Biiblã zãmsgo.—1 Tesalonik rãmbã 5:17.
D BAO N BÃNG N PAASE
D ges y sẽn tõe n maan to-to n kell n wɩng ne Biiblã zãmsgo, baa y pa tar sẽka, wall yaa neb n dat n gɩdg-yã. Rẽ poore, d na n yãa a Zeova sẽn na n sõng-y to-to tɩ y kell n wɩng ne zãmsgã n da bas ye.
4. Modg-y tɩ Biiblã zãmsg tall yõod wʋsg y nifẽ
Wakat ninga d tʋʋmã yaa wʋsgo, hal tɩ d getẽ tɩ d pa tar sẽk n zãmsd Biiblã ye. Bõe n tõe n sõng-yã? Karm-y Filip rãmb 1:10, tɩ rẽ poor bɩ y leok sogsgã:
Yãmb tagsdame tɩ “bũmb nins sẽn tar yõod n yɩɩdã” kẽer la bʋse?
Bõe la y tõe n maane, tɩ wilg tɩ Biiblã zãmsg tara yõod wʋsg y nifẽ?
Y sã n deng n ning bĩisrã so wã pʋgẽ la y yaool n dat n sag kugã, pa na n kẽ ye
Y sã n deng n sag kugã so wã pʋgẽ, y na n tõog n ninga bĩisrã fãa la bala. Woto me, y sã n lʋɩɩs “bũmb nins sẽn tar yõod n yɩɩdã” taoore, y na n tõog n maan-b lame, la y paam sẽk me bũmb a taabã yĩnga
Wẽnnaam naana ninsaalbã tɩ b rat n bao n bãng-a la b tũ-a. Biiblã zãmsgã sõngda tõnd rẽ wɛɛngẽ. Karm-y Matiye 5:3, tɩ rẽ poor bɩ y leok sokrã:
D sã n wɩngd ne Biiblã zãmsgo, wãn to la na n naf-do?
5. Kell n wɩng-y, baa b sã n wa rat gɩdg-yã
Wakat ninga, neb kẽer tõe n wa rat n komsa y raoodo, tɩ y bas Biiblã zãmsgo. Ges-y mak-sõng ning a Fãrãnsɛsko sẽn kõ wã. Ges-y VIDEO wã, tɩ rẽpoor bɩ y leok sogsgã.
A Fãrãnsɛsko sẽn togs a zo-rãmbã la a zakã rãmb bũmb nins a sẽn zãmsdã, b manesem yɩɩ wãna?
Wãn to la a sẽn pa koms raood n basã naf-a?
Karm-y 2 Tɩmote 2:24, 25, tɩ rẽ poor bɩ y leok sogsgã:
Yãmb zakã rãmb la y zo-rãmbã tagsg yaa wãn ne bũmb ning y sẽn zãmsdã?
Ned sũur sã n pa noom ne y sẽn zãmsd Biiblã, vɛrse-rãmbã wilgdame tɩ y manesem segd n yɩɩ wãna? Bõe yĩnga?
6. Teeg-y a Zeova t’a sõng-yã
Tõnd ne a Zeova zoodã pãng sã n paasdẽ, d na n maneg n dat n maana sẽn noom-a. Baasgo, tõe n yɩɩ toog tɩ d toeem bũmb kẽere, sẽn na yɩl tɩ d sẽn vɩ to-to wã zems ne a noyã. Sã n wa yaa woto ne yãmba, bɩ y ra koms raood n bas ye. A Zeova na n sõng-y lame. Ges-y VIDEO wã, tɩ rẽ poor bɩ y leok sogsgã.
Bõe la a Gim toeem sẽn na yɩl n ta a Zeova yam?
Bõe n yɩ yãmb noog a kibarã pʋgẽ?
Karm-y Ebre-rãmb 11:6, tɩ rẽ poor bɩ y leok sogsgã:
Bõe la a Zeova na n maan n kõ ‘neb nins sẽn baood-a ne b sũy fãa wã,’ rat n yeel tɩ sẽn modgd-b sẽn na yɩl n bãng-a, la b ta a yamã?
A Zeova sẽn ne y sẽn modgd n zãmsd Biiblã, a tagsg yaa wãna?
NINA TÕE N SOKAME YAA: “Bõe yĩng tɩ fo zãmsd Biiblã ne a Zeova Kaset rãmbã?”
Y na n leokame tɩ bõe?
KƲMSGO
Baa ne Biiblã zãmsg sẽn pa nana wakat fãa wã, tõe n sõng-y lame tɩ y wa paam n vɩɩmd wakat sẽn kõn sa. Kell-y n teeg-y a Zeova, t’a na n keo-y lame.
Lebg-n-gese
Bõe yĩng tɩ sɩdã sẽn be Biiblã pʋgẽ wã tar yõod wʋsg ne yãmba?
Bõe la y tõe n maane, tɩ wilg tɩ Biiblã zãmsg tara yõod wʋsg y nifẽ?
Bõe yĩng tɩ y segd n kos a Zeova t’a sõng-y tɩ y kell n wɩng ne Biiblã zãmsgo?
BŨMB A TAABA
Bũmb a naas sẽn sõng neb wʋsg tɩ b pa sãamd b sẽkã.
“D maand a wãn n da wa sãam d sẽkã” (Yʋʋmd 2014 wao-fuggd kiuug Réveillez-vous! wã)
Pag a ye sẽn da modgd wʋsg n na n ta Wẽnnaam yam, t’a sɩdã ra pa wʋmd a võor ye. Wãn to la a Zeova sõng-a?
Pag a ye sẽn pa koms raood n base, tɩ naf a sɩdã.
Neb n mi n yetẽ t’a Zeova Kaset rãmbã wãada zagse. Yaa sɩd bɩ?
-
-
Ket-y n paasd-y yãmb ne a Zeova zoodãVɩɩmd-y wakat sẽn kõn sa!—Biiblã zãmsg sebre
-
-
3. Bõe la a Zeova na n maan n sõng yãmba?
Biiblã yetame yaa: “Wẽnnaam . . . na n baasa yãmb zãmsgã. B na n kɩtame tɩ y yals kãn-kãe. B na n kõo yãmb pãnga. B na n kɩtame tɩ y kɩ yẽg sõma.” (1 Pɩyɛɛr 5:10) Tõnd fãa paamda makre. La a Zeova kõta tõnd bũmb nins sẽn na n sõng-d tɩ d yals kãn-kãe wã. (Yɩɩn-sõamyã 139:23, 24) A p̣ʋlmame t’a na n kõo tõnd raab la tõog tɩ d kell n tũ-a ne d sũur fãa.—Karm-y Filip rãmb 2:13.
-