Kiris-nebã vɩɩm la b tʋʋma tigissã na-kẽndr not-rãmbã
SẼOOG A 1-7
D SẼN BÃNG BIIBLÃ KARENG PƲGẼ | KOLOS RÃMBÃ 1-4
“Yeeg-y nin-kʋdgã, la y yeelg nin-paalgã”
Kolos rãmbã 3:5-9; w11 3/1 12 s. 12-13
Reeg-y Wẽnnaam vʋʋsem sõngã, la y zãag y meng ne dũniyã yamã
12 Mam manesmã sẽn yaa to-to ne m taabã wilgda bõe? (Karm-y Kolos rãmb 3:8-10, 13.) Dũniyã yamã kɩtdame tɩ nebã sakd b yĩnsã ratem. (Gal. 5:19-21) Sẽn yɩɩd fãa, yaa zu-loees sasa la d tõe n sɩd bãng yam ning sẽn tar pãng d zugã. Wala makre, saam-biig wall saam-bi-poak sã n wa maan-d bũmb tɩ kɩt tɩ d tẽed t’a pa nand-do, pa rẽ bɩ a sãama d sũuri, wall a sã n maana bũmb a to n beeg-do. D manesmã sẽn yaa to-to ne d zakã nebã me wilgda yam ning sẽn tar pãng d zugã. Dẽnd segdame tɩ d fees d meng n gese. Sok-y y meng woto: ‘Kiis a yoob nins sẽn loogã pʋgẽ, mam dɩka Kiristã togs-n-taar n paas bɩ, bɩ m no-goamã la m yel-manesmã wilgame tɩ m lebs n dɩka m pĩnd zʋg-wẽnsã kẽere?’
13 Wẽnnaam vʋʋsem sõngã tõe n sõng-d lame tɩ d ‘bas nin-kʋdgã ne a tʋʋmã,’ la d ‘lebg nin-paalse.’ Woto na n sõng-d lame tɩ d maneg n nong d taabã la d maand-b neere. Na n kɩtame tɩ d sakd n kõt taab sugri, baa sã n mik tɩ b sẽn maan-d bũmb ningã seka d sũur na yiki. D to sã n wa beeg-do, d pa na n leok-a ne sũ-toogo, pa rẽ bɩ ne kisgr la sũ-yikri, wall ne gom-põos ye. D na n modgdame n bʋkd d menga, n ‘maand taab neer la d kʋmd taaba.’—Ef. 4:31, 32, Kãab-paalgã Koe-noogo.
Kolos rãmbã 3:10-14; w13 9/1 21 s. 18-19
Yãmb basame tɩ Wẽnnaam tek-y bɩ?
18 La d sã n dat tɩ Wẽnnaam Gomdã toeem-do, a kareng la a zãmsg bal pa sek ye. Neb wʋsg karemda Biiblã, n mi a kibay sãnda. Tõe tɩ koe-moonegã sasa, y zoe n sega nin-bãmb buudã. Kẽer meng tõe n togsa Biiblã vɛrse-rãmb sãnda goam ne zugu. La b bãngrã pa toeemd b tagsa wã la b manesmã woto ye. Bõe yĩnga? Bala, yaa ned sẽn na n bas tɩ Wẽnnaam Gomdã kẽ a sũurã bal la a na n tõog n toeeme. Rẽ n so tɩ d segd n bʋgsd bũmb ning d sẽn zãmsd Biiblã pʋgẽ wã zugu. Yɩta sõma tɩ d sok d meng woto: ‘Mam kɩsa sɩd tɩ pa tũudum yɛl bal bɩ? Mam nee kaset sẽn wilgd tɩ yaa sɩd bɩ? M tũudã bũmb nins mam sẽn zãmsdã bɩ, bɩ m tagsdame tɩ yaa bũmb m sẽn segd n wilg neb a taabã bala? Mam neeme tɩ yaa a Zeova n gomd ne-m bɩ?’ D sã n bʋgsd sogs-kãensã buud zugu, bũmb nins d sẽn zãmsdã na n kẽ d sũurã. Rẽ la d na n maneg n nong a Zeova, n dat n toeeme, n noog a sũuri.—Yel. 4:23; Luk 6:45.
19 D sã n karemd Wẽnnaam Gomdã la d bʋgsd a zugu, na n sõng-d lame tɩ d kell n maan wa a Poll sẽn yeelã, n ‘bas nin-kʋdgã ne a tʋʋmã n lebg nin-paals sẽn paam yam manegre.’ (Kol. 3:9, 10) D sã n wʋmd Biiblã goam võor sõma la d tũudẽ, d na n lebgda nin-paalga, tɩ kogend tõnd ne a Sʋɩtãan bẽdsã.
D bʋgs Wẽnnaam Gomdã zug neere:
Kolos rãmbã 1:13, 14; it-2 833 s. a 4-6
Wẽnnaam Rĩungã
“Bãmb Bi-nongrã rĩungã.” A Zeezi sẽn leb saasẽ tɩ rasem piig poore, yʋʋmd 33 Pãntekotã daare, vʋʋsem sõngã siga a karen-biisã zugu, tɩ yɩ kaset t’a Zeezi zẽkame n ‘be Wẽnnaam nug-rɩtgo.’ (Tʋʋ. 1:8, 9; 2:1-4, 29-33) A karen-biisã sɩngame n dɩt kãab-paalgã nafa. Sẽn paase, bãmb n yɩ pipi n lebg ‘buud sẽn yaa sõngã’ nebã, rat n yeel tɩ Israyɛll sẽn yaa Wẽnnaam dẽndã.—Ebre. 12:22-24; 1 Pɩy. 2:9, 10; Gal. 6:16.
Masã, Kiristã ra zĩi a Ba wã rɩtgo, la a yaa tigingã Zu-soaba. (Efɛ. 5:23; Ebre. 1:3; Fili. 2:9-11) Gʋls-sõamyã wilgdame tɩ yʋʋmd 33 Pãntekotã daarã, a Zeezi sɩngame n dɩt naam a karen-biisã zugu. Pipi kiris-nebã wakate, tʋm-tʋmd a Poll sẽn wa n gʋls kiris-neb nins sẽn be Kolosã, a wilgame t’a Zeezi ra zoe n tara rĩungu. Ad a sẽn yeele: “[Wẽnnaam] yiisa tõnd likã tõog pʋgẽ, n kẽes-d bãmb Bi-nongrã rĩungã pʋgẽ.”—Kol. 1:13; Tʋʋ. 17:6, 7
Yʋʋmd 33 Pãntekotã daarã, Kirist rĩungã sɩngame n dɩt naam Israyɛll sẽn yaa Wẽnnaam dẽndã zugu, rat n yeel tɩ neb nins sẽn paam Wẽnnaam vʋʋsem sõngã zaeeb n na n lebg a kambã. (Zã 3:3, 5, 6) Nin-kãensã sã n wa loog saasẽ, Kirist rĩungã pa na n le rɩ naam b zug ye. La b na n dɩɩ naam ne Kirist saasẽ.—Vẽn. 5:9, 10.
Kolos rãmbã 2:8; w08 8/1 32 s. a 8
Galat dãmba, Efɛɛz rãmba, Filip rãmba, la Kolos rãmb sɛbã vaeesgo
2:8—Yel-yaals “sẽn yaa dũniyã rẽndã” a Poll sẽn yeel tɩ d gũus ne wã yaa bõe? Yaa a Sʋɩtãan dũniyã yɛla, rat n yeel tɩ noy nins la bũmb nins fãa sẽn teend dũni-kãngã wã. (1 Zã 2:16) Filozofi wã, laogã baoobo, la ziri tũudmã naaga yel-kãense.
SẼOOG RASEM A 8-14
D SẼN BÃNG BIIBLÃ KARENG PƲGẼ | 1 TESALONIK RÃMBÃ 1-5
‘Ket-y n kengd-y taab raoodo, la y paasd taab tẽeb pãnga’
1 Tesalonik rãmbã 5:11-13; w11 6/1 30 s. 12
“Waoog-y neb nins sẽn tʋmd wʋsg yãmb sʋkã”
12 “Lʋɩ tigingã taoorã’ pa zãms a nebã bal ye. Pipi Tɩmote 3:4 pʋgẽ wã, gom-bil ning b sẽn lebg tɩ ‘gesã’ ne ‘lʋɩ taoorã’ fãa yaa a yembre. Be, a Poll yeelame tɩ yel-gɛt “tog n gesa a meng yir dãmb yell tɩ zemse, la a kɩt t’a kambã yɩ kom-sakdse, n maan sẽn zems waoogre.” Vẽenega, ‘ges a meng yir dãmb yell’ ka wã pa zãms a kambã bal ye. Yaa lʋɩ zakã taoore, n sõng kambã tɩ b “yɩ kom-sakdse.” Sɩd me, kãsem dãmbã lʋɩta tigingã neb taoore, n sõngd b fãa tɩ b sakd a Zeova.—1 Tɩm. 3:5.
“Waoog-y neb nins sẽn tʋmd wʋsg yãmb sʋkã”
19 Ned sã n tags yãmb yell n kõ-y kũuni, y manesem yɩta wãna? Rẽ yĩnga y kõn dɩ kũunã yõod n wilg tɩ y sũur yaa noog sɩda? “Kũun sẽn yaa nebã” yaa kũun a Zeova sẽn kõ yãmba, a Zezi Kirist maasem yĩnga. Bũmb a ye y sẽn tõe n maan n wilg y mi-beoog rẽ yĩnga, yaa y sẽn na n kelgd kãsem dãmbã sõssã neere, n modgd n tũud saglsã. Y leb n tõe n wilga y mi-beoogo, y sẽn na n modgd n leokd sõma n kengd y taabã raood tigissã sasa. Teend-y tʋʋm nins kãsem dãmbã sẽn lʋɩt taoor n getẽ tɩ d tʋmdẽ wã. Wala makre, koe-noogã moonegã. Kãsem soab ning sã n kõ-y saglg tɩ naf-yã, y tõe n togs-a lame. Sẽn paase, y tõe n wilgda kãsem dãmbã zags rãmb tɩ y sũur nooma ne-ba. Tẽeg-y tɩ sẽn na yɩl tɩ kãsem soab tõogd n tʋmd tigingã tʋʋm sõma, a zakã rãmb sakdame t’a rɩkd sẽk a sẽn da tõe n dɩk n zĩnd ne-ba, n maand rẽ.
1 Tesalonik rãmbã 5:14; w17.10 10 s. 13
Bɩ tõnd nonglmã yɩ ne tʋʋma la ne sɩda
13 D sõng pãn-komsem dãmbã. Ad Biiblã saglg sẽn tõe n sõng-d tɩ d bãng d nonglmã sã n yaa hakɩɩka. B yeelame tɩ d “tebel pãn-komsem dãmbã,” la d “maan sũ-mar ne nebã fãa.” (1 Tes. 5:14) Yaa sɩd tɩ pãn-komsem dãmb wʋsg tẽeb wat n paama pãnga, la kẽer nengẽ, yaa tɩlɛ tɩ d maan sũ-mar wʋsgo, la d sõng-b ne nonglem. Bõe la d tõe n maan n sõng-ba? D tõe n wilg-b-la vɛrse sẽn kengd raoodo, wall d kos-b tɩ b wa tɩ d tũ taab n moon koɛɛgã, pa rẽ bɩ d sõs ne-ba, n kelg-b neere. Yɩta sõma me tɩ d ra bakd d tẽed-n-taasã, n get kẽer wa pãn-komsem dãmba, la sãnda wa neb tẽeb sẽn tar pãng ye. Ned fãa tara a sẽn kongd pãng zĩig ninga, la a sẽn tar pãng zĩig ninga. Tʋm-tʋmd a Poll meng yeela vẽeneg tɩ yẽ tara a pãn-komsem. (2 Kor. 12:9, 10) Dẽnd ned fãa ratame t’a taabã sõngd-a la b kengd a raoodo.
D rɩk a Zezi naoore, n yɩ sik-m-mens rãmb la nimbãan-zoɛtba
16 D no-goamã. D sã n zoet d taabã nimbãanega, na n kɩtame tɩ d ‘belsd sũ-sãoong rãmbã.’ (1 Tes. 5:14) Bõe la d tõe n yeel n keng b raoodo? D tõe n wilg-b lame tɩ b yell pak-d lame. D tõe n goma b zʋg-sõma wã yelle, la bũmb toor-toor b sẽn maan tɩ wilgdẽ tɩ b tara minim me yelle. D tõe n tẽeg-b lame t’a Zeova sẽn bool-b tɩ b lebg a Biigã karen-biisã, wilgdame tɩ b tara yõod a nifẽ. (Zã 6:44) D tõe n tẽeg-b lame me t’a Zeova geta a nin-buiidã yelle, la t’a “pẽnegda neb nins sũy sẽn sãamã,” la a fãagd “sũ-pa-noom dãmbã.” (Yɩɩl 34:19) D sã n gomd gom-noodo, tõe n sɩd kenga neb nins sũy sẽn sãamã raoodo.—Yel. 16:24.
D bʋgs Wẽnnaam Gomdã zug neere:
1 Tesalonik rãmbã 4:3-6; it-1 921
Yoobo
Ned sã n yo, yaa yel-wẽnd sẽn tõe n kɩt tɩ b yiis-a tigingã pʋgẽ. (1 Kor. 5:9-13; Ebre. 12:15, 16) Tʋm-tʋmd a Poll yeelame tɩ kiris-ned sã n yo, a beegda a meng yĩngã, bala a tũnuga ne a raoolmã bɩ a poglmã n maan yel-wẽnde. A maana bũmb sẽn sãam yẽ ne a Zeova zoodã, a rẽgma tigingã, la sẽn paase, a mengã tõe n bẽe taoor bãag tɩ tũ ne a yõore. (1 Kor. 6:18, 19) A wẽga a tẽed-n-taasã. (1 Tes. 4:3-7) Bala, 1) a tʋma tʋʋm-dẽgd sẽn yaa yãnde, la sẽn sãamd a Zeova yʋʋrã (Ebre. 12:15, 16), 2) a kɩtame tɩ ned ning a sẽn yo ne wã pa le yaa yɩlemd Wẽnnaam nifẽ, tɩ nin-kãng sã n nan pa kẽ kãadem me, a sã n wa kẽ, a pa le yaa yɩlemd ye, 3) a sãama a zakã rãmb yʋʋre, la 4) a sãama ned ning a sẽn yo ne wã roagdb sũuri, bɩ a sɩdã wall ned ning a sẽn na n kẽ kãadem ne wã sũuri. A sẽn yo wã, pa ninsaalbã noy sẽn pa tolg n gɩdgd yoobã la a kɩɩs ye. Yaa Wẽnnaam meng la a kɩɩs-yã, Soab ning sẽn na n wa sɩbg-a, a yel-wẽnã yĩngã.—1 Tes. 4:8.
1 Tesalonik rãmbã 4:15-17; w15 7/1 20-21 s. 14-15
“Yãmb fãagrã kolgame”!
14 Goog sẽn yit Magoogã sã n wa na n zab ne Wẽnnaam nin-buiidã, bõe n na n maane? Biiblã yeela woto: “[Ninsaal Bi-riblã] na n tʋma b malegsã, n tigs b nin-tũusdsã sẽn be dũni kɩrems a naasã, hal dũni tɛk tɩ ta yĩngr tɛka.” (Mark 13:27; Mat. 24:31) Nin-tũusdsã tigsgã pa neb nins sẽn paam vʋʋsem sõng zaeebã yãkrã ye. Leb n pa sẽn paam-b vʋʋsem sõng zaeeb n ket tẽngã zugã sẽn na n paam yaoolem bãndã ye. (Mat. 13:37, 38) B na n paama yaoolem bãndã nand tɩ to-kãsengã sɩnge. (Vẽn. 7:1-4) Woto wã, tigsg ning yell a Zeezi sẽn gomã yaa bõe? Yaa sẽn paam-b vʋʋsem sõng zaeeb n ket tẽngã zugã saasẽ wã kẽngre. (1 Tes. 4:15-17; Vẽn. 14:1) B loogrã na n yɩɩ Goog sẽn yit Magoogã sã n wa sɩng zabr ne Wẽnnaam nin-buiidã poor bilfu. (Eze. 38:11) Rẽ poore, a Zeezi sẽn yeel bũmb ningã na n pidsame. A yeela woto: ‘Dẽ, nin-tɩrsã na n yãga wa wĩndg bãmb ba soolem pʋgẽ.’—Mat. 13:43.
15 Neb kẽer sẽn yet tɩ b yaa kiris-neb tẽedame tɩ b na n zẽkame n kẽng saasẽ. B leb n tẽedame t’a Zeezi na n lebg n waame tɩ nebã fãa yã-a. La Biiblã wilga vẽeneg t’a Zeezi waoongã pa bũmb d sẽn na n yã ne nif ye. Wala makre, a yeelame tɩ ‘Ninsaal Bi-riblã bãnd na n puka saasẽ,’ la t’a na n zaoonda sawat n wa. (Mat. 24:30) Biiblã leb n yeelame tɩ “ninsaal yĩng ne zɩɩm ka tõe n paam Wẽnnaam soolmã ye.” Rẽ n so tɩ neb nins sẽn na n kẽng saasẽ wã segd n ‘paam tedgr wakat a yembre, nif kamsg pʋgẽ, yaoolem baorg peebgã wakate.’ (Karm-y 1 Korẽnt-rãmb 15:50-53.) Rẽnd b na n tigma sẽn paam-b vʋʋsem sõngã zaeeb n ket tẽngã zugã zĩig pʋgẽ tɩ b kẽng saasẽ.
SẼOOG RASEM 15-21
D SẼN BÃNG BIIBLÃ KARENG PƲGẼ | 2 TESALONIK RÃMBÃ 1-3
‘Yel-wẽnã rao wã pukri’
2 Tesalonik rãmbã 2:6-8; it-1 220-221
Wẽnnaam sakrã
Yel-soalgdg a to n be n yaa toor fasɩ ne a Zeova “yel-soalgdgã sẽn yaa sõngã.” Yaa “yel-wẽnã rao wẽnemã sẽn yaa yel-soalgdgã.” Ra yaa yel-soalgdg ne kiris-neb hakɩɩkã, bala tʋm-tʋmd a Poll wakatẽ wã, “yel-wẽnã rao” ra nan pa puk vẽenega, tɩ b miẽ tɩ yaa neb sull yell la a Poll sẽn da gomdã ye. Baa “yel-wẽnã rao” sã n da wa puki, ra na n kell n yɩɩ yel-soalgdg ne neb wʋsgo, bala a na n maanda sɩlem n tʋmd tʋʋm-wẽnse, n yetẽ tɩ yaa ne Wẽnnaam yʋʋr la a sẽn maandã. La yaa vẽeneg tɩ Wẽnnaam nifẽ, yaa sɩdã kɩɩsgo. A Poll yeelame tɩ yẽ wakatẽ wã, “yel-wẽnã rao wẽnemã sẽn yaa yel-soalgdgã” ra zoe n tʋmdame, bala yɛl sẽn pa zems la kẽer ra zoe n maand tigingã pʋgẽ. La tarẽ-n-tarẽ, b ra na n wa lebga wẽn-kɩɩsdb sulli. Baasgo, Kirist Zeezi waoongã sẽn na n lebg vẽenegã sasa, a na n sãam-a lame. Sɩdã kɩɩsd a Sʋɩtãan sẽn tũnugd ne wã na n zẽka a meng n yɩɩd “bũmb ning fãa ninsaalbã sẽn boond tɩ ‘wẽnd’ wall b sẽn waoogde.”(Grɛk, sebasma) Wẽnnaam bɛ kãngã a Sʋɩtãan sẽn tʋmd ne wã na n belga neb wʋsgo, tɩ neb nins sẽn na n tũ-a wã paam sãoongo. “Yel-wẽnã rao” wã sẽn tʋmd tʋʋm-wẽnsã n yetẽ tɩ yaa Wẽnnaam yʋʋrã yĩngã, n na n kɩt t’a tõog n belg nebã.—2 Tes. 2:3-12; ges-y Mat. 7:15, 21-23.
2 Tesalonik rãmbã 2:9-12; it-2 255 s. a 7
Ziri
Wẽnnaam a Zeova basdame tɩ b belgd neb nins sẽn nong zirẽ-beedã, tɩ b tẽed zirẽ-be-zãmsgo, la b pa tẽed a Zeezi Kirist koe-noogã ye. (2 Tes. 2:9-12) Bũmb a woto n maan pĩnd wẽndẽ, Israyɛll rĩm a Akaab naamã sasa. Ziri no-rɛɛsdb n yeel rĩm a Akaab t’a sã n kẽng n tɩ zab ne Ramot sẽn be Galaadã, a na n tõogame. A Zeova no-rɛɛs a Miise yaool n yeelame t’a sã n kẽnge, pa na n baas neer ye. A Zeova vẽnega a Miise t’a yã a sẽn sak t’a malɛk a ye lebg “zirẽ sɩɩg” n kẽ a Akaab no-rɛɛsdbã fãa. Rat n yeelame tɩ malɛkã kɩtame t’a Akaab no-rɛɛsdbã pa togs sɩd ye. B ra togsda bũmb nins bãmb mensã sẽn datã, la sẽn noom rĩmã. Baa ne a Zeova sẽn da zoe n keoog a Akaabã, a sak n tẽe belgrã, tɩ baas ne a mengã kũum.—1 Rĩm. 22:1-38; 2 Kib. 18.
D bʋgs Wẽnnaam Gomdã zug neere:
2 Tesalonik rãmbã 1:7, 8; it-1 890 s. a 6
Bugum
A Pɩyɛɛr yeelame tɩ “saasã ne tẽng ning sẽn be masã wã bĩnga bugum yĩnga.” D sã n karem vɛrse nins sẽn deng a sẽn yeelã, la vɛrse nins sẽn pʋgl rẽ wã, n paas vɛrse-rãmb a taaba, yaa vẽeneg tɩ pa bugum sɩd-sɩd yell la a sẽn da gomdã ye. Yaa sãoong wakat sẽn kõn sa yĩng yell la a sẽn gomdã. A Nowe wakatẽ wã, sa-kãsengã pa sãam saasã la tẽngã meng-meng ye. Yaa wẽn-kɩɩsdbã la sa-kãsengã sãam-yã. Woto me, wakat ning a Zeezi Kirist ne a malɛgsã sẽn na n puk bug-witim pʋgẽ wã, yaa wẽn-kɩɩsdbã ne dũni-wẽn-kãngã bal la b na n sãam wakat sẽn kõn sa yĩnga.—2 Pɩy. 3:5-7, 10-13; 2 Tes. 1:6-10; Eza. 66:15, 16, 22, 24.
2 Tesalonik rãmbã 2:2; w86 15/7 19 s. 19
Maan-y gũusgu
19 Sẽn paase, a Zã wilga d sẽn segd n maan gũusg to-to. (Karm-y 1 Zã 4:1.) D pa segd n tẽ “koɛɛg ning fãa sẽn wõnd a yita Wẽnnaam nengẽ ye.” La d segd n “feesa koeesã fãa n ges b sã n sɩd yita Wẽnnaam nengẽ.” Bõe yĩnga? “Bala zirẽ-be-no-rɛɛsdb wʋsg n kẽ dũniyã pʋgẽ.” Zirẽ-be-no-rɛɛsdb kẽer ra togda soaya, n kẽnd tigims toɛy-toɛy pʋsẽ n “dat tɩ karen-biisã lak n pʋg bãmba.” (Tʋʋ. 20:29, 30; 2 Zã 7) Rẽ n so tɩ kiris-neb hakɩɩkã ra segd n gũusi.
SẼOOG RASEM 22-28
D SẼN BÃNG BIIBLÃ KARENG PƲGẼ | 1 TƖMOTE 1-3
Modg-y n bao-y tʋʋm-sõngo
1 Tɩmote 3:1; w16.08 21 s. a 3
Yãmb baood n na n tʋma Wẽnnaam tʋʋmã n paas bɩ?
3 Karm-y 1 Tɩmote 3:1. Tʋm-tʋmd a Poll yeelame tɩ ned sã n dat tʋʋmd tigingã pʋgẽ, yaa bũmb sẽn sek pẽgre. Ned sã n dat n gãd bũmb sẽn zãr ne-a, rẽnda a tẽeg a nugã n tõog n paam bũmbã. Rẽnd a Poll gomdã wilgdame tɩ yɩl tɩ ned paam tʋʋmd tigingã pʋgẽ, yaa tɩlɛ t’a mao. D rɩk makr wa saam-biig sẽn na n dat n lebg kãsemb-sõngda. A miime t’a segd n mao n bɩɩsa zʋg-sõma nins rẽ sẽn baood t’a bɩɩsã. A sã n wa lebg kãsemb-sõngda, a na n ket n modgd n bɩɩsda zʋg-sõma a taaba, n wa tõog n lebg kãsem-soaba.
1 Tɩmote 3:13; km 12/78 4 s. a 7
Neb nins sẽn baood ‘tʋʋm-sõngo’
7 Dẽnd pa zaalem la a Poll sẽn yeel tɩ rap a woto baooda tʋʋm-sõngã ye. La tʋʋm-kãng pa wa kẽer sẽn tagsd tɩ yaa naam buud b sẽn kõt ned wẽnd-doogẽ ye. Kãsem-sõngdbã “sẽn tʋmd sõma” wã paamda a Zeova ne a Zeezi barka, tɩ tigingã neb fãa waoogd-b la b teend-ba. Rẽ kɩtame tɩ “b tõe n gom tẽeb ning sẽn be Kirist Zeezi pʋgẽ wã yell ne pʋ-peelem wʋsgo.” B tʋmda b tʋʋmdã sõma, tɩ tigingã neb nand-b rẽ yĩnga. B tara tẽeb sẽn yaa kãn-kãe, n tõe n gom b tẽebã yell n pa zoe rabeem, tɩ ned me ka tõe n dõd-b ye.
D bʋgs Wẽnnaam Gomdã zug neere:
1 Tɩmote 1:4; it-1 980
Yaab-rãmb sõdgre
Bao n bãng yɛl a woto bɩ n wẽ no-koeemd yel-kãens wɛɛngẽ ra pa tar yõod ye. Sẽn yɩɩd fãa, sasa ning a Poll sẽn wa n gʋls a Tɩmote lɛtrã. Ra pa tar yõod tɩ b gʋls yaab-rãmbã rot n bĩngi, sẽn na yɩl n bãng ned sẽn yɩtẽ ye. Bala kiris-neb tigingã pʋgẽ, Wẽnnaam pa bakd zʋɩf-rãmbã ne bu-zemsã neb ye. (Gal. 3:28) Sẽn paase, b ra zoe n sõdga a Zeezi yaab-rãmbã roto, n wilg tɩ Kiristã yaa a Davɩɩd yagenga. Bũmb a to me yaa t’a Poll sẽn gʋls a lɛtrã poor bilfu, b ra na n sãama Zerizalɛm ne zʋɩf-rãmbã sɛbã fãa. Wẽnnaam pa kogl-b ye. Yaa rẽ fãa yĩng la a Poll sẽn da pa rat t’a Tɩmote ne tigims toɛy-toɛyã neb bas yɛl nins sẽn tar yõodã n kẽes b sẽkã n na n bao n bãng b yaab-rãmbã roto, la b wẽed no-koɛɛm ye. Bala yel-kãensã pa na n naf-b tẽebã wɛɛngẽ ye. Biiblã pʋgẽ, b sẽn sõdg Kiristã yaab-rãmbã rotã seka na kɩt tɩ d kɩs sɩd tɩ yẽ la Mesi wã. Yaa rẽ n tar yõod n tɩ yɩɩd ne kiris-nebã. Biiblã sɛb a taab sẽn sõdgd yaab-rãmbã rotã yaa kaset tɩ Biiblã goamã yaa sɩda, tɩ wilgd vẽeneg tɩ nin-kãensã sɩd zĩndame.
1 Tɩmote 1:17; cl 12 s. 15
“Ges-y-yã! Ad tõnd Wẽnnaamã”
15 A Zeova a ye tãa la b boond tɩ “wakat sẽn ka sɛt Rĩmã.” (1 Tɩmote 1:17; Vẽnegre 15:3) Rat n yeelame tɩ bõe? Gom-kãngã wʋmbã võor yɩɩda ninsaal pãnga. A Zeova pa tall sɩngre, a pa na n tall saab me ye. Yɩɩn-sõamyã 90:2 yetame yaa: “Yãmb dag n sɩng n yaa Wẽnnaam zamaan woo zamaane.” Dẽnd a Zeova bee wakat fãa. A yaa “wakat fãa naaba.” A sɩng n bee hal wakat sẽn pa tõe n bãng n sõde, n yaool n na n naan bũmb nins sẽn be saasẽ la tẽngã zugã. (Dãniyɛll 7:9, 13, 22, Wẽnnaam Sebre, 1983) Rẽ wã, ãnd n tõe n kɩɩs t’a pa Naab sẽn-ka-to?
SẼOOG RASEM 29–SA-SIK RASEM A 4
D SẼN BÃNG BIIBLÃ KARENG PƲGẼ | 1 TƖMOTE 4-6
“Wẽnnaam sakrã, la arzɛgsã”
1 Tɩmote 6:6-8; w03 6/1 9 s. a 1-2
D maan sũ-noog ne bũmb ning d sẽn tarã
A Poll ra tara sũ-noogo, la vɩɩm sẽn tar barka. Bũmb ning sẽn sõng-a n tɩ yɩɩd yaa a sẽn da maand sũ-noog ne a sẽn tarã. Ned sẽn maand sũ-noog ne bũmb ning a sẽn tarã modgdame t’a sẽn tarã sekd-a. Rẽ wɛɛngẽ, a Poll yeela a Tɩmote sẽn da yaa a tʋmd-n-taagã yaa: “Sɩd-sɩda, Wẽnnaam sakrã nafda ned wʋsgo, la yaa a soabã sẽn na n maand sũ-noog ne bũmb ning a sẽn tarã. Bala, tõnd pa zã baa fʋɩ n wa dũniyã pʋgẽ, la d pa tõe n zã bũmb n yi me ye. Woto wã, d sã n tar rɩɩb la futu, d na n maana sũ-noog ne bõn-kãense.”—1 Tɩmote 6:6-8.
A Poll wilgame tɩ Wẽnnaam sakrã, la maan sũ-noog ne bũmb ning d sẽn tarã tũuda taaba. A ra miime tɩ Wẽnnaam sakrã, rat n yeel tɩ lʋɩɩs Wẽnnaam tʋʋmdã taoor vɩɩmã pʋgẽ wã n kõt sũ-noog hakɩɩka. Pa arzɛgsã bɩ teedã baoob ye. A sẽn da baood ‘rɩɩb la futã,’ yaa sẽn na yɩl n kell n tʋm Wẽnnaam tʋʋmdã. Dẽnd ne a Polle, yaa f sẽn na n teeg a Zeova la f na n tõog n maan sũ-noog ne f sẽn tarã, baa f yɛlã sẽn wa n yaa to-to.
1 Tɩmote 6:9; g 6/07 6 s. a 2
Ned sã n dat ne a sũur fãa n lebg rakãagre, wata ne zu-loe-bʋse?
Yaa sɩd tɩ neb wʋsg pa maand kaalem, b sẽn modgd b pãng fãa n na n lebg rakã-rãmb yĩng ye. La b baoobã pʋgẽ, bũmb wʋsg la b na n bõne. Sẽn paas me, b tʋʋmã bɩ ligdã zu-loees tõe n kɩtame tɩ b yamã pa gãe bãane, tɩ b pa gõe sõma, tɩ yaa zu-zaba, wall pʋ-noada, tɩ b vɩɩmã pa le noom ye. Woto fãa tõe n kʋʋga b vɩɩmã. La baa a soabã wa n toeeme, rẽ tɩ zoe n kẽ n bõogame. A pagã tõeeme n pa le kɩs-a sɩda, a kambã sũy tõe n sãamame, tɩ yẽ mengã ka le tar laafɩ ye. Tõe tɩ yɛl kẽer la a na n tõog n demse, la pa na n yɩ nana ye. Neb a woto paamda ‘tood wʋsgo.’—1 Tɩmote 6:10.
1 Tɩmote 6:10; g 11/08 6 s. a 4-6
Sagls a yoob sẽn na n sõng-y tɩ y vɩɩmã tall barka
Wa d sẽn yã pipi sõsgã pʋgẽ wã, neb nins sẽn dat n lebg rakã-rãmba, n tẽed tɩ rẽ n na n kɩt tɩ b vɩɩmã tall barkã zoet n pʋgda ko-neneg n tagsdẽ tɩ yaa koom sɩd-sɩda. B na n paama sũ-sãamse, la zu-loees wʋsgo. Makre, neb sã n modgd b pãng fãa n na n bao arzɛka, bãmb ne b zakã rãmb la b zo-rãmbã zems-n-taarã sãamdame. Kẽer pa le gõe sõma, b tʋʋmã wall b sẽn maand yɩɩr yĩnga. Koɛɛg soab 5:11 wã yetame: “Tʋmtʋmd sã n tar dɩɩb bilf wall wʋsgo, a gõeem noom-a lame. La arzɛk soab tɩgrã ka basd-a t’a gũs ye.”
Arzɛkã pa zu-soab sẽn yaa toaag bal ye. A belgda nebã me. A Zeezi Kirist goma “arzɛkã belgr” yelle. (Mark 4:19, notã) Koɛɛg-koɛɛga, nebã tagsdame tɩ arzɛkã kõta sũ-noogo, la pa woto ye. Arzɛk pa sekd ned ye. Koɛɛg soab 5:9 wã yetame yaa: “Ned sã n nong ligdi, ligd ka sekd-a ye.”
D sã n na n kʋmse, arzɛkã nonglem pa nafd neda, wata ne sũ-sãamse, sũ-yikri, bɩ n kɩt meng tɩ ned tʋm tʋʋm-wẽnse. (Yel-bũnã 28:20) Ned sã n sɩd rat n paam sũ-noog la vɩɩm sẽn tar barka, a tog n yɩɩ kõata, sug-kõata, yɩlemd Wẽnnaam nifẽ, n nong a taabã la a tar tẽebo.
D bʋgs Wẽnnaam Gomdã zug neere:
Sũur-kaset sẽn yaa sõma
17 Tʋm-tʋmd a Pɩyɛɛr yeelame: “Kell-y n tall-y sũur-kaset sẽn yaa sõma.” (1 Pɩyɛɛr 3:16) Bʋko, neb wʋsg toog sẽn kae ne a Zeova saglsã, b sũur-kasetã pa le tʋmd baa bilf ye. A Poll yeelame tɩ nin-kãens sũur-kasetã riglmame tɩ yaa wa b “ning-a-la bãnd ne kut sẽn wɩng wʋsgo.” (1 Tɩmote 4:2) Bugum sã n dɩ ned yĩnga, gãongã kidbdame, tɩ b sã n sɩɩs meng bɩ a soab pa mi ye. Ned sã n maand sẽn yaa wẽnga, a sã n pa base, a sũur-kasetã na n riglmame, n pa le tʋmd baa bilf ye.
1 Tɩmote 4:13; it-2 122 s. a 1-2
Karengã zãma wã taoore
Kiris-neb tigingã pʋgẽ. Pipi kiris-nebã wakate, neb nins sẽn da tar Gʋls-sõamyã seb-pindmã ra pa waoog ye. Rẽ n so tɩ ra yaa tɩlɛ tɩ b karemd-b zãma wã taoore. Tʋm-tʋmd a Poll kõo noor tɩ b karemd a lɛtã wã tigissã sasa, la tɩ tigimsã toond taab lɛta nins yẽ sẽn gʋlsdã, sẽn na yɩl tɩ b karem-b nebã taoore. (Kol. 4:16; 1 Tes. 5:27) A Poll sagla bi-bɩɩg a Tɩmote sẽn da yaa yel-gɛtã t’a wɩng ne ‘Gʋls-sõamyã kareng nebã taoore, la a wɩng ne nebã saglg la b zãmsgo.’—1 Tɩm. 4:13
Ned sã n karemd zãma wã taoore, a segd n karemda sõma. (Hab. 2:2) Sẽn mik tɩ yaa nebã zãmsg yĩngã, a soabã segd n wʋmda a sẽn karemdã võor sõma, n mi sẽn gʋls-a sebrã sẽn dat tɩ nebã bãnge, la a gũus t’a karengã ra wa kɩt tɩ kɛlgdbã pa wʋm a sẽn karemdã võor ye. Vẽnegr 1:3 wã wilgdame tɩ neb nins sẽn zẽkd b koees n karemd bãngr-gom-kãngã, la sẽn kelgd-b la b tũud bũmb nins sẽn gʋls a pʋgẽ wã na n paama sũ-noogo.