• Wãn to la Biiblã tõe n sõng-yã?
    Vɩɩmd-y wakat sẽn kõn sa!—Biiblã zãmsg sebre
    • Sak a 1. Biibl sẽn lake.

      SAK A 01

      Wãn to la Biiblã tõe n sõng-yã?

      Tõnd fãa la bal sokda d mens sogsg vɩɩmã wɛɛngẽ, namsgã, kũumã, la beoog-daarã wɛɛngẽ. D maanda yɩɩr me daar fãa zu-loeesã wɛɛngẽ. Wala makre, bao-n-kõ-noorã la d sẽn na n maan to-to tɩ sũ-noog zĩnd d zagsã pʋsẽ. Neb wʋsg yãame tɩ Biiblã sõngd-b lame tɩ b paamd sogsg kẽer leoore, la sagls sẽn sõngd-b daar fãa. Yãmb tagsdame tɩ Biiblã tõe n sõnga ned buud fãa bɩ?

      1. Sogs-bʋs la Biiblã leokda?

      Ad sogsg kẽer Biiblã sẽn leokde: Vɩɩmã sɩnga wãn-wãna? Vɩɩmã yõod yaa bõe? Bõe yĩng tɩ nin-sõma namsdẽ? Ned kaalem poore, bõe n maande? Nebã fãa sã n data laafɩ la bãane, bõe yĩng tɩ zabã yaa wʋsgo? Bõe n na n paam tẽngã beoog-daare? Biiblã pʋgẽ, b sagenda tõnd tɩ d bao sogs-kãensã leoore. Sɩd me, neb milyõ-rãmb paama b leoorã hal tɩ nafd-ba.

      2. Wãn to la Biiblã tõe n sõng tõnd d daar fãa vɩɩmã pʋgẽ?

      Biiblã kõta tõnd sagls sẽn yaa sõma. Wala makre, a wilgda zagsã rãmb b sẽn tõe n paam sũ-noog to-to. A kõta sagls sẽn tõe n sõng-d tɩ d mao ne yɩɩrã, la sẽn tõe n sõng-d me tɩ d paam sũ-noog d tʋʋmdã pʋgẽ. Y sã n zãms seb-kãngã, y na n bãnga Biiblã sẽn yet yel-kãensã wɛɛngẽ, la yɛl a taaba. Tõe tɩ y wa sak n deeg tɩ ‘Gʋls-sõamyã tõre, [rat n yeel tɩ Biiblã sẽn yetã fãa] tara yõodo.’​—2 Tɩmote 3:16.

      Seb-kãngã pa ledgd Biiblã ye. A pʋd n tõe n sõng-y lame tɩ y vaees Biiblã y toore. Woto yĩnga, d sagend-y lame tɩ y karem vɛrse nins sẽn be sak fãa pʋgẽ wã, n ges sã n zemsa ne bũmb nins y sẽn zãmsdã.

      D BAO N BÃNG N PAASE

      D ges Biiblã sẽn sõng neb to-to, d sẽn tõe n maan to-to t’a karengã tall yamleoogo, la bũmb ning sẽn kɩt tɩ d segd n bao ned t’a sõng-d tɩ d wʋm a võorã.

      3. Biiblã tõe n wilg-d-la sore

      D tõe n yeelame tɩ Biiblã yaa wa tors sẽn wit sõma. A tõe n sõnga tõnd tɩ d bãng n yãk yam, la a sõng-d me tɩ d bãng bũmb nins sẽn wat beoog-daare.

      Karm-y Yɩɩn-sõamyã 119:105, la y leok sogsgã:

      • Sẽn gʋls-a gom-kãensa wã tagsg ra yaa wãn ne Biiblã?

      • Yãmb tagsg yaa wãn ne Biiblã?

      Rao sẽn kẽnd koom noor ne yʋngo, n zãad tors sẽn wit n teesd a taoore.

      4. Biiblã tõe n sõnga tõnd tɩ d paam d sogsgã leoore

      Pag a ye yãame tɩ Biiblã sõng-a lame t’a paam sogsg a sẽn da sokd a meng leoore. Yaa sogsg a sẽn da sokd a meng hal na maan yʋʋma. Ges-y VIDEO wã. Rẽ poor bɩ y leok sogsgã:

      VIDEO: D ra tol n yĩm tɩ manegr n wat ye! (1:48)

      • Video wã pʋgẽ, sogs-bʋs la pagã ra sokd a menga?

      • Wãn to la Biiblã zãmsgã sõng-a?

      Biiblã wilgdame tɩ yaa sõma tɩ d sokd sogsgo. Karm-y Matiye 7:7. Rẽ poor bɩ y leok sokrã:

      • Sogs-bʋs la y sokd y menga, tɩ Biiblã tõe n sõng-y tɩ y paam b leoorã?

      5. Y sẽn tõe n maan tɩ Biiblã kareng tall yamleoogo

      Neb wʋsg nong n karemda Biiblã, hal tɩ nafd-ba. Ges-y VIDEO wã, tɩ rẽ poor bɩ y leok sogsgã:

      VIDEO: Biiblã karengo (2:05)

      • Video wã pʋgẽ, kom-bɩɩsã tagsg ra yaa wãn sɛbã kareng wɛɛngẽ?

      • Bõe n kɩt tɩ b tagsg yaa toor masã Biiblã kareng wɛɛngẽ?

      Biiblã pʋgẽ, b yeelame tɩ bũmb nins b sẽn gʋls be wã yaa tõnd zãmsg yĩnga, sẽn na yɩl n sõng-d tɩ d paam belsgo, la d tẽ manegre. Karm-y Rom dãmb 15:4, tɩ rẽ poor bɩ y leok sokrã:

      • Yãmb tagsg yaa wãn ne b sẽn yeel tɩ Biiblã tõe n belsa tõndo, la a kɩt tɩ d tẽ manegrã?

      6. Neb a taab tõe n sõng-d lame tɩ d wʋm Biiblã goam võore

      Neb wʋsg karemda Biiblã b yembre, la b mikame me tɩ b sã n sõsd a zug ne neb a taaba, sõngd-b lame. Karm-y Tʋʋm 8:26-31, tɩ rẽ poor bɩ y leok sokrã:

      • Bõe n tõe n sõng-d tɩ d wʋm Biiblã goam võore? ​—Ges-y vɛrse 30 la 31.

      Fot-rãmbã: 1. Koe-moond a Filip sẽn bilgd Etiyopi raoã Biiblã vɛrse. 2. A Zeova Kaset soab sẽn sõsd Biiblã zug ne pag la a kamb a yiibu.

      Etiyopi raoã ra rata sõngr sẽn na yɩl n wʋm Biiblã goam võore. Rũnda-rũndã me, neb wʋsg mikame tɩ b sã n sõsd Biiblã zug ne neb a taaba, sõngd-b lame

      NEB KẼER SẼN YETE: “Biiblã zãmsg yaa sẽk sãoongo.”

      • Yãmb yẽ yetame tɩ bõe? La bõe yĩnga?

      KƲMSGO

      Biiblã kõta sagls sẽn sõngd tõnd d daar fãa vɩɩmã pʋgẽ, la a sõngd tõnd tɩ d paamd d sogsg kẽer leoore. A leb n sõngda nebã tɩ b paamd belsgo, la a sõngd-b tɩ b tẽed manegre.

      Lebg-n-gese

      • Sagl-bʋs buud n be Biiblã pʋgẽ?

      • Sogsg kẽer Biiblã sẽn leokd la bʋse?

      • Bõe la yãmb dat n bãng Biiblã pʋgẽ?

      M sẽn tõe n maane

      BŨMB A TAABA

      Biiblã saglsã ket n tõe n nafa tõnd rũndã-rũndã.

      “Biiblã saglsã yaa zãmaan fãa yĩnga” (Yʋʋmd 2018 Gũusg Gasgã N° a 1)

      Biiblã sõnga rao a ye sẽn da maood ne sũ-sãams hal a yãadmẽ.

      Sẽn sɩng to-to tɩ mam vɩɩmã toeeme (2:53)

      Biiblã sagls sẽn tõe n sõng zak rãmb tɩ b paam sũ-noogo.

      “Sagls 12 sẽn tõe n sõng tɩ zak pʋgẽ vɩɩm yɩ noogo” (Yʋʋmd 2018 Réveillez-vous ! N° a 2)

      Neb wʋsg tẽedame tɩ b mii dũniyã sẽn be a soab ning nugẽ wã. La b sẽn tẽedã pa sɩd ye. Ges-y Biiblã sẽn yetã.

      Bõe yĩng tɩ y tog n zãms Biiblã?​—A zãngã (3:14)

  • Biiblã yaa Wẽnnaam Gomd a sẽn kõ-do
    Vɩɩmd-y wakat sẽn kõn sa!—Biiblã zãmsg sebre

    • 1. Sẽn mik tɩ yaa ninsaalb n gʋls Biiblã, bõe yĩng tɩ d yetẽ tɩ yaa Wẽnnaam n so-a?

      Yaa sẽn zems rap 40 n gʋls Biiblã, na maan yʋʋm 1 600 pʋgẽ. B sɩnga yʋʋmd 1513 sẽn deng a Zeezi rogmã, n tãag yʋʋmd 98 a Zeezi rogmã poore. Sẽn gʋls-b Biiblã yɛlã ra yaa toor-toore. Kẽer da yaa pe-kɩɩmba, zĩm-yõgdba, tɩ sãnda ra yaa rĩm-dãmba. Baa ne rẽ, Biiblã zĩig baa ye pa kɩɩsd a to ye. Bõe n kɩt tɩ yaa woto? Yaa Biiblã sẽn yaa Wẽnnaam Gomdã yĩnga. (Karm-y 1 Tesalonik rãmb 2:13.) Sẽn gʋls-b Biiblã pa gʋls b mens tagsa ye. Ayo. B “togsa Wẽnnaam koees wa sẽn zems vʋʋsem sõngã sẽn vẽneg-bã.”a (2 Pɩyɛɛr 1:21) Wẽnnaam tũnuga ne a vʋʋsem sõngã, n vẽneg neb a tagsa wã tɩ b gʋlse.​—2 Tɩmote 3:16.