Kiris-nebã vɩɩm la b tʋʋma tigissã na-kẽndr not-rãmbã
SA-SIK RASEM A 5-11
D SẼN BÃNG BIIBLÃ KARENG PƲGẼ | 2 TƖMOTE 1-4
“Vʋʋsem sõngã Wẽnnaam sẽn kõ tõndã pa kɩt tɩ d yaa rabɛɛmb ye”
2 Tɩm. 1:7; w09-MM 5/1 19 s. a 9
Kom-bɩɩse, kɩt-y tɩ nebã bãng tɩ y bɩtame
9 Sẽn na yɩl n sõng a Tɩmote, kaoosg poore, a Poll tẽeg-a-la woto: ‘Wẽnnaam ka kõ tõnd dabeem sɩɩg ye, yaa sɩɩg sẽn wat ne pãng la nonglem la yam bɩ yam-vẽenem.’ (2 Tɩm. 1:7) “Yam-vẽenem” kãng sõngda ned t’a tõe n tags n wʋm yɛl võor sõma. A leb n sõngd-a lame t’a sakd n maood ne zu-loees buud fãa, baa b sẽn yaa to-to. Kom-bɩɩs kẽer sẽn ka yam wilgdame tɩ b yaa rabɛɛmba, n tẽed tɩ zu-loeesã tɩɩm yaa b sẽn na n gõe wʋsgo, pa rẽ bɩ b get televiziõ wã wʋsgo, wall b rɩkd dorge, bɩ b yũud rãam tɩ loogdẽ. Kẽer me tagsdame tɩ yaa reemd n pa satẽ wã la yoobã n na n sõng-ba. La kiris-ned pa segd n maan woto ye. B sagla kiris-nebã tɩ b ‘bas Wẽnnaam kɩɩsg la dũniyã ratem sẽn yaa wẽnsã, la b gũus b mens dũniyã ka masã n maan tɩrga, la b sak Wẽnnaam.’—Tɩt 2:12.
2 Tɩm. 1:8; w03-MM 3/1 22 s. a 7
‘Tall-y raood la y nang pãnga!’
7 A Poll gʋlsa a Tɩmote n yeele: “F mi tɩ ka rabeem la Wẽnd kẽes d sũurẽ ye, b kõo tõnd b Vʋʋsem sẽn yaa pãnga . . . Da zoe yãnd ne kaset ning fo sẽn tog n kõ d Soaala ye.” (2 Tɩmote 1:7, 8, Sebr Sõngo; Mark 8:38) D sẽn karem gom-kãensã wã d tõe n soka d mense: ‘Mam zoeta yãnd ne m tẽebã bɩ, bɩ m tara raoodo? Mam sẽn tʋmd zĩig ningã (bɩ m sẽn be lekoll ningã), mam kɩtdame tɩ nebã bãng tɩ m ya a Zeova Kaset soab bɩ, bɩ m baoodame n na n solg rẽ? Mam zoeta yãnd m sẽn pa maand wa neb a taabã bɩ, bɩ m sũur nooma m sẽn welg toor n tar zems-n-taar ne a Zeova wã yĩnga?’ Ned sã n zoet rabeem ne koe-noogã moonego, bɩ ne wilg a tẽeb neb wʋsg sẽn pa nonge, bɩ a tẽeg a Zeova sẽn sagl a Zozue sagl-kãngã wã: “Nang pãng la f keng f sũuri.” D ra tol n yĩm tɩ pa tõnd tʋmd-n-taasã bɩ d karen-bi-taasã tagsg n tar yõod ye, la yaa a Zeova la a Zeezi Kirist tagsgã.—Galat dãmba 1:10.
D bʋgs Wẽnnaam Gomdã zug neere
2 Tɩm. 2:3, 4; w17.07-MM 10 s. 13
Bao-y paoong sɩd-sɩdã
13 A Tɩmote me yɩɩ ned sẽn tall tẽebo. A Poll bool-a lame t’a “Zeezi Kiris tãb-bi-sõngo,” la a yeel-a yaa: “Sodaag ka kẽesd a toog nin-zaals vɩɩm yɛl pʋgẽ, a sã n dat tɩ ned ning sẽn dɩk-a yẽ sodaarã sũur yɩ noog ne-a ye.” (2 Tɩm. 2:3, 4) Rũndã-rũndã, sẽn yɩɩd neb milyõ a ye n kẽes b mens zãng Wẽnnaam tʋʋmdã pʋgẽ, n yaa wa tãb-biisi. Bãmb ne b tẽed-n-taasã fãa maanda b sẽn tõe n tũud a Poll saglgã. B yõkda b mense, n pa basdẽ tɩ piblisite-rãmbã la dũniyã nebã manesmã kɩt tɩ b lebg rat-wʋsg rãmb ye. Wakat fãa, b tẽegdame tɩ Biiblã yeelame tɩ “ned sã n tɩ reeg samd ned a to nengẽ, a lebga a soabã yamba.” (Yel. 22:7) A Sʋɩtãan sẽn dat yaa tõnd rɩk d pãngã la d sẽkã fãa n baood ligdã, hal n lebg ligdã yembse. Neb n kẽed sam-bɛd sẽn na yɩl n da zaka, mobilli, n yao kareng bɩ n maan b yi-kãadem kibsa. Wat n lebga tɩlɛ tɩ b tʋm yʋʋm ka tɛk n yao. D sã n dat n wilg tɩ d maanda yam, segdame tɩ d mao n da gĩd d vɩɩmã, n da nong n kẽed sama, la d ra raad teed wʋsg ye. Rẽ, d na n sɩd yɩɩ Wẽnnaam yembse, n da yɩ ligdã yembs ye.—1 Tɩm. 6:10.
2 Tɩm. 2:23; w14-MM 7/1 16 s. 10
Neb nins sẽn yaa a Zeova rẽndã segd n ‘basa tʋʋm-wẽnse’
10 Rũndã-rũndã, d pa wae n yãt sɩdã kɩɩsdb tigingã pʋgẽ ye. La sɩdã kɩɩsdb tõe n wa rat n sõsa ne tõndo. B tõe n tũnuga ne ẽntɛrnetã wall bũmb a taaba. La sẽn yaa a soab fãa, d pa segd n kelg-b ye. D pa segd n wẽ no-koɛɛm ne sɩdã kɩɩsdb wall d leok b mesaaz-rãmbã ye. Baa d sã n tagsdẽ tɩ rẽ na n sõng-b lame tɩ b ninã puki, pa zems ye. Bala d sã n maan woto, d kɩɩsda Wẽnnaam. A yeelame tɩ d segd n laka d mens ne nin-kãensã.
SA-SIK RASEM 12-18
D SẼN BÃNG BIIBLÃ KARENG PƲGẼ | TƖT 1–FILEMO
“Yãk kãsem-dãmba”
Tɩt 1:5-9; w14 15/11 28-29
Karemdbã sogsgo
Baa Gʋls-sõamyã sẽn pa wilgd b sẽn da yãkd kãsem-dãmbã la kãsem-sõngdbã to-to wã ball-ballã, d tõe n yãa bũmb kẽer sẽn wilgd b sẽn da maand to-to wã. B wilgame t’a Poll ne a Barnabas sẽn wa n gilg n moon koɛɛgã pipi n lebgdẽ wã, b “yãka neb tɩ b lebg kãsem-dãmb tiging fãa pʋgẽ”, la tɩ b “pʋʋsame la b loe noore, la b bas-b a Zeova sẽn yaa soab ning b sẽn tẽ wã nugẽ.” (Tʋʋ. 14:23) Yʋʋm a wãn poore, a Poll gʋlsa a tʋmd-n-taag a Tɩt lɛtre, n yeel yaa: “Mam basa foo Kɛrɛt sẽn na yɩl tɩ f maneg bũmb nins sẽn pa sõma wã, la f yãk kãsem-dãmb tẽng-tẽng wa sẽn zems noor ning mam sẽn kõ foomã.” (Tɩt 1:5) Wõnda b ra kõo a Tɩmote sẽn gilg wʋsg ne a Poll n moon koɛɛgã me sor t’a tõe n maan woto. (1 Tɩm. 5:22) Dẽnd yaa vẽeneg tɩ yaa saam-biis nins sẽn da gilgd n kaagd tigimsã n da yãkd kãsem-dãmbã la kãsem-sõngdbã, pa tʋm-tʋmdbã la kãsem-dãmbã sẽn da be Zerizalɛmmã ye.
Biiblã sẽn wilg woto wã kɩtame tɩ Siglgã taoor lʋɩtb Sull toeem b sẽn da yãkd kãsem-dãmbã la kãsem-sõngdbã to-to wã. Yʋʋmd 2014 bõn-bɩʋʋng kiuugã pipi daarã tɛka, ad b sẽn yãkd kãsem-dãmbã la kãsemb-sõngdbã to-to: Tigims sull yel-gɛt fãa segd n maaga a yĩng n ges saam-biis nins a tigims sullã kãsem-dãmbã sẽn tagsd tɩ b tõe n lebga kãsem-dãmb wall kãsem-sõngdbã zʋg-sõma wã. A sã n wa kaagd tigimsã, a na n bao n bãnga saam-biis nins b sẽn dat t’a yãkã sõma, tɩ sã n tõe bɩ a tũ-b n moon koɛɛgã. Yel-gɛtã sã n sõs ne kãsem-dãmbã sull poore, yẽ n tar sor n na n yãk saam-biis tɩ b lebg kãsem-dãmbã la kãsemb-sõngdbã a tigims sullã pʋgẽ. Woto zemsa ne pipi kiris-nebã sẽn da maandã.
Ãnd dãmb n tar tʋʋmd kãsem-dãmbã la kãsem-sõngdbã yãkr pʋgẽ? “Tʋm-tʋmd sẽn tũud sɩd la sẽn tar yamã” tʋʋmdã pa toeem ye. Yaa ges tɩ Wẽnnaam nin-buiidã paamd bũmb nins sẽn yaa tɩlɛ b tẽebã kengr yĩngã. (Mat. 24:45-47) Wala makre, ne vʋʋsem sõngã sõngre, b maanda vaeesg Gʋls-sõamyã pʋgẽ sẽn na yɩl n wilg Wẽnnaam nin-buiidã dũniyã gill zug Biiblã sagls nins b sẽn tõe n tũ n sigl sõma wã. Leb n yaa tʋm-tʋmd sẽn tũud sɩdã n yãkd tigims sull yel-gɛtbã fãa, la filiyall-dãmbã taoor lʋɩtb sulã neba. Filiyall fãa me sõngdame tɩ b tũud noy la sagls nins tʋm-tʋmd sẽn tũud sɩdã sẽn kõtã. Tiging fãa kãsem-dãmb sull sã n dat tɩ b yãk saam-biig t’a lebg kãsem-soab wall kãsem-sõngda, b segd n maaga b yĩng n vaees Biiblã, n ges saam-biigã sã n tara zʋg-sõma nins Biiblã sẽn wilg tɩ ned segd n bɩɩsame tɩ b yaool n yãk-a wã. Tigims sull yel-gɛt fãa segd n maaga a yĩng n ges saam-biis nins kãsem-dãmbã sẽn tagsd tɩ b tõe n lebga kãsem-dãmb wall kãsem-sõngdbã zʋg-sõma wã, la a pʋʋs a Zeova n yaool n yãk sẽn sɩd tõe n lebg-b kãsem-dãmb wall kãsem-sõngdbã.
D bʋgs Wẽnnaam Gomdã zug neere
Tɩt 1:12; w89 15/5 31 sull a 5
Karemdbã sogsgo
Yaa vẽeneg t’a Poll ra pa wilgd t’a saka bu-wɛlsdbã sẽn da sãbsd Kɛrɛt nebã ye. D tõe n kɩsa sɩd ne dẽ, bala a Poll ra miime tɩ kiris-neb sẽn tat a Zeova yam n da be Kɛrɛte, t’a zae-b ne a vʋʋsem sõngã. (Tʋʋma 2:5, 11, 33) Kiris-neb ra bee be n sek b na lugl tigims “tẽng-tẽnga.” Yaa sɩd tɩ kiris-nin-kãens ra pa zems zãng ye. La d tõe n kɩsa sɩd tɩ b ra pa ziri yagdba, kʋɩɩmb la yão-be-neb ye. Sã n da yaa woto, b ra pa tõe n kell n ta a Zeova yam ye. (Filip rãmbã 3:18, 19; Vẽnegre 21:8) Rũndã-rũndã, d tõe n yãa pʋ-peelem dãmb tẽnsã fãa pʋsẽ. Ra yaa woto Kɛrɛt tẽngã pʋgẽ me. Sãmbg sẽn kae, neb n da be be tɩ tẽngã nebã sẽn da pa tũud noyã sãamd b sũy wʋsgo. Nin-kãens ra na n sak n kelga koe-noogã kiris-nebã sẽn moondã.—Ezekɩyɛll 9:4; ges-y Tʋʋm 13:48.
File. 15, 16; w08-MM 10/1 31 s. a 5
Tɩt sebrã, Filemo sebrã, la Hebre dãmb sebrã vaeesgo
15, 16—Bõe yĩng t’a Poll pa kos a Filemo t’a bas a Onezɩm t’a ra yɩ yamba? A Poll raabã ra yaa a “moon Wẽnnaam soolem koɛɛgã la a zãms nebã Zu-soab a Zeezi Kirist koɛɛgã.” Rẽ n so t’a pa kẽesd a meng dũniyã yɛl pʋsẽ ye. Wala makre, a ra pa baood n na n sõng yembsã tɩ b paam b mens ye.—Tʋʋ. 28:31.
SA-SIK RASEM 19-25
D SẼN BÃNG BIIBLÃ KARENG PƲGẼ | EBRE-RÃMBÃ 1-3
“Nong-y tɩrlem, la y kisg wẽnga”
Ebre. 1:8; w14-MM 2/1 10 s. a 8
Kils-y Kiristã sẽn yaa Rĩm-kãsengã!
8 Yʋʋmd 1914, a Zeova kɩtame t’a Zeezi lebg a Rĩungã Rĩm. A ‘naam dasaarã yaa tɩrlem dasaare.’ Rẽnd d tõe n kɩsa sɩd t’a Zeezi na n dɩɩ a naamã ne tɩrlem wakat fãa. A tara sor n na n dɩ naam, bala yaa a Zeova n kõ-a naamã. Sẽn paase, a naamã geer na n zĩnda “wakat fãa.” D sẽn paam n tũud a Zeova tɩ Rĩm ning a sẽn yãkã wilgd-d sorã pa noom-d sɩda?
Ebre. 1:9; w14-MM 2/1 9-10 s. a 7
Kils-y Kiristã sẽn yaa Rĩm-kãsengã!
7 Karm-y Yɩɩl Sõamyã 45:7, 8. A Zeezi sẽn nong tɩrlem ne a sũur fãa la a kis bũmb ning fãa sẽn tõe n sãam a Ba a Zeova yʋʋrã yĩnga, a Zeova yãk-a lame t’a lebg a Rĩungã Rĩma. A Zeova zaeya a Zeezi ne “sũ-noog kaam” n yɩɩd a “tũud-n-taasã” sẽn yaa Zida rĩm-dãmbã sẽn yaa a Davɩɩd yagensã. Bõe yĩng tɩ d yet woto? Pipi, yaa a Zeova meng a toor n zae a Zeezi. Yiib-n-soaba, a Zeova zae-a lame t’a na n yɩ Rĩm la maan-kʋʋdb kãsma. (Yɩɩl 2:2; Heb. 5:5, 6) Tãab-n-soaba, a Zeova zaeya a Zeezi ne a vʋʋsem sõngã. Sẽn na n baase, pa tẽngã zug la a na n zĩnd n dɩ naam ye. Yaa saasẽ.
D bʋgs Wẽnnaam Gomdã zug neere
Ebre. 1:3; it-1 1170 s. a 4
Wõnego
A Zeezi sẽn wõnd a Ba wã to-to sɩngrẽ wã ne rũndã-rũndã wã yaa a ye bɩ?
Wẽnnaam Bi-ribl-kãsengã sẽn wa n lebg a Zeezi n yɩ ninsaalã yaa a Ba wã wõnego. (2 Kor. 4:4) Sãmbg sẽn ka be, Wẽnnaam sẽn wa n yeel tɩ ‘d maan ninsaal t’a yɩ wa tõndã,’ yaa ne a Biigã la a ra gomda. Rẽnd Biigã sɩng n yaa a Ba wã sẽn yaa Naandã wõneg hal Biigã naaneg wakate. (Sɩng. 1:26; Zã 1:1-3; Kol. 1:15, 16) Biigã sẽn wa n be tẽngã zug n yaa ninsaal sẽn zems zãngã, a rɩka a Ba wã togs-n-taar kɛpɩ tɩ zems ninsaal tõogã. Rẽ n so t’a tõog n yeel yaa: “Ned ning sẽn yã maam, a yãa Ba wã me.” (Zã 14:9; 5:17, 19, 30, 36; 8:28, 38, 42) La sãmbg sẽn kae, Wẽnnaam a Zeova sẽn yaa a Zeezi Ba wã sẽn wa n vʋʋg-a t’a lebg malɛk la a kõ-a ‘noor t’a ges bũmb fãa yell saasẽ la tẽngã zugã,’ b wõnegã maneg n paasame. (1 Pɩy. 3:18; Mat. 28:18) Sẽn mik tɩ rẽ tɛka, Wẽnnaam zẽka a Zeezi n kõ-a “naam sẽn yaa kãsengã,” Wẽnnaam Biigã pukda a Ba wã ziir masã n yɩɩd sẽn deng t’a yi saasẽ n wa tẽngã zugã. (Fili. 2:9; Ebre. 2:9) Rũndã-rũndã, a “wõnda Wẽnnaam kɛpɩ.”—Ebre. 1:2-4.
Ebre. 1:10-12; it-1 478 s. a 1
Saasẽ
Yɩɩn-sõamyã 102:25, 26 gomda Wẽnnaam a Zeova yelle, la tʋm-tʋmd a Poll lebg n dɩka gom-kãens n gom a Zeezi Kirist yelle. Bala Wẽnnaam sẽn wa n na n naam saasã la tẽngã bũmb fãa wã, a Bi-ribl sẽn-ka-to wã n yɩ a tʋʋm-mita. A Poll maka Biigã sẽn be wakat fãa wã ne bũmb nins Wẽnnaam sẽn naan tɩ d tõe n yã wã, n wilg tɩ pa a yembr ye. Bala Wẽnnaam sã n data, a tõe ‘n põda bõn-kãens wa kobr’ n dɩgl kɛɛnga.—Ebre. 1:1, 2, 8, 10-12; ges-y 1 Pɩy. 2:3.
SA-SIK RASEM 26–BÕN-BƖƲƲNG PIPI DAARE
D SẼN BÃNG BIIBLÃ KARENG PƲGẼ | EBRE-RÃMBÃ 4-6
“Maan-y y sẽn tõe fãa n kẽ Wẽnnaam vʋʋsgã pʋgẽ”
Ebre. 4:1, 4; w11-MM 7/1 24-25 s. a 3-5
Wẽnnaam vʋʋsg raarã yaa bõe?
3 Bʋʋm a yiib n kɩt tɩ d tõe n yeel tɩ rasem a yopoe soabã tall n tãaga pipi kiris-nebã wakatẽ. Pipi bʋʋmã yaa a Zeezi sẽn leok a bɛɛbã to-to b sẽn da wɩt-a n yetẽ t’a maagda bãad-dãmb vʋʋsg daarã. Nin-kãensã ra geelgda rẽ wa tʋʋmã. Zu-soabã yeel-b-la woto: ‘Mam Ba tʋmda daar fãa, la ma-me tʋmdame.’ (Zã 5:16, 17) A gomdã rat n yeelame tɩ bõe? B sẽn dõd-a t’a tʋmda vʋʋsg daarã, a leok-b lame n yeele: “Mam Ba tʋmda daar fãa.” Yaa wa a sẽn da na n yeel-b woto bala: ‘Maam ne m Ba wã sẽn tʋmd tʋʋmd ningã yaa a yembre. Sẽn mik tɩ m Ba ket n tʋmda a vʋʋsg daarã sẽn kaoosd yʋʋm tusa wã, ma-me tara sor n na n ket n tʋmd baa vʋʋsg daare.’ A Zeezi gomdã wilgdame tɩ hal baa wakat kãng tɩ rasem a yopoe soabã ra ket n nan pa sa ye. Rat n yeel t’a Zeova sẽn wa n naan tẽngã bũmbã fãa n sa n sɩng vʋʋsgã, a ra ket n vʋʋsdame. La baasgo, a ra ket n tʋmda sẽn na yɩl n pids raab ning a sẽn tar ne ninsaalbã la ne tẽngã.
4 Bʋʋm a yiib-n-soabã yaa a Poll sẽn wilg bũmb ningã. A ra tẽega Sɩngr 2:2 wã sẽn gomd Wẽnnaam vʋʋsg daarã yellã, n yeel woto: ‘Tõnd sẽn tẽ wã, tõnd kẽeda vʋʋsg pʋgẽ.’ (Heb. 4:3, 4, 6, 9) Dẽnd hal baa a Poll dãmb wakatẽ wã tɩ rasem a yopoe soab daarã ra ket n nan pa sa ye. La ra-kãng ra na n kaoos n tãaga wakat bʋgo?
5 Sẽn na yɩl n tõog n leok sok-kãngã, segdame tɩ d tẽeg bũmb ning sẽn kɩt tɩ Wẽnnaam welg rasem a yopoe soab daarã. Sɩngr 2:3 wã wilgda rẽ n yet woto: ‘Wẽnnaam ninga rasem a yopoe wã raar barka, n welg-a ne dasem a taabã.’ A Zeova sẽn welg ra-kãng ne rasem a taabã n ning-a barkã, yaa sẽn na yɩl n baas raab ning a sẽn da tar ne tẽngã. Raab-kãng yaa tɩ rap la pagb sẽn yaa wẽn-sakdb vɩɩmd tẽngã zugu, n ges a yell la b ges bũmb nins fãa sẽn be a zugã yelle. (Sɩng. 1:28) Yaa raab-kãng pidsg yĩng la Wẽnnaam a Zeova la a Zeezi Kirist sẽn yaa “vʋʋsg raarã Zu-soabã” ket n ‘tʋmd daar fãa.’ (Mat. 12:8) Wẽnnaam vʋʋsg daarã na n tall n tãaga wakat ning a sẽn na n pids a raabã zãng-zãngã. Na n yɩɩ Kiristã naam sẽn na n kaoos yʋʋm tusrã saabẽ.
Ebre. 4:6; w11-MM 7/1 25 s. a 6
Wẽnnaam vʋʋsg raarã yaa bõe?
6 Wẽnnaam wilga a Ãdem ne a Hawa a raabã vẽenega, la b maana bũmb n tõdg raab-kãngã. A Ãdem ne a Hawa poore, neb milyõ-rãmb me n kɩɩs Wẽnnaam. Baa Israyɛll nebã Wẽnnaam sẽn da yãk tɩ yaa a nin-buiidã kɩɩs-a-la naoor wʋsgo. A Poll keooga a wakatẽ kiris-nebã tɩ b sã n pa gũusi, bãmb me tõe n wa lebga tõtb wa Israyɛll nebã. A yeel-b-la woto: “Bɩ tõnd nang pãng n kẽ vʋʋsg-kãnga, tɩ ned ba a ye ra yɩ wa neb nins sẽn ka tall tẽeb n kongã n lʋɩ ye.” (Heb. 4:11) A Poll sẽn yeelã wilgdame tɩ kɩɩsd pa tõe n paam n kẽ Wẽnnaam vʋʋsg raarã pʋgẽ ye. La tõnd yẽ? Rẽ yĩnga rat n yeelame tɩ d me sã n kɩɩsd Wẽnnaam daabã, d pa na n paam n kẽ a vʋʋsg daarã pʋgẽ bɩ? Tara yõod tɩ d bao n bãng sok-kãngã leoorã. Rẽ n so tɩ d na n gom a yell sõma sõs-kãngã pʋgẽ. La d na n deng n goma pĩnd wẽndẽ Israyɛllã neb sẽn bas mak-wẽng ningã yelle, la rẽ sẽn kɩt tɩ b pa tõog n kẽ Wẽnnaam vʋʋsg daarã pʋgẽ wã me yelle.
Ebre. 4:9-11; w11-MM 7/1 28 s. 16-17
Wẽnnaam vʋʋsg raarã yaa bõe?
16 Rũndã-rũndã, tõnd ned baa a ye pa tẽed tɩ yaa tɩlɛ ne kiris-nebã tɩ b tũ a Moyiiz tõogã sẽn na yɩl n paam fãagrã ye. Wẽnnaam sẽn vẽneg a Poll t’a yeel bũmb ning lɛtr ning a sẽn tool Efɛɛz kiris-nebã wilgda rẽ vẽenega. A yeela woto: “Tɩ bõe, yaa ne bark la yãmb paam fãagr tẽeb yĩnga, la ka ne yãmb mens pãng ye, yaa Wẽnnaam kũuni. La a ka tʋʋmã yĩnga, tɩ ned da pẽg a meng ye.” (Ef. 2:8, 9) Woto yĩnga, wãn-wãn la kiris-nebã tõe n kẽ Wẽnnaam vʋʋsg daarã pʋgẽ rũndã-rũndã? Tẽeg-y tɩ Wẽnnaam welga rasem a yopoe soabã, rat n yeel t’a vʋʋsg daarã sẽn na yɩl n pids raab ning a sẽn tar ne tẽngã. A Zeova tũnugda ne a siglgã n wilgd tõnd raab-kãnga, la a sẽn dat tɩ d maanã. Tõnd ned kam fãa sã n dat n kẽ a Zeova vʋʋsg raarã pʋgẽ, rẽndame tɩ d sakd-a la d teend a siglgã wa a sẽn datã.
17 La d sã n pa sakd sagls nins tʋm-tʋmd sẽn tũud sɩd la sẽn tar yamã sẽn tikd Biiblã zug n kõt-dã, n bas n maand sẽn noom-d bala, d kɩɩsda Wẽnnaam raabã. Rẽ maaneg sãamda zood ning d sẽn tar ne a Zeova wã. Sõsg ning sẽn pʋgdã pʋgẽ, d na n goma zu-loees kẽer yelle. Yaa zu-loees sẽn tõe n kɩt tɩ d paam sor n wilg d sã n sɩd yaa sakdba. D sẽn na n yãk yam n zã d mens to-to zu-loe-kãensã buud pʋgẽ wã na n wilga d sã n kẽe Wẽnnaam vʋʋsg daarã pʋgẽ.
D bʋgs Wẽnnaam Gomdã zug neere
Karemdbã sogsgo
Ebre-rãmb 4:12 pʋgẽ wã “Wẽnnaam gomdã” b sẽn yeel t’a “vɩɩme, la a tara pãngã” yaa bõe?
▪ Ebre-rãmb sebrã vɛrse-rãmb a taab wilgdame tɩ tʋm-tʋmd a Poll ra gomda Wẽnnaam koeesã, bɩ a raabã yelle, wa b rãmb nins sẽn be Biiblã pʋgẽ wã.
Tõnd sɛbã pʋsẽ, b wae n tikda Ebre-rãmb 4:12 wã n na n wilg tɩ Wẽnnaam gomdã tara pãng n tõe n toeem neda. B sẽn yet woto wã me zemsame. La yɩta sõma tɩ d ges Ebre-rãmb sebrã vɛrse-rãmb a taaba, tɩ na n sõng-d lame tɩ d wʋm Ebre-rãmb 4:12 goamã võor sõma. A Poll ra sagenda kiris-neb nins sẽn yaa Ebre-rãmbã tɩ b vɩɩmd tɩ zems Wẽnnaam daabã. Raab-kãens wʋsg bee Gʋls-sõamyã pʋgẽ. A Poll rɩka makr ne Israyɛll neb nins b sẽn yiis yembd Ezɩptã. B ra tõe n wa paam n kẽe kãabg tẽngã sẽn da yaa “tẽng sẽn tar bĩisim ne sɩɩd wʋsgã” pʋgẽ, n paam vʋʋsg hakɩɩka.—Yik. 3:8; Tõo. 12:9, 10.
Rẽ ra yaa Wẽnnaam daab a sẽn togse. La Israyɛll nebã wa n riglma b sũyã, n pa tall tẽeb ye. Rẽ, b fãa la bal pa tõog n kẽ vʋʋsgã pʋgẽ ye. (Sõd. 14:30; Zoz. 14:6-10) La a Poll paasame tɩ Wẽnnaam pʋlmame tɩ d “ket n tõe n kẽe bãmb vʋʋsgã pʋgẽ.” (Ebre. 3:16-19; 4:1) Vẽenega, ‘pʋlen-kãng’ naaga Wẽnnaam daabã a sẽn togsã. Tõnd me tõe n karma goam sẽn wilgd Wẽnnaam daabã, la d vɩɩmd tɩ zems ne raab-kãng wa kiris-neb nins sẽn da yaa Ebre-rãmbã. Sẽn na yɩl n wilg tɩ pʋlen-kãng tika Gʋls-sõamyã, a Poll lebs n togsa goam sẽn be Sɩngr 2:2 la Yɩɩn-sõamyã 95:11 pʋgẽ.
Hakɩɩka, d sã n tẽeg tɩ Wẽnnaam pʋlmame “tɩ d ket n tõe n kẽe bãmb vʋʋsgã pʋgẽ,” segd n yɩ-d-la noogo. D kɩsa sɩd tɩ d sẽn tik Biiblã n saagd n na n kẽ Wẽnnaam vʋʋsgã pʋgẽ wã yaa bũmb sẽn tõe, n maand bũmb toor-toor n na n paam n kẽ a pʋgẽ. D pa modgd sẽn na yɩl n tũ a Moyiiz Tõogã, bɩ n tũnug ne tʋʋm-tʋmdɩ a taab n na n paam n ta Wẽnnaam yam ye. La ne tẽebo, d modgdame tɩ d sẽn vɩ to-to wã zemsd ne Wẽnnaam daabã a sẽn vẽnegã. Sẽn paase, dũniyã gill zugu, neb tusa n sɩng Biiblã zãmsgo, n bãngd Wẽnnaam daabã wa d sẽn zoe n togsã. Bãmb sʋkã, neb wʋsg n toeem b sẽn da vɩ to-to wã, n bɩɩs tẽebo, la b reeg lisg n lebg kiris-neba. B sẽn toeemd to-to wã wilgda vẽeneg tɩ “Wẽnnaam gomdã vɩɩme, la a tara pãnga.” Wẽnnaam daabã sẽn be Biiblã pʋgẽ wã zoe n toeema tõnd vɩɩmã, n na n ket n toeemd-a.
Ebre. 6:17, 18; it-1 799 s. a 7
Saagre
‘Sẽn paam-b saasẽ boollã’ (Ebre. 3:1) sẽn saagd n na n wa paam yĩng sẽn pa tõe n põog la b vɩɩmd wakat sẽn kõn sa wã yaa bũmb sẽn tik sɩda, n le yaa bũmb d sẽn tõe n sɩd teege. Tika bũmb a yiib wɛɛngẽ Wẽnnaam sẽn pa tõe n yag ziri, rat n yeel t’a pʋlengã la a wẽenegã. Sẽn paase, saag-kãng bee ne Kiristã sẽn vʋʋg masã n be saasẽ n pa le tõe n ki wã. Rẽ n so tɩ b mak saag-kãng ne “baar tõnd sɩɩsã yĩnga, sẽn vigl kãn-kãe la sẽn pa vigsdi, la sẽn kẽed hal n tãag fu-lilldgã poore, [wa maan-kʋʋdb kãsmã sẽn da kẽed Zĩ-sõng sẽn yɩɩdã pʋgẽ Paasg daarã] zĩig ning a Zeezi sẽn deng taoor n tɩ kẽ tõnd yĩngã. Bãmb lebga maan-kʋʋdb kãsem wa a Melkisedɛk wakat fãa yĩnga.”—Ebre. 6:17-20.