“Bɩ y kolg Wẽnnaam”

“Bɩ y kolg Wẽnnaam, la bãmb na kolg yãmba.”—ZAK 4:8.

1, 2. a) Bõe la ninsaalbã nong n yetẽ? b) Sagl-bʋg la a Zak kõ-yã, la bõe yĩng tɩ sagl-kãng ra yaa tɩlae?

“WẼNNAAM bee ne tõndo.” Gom-kãensã gʋlsa tẽns darpo rãmb la sodaas fut zut menga. Rũndã-rũndã ligd koeems la ligd vãt ka tɛk zutu b gʋlsame tɩ “Tõnd teega Wẽnde.” Ninsaalbã nong n yetame tɩ b tara zood sõma-sõma ne Wẽnnaam. Yãmb pa ne tɩ tall zood a woto yɩɩda gom dẽ yell bɩ d gʋls-a n wilgdẽ bala?

² Biiblã wilgdame tɩ d tõe n talla zems-n-taar ne Wẽnnaam. La rẽ baooda modgre. Pipi yʋʋm kob-gĩndẽ wã, baa kiris-neb sẽn da zae ne vʋʋsem sõngã sãnda ra segd n paasa b zems-n-taarã pãng ne Wẽnnaam a Zeova. Yɩɩ tɩlae ne kiris-neb yel-gɛt a Zak t’a keoog neb kẽer b yĩngã ratem wẽnse, la b sẽn bas n ye pa yɩlem tẽebã wɛɛngẽ wã yĩnga. A taas-b-la sagl-kãngã sẽn tar pãngã: “Bɩ y kolg Wẽnnaam, la bãmb na kolg yãmba.” (Zak 4:1-12) A Zak sẽn yeel tɩ ‘kolgã’ a rat n yeelame tɩ bõe?

3, 4. a) Tõe tɩ gomd ning sẽn yaa ‘kolg Wẽnnaamã’ tẽega a Zak sebrã karemdb nins sẽn zĩnd pipi yʋʋm kob-gĩndẽ wã bõe? b) Bõe yĩng tɩ d tõe n kɩs sɩd tɩ d tõe n kolga Wẽnnaam?

³ A Zak tũnuga ne gomd a sebrã karemdb wʋsg sẽn da mi. A Moiiz Tõogã kõo maan-kʋʋdbã noy sẽn yaa takɩ a Zeova ‘kolgr’ bɩ a pẽnegr wɛɛngẽ, a nin-buiidã nafr yĩnga. (Yikri 19:22) Woto, tõe t’a Zak sebrã karemdb tẽegame t’a Zeova kolgr pa bũmb b sẽn segd n ges faag-faag ye. A Zeova yaa ãndũniyã nin-kãseng sẽn yɩɩd fãa.

⁴ Sẽn paas me, wala Biibl mit a yembr sẽn wilgã, “sagl-kãngã [sẽn be Zak 4:8 pʋgẽ wã] wilgda saagr sẽn tar pãnga.” A Zak ra miime tɩ wakat fãa, ne nonglem, a Zeova boola ãdem-biisã sẽn pa zems zãngã tɩ b kolg-a. (2 Kɩbaya 15:2) A Zezi maoongã paka sor tɩ d tõe n kolg a Zeova sõma n yɩɩda. (Efɛɛz rãmba 3:11, 12) Rũndã-rũndã, sor pakame tɩ neb milyõ rãmb tõe n kolg Wẽnnaam. La wãn to la d tõe n dɩ so-kãseng kãng nafa? Koɛɛg-koɛɛga, d na n yãa soay a tãab d sẽn tõe n tũnug ne n kolg Wẽnnaam a Zeova.

Ket-y n ‘bãngd’ Wẽnnaam

5, 6. Wãn to la bi-bɩɩg a Sãmwɛll makrã wilgd d sẽn segd n maan sẽn na yɩl n ket n ‘bãngd’ Wẽnnaamã?

⁵ Sã n yaa ne Zã 17:3, a Zezi yeelame: “Vɩɩm sẽn ka sɛta yaa woto, [“yaa bãmb sẽn na n baood n bãngd,” NW ] yãmb sẽn yaa sɩd Wẽnnaam sẽn-ka-to la a Zezi Kirist yãmb sẽn tʋm a soabã.” Biibl dãmb wʋsg sẽn lebgd verse kãngã to-to wã yaa toor bilf ne Traduction du monde nouveau wã. Wall tɩ b yeel tɩ “baood n bãngd” Wẽnnaamã, b yetame bal tɩ “bãng” Wẽnnaam bɩ Wẽnnaam “bãngre.” La mitb wʋsg wilgame tɩ gom-biigã võor b sẽn tũnug ne Gɛrk pipi goamẽ wã võor tɩ loee ne bũmb sẽn yɩɩd woto. A tɩ loee ne bũmb b sẽn ket n maandẽ, bũmb sẽn tõe meng n kɩt tɩ f wa bãng ned a to sõma.

⁶ Wa tõog n bãng Wẽnnaam sõma ra pa tags-paalg a Zezi wakatã ye. Wala makre, Hebre Gʋlsg Sõamyã goamã pʋgẽ, d karemdame t’a Sãmwɛll sẽn da wa n yaa bi-kɩdga, a ‘da nan ka mi a Zeova ye.’ (1 Sãmwɛll 3:7) Woto rat n yeelame t’a Sãmwɛll da pa mi bũmb wʋsg a Wẽnnaamã wɛɛngẽ bɩ? Ayo. A roagdbã ne maan-kʋʋdbã sɩd ra zãms-a-la wʋsgo. La, sã n yaa ne bãngd a yembre, Hebre gom-biig ning b sẽn tũnug ne verse kãngã pʋgẽ wã b tõe n tũnuga “ne-a f sã n gomd f zo-nongr meng-meng yelle.” A Sãmwɛll da nan pa mi a Zeova sõma-sõma wa a sẽn bãng-a to-to kaoosg zugẽ a sẽn wa n lebg a Zeova no-rɛɛsã ye. A Sãmwɛll sẽn da ket n bɩtẽ wã, a sɩd wa n bãnga a Zeova, n paam zood sẽn sɩd tar pãng ne-a.—1 Sãmwɛll 3:19, 20.

7, 8. a) Bõe yĩng tɩ Biiblã zãms-zulumsã pa segd n koms tõnd raoodo? b) Tõnd segd n zãmsa Wẽnnaam Gomdã sɩd-zulums kẽer bʋse?

⁷ Yãmb baood n bãngda a Zeova sẽn na yɩl t’a wa lebg y zoa bɩ? Sẽn na yɩl n maan woto, y segd n ‘nonga’ tẽebã rɩɩb Wẽnnaam sẽn kõtã. (1 Pɩɛɛr 2:2) Ra ges-y tɩ Biiblã zãms-yẽgã bal sekame ye. Modg-y n paam n bãng Biiblã zĩis võor wʋmb sẽn yaa toog n yɩɩdã. (Hebre dãmba 5:12-14) Yãmb tagsdame tɩ zãms-kãens yaa toog tɩ loog tɩ rẽ komsd y raood bɩ? Sã n yaa woto, bɩ y tẽeg t’a Zeova yaa “Karensaam Kãsengã.” (Ezai 30:20, NW ) A mii a sẽn na n taas zãms-zulums to-to tɩ kẽ ninsaalb sẽn pa zems zãng yamẽ. La a tõe n barka modgr ninga yãmb sẽn maand ne y sũur fãa n dat n wʋm zãmsg ning a sẽn taasd yãmbã võorã.—Yɩɩl Sõamyã 25:4.

⁸ Bõe yĩng tɩ y pa na n sok y meng n ges y sã n wʋmda “Wẽnnaam bõn-zulumsã” kẽer võore? (1 Korẽnt dãmba 2:10, NW ) Bõn-kãens pa gom-zut sẽn pa be yamleoog wala b rãmb nins dũni kiris-nebã tũudum yel-mitb la b tũudum taoor dãmb sẽn wẽed no-koeemd b zutã ye. B yaa tẽeb zãmsg sẽn be nafre, n kɩtd tɩ tõnd bãng d Ba sẽn tar nonglmã yam la a sũuri. Wala makre, gom-zut wala rondã, “yel-solemd la sẽn solgã,” la kaool toɛy-toɛyã a Zeova sẽn tũnug ne n ning a nin-buiidã bark la a pids a raabã, n paas a taab sõor wʋsg yaa gom-zut sẽn be yamleoog la nafa, tɩ tõnd tõe n tũnug ne-b n maan vaeesg la zãmsgo.—1 Korẽnt dãmba 2:7, Kãab-paalgã Koe-noogo.

9, 10. a) Bõe yĩng tɩ wuk-m-meng yaa yelle, la bõe n na n sõng tõnd tɩ d gil-a? b) A Zeova bãngrã wɛɛngẽ, bõe yĩng tɩ d segd n modg n yɩ sik-m-mens rãmba?

⁹ Y sẽn bãngd tẽebã sɩd-zulums n paasdẽ wã, bɩ y gũus bẽdg sẽn tõe n tũ ne bãngrã n wa, sẽn yaa wuk-m-mengã. (1 Korẽnt dãmba 8:1) Wuk-m-meng yaa yelle, bala a zãagda ninsaalbã ne Wẽnnaam. (Yelbũna 16:5; Zak 4:6) Tẽeg-y tɩ ninsaal ba a yembr pa tar bʋʋm n na n wuk a meng a bãngr yĩng ye. D rɩk makr ne sebr sɩngr goam sẽn pẽgd ãdem-biisã yaoolem bãng-bɛd taoor kẽngrã. Sɩngr gom-kãens yetame: “Tõnd sã n bãngd n paasdẽ, d yãtame n paasdẽ tɩ d pa mi bũmb wʋsg ye. . . . Bũmb nins fãa tõnd sẽn zãmsã pa zem bũmbu, d sã n dɩk-a n mak ne d sẽn segd n bãng n paasã ye.” Sik-m-meng woto bee yamleoogo. La sã n yaa bãngr sẽn yaa kãseng n yɩɩd fãa wã wɛɛngẽ, sẽn dat n yeel tɩ Wẽnnaam a Zeova bãngrã, d tara bʋʋm sẽn yaa kãseng n yɩɩd meng n na n tall sik-m-meng wakat fãa. Bõe yĩnga?

¹⁰ Ges-y Biiblã goam kẽer a Zeova wɛɛngẽ. ‘Yãmb tagsa wã yaa zulums wʋsgo.’ (Yɩɩl Sõamyã 92:6) “[A Zeova] bãngra ka tar tɛk ye.” (Yɩɩl Sõamyã 147:5) “Ned ka tõe n bãng [a Zeova] yama tɛk ye.” (Ezai 40:28) “Ges Wẽnnaam yam la b bãngr sẽn ka tɛka.” (Rom dãmba 11:33) Vẽenega, d pa na n tol n bãng yɛlã fãa a Zeova wɛɛngẽ ye. (Koɛɛg Soaba 3:11) A zãmsa tõnd bõn-kãsems wʋsgo, ne rẽ fãa bãngr wʋsg sẽn ka koak n be tõnd taoor wakat fãa tɩ d tõe n zãms n bãng n paase. D pa ne tɩ woto sidgda yĩng la a kɩtdẽ tɩ d tall sik-m-meng sɩda? Dẽnd d sẽn ket n zãmsdẽ wã, bɩ d tũnug ne d bãngrã wakat fãa n kolg a Zeova la d sõng neb a taabã me tɩ b maan woto, n da tol n tũnug ne-a n zẽk d mens neb a taabã zut ye.—Matɩe 23:12; Luk 9:48.

Wilg-y ne y yel-manesem tɩ y nonga a Zeova

11, 12. a) Bãngr ning tõnd sẽn paamd a Zeova wɛɛngẽ wã segd n talla pãn-tusd-bʋg tõnd zutu? b) Bõe n wilg tɩ ned tara nonglem hakɩk ne Wẽnnaam?

¹¹ Wa sẽn zemse, tʋm-tʋmd a Poll wilgame tɩ bãngr tɩ loee ne nonglem. A gʋlsa woto: “Mam sẽn kot bũmb ninga m pʋʋsg pʋgẽ yaa tɩ yãmb nonglem na paam paasg daar fãa ne bãngre la yam-vẽnegre.” (Filip rãmba 1:9) Sɩd buud fãa sẽn tar yõodã tõnd sẽn zãms a Zeova la a raabã wɛɛngẽ segd n paasa tõnd nonglmã ne d saasẽ Ba wã, la a pa segd n kɩt tɩ d wuk d meng ye.

¹² Yaa sɩd tɩ neb wʋsg yetame tɩ b nonga Wẽnnaam tɩ sɩd yaool n pa woto ye. Tõe tɩ b tagsda ne pʋ-peelem tɩ b tara nonglem sẽn tar pãngã. Tagsa a woto yaa sõma, n zems pẽgre, b sã n zems ne bãngr sẽn zems kɛpɩ wã. La rẽ bal pa wilgd tɩ y nonga Wẽnnaam ne nonglem hakɩk ye. Bõe yĩnga? Ges-y Wẽnnaam Gomdã sẽn wilgd Wẽnnaam nonglem hakɩkã sẽn ya a soabã: “Wẽnnaam nonglem yaa tɩ tõnd sak bãmb tõogo.” (1 Zã 5:3) Rẽ, tall nonglem hakɩk ne a Zeova yaa f sẽn na n sak n tũ a noyã.

13. Wãn to la wẽn-zoeer na n sõng tõnd tɩ d wilg tɩ d tara nonglem ne a Zeova?

¹³ Wẽn-zoeer na n sõnga tõnd tɩ d sak a Zeova. Yaa d sẽn bãngd-a, n zãmsd n bãngd a sõmblmã sẽn ka koakã, a ziirã, a pãngã, a tɩrlmã, a yamã la a nonglmã, n kɩt tɩ d tar yɛɛsg kãseng kãng ne waoogr wʋsg a Zeova yĩngã. Zoees a woto yaa tɩlae sẽn na yɩl n kolg-a. Sɩda, ges-y bũmb ning Yɩɩl Sõamyã 25:14 sẽn yetã: “Zusoaba zood yaa neb nins sẽn zoet bãmba yĩnga.” Rẽnd tõnd sã n zoet n pa rat n maan bũmb sẽn sãamd tõnd saasẽ Ba-nongrã sũuri, d tõe n kolg-a lame. Wẽn-zoeerã na n sõnga tõnd tɩ d tũ sagl-sõng ning sẽn be Yelbũna 3:6 pʋgẽ wã: “Fo sẽn maand bũmb ninga fãa, bɩ f tẽeg Zusoaba yelle, la b na n demsa fo sorã.” Rẽ rat n yeelame tɩ bõe?

14, 15. a) Sard nins tõnd sẽn dɩkd vɩɩmã pʋgẽ daar fãa wã sãnda la bʋse? b) Wãn to la d tõe n dɩk sard sẽn wilgd tɩ d tara wẽn-zoeere?

¹⁴ Y segd n dɩka sard daar fãa, kãsems la kɩdse. Wala makre, sõs-bʋs buud la y na n tall ne y tʋmd-n-taasã, y karen-bi-taasã la y yagsã? (Luk 6:45) Y na n tʋma ne y sũur fãa bɩ, bɩ y na n baoa soay n da modg wʋsgo? (Kolos rãmba 3:23) Y na n pẽnegda neb nins sẽn pa nong a Zeova wʋsg bɩ baa bilfã n paasdẽ bɩ, bɩ y na n baoome n paas y zems-n-taarã pãng ne neb sẽn tar tẽebo? (Yelbũna 13:20) Baa bõn-kɩds pʋsẽ, bõe la y na n maan n paas Wẽnnaam Rĩungã nafa? (Matɩe 6:33) Sã n yaa Gʋlsg Sõamyã no-kãsemse, wala makre b rãmb nins yell d sẽn gom ka wã zut la yãmb tikd daar fãa n dɩkd y sardã, rẽnd sɩd-sɩda, y tẽegda a Zeova yell y ‘soaya fãa pʋsẽ.’

¹⁵ Sɩda, ne sard fãa tõnd sẽn dɩkde, yaa tags-kãngã zug la d segd n tiki: ‘Bõe la a Zeova rat tɩ mam maane? Manesem bʋg n na n ta a yam n yɩɩge?’ (Yelbũna 27:11) Wẽn-zoeer tallg woto yaa manesem sẽn yaa sõma wʋsg sẽn wilgd tɩ d tara nonglem ne a Zeova. Wẽn-zoeerã na n kɩtame tɩ tõnd me kell n yɩ yɩlemd tẽebã, vɩɩm manesmã la yĩngã wɛɛngẽ. Tẽeg-y tɩ verse ning pʋgẽ a Zak sẽn sagendẽ kiris-nebã tɩ b ‘kolg Wẽnnaamã,’ a leb n sagla woto: “Yel-wẽna rãmba, bɩ y nudg y nusi. La yam a yiib rãmba, bɩ y maneg y sũyã tɩ yɩ sõama.”—Zak 4:8.

16. D sã n kõt a Zeova, yaa bõe la d pa tõe n tol n maane, la baasg zãnga, bõe la d na n tõog n maan wakat fãa?

¹⁶ Yaa sɩda, wilg tɩ d tara nonglem ne a Zeova pa d zãag d meng ne sẽn yaa wẽng bal ye. A yɩɩda woto zĩig sẽn zãre. Nonglmã tusda tõnd tɩ d maan neer me. Wala makre, d manesem yaa wãn to ne a Zeova sẽn yaa kõt sẽn ka to wã? A Zak gʋlsame: “Bark sõama fãa la kũun sõama fãa yita yĩngri vẽenem Ba nengẽ n sigda.” (Zak 1:17) Yaa sɩda, tõnd sã n kõ a Zeova d sẽn so wã, d pa paasd-a bũmb ye. A zoe n soo laog la bõn-sõma nins fãa sẽn be wã. (Yɩɩl Sõamyã 50:12) La tõnd sã n dɩk d sẽkã la d pãngã n kõ a Zeova, d pa pidsd raab a sẽn pa tõe n pids ne manesem zẽng ye. Baa tõnd sã n zãgs Wẽnnaam Rĩungã koe-noog moonego, a tõe n kɩtame tɩ kugã kaase! Rẽnd bõe yĩng tɩ d na n dɩk d laogã, d sẽkã la d pãngã n kõ a Zeova? Sẽn tɩ yɩɩd fãa, yaa woto la d wilgd tɩ d nong-a-la ne d sũurã fãa, ne d sɩɩgã fãa, ne d yamã la ne d pãngã fãa.—Mark 12:29, 30.

17. Bõe n tõe n tus tõnd tɩ d kõ a Zeova ne sũ-noogo?

¹⁷ D sã n kõt a Zeova, d segd n maan-a-la ne sũ-noogo, “tɩ bõe, Wẽnnaam nonga ned ninga sẽn kõt ne sũ-noogo.” (2 Korẽnt dãmba 9:7) Noor ning sẽn gʋls Tõodo 16:17 pʋgẽ wã tõe n sõnga tõnd tɩ d kõ ne sũ-noogo: “Bɩ ned kam fãa wa ne kũun wa sẽn zems bark ninga Zusoab a Wẽnnaam sẽn kõ yãmbã.” Tõnd sã n ges a Zeova sẽn yɩ kõt wʋsg to-to ne tõndã, d tʋllame n kõ-a wʋsg ne yamleoogo. D sã n kõt woto noogda a sũuri, wala roagd sũur sẽn yaa noog ne kũun a bi-nongr sẽn kõ-a wã. D sẽn wilgd tɩ d tara nonglem woto wã na n sõnga tõnd tɩ d kolg a Zeova.

Tũnug-y ne pʋʋsgã n bao zood ne Wẽnnaam

18. Bõe yĩng tɩ d segd n ges d sẽn tõe n maan to-to tɩ d pʋʋsgã yɩ sõma n paase?

¹⁸ Tõnd sẽn wat n pʋʋsd d yembrã sasa kõta tõnd weer sõma-sõma tɩ d tõe n tall zood sõsg ne d saasẽ Ba wã. (Filip rãmba 4:6) Sẽn mik tɩ pʋʋsg yaa bõn-tũnugdg kãseng sẽn kɩtd tɩ d tõe n kolg Wẽnnaamã, zemsame tɩ d yaas n tags tõnd pʋʋsgã sõmblem zugu. Pa rat n yeel tɩ d segd n pʋʋsa ne gom-minim la gom-tagd ye, la yaa ne pʋ-peelem goama sẽn yit d sũur pʋgẽ. Wãn to la d tõe n maan tɩ d pʋʋsgã yɩ sõma n paase?

19, 20. Bõe yĩng tɩ d segd n tags sõma n yaool n pʋʋse, la bõe zug la d tõe n tags woto?

¹⁹ D tõe n zĩnd n tagsa sõma n yaool n pʋʋse. D sã n deng n tags sõma, d tõe n kɩtame tɩ d pʋʋsgã yɩ takɩ la b tall võore, tɩ woto kɩt tɩ d pa na n minim n togsd d raasenkam pʋʋsg goamã tẽegr sẽn yaa nana wã ye. (Yelbũna 15:28, 29) Tõe tɩ d sã n tags yɛl kẽer wɛɛngẽ a Zezi sẽn pʋʋs a pʋʋsg ning sẽn yaa mams-sõngã pʋgẽ zugu, n yaool n ges rẽ sẽn tɩ loe ne tõnd mengã vɩɩm to-to, tõe n sõng-d lame. (Matɩe 6:9-13) Wala makre, d tõe n soka d meng n gese bõe la tõnd me rat n maan n sõng bilf n pids a Zeova raabã tẽng zug ka. D tõe n togsa a Zeova tɩ d tʋllame n maan bũmb sẽn tar yõod a nifẽ wa d sẽn tõe tɛka, la d kos a sõngr sẽn na yɩl n tʋm tʋʋm nins fãa a sẽn kõ-dã bɩ? Tõnd maanda yɩɩr ne d mengã bõn-daab hal tɩ lebg pakr ne-d bɩ? Yel-wẽn-bʋs yĩng la d segd n kos sugri, la ãnd la d segd n kõ sugr n yɩɩda? Mak-bʋs n namsd tõndo, la tõnd neeme tɩ yaa yãgb bũmb tɩ d paam a Zeova koglg yel-kãng wɛɛngẽ bɩ?

²⁰ Sẽn paase, d tõe n tagsa neb nins yell d sẽn mi tɩ b rata a Zeova sõngr wʋsgã. (2 Korẽnt dãmba 1:11) La d pa rat n yĩm bark pʋʋsg ye. D sã n yaas n tags rẽ zugu, d sɩd tõe n yãa bʋʋm d sẽn tar n na n pʋʋs a Zeova bark la d pẽg-a daar fãa a sõmblmã sẽn yaa wʋsgã yĩnga. (Tõodo 8:10; Luk 10:21) Rẽ maaneg tara nafa a taaba. A tõe n sõnga tõnd tɩ d tall yam sõng la naneb n paas ne vɩɩmã.

21. Gʋlsg Sõamyã mak-sõma bʋs zãmsg n tõe n sõng tõndo, d sã n wa kolgd a Zeova pʋʋsg pʋgẽ?

²¹ Zãmsgã tõe n paasa tõnd pʋʋsgã sõmblem. Rap la pagb sẽn yaa kɩs-sɩd dãmb n maan pʋʋsg sẽn yaa sõma wʋsg tɩ b gʋls Wẽnnaam Gomdẽ wã. Wala makre, yel-toog sã n dat n wa d zugu, n kɩt tɩ d tar yɩɩr la d zoet rabeem tõnd bɩ d nin-nongdsã neer yĩnga, d tõe n karma a Zakoob pʋʋsgã sẽn tɩ loe ne a sẽn da segend n na n seg a ba-biig a Ezayu sẽn da rat n dok a sũurã. (Sɩngre 32:10-13) D leb n tõe n gesa pʋʋsg ning Rĩm a Aaza sẽn pʋʋse, Etiopi tãb-biis sẽn na ta milyõ a yembr sẽn da rat n zab ne Wẽnnaam nin-buiidã sasa wã. (2 Kɩbaya 14:10, 11) Zu-loɛɛg sã n namsd tõnd n dat n sãam a Zeova yʋ-noogã, rẽ, a Eli pʋʋsg ning a sẽn maan Baall balemdbã taoor Karmell Tãngã zugã zemsa karengo. D tõeeme me n ges a Nehemi pʋʋsg ning sẽn tɩ loe ne Zerizalɛm sẽn da be toog pʋgẽ wã. (1 Rĩm dãmba 18:36, 37; Nehemi 1:4-11) D sã n karemdẽ la d tagsd pʋʋsg kãensã zut sõma tõe n paasa tõnd tẽebã pãng la kõ-d tagsa tɩ d bãng d sẽn na n kolg a Zeova sõma n paas to-to n togs-a yɩɩr ning sẽn namsd tõndã.

22. Yʋʋmd 2003 verse yaa bʋgo, la bõe la d tõe n sok d mens wakat-wakat yʋʋmdã sasa?

²² Vẽenega, waoogr ne bõn-datl kãseng ye kae n yɩɩd d tũ a Zak saglg sẽn yet tɩ d ‘kolg Wẽnnaamã’ ye. (Zak 4:8) Bɩ d maan woto n bɩ Wẽnnaam bãngrã pʋgẽ, d sẽn na n bao n wilg d nonglmã ne-a n paasdẽ, la d sẽn na n bɩɩsd zood ne-a d pʋʋsgã pʋgẽ. Yʋʋmd 2003 wã fãa pʋgẽ, d kell n ning Zak 4:8 sẽn yaa yʋʋmdã verse wã d yamẽ, la d ket n sokd d mens n getẽ d sã n sɩd kolgda a Zeova. Yaa wãn to yẽ ne verse kãngã yaoolem babgã wɛɛngẽ? Wãn to la a Zeova na n “kolg yãmba,” la bark bʋs la rẽ na n kõ-do? Sõsg ning sẽn pʋgdã na n goma rẽ yelle.

‘A na kolg yãmba’

“[Wẽnnaam] ka zãr ne tõnd fãa ye.”—TƲƲMA 17:27.

1, 2. a) D sã n get ãdsã sẽn be yĩngrã, sok-bʋg la d tõe n sok d meng Naandã wɛɛngẽ? b) Wãn to la Biiblã kõt tõnd bas-m-yam tɩ ninsaalb pa zaalem a Zeova nifẽ?

YÃMB zoe n gesa ãdsã sẽn be yĩngrã yʋng tɩ tall yamleoog wʋsg ne-y bɩ? Ãdsã sõor sẽn yaa wʋsg la yĩngr vɩʋʋgã sẽn yalem wʋsgã wata ne yɛɛsg sẽn naag ne waoogre. Ãndũni yaleng kãngã pʋgẽ, tẽngã yaa fĩ-fĩi bala. Rẽ rat n yeelame tɩ Naand “Sẽn-ka-to dũniyã tɛk fãa” wã yaa kãseng wʋsg hal tɩ kɩt t’a toor kae ne ninsaalbã bɩ t’a zãrame tɩ loog t’a bãngr yaa bũmb sẽn pa tõe bɩ?—Yɩɩl Sõamyã 83:19.

² Biiblã kõta tõnd bas-m-yam t’a Zeova pa get ninsaalbã wa zaalem ye. Sɩda, Wẽnnaam Gomdã sagenda tõnd tɩ d bao-a n yetẽ: “Bãmb ka zãr ne tõnd fãa ye.” (Tʋʋma 17:27; 1 Kɩbaya 28:9) Sɩda, d sã n maan d sẽn na maaneg n kolg Wẽnnaam, yẽ me na n kolga tõndo. Wãn to? Tõnd yʋʋmd 2003 verse wã kõta leok-kãngã sẽn kengd raoodã: ‘A na kolg yãmba.’ (Zak 4:8) Bɩ d gom bark kãsems kẽer a Zeova sẽn kõt neb nins sẽn pẽ-a wʋsgã yelle.

Kũun sẽn yit a Zeova nengẽ

3. Kũun bʋg la a Zeova kõt neb nins sẽn kolgd-a wã?

³ Pipi, a Zeova bĩnga kũun sẽn yaa kãseng a nin-buiidã yĩnga. Naam, arzɛk la zãmsg ning fãa zãmaan kãngã sẽn kõtã pa tõe n kõ kũun kãngã ye. Yaa kũuni, a Zeova sẽn kõt neb nins sẽn pẽ-a wã bala. Yaa bõe? Wẽnnaam Gomdã leokdame: “Fo sã n bao bãngr ne yam wa ned sẽn baood wanzũri ne arzɛgse, fo na n bãnga Zusoaba zoees sẽn yaa bũmb ninga, la f na n yãa b bãngra sẽn yaa to-to. Tɩ bõe, Zusoaba kõta yam.” (Yelbũna 2:3-6) Mams-y n ges ninsaalb sẽn pa zems zãng sẽn tõe n paam ‘Wẽnnaam bãngrã’! Kũun kãngã, sẽn yaa bãngr ning sẽn be Wẽnnaam Gomdẽ wã b mak-a-la ne ‘arzɛgs sẽn solge.’ (NW ) Bõe yĩnga?

4, 5. Bõe yĩng tɩ b tõe n dɩk ‘Wẽnnaam bãngrã’ n mak ne ‘arzɛgs sẽn solge’? Rɩk-y makre.

⁴ Wẽnnaam bãngrã tara yõod wʋsgo. Rẽ bark kãsems nins sẽn yɩɩd-bã a yembr yaa vɩɩm sẽn pa satã saagre. (Zã 17:3) La bãngr kãng manegda tõnd vɩɩmã baa masã menga. Wala makre, d sẽn zãmsd Wẽnnaam Gomdã neerã yĩnga, d wa n bãnga sogs-kãsems wala bãmbã leoore: Wẽnnaam yʋʋrã yaa bõe? (Yɩɩl Sõamyã 83:18, NW ) Sẽn ki-bã halhaal meng-meng yaa bõe? (Koɛɛg Soaba 9:5, 10) Wẽnnaam daabã ne tẽngã la ne ãdem-biisã yaa bõe? (Ezai 45:18) Tõnd leb n wa bãngame tɩ vɩɩm manesem ning sẽn yaa sõma n yɩɩdã yaa Biiblã saglsã sẽn yaa sõma wã tũubu. (Ezai 30:20, 21; 48:17, 18) Woto, d tara sagls sẽn yaa sõma sẽn sõngd tõnd tɩ d mao ne vɩɩmã yɩɩre la d tall vɩɩm manesem sẽn wat ne sũ-noog hakɩka. Sẽn tɩ yɩɩd fãa, tõnd sẽn zãmsd Wẽnnaam Gomdã kɩtame tɩ d wa tõog n bãng a Zeova zʋg-kãsemsã la d pẽneg-a. Bõe n ye tõe n tall yõod n yɩɩg zood sõma ne a Zeova sẽn tik ‘Wẽnnaam bãngrã’ zugu?

⁵ Bʋʋm a to n kɩt tɩ d tõe n dɩk Wẽnnaam bãngrã n mak ne ‘arzɛgs sẽn solge.’ Wala arzɛgs wʋsgo, a yaa bũmb sẽn pa wɛ dũni kãngã pʋgẽ. Tẽngã neb milyaar a yoobã sʋka, ya a Zeova balemdbã sẽn ta milyõ a yoobã, bɩ ned a 1 neb 1 000 zug n yã ‘Wẽnnaam bãngrã.’ Sẽn na yɩl n dɩk makr n wilg tɩ sɩd ning sẽn be Wẽnnaam Gomdẽ wã bãngr yaa zu-noog sẽn pa wɛ, bɩ d ges sok-kãngã sẽn tɩ loe ne Biiblã: Bõe n paamd ninsaalbã b kũum poore? Gʋlsg Sõamyã zãmsg kɩtame tɩ d bãng tɩ sɩɩg kiidame la tɩ sẽn ki-bã pa mi bũmb ye. (Ezai 38:18) Ne rẽ fãa, dũni kãngã tũudum fãa la bal gãda tẽeb ziri ning sẽn yet tɩ ninsaal tara bũmb sẽn ket n vɩ a kũumã poorã. Rẽ yaa dũni kiris-neb tũudum dãmbã zãms-yẽgre. Zãms-kãng leb n bee tũudum dãmb a taab pʋsẽ, wala Budism, Ẽnduism, Lislaamdã, Zainism, Zidaism, Sẽnto, Sikism la Taoismã pʋgẽ. Tags-y n gese: neb milyaar dãmb la ziri zãms-kãngã tudg-yã!

6, 7. a) Ãnd dãmb bal n tõe n yã ‘Wẽnnaam bãngrã’? b) Mak-bʋg n wilgd t’a Zeova ninga tõnd bark n kõ-d vẽnegr ‘yẽesem dãmba la yam dãmba’ sẽn pa tare?

⁶ Bõe yĩng tɩ yaa neb sõor bilf woto n yã ‘Wẽnnaam bãngrã’? Yaa ned sẽn pa tõe n wʋm Wẽnnaam Gomdã võor sõma tɩ pa tũ ne yẽ sõngrã yĩnga. Tẽeg-y tɩ Wẽnnaam bãngrã yaa kũuni. A Zeova kõt-a-la neb nins sẽn dat n vaees a Gomdã ne pʋ-peelem la ne sik-m-mengã bala. Nin-kãens tõeeme n pa ‘yam dãmb ne dũniyã yɛl ye.’ (1 Korẽnt dãmba 1:26) Sã n yaa ne sẽn zems ne dũniyã tagsgo, b tõe n gesa bãmb wʋsg meng wala neb sẽn yaa ‘nintals sẽn ka paam zãmsgo.’ (Tʋʋma 4:13) La pa rẽ n tar yõod ye. A Zeova sẽn ne zʋg-sõma tõnd sũurẽ wã yĩnga, a keooda tõnd n kõ-d ‘a bãngrã.’

⁷ Ges-y makr a yembre. Dũni kiris-nebã mitb wʋsg gʋlsa sɛb wʋsg sẽn tar zãmsg Biiblã zugu. Seb-kãens tõe n wilga Hebre la Gɛrk gom-biis sẽn sɩng to-to la b võore, n paas yɛl a taaba. Baa ne bãngdb kãens sẽn zãms bũmb ninsã fãa, rẽ yĩnga b sɩd yãa ‘Wẽnnaam bãngrã’ bɩ? B sɩd wʋmda Biiblã gom-zu-kãsengã võor vẽeneg bɩ? Ada: B na n tũnuga ne saasẽ Rĩungã n wilg t’a Zeova naam sẽn ka to wã zemsame. B miime tɩ Wẽnnaam a Zeova pa be Tãablem pʋgẽ bɩ? La tõnd yẽ wʋmda yel-kãensã võor tɩ zems kɛpɩ. Bõe yĩnga? A Zeova kõ-d-la vẽenem tẽebã sɩd wɛɛngẽ, la rẽ yaa bũmb ‘yẽesem dãmba ne yam dãmba’ sẽn pa tare. (Matɩe 11:25) Ad a Zeova sɩd ningd neb nins sẽn pẽ-a wã barka!

‘A Zeova gũuda neb nins fãa sẽn nong-a wã’

8, 9. a) Wãn to la a Davɩɩd bilg bark a to neb nins sẽn pẽ a Zeova wã sẽn paamdã? b) Bõe yĩng tɩ kiris-neb hakɩkã rat Wẽnnaam koglgo?

⁸ Neb nins sẽn pẽ a Zeova wã paamda bark a to. Yaa Wẽnnaam koglgã. Yɩɩl gʋlsd a Davɩɩd sẽn da paam zu-loees wʋsgã gʋlsame: “Zusoaba pẽnegda neb nins sẽn boond bãmbã, la neb nins sẽn boond bãmb ne sɩdã. Bãmb kõta b zoɛtba b sẽn dat bũmb ninga. La bãmb wʋmda bãmb kɛlenga n fãagd bãmba. Zusoaba gũuda neb nins sẽn nong bãmbã.” (Yɩɩl Sõamyã 145:18-20) N-ye, a Zeova pẽe neb nins sẽn nong-a wã, tɩ b sã n wa kelemd n kot sõngr bɩ a tõe n yɩ tao-tao n wa sõng-ba.

⁹ Bõe yĩng tɩ d rat Wẽnnaam koglgã? D sẽn vɩ ‘yaoolem wakat toodã’ tɩ namsd tõndã toor sẽn ka be, a Zeova Bɛ kãseng a Sʋɩtãan munaanfɩɩk nong n zabda ne kiris-neb hakɩkã wʋsgo. (2 Tɩmote 3:1) Bɛ kãngã sẽn tar sɩlem wʋsgã baooda ne a sũur fãa n na n “sãam” tõndo. (1 Pɩɛɛr 5:8) A Sʋɩtãan namsda tõnd d tẽebã yĩnga, n wat ne weoogr d zut la a makd tõndo. A leb n baood n na n tũnuga ne d tagsa wã la d sũyã sẽn yaa to-to wã n zab ne-do. A sẽn data fãa ya a boog d tẽebã pãng n wa sãam-a fasɩ. (Wilgri 12:12, 17) D sẽn zabd ne bɛ sẽn tar pãng wʋsg woto wã yĩnga, pa bũmb sẽn kengd d pɛlga, d sẽn mi ‘t’a Zeova gũuda neb nins fãa sẽn nong-a wã’ sɩda?

10. a) Wãn to la a Zeova gũud a nin-buiidã? b) Kogl-bʋg n tar yõod n yɩɩda, la bõe yĩnga?

¹⁰ La wãn to la a Zeova gũud a nin-buiidã? A sẽn kãab t’a na n kogla tõndã pa wilgd tɩ d vɩɩmã pa na n tall zu-loees zãmaan kãngã pʋgẽ ye. Leb n pa rat n yeel tɩ yaa tɩlae ne-a t’a maan yel-soalem n sõng tõnd ye. Baasg zãnga, a Zeova sɩd kogenda a nin-buiidã siglga. Sẽn sõs n yɩl fãa, a pa na n tol n bas t’a Sʋɩtãan sãam balemdb hakɩkã tẽngã zug ye! (2 Pɩɛɛr 2:9) Sẽn tɩ yɩɩd fãa, a Zeova kogenda tõnd tẽebã wɛɛngẽ. A segenda tõnd n kõt-d bũmb nins sẽn yaa tɩlae ne-dã sẽn na yɩl tɩ d tall sũ-mar makrã pʋsẽ, la d kogl d zems-n-taarã ne yẽ. La tẽebã koglg n tar yõod n yɩɩd koglg buud a tãabã fãa. Bõe yĩnga? Tõnd sã n ket n tar zems-n-taar ne a Zeova fãa, baa fʋɩ pa tõe n maan tõnd wẽng n kaoos ye, kũum meng pa tõe ye.—Matɩe 10:28.

11. Bõe la a Zeova segl a nin-buiidã tẽeb koglg yĩnga?

¹¹ A Zeova segla bũmb wʋsg n na n kogl neb nins sẽn pẽ-a wã tẽebo. A Gomdã sẽn yaa Biiblã pʋgẽ, a kõta tõnd yam tɩ d mao ne makr toɛy-toɛya. (Zak 1:2-5) Sagl-sõma nins sẽn be Gʋlsg Sõamyã pʋgẽ wã tũub meng yaa koglg n kõ-do. Sẽn paase, a Zeova kõta vʋʋsem sõngã ‘neb nins sẽn kot-a’ wã. (Luk 11:13) Vʋʋsem kãng n yaa pãn-kãseng ning sẽn ka to ãndũniyã fãa pʋgẽ, rẽ n so t’a sɩd tõe n segl tõnd tɩ d tõog n mao ne makr bɩ kʋɩɩbg buud fãa sẽn tõe n wa d zugu. A Zeova tũnugda ne Kirist n kõt ‘kũun sẽn yaa neba.’ (Efɛɛz rãmba 4:8) Nin-kãensã sẽn yaa rap sẽn tar tõog tẽebã wɛɛngẽ wã modgdame n dɩkd makr ne a Zeova mengã nimbãan-zoeerã b tẽed-n-taasã sõngr pʋgẽ.—Zak 5:14, 15.

12, 13. a) Ne bõe maasem la a Zeova kõt tõnd tẽebã rɩɩb wakat sẽn zems sasa? b) Yãmb tagsg yaa wãn to a Zeova seglsã tõnd tẽebã neer yĩngã wɛɛngẽ?

¹² A Zeova kõta bũmb a to sẽn na yɩl n kogl tõndo: yaa tẽebã rɩɩb wakat sẽn zemse. (Matɩe 24:45) A Zeova tũnugda ne sɛba, Gũusg Gasgã ne Réveillez-vous ! wã sẽn naage, n paas tigis-kãsemsã, n kõt tõnd bũmb ning sẽn segd ne-dã wakat ning sẽn segdã sasa. Y tẽra bũmb y sẽn wʋm a Zeova Kaset rãmbã tigisgẽ bɩ tigis-kãsengẽ sẽn sɩd kẽ-y sũur n kõ-y pãng bɩ keng y raood bɩ? Yãmb zɩ n karem bũmb zʋrno kãensã a yembr pʋgẽ n tags tɩ b gʋls-a-la yãmb yĩng sɩda?

¹³ A Sʋɩtãan zab-teed nins sẽn tʋmd sõma n yɩɩdã a yembr yaa raood komsgã, la tõnd pa põsd raood komsgã ye. A mii sõma tɩ d raoodã sã n koms wʋsg n kaoose, d pãngã tõe n saame, hali tɩ wẽng tõe n maan-d nana-nana menga. (Yelbũna 24:10) A Sʋɩtãan sẽn dat n tũnug ne tags-wẽns n koms tõnd raoodã yĩnga, d rata sõngre. Wakat-wakate b yiisda sõss Gũusg Gasgã la Réveillez-vous ! wã pʋgẽ tɩ sõngd tõnd tɩ d zab ne raood komsgã. Kiris-nin-poak sẽn karem sõs-kãngã buud poore, a gʋlsame: “Mam karmda sõs-kãngã daar fãa la bala, la m ket n daagda sũ-noog nintãm. M dɩgend-a-la gãagã zug n tõe n paam-a wakat ning fãa m sẽn koms raoodo. Ne sõss wala kada soabã maasem, m bãngame t’a Zeova belsda maam la a kogend-ma.”a Tõnd pa tar mi-beoog ne a Zeova a sẽn kõt-d tẽebã rɩɩb wakat sẽn zemsã sɩda? Ra yĩm-y t’a sẽn segl bũmb nins tõnd tẽebã neer yĩngã wilgdame t’a pẽe tõnd la t’a kogenda tõnd ye.

‘Sẽn wʋmd-a pʋʋsgã’ pẽnegre

14, 15. a) Bark bʋs la a Zeova kõt neb nins sẽn pẽ-a wã? b) Bõe yĩng tɩ d sẽn tõe n pẽneg a Zeova nana-nana pʋʋsg pʋgẽ wã yaa zu-no-kãsenga?

¹⁴ Yãmb zɩ n yã tɩ ninsaalbã sã n wa paam naam la zu-sobend bala, naoor wʋsgo kɩtdame tɩ neb nins sẽn segd n sak b zu-sobendã ye pa tõe n pẽneg-b nana-nana sɩda? La yaa wãn to ne Wẽnnaam a Zeova? A zãra ne ninsaalbã wʋsg hali t’a toog kae ne b pʋʋsgã bɩ? Pa woto abada! Pʋʋsgã sẽn yaa kũunã yaa bark a to a Zeova sẽn kõt neb nins sẽn pẽ-a wã. D sẽn tõe n pẽneg ‘sẽn wʋmd-a pʋʋsgã’ nana-nana wã sɩd yaa zu-no-kãsenga. (Yɩɩl Sõamyã 65:3) Bõe yĩnga?

¹⁵ D rɩk makre: Ãnterpiriiz kẽeng taoor soab tara zɩɩb wʋsgo. A yãkda bũmb nins yẽ mengã sẽn na n maana, la b rãmb nins a sẽn na n dɩk n bobl neb a taaba. Woto me, ãndũniyã Naab sẽn-ka-to wã tõe n yãka yɛl nins yell yẽ mengã sẽn na n gesã, la b rãmb nins a sẽn na n boblã. Ges-y bũmb nins fãa a Zeova sẽn bobl a Biribl nongr a Zezi wã. A kõo Biriblã “noor t’a kao bʋʋdo.” (Zã 5:27) Malɛk rãmbã “sakda bãmba.” (1 Pɩɛɛr 3:22) A Zezi tõe n paama a Zeova vʋʋsem sõngã sẽn tar pãng wʋsgã tɩ sõng-a t’a wilg a karen-biisã sor tẽng zugu. (Zã 15:26; 16:7) Woto yĩnga a Zezi ra tõe n yeelame: “B kõo maam pãng fãa sẽn be arzãna la sẽn be dũniyã.” (Matɩe 28:18) La sã n yaa ne pʋʋsgã, a Zeova yãkame n na n ges bõn-kãng yell a toore. Yaa woto yĩng n kɩt tɩ Biiblã yet tõnd tɩ ya a Zeova bal la d segd n pʋʋse, n maand woto ne a Zezi yʋʋre.—Yɩɩl Sõamyã 69:14; Zã 14:6, 13.

16. Bõe yĩng tɩ d tõe n kɩs sɩd t’a Zeova sɩd kelgda tõnd pʋʋsgã?

¹⁶ A Zeova sɩd kelgda tõnd pʋʋsgã bɩ? A toog sã n da kae ne tõndo, a kõn tol n saglẽ tõnd tɩ d “pʋʋs n da bas ye,” wall a sagl-d tɩ d bas d zɩɩbã la d yɩɩrã ne yẽ ye. (Rom dãmba 12:12; Yɩɩl Sõamyã 55:23; 1 Pɩɛɛr 5:7) Wẽn-tũudb hakɩkã yell b sẽn gom Biiblã pʋgẽ wã ra kɩsa sɩd zãng t’a Zeova kelgda pʋʋsgo. (1 Zã 5:14) Woto, yɩɩl gʋlsd a Davɩɩd yeelame: “[A Zeova] na n wʋma mam koɛɛga.” (Yɩɩl Sõamyã 55:18) Tõnd me tara bʋʋm n tõe n kɩs sɩd t’a Zeova pẽe tõndo, n na n sak n kelg d yɩɩrã fãa.

A Zeova keooda a sõgen dãmbã

17, 18. a) A Zeova tagsg yaa wãn to ne tʋʋmd ning a nebã sẽn maand ne kɩs-sɩdã wɛɛngẽ? b) Wilg-y Yelbũna 19:17 sẽn wilgd to-to tɩ tõnd nimbãan-zoeer tʋʋmã pa ling a Zeova ye.

¹⁷ A Zeova sẽn yaa ãndũniyã Naab sẽn-ka-to wã, ninsaalbã sẽn maand bũmb ning bɩ b sẽn zãgsd bũmb ning maanegã pa boogd-a, pa paasd-a. Baasg zãnga, a Zeova yaa Wẽnnaam sẽn nand neba. A geta nebã sẽn balemd-a ne kɩs-sɩdã wa bũmb sẽn tar yõodo, n nong rẽ. (Yɩɩl Sõamyã 147:11) Rẽ, ad nafr a to neb nins sẽn pẽ a Zeova wã sẽn paamde: A keooda a sõgen dãmbã.—Hebre dãmba 11:6.

¹⁸ Biiblã wilgda vẽeneg t’a Zeova getame t’a balemdbã sẽn maand bũmb ningã tara yõod wʋsgo. Wala makre d karemda woto: “Ned sã n sõng naong rãmba, a bĩngda Zusoaba nengẽ. Yaa bãmb n na n yao a tʋʋm sõama wã fãa.” (Yelbũna 19:17) A Zeova sẽn get naong rãmbã n zoet b nimbãanegã yaa bũmb sẽn da pukd a Moiiz Tõogã pʋgẽ. (Maankʋʋre 14:21; 19:15) A Zeova tagsg yaa wãn to, d sã n dɩk togs-n-taar ne a nimbãan-zoeerã d manesmã ne naong rãmbã wɛɛngẽ? Tõnd sã n kõ naong rãmbã Wẽnd yĩnga, a Zeova geta woto wa bũmb d sẽn peng-a. A Zeova kãabame t’a na n yaoa sam-kãnga, n maan-d lohorem la a ning-d barka. (Yelbũna 10:22; Matɩe 6:3, 4; Luk 14:12-14) N-ye, d sã n tall nimbãan-zoeer ne d balem-taag sẽn be raab pʋgẽ, yaa bũmb sẽn noogd a Zeova sũuri. Ad d sɩd tara mi-beoog d sẽn mi tɩ tõnd nimbãan-zoeer tʋʋmã pa ling d saasẽ Ba wã!—Matɩe 5:7.

19. a) Bõe yĩng tɩ d tõe n kɩs sɩd t’a Zeova nanda bũmb ning d sẽn maand moonegã la karen-biisã maaneg tʋʋmdẽ wã? b) Wãn to la a Zeova keood tʋʋm nins d sẽn maand n teend a Rĩungã?

¹⁹ Sẽn tɩ yɩɩd fãa, a Zeova nanda tõnd sẽn maand bũmb ning a Rĩungã yĩngã. Tõnd sã n wa pẽneg a Zeova, nana-nana bala d na n dat n dɩka d sẽkã, d pãngã la d laogã n kẽes Rĩungã mooneg la karen-biisã maaneg tʋʋmdẽ wa d sẽn tõe tɛka. (Matɩe 28:19, 20) Wakat kẽere, d tõe n tagsame tɩ d pa tʋmd Rĩungã tʋʋm wʋsg ye. Tõnd sũurã sẽn pa zems zãngã tõeeme meng n kɩt tɩ tõnd sãmbdẽ a Zeova sũur sã n nooma ne tõnd modgrã. (1 Zã 3:19, 20) La a Zeova nanda kũun buud fãa d sẽn kõte, ba a sẽn paood to-to, d sã n maan-a-la ne nonglem. (Mark 12:41-44) Biiblã kõta tõnd bas-m-yam woto: “Wẽnnaam yaa tɩrga, la bãmb kõn yĩm yãmb tʋʋmda ne y nonglma yãmb sẽn wilg bãmb yʋʋra yĩnga . . . ye.” (Hebre dãmba 6:10) Sɩda, a Zeova tẽrame la a keooda tʋʋm nins sẽn yaa-b kɩds n yɩɩdã meng d sẽn maand n teend a Rĩungã. Tẽebã bark wʋsgã toor sẽn ka be, d tõe n gẽega vɩɩmã sũ-nood nins sẽn wat dũni paalgã pʋgẽ wã, zĩig ning a Zeova sẽn na n tẽeg a nug n pids neb nins fãa sẽn pẽ-a wã tʋlsem sẽn zemsã.—Yɩɩl Sõamyã 145:16; 2 Pɩɛɛr 3:13.

20. Yʋʋmd 2003 fãa sasa, wãn to la d tõe n ning d yʋʋmdã verse goam d yamẽ, la wata ne nafa bʋse?

²⁰ Yʋʋmd 2003 fãa sasa, bɩ d sok d mens n gese d sã n ket n maanda modgr n na n kolg d saasẽ Ba wã. D sã n maand woto, d tõe n kɩsa sɩd t’a na n maana wa a sẽn kãabã. Sẽn ya a soab fãa, ‘Wẽnnaam ka tõe n yag ziri ye.’ (Tɩt 1:2) Yãmb sã n kolg-a, a na n kolga yãmba. (Zak 4:8) La rẽ nafr yaa bõe? Yaa bark wʋsg masã tɛk la saagr sẽn yaa ket n kolgd a Zeova wakat sẽn pa sat yĩnga!

[Tẽngr note]