A Zak sebrã sẽn yet bũmb ningã leb n tõe n sõng-d lame tɩ d bãng d sẽn tõe n maanega. A yeela woto: “Ned bee yãmb sʋk n ka laafɩ bɩ? Bɩ a bool Wẽnnaam tẽedbã kãsem dãmba, la bɩ bãmb tik a soab ne kaam ne Zusoabã yʋʋre, n pʋʋs Wẽnnaam a yĩnga. Tẽeb pʋʋsg na maag bãadã, la Zusoabã na yik-a t’a paam laafɩ, la yẽ sã n da maana yel-wẽna, a na paam sugri.”—Zak 5:14, 15.

Pipi, a yeelame tɩ b “tik a soab ne kaam.” Yaa pãng ning Wẽnnaam Gomdã sẽn tar n tõe n maag ned sũur sẽn sãam t’a wõnd bãadã yell la b sẽn gomdã. Tʋm-tʋmd a Poll sɩd wilga rẽ, n yeel tɩ “Wẽnnaam goamã vɩɩme la a tara pãnga, . . . la a yaa sũur tagsg la ratem bʋ-kaooda,” n tõe n kẽ ned yam la a sũur hal sõma. (Hebre dãmba 4:12) Kãsem dãmbã mi b sẽn na n tall Biiblã n sõng bɛɛgdã to-to, t’a bãng bũmb ning sẽn wa ne a kongrã, la a sẽn segd n maan to-to n maneg yellã sẽn be yẽ ne Wẽnnaam sʋkã.