3. Wãn to la Wẽnnaam leokd tõnd pʋʋsgã?

A leokda d pʋʋsgã ne manesem toor-toore. A Zeova kõo tõnd Biiblã sẽn yaa a Gomdã, tɩ d wae n paamd d sogsgã leoor be. Wẽnnaam Gomdã kareng tõe n kõo “ka-yam soabã yam.” (Yɩɩn-sõamyã 19:8; karm-y Zak 1:5.) D sã n wa tar zu-loeese, a tõe n sõng-d lame tɩ d yamã gãand bãane. D sã n wa rat sõngre, a tõe n kɩtame tɩ d tẽed-n-taasã sõng-do.

D fãa yãkda yam bũmb toor-toor wɛɛngẽ. D yam-yãkr kẽer tõe n manega tõndo, wall n wã tõndo, pa rẽ bɩ n maneg tõnd ne a Zeova zoodã wall n sãam-a. Wala makre, d segd n yãka zĩig ning d sẽn na n vɩɩmde, d sẽn na n maan to-to n paam ligd n ges d meng yelle, la d sã n na n kẽe kãadem. D sã n bãng n yãk yam, d tõe n paama sũ-noog d vɩɩmã pʋgẽ, la d ta a Zeova yam.

1. Wãn to la Biiblã tõe n sõng-y tɩ y yãk yam tɩ yɩ sõma?

Nand tɩ y yãk yam, pʋʋs-y a Zeova n kos-a sõngre, la y maan vaeesg Biiblã pʋgẽ, n bao n bãng a tagsg rẽ wɛɛngẽ. (Karm-y Yel-bũnã 2:3-6.) Yɛl kẽer wɛɛngẽ, a Zeova kõo noy vẽenega. Y sã n yãk yam n tũ no-kãense, rẽ la sõma n tɩ yɩɩda.

La sã n mikame tɩ Biiblã pʋgẽ, b pa kõ noor takɩ sẽn wilgd y sẽn segd n maanã? Baa sã n wa yaa woto, a Zeova na n ‘tɛɛ yãmb sor ning yãmb sẽn be wã zugu.’ (Ezayi 48:17) Wãn to? Sagls n be n tõe n sõng-y tɩ y bãng y sẽn na n maane. Sagls nins sẽn be Biiblã pʋgẽ wã yaa sɩda, la wilgd Wẽnnaam tagsgo, la a raabo. Naoor wʋsgo, d sã n karem kibar sẽn be Biiblã pʋgẽ, d bãngda Wẽnnaam tagsg sẽn yaa a soab yell ning wɛɛngẽ. D sã n bãng a Zeova tagsg sẽn yaa a soaba, d bãngd n yãka yam sẽn noogd a sũuri.

2. Nand tɩ y yãk yam, bõe yell la y segd n tagse?

Biiblã pʋgẽ, b yetame yaa: “Yam soab maanda gũusg ne a yel-manesmã fãa.” (Yel-bũnã 14:15) Woto rat n yeelame tɩ nand tɩ d yãk yam, d segd n maaga d yĩng n tags bũmb toor-toor d sẽn tõe n yãk yelle. D sã n wa magd n get d sẽn na n yãk a soaba, d tõe n soka d meng yaa: ‘Sagl-bʋs sẽn be Biiblã pʋgẽ la m tõe n tũ? Yam-yãkr bʋg n na n kõ-m sũur pʋgẽ bãane? M yam-yãkrã na n nafa m taabã bɩ, bɩ na n wã-b lame? Sẽn tar yõod n yɩɩda, na n kɩtame t’a Zeova sũur yɩ noog bɩ?’​—Tõodo 32:29.

A Zeova tara sor n na n wilg tõnd sẽn yaa sõma, la sẽn yaa wẽnga. D sã n tõog n bãng a noyã la a saglsã sõma, la d rat ne d sũur fãa n tũ rẽ, d kibinda d sũur-kãsetã ne Biiblã maasem. Yaa tõnd sũur-kasetã n sõngd tõnd tɩ d bãng sẽn yaa sõma bɩ sẽn yaa wẽnga. (Rom dãmbã 2:14, 15) D sã n kibind d sũur-kasetã ne Biiblã maasem, na n sõnga tõnd tɩ d bãngd n yãkd yam.

D BAO N BÃNG N PAASE

3. Tũ-y noy la sagls nins sẽn be Biiblã pʋgẽ wã

VIDEO: Tũud-​y noy la sagls nins sẽn be Biiblã pʋgẽ wã (5:54)

• A Zeova naana tõnd tɩ d tõe n maan bõe?

• Bõe yĩng t’a Zeova naan tõnd tɩ d tõe n yãk d toorẽ yam?

• Bõe la a Zeova kõt tõndo, tɩ sõngd tõnd tɩ d bãngd n yãkd yam?

Bɩ d rɩk makr ne saglg a ye sẽn be Biiblã pʋgẽ. Karm-y Efɛɛz rãmb 5:15, 16, tɩ rẽ poor bɩ y gom “y sẽn tõe n maan to-to n da sãam y sẽkã,” sẽn na yɩl . . .

• n karemd Biiblã wakat fãa.

• n modgd n na n yɩ pʋg-sõngo, sɩd-sõngo, roagd sẽn get a kamb yell sõma, wall bi-sõngo.

• n kẽnd tigissã.

4. Kibind-y y sũur-kasetã, sẽn na yɩl n bãngd n yãkd yam

VIDEO: “D kell n tall sũur-kãset sẽn yaa sõma” (5:13)

• Video wã pʋgẽ, bõe la saam-bi-poakã maan sẽn na yɩl n kibl a sũur-kasetã, n tõog n yãk yam sẽn noom a Zeova?

Bõe yĩng tɩ yɛl nins wɛɛngẽ sẽn yaa tõnd n segd n yãk yamã, d pa segd n kos neb a taab tɩ b yãk yam n kõ-do? Karm-y Ebre-rãmb 5:14, tɩ rẽ poor bɩ y leok sogsgã:

• Baa sã n wõnda yaa nana tɩ d kos neb a taab tɩ b yãk yam n kõ-do, bõe la tõnd mengã segd n modg n bãngd n bakdẽ?

• Bõe n be n tõe n sõng-y tɩ y kibl y sũur-kasetã sõma, n tõog n bãngd n yãkd yam?

5. D gũus ne neb a taabã sũur-kaseto

Ned yam-yãkr pa yembr ne a to ye. Wãn to la d tõe n wilg tɩ d gũusda ne d taabã sũur-kaseto? D rɩk makr a yiibu:

Makr a 1: Saam-bi-poak n nong n ningd pãntalõ-rãmba, a sã n wa kokd pemsem, wall a sã n tʋmd tʋʋm kẽere. A wa n yikame n tɩ be tiging a to. La tigin-kãng saam-bi-pogs wʋsg sã n yã pag sẽn ning pãntalõ, namsd-b lame.

Karm-y Rom dãmb 15:1 la 1 Korẽnt rãmb10:23, 24, tɩ rẽ poor bɩ y leok sogsgã:

• Sẽn zems ne vɛrse-kãensã goamã, bõe la saam-bi-poakã tõe n yãk yam n na n maane? Yãmb manesem na n yɩɩ wãna, y sã n wa be ne ned t’a sũur-kasetã pa kõt-a sor t’a maan bũmb yãmb sũur-kasetã sẽn kõt-y sor tɩ y maane?

Makr a 2: Saam-biig a ye n yãk yam n pa na n yũ rãam, baa ne a sẽn mi tɩ Biiblã pʋgẽ, b pa gɩdg rãamã yũ n zemsã. Saam-biig n bool yẽ ne neb a taab tɩ b wa tɩ b naag taab n dɩ. Rɩɩbã sasa, kẽer da yũuda rãam.

Karm-y Koɛɛg soab 7:16 la Rom dãmb 14:1, 10, tɩ rẽ poor bɩ y leok sogsgã:

• Sẽn zems ne vɛrse-kãensã goamã, bõe la saam-biigã tõe n yãk yam n na n maane? Yãmb manesem na n yɩɩ wãna, y sã n ne ned a to sẽn maand bũmb yãmb sũur-kasetã sẽn pa kõt-y sor tɩ y maane?

Bõe la y tõe n maane, tɩ sõng-y tɩ y bãngd n yãkd yam?

1. Kos-y a Zeova t’a sõng-y tɩ y yãk y sẽn na n maanã.​—Zak 1:5.

2. Maan-y vaeesg Biiblã pʋgẽ la siglgã sɛbã pʋgẽ, n paam sagls sẽn na n sõng-yã. Y tõe n sõsa ne kiris-neb tẽeb sẽn bɩ me.

3. Tags-y n ges-y y yam-yãkrã sẽn na n maan yãmb la y taabã sũur-kasetã bũmb ninga.

KƲMSGO

D sã n bao n bãng a Zeova tagsg sẽn yaa a soab yell ning wɛɛngẽ, la d tags n ges d tʋʋm-tʋmdɩ wã sã n na n sõnga d taabã wall n wã-ba, sõngdame tɩ d bãng n yãk yam.

Lebg-n-gese

• Wãn to la y tõe n yãk yam sẽn noogd a Zeova sũuri?

• Wãn to la y tõe n kibl y sũur-kasetã?

• Wãn to la d tõe n wilg tɩ d gũusda ne neb a taabã sũur-kaseto?

BŨMB A TAABA

Wãn to la y tõe n yãkd yam sẽn na n paas yãmb ne Wẽnnaam zoodã pãnga?

“D yãk yam sẽn waoogd Wẽnnaam” (Yʋʋmd 2011 tʋʋl-nif kiuug pipi daar Gũusg Gasgã)

Wãn to la a Zeova maanda, n kõt tõnd saglse?

A Zeova wilgda a nin-buiidã sore (9:50)

Bõe n sõng rao a ye t’a yãk yam sẽn pa nana?

A Zeova getame tɩ d paamd bũmb nins fãa sẽn yaa sõma wã (5:46)

Bũmb a taab sẽn tõe n sõng-y tɩ y bãng y sẽn tõe n maan n ta a Zeova yam, baa a sã n pa kõ noor takɩ bũmb ning wɛɛngẽ.

“Yaa tɩlɛ tɩ b kõ yãmb noor bũmb fãa wɛɛngẽ bɩ?” (Yʋʋmd 2003 yʋʋm-sar kiuug pipi daar Gũusg Gasgã)