Kiris-nebã vɩɩm la b tʋʋma tigissã na-kẽndr not-rãmbã
ZĨ-LIKR RASEM A 7-13
D SẼN BÃNG BIIBLÃ KARENG PƲGẼ | ZAK 3-5
“D wilg tɩ d tara yam ning sẽn yit Wẽnnaam nengẽ wã”
Zak 3:17; cl 221-222 s. a 9-10
Y sẽn vɩ to-to wã wilgdame tɩ y tara “yam ning sẽn yit yĩngrã” bɩ?
9 ‘Kɩtdame tɩ ned yɩ yɩlemde.’ Yɩ yɩlemd rat n yeelame tɩ f tall yel-manesem sẽn yaa sõma, tɩ rẽok me pa be f sũurẽ wã ye. Biiblã pʋgẽ, yam la sũur wae n tũuda taaba. La ned sũur sã n pid ne tags-wẽnse, tʋls-wẽns la ratem-wẽnse, a pa tõe n paam yam ning sẽn yit yĩngrã ye. (Yel-bũnã 2:10; Matiye 15:19, 20) D yaa neb sẽn pa zems zãnga, la d sã n mao wa d sẽn tõe tɩ d sũurã yaa yɩlemde, d na n ‘zãaga d meng ne wẽnga, n maan neere.’ (Yɩɩn-sõamyã 37:27; Yel-bũnã 3:7) Rẽ yĩnga, b sẽn deng n yeel tɩ yam ning sẽn yit yĩngrã kɩtdame tɩ ned yɩ yɩlemdã pa zems sɩda? Sɩd me, d yel-manesmã sã n pa sõma, tɩ d pa yɩlemd tũudmã wɛɛngẽ me, d yɩta a wãn n tõog n tall zʋg-sõma a taabã yam ning sẽn yit yĩngrã sẽn tõe n sõng ned t’a bɩɩsã?
10 “Tɩ rẽ poor bɩ a kɩt t’a yɩ ned sẽn baood laafɩ.” Yam ning sẽn yit yĩngrã sõngda ned t’a baood laafɩ. Laafɩ wã yaa vʋʋsem sõngã bila. (Galat rãmbã 5:22) D modgda sẽn na yɩl n da sãam “zems-n-taar” ning sẽn be a Zeova nin-buiidã sʋkã ye. (Efɛɛz rãmbã 4:3) Bũmb sã n wa kɩt tɩ tõnd ne d tẽed-n-taag moor pa le noomẽ, d maanda d sẽn tõe fãa me sẽn na yɩl tɩ laafɩ le zĩnd d sʋka. Bõe yĩng tɩ rẽ maaneg tar yõodo? Biiblã yetame yaa: “Bɩ y kell n . . . zĩnd ne laafɩ. Woto, nonglem la laafɩ Wẽnnaamã na n zĩnda ne yãmba.” (2 Korẽnt rãmbã 13:11) D sã n kell n zĩnd ne laafɩ, nonglem la laafɩ Wẽnnaamã na n zĩnda ne tõndo. Manesem ning d sẽn tar ne d tẽed-n-taasã tõe n paasa tõnd ne a Zeova zoodã pãnga, bɩ n boog-a. Bõe la d tõe n maan tɩ wilg tɩ d yaa ned sẽn baood laafɩ? Ad makre.
Zak 3:17; cl 223-224 s. 12
Y sẽn vɩ to-to wã wilgdame tɩ y tara “yam ning sẽn yit yĩngrã” bɩ?
12 Kɩtdame tɩ ned “maand bũmb ne yam.” Maand bũmb ne yamã rat n yeelame tɩ bõe? Biibl-mitbã yeelame tɩ yɩl n lebg gɛrk gom-bil ning b sẽn lebg Zak 3:17 tɩ “sẽn maand bũmb ne yamã” pa nana ye. Biibl-lɛbgdb wʋsg lebg-a lame tɩ “sẽn tar sũ-bʋgsem,” “sẽn tõogd a sũuri,” wall “sẽn nand a taabã.” Traduction du monde nouveau wã pʋgẽ, vẽnegr n be vɛrse wã zĩigẽ n wilgdẽ tɩ gom-bilã rat n yeelame me tɩ “sẽn pa dem-dem ye.” Wãn to la d tõe n maan bũmb fãa ne yam tɩ wilg tɩ d tara yam ning sẽn yit yĩngrã?
cl 224-225 s. 14-15
Y sẽn vɩ to-to wã wilgdame tɩ y tara “yam ning sẽn yit yĩngrã” bɩ?
14 Kɩtdame tɩ ned “sakd nana.” Gɛrk gom-bil ning b sẽn lebg tɩ “sakd nana” wã pa le be zĩig a to Biiblã babg ning b sẽn da gʋls ne gɛrkã pʋgẽ ye. Biibl-mit a ye yeelame tɩ naoor wʋsgo, yaa sodaarã pʋgẽ la b pʋt gom-bi-kãngã. Bilgda ned sẽn “deegd gomd nana-nana,” la “sẽn yaa sakda.” Ned sẽn tar yam ning sẽn yit yĩngrã sakda Gʋls-sõamyã sẽn yetã. Pa ned sẽn wae n maand a sẽn yãk yam n na n maanã bala, baa b sã n wilg-a t’a yam-yãkrã pa sõma ye. B sã n wilg-a ne Gʋls-sõamyã maasem t’a yam-yãkr pa sõma, wall t’a tagsg pa zemse, a sakda tao-tao n toeeme. Y taabã getame tɩ yãmb yaa ned sẽn yaa woto bɩ?
“Sẽn pid ne nimbãan-zoeer la sẽn womd bi-sõma”
15 Kɩtdame tɩ ned ‘pid ne nimbãan-zoeer la a womd bi-sõma.’ Nimbãan-zoeerã ne yam ning sẽn yit yĩngrã tũuda taaba, bala yam sẽn yit yĩngrã ‘pida ne nimbãan-zoeere.’ B goma “nimbãan-zoeer” la “bi-sõma” yelle. Woto zemsame, bala b sã n gomd nimbãan-zoeer yell Biiblã pʋgẽ, naoor wʋsgo, bilgda ned sẽn wilgd t’a taabã yell pak-a lame, n kʋmd-ba, tɩ rẽ kɩt t’a maand bũmb toor-toor b neer yĩnga. Sebr a ye pʋgẽ, b yeelame tɩ nimbãan-zoeer yaa “maan sũ-sãang ned sẽn be yell pʋgẽ yĩnga, tɩ kɩt tɩ f baood n na n maan bũmb n sõng-a.” Dẽnd yam ning sẽn yit Wẽnnaam nengẽ wã pa zugẽ bãngr bala, wall sẽn kɩtd tɩ ned pa tar yĩn-sidg ye. A pʋd n yita sũurẽ, la kɩtdẽ tɩ ned nonga a taaba, la a kʋmd-ba. Wãn to la d tõe n wilg tɩ d pida ne nimbãan-zoeere?
Zak 3:17; cl 226-227 s. 18-19
Y sẽn vɩ to-to wã wilgdame tɩ y tara “yam ning sẽn yit yĩngrã” bɩ?
18 Kɩtdame tɩ ned “pa bakd neda.” Yam ning sẽn yit yĩngrã sõngdame tɩ ned tõog n yiis bu-welsg la tẽng-n-biilem a sũurẽ. D sã n tar yam ning sẽn yit yĩngrã, d na n maoome tɩ baa d sũurã pʋgẽ bɩ d ra bak ned ye. (Zak 2:9) D pa na n tik ned bãngre, a tarem, wall tʋʋm a sẽn tar tigingã pʋgẽ n sõng-a bɩ n waoog-a n yɩɩg neb a taabã ye. D pa na n sãbs d tẽed-n-taaga, baa a yaa naong soaba. A Zeova sã n getẽ tɩ ned a woto toga ne yẽ nonglem, tõnd me segd n getame tɩ togame tɩ tõnd nong-a.
19 Kɩtdame tɩ ned “pa tar zãmb ye.” Gɛrk gom-bil ning b sẽn lebg tɩ “zãmb soabã” ra bilgda ned sẽn maand teyatre. Pĩnd wẽndẽ, Gɛrɛs la Rom neb nins sẽn da maand teyatrã ra ningda mask-bɛda. Rẽ kɩtame tɩ Gɛrk gom-bil ning b sẽn lebg tɩ “zãmb soabã” wa bilgd ned sẽn solgd a sẽn sɩd yaa soaba, ned sẽn belgd a taaba. Tõnd manesem sẽn yaa to-to ne d tẽed-n-taasã, la baa d tagsg sẽn yaa a soab ne-bã segd n wilgame tɩ d pa tar zãmb ye.
D bʋgs Wẽnnaam Gomdã zug neere
Zak 4:5; w08 15/11 20 s. a 6
A Zak ne a Pɩɛɛr sɛbã vaeesgo
4:5—Yaa vɛrse-bʋg goam la a Zak sẽn lebs n togsã? Pa vɛrse takɩ goam la a sẽn lebs n togsã ye. La tõe tɩ yaa goam sẽn be Sɩngr 6:5; 8:21; Yel-bũn 21:10, la Galat rãmb 5:17 wã la a tik n yeel woto.
Zak 4:11, 12; w97 15/11 20-21 s. a 8
Tẽeb kɩtdame tɩ d maand sũ-mare, la d nong pʋʋsgo
8 D sã n gom d tẽed-n-taag wẽnga, yaa yel-wẽnde. (Zak 4:11, 12) La kiris-neb kẽer nong n wɩta b tẽed-n-taase. Tõe tɩ yaa b sẽn tagsd tɩ bãmb yaa tɩrse, wall b sẽn dat n zẽk b mens n yɩɩd neb a taabã. (Yɩɩn-sõamyã 50:20; Yel-bũnã 3:29) Gɛrk gom-bil ning b sẽn lebg tɩ gom wẽngã võor yaa kisgri, tɩ rẽ kɩt t’a soab yag a to ziri bɩ n rõd-a tɩ loog noore. Rat n yeelame tɩ kao f tẽed-n-taag bʋʋd kɛgre. Bõe yĩng tɩ ned sẽn maand woto gomd “tõogã wẽng la a kaood tõogã bʋʋdo”? Fariziẽ-rãmbã ne gʋlsdbã ra “basda Wẽnnaam noyã” n tikd bãmb mensã minungã zug n kaood nebã bʋʋdo. (Mark 7:1-13) Woto me, ned sã n ning a tẽed-n-taag taale, t’a Zeova yaool n pa ning-a taale, rẽ yĩnga, a pa “kaood tõogã bʋʋdo,” tɩ yaa wa a yetame tɩ tõogã pa zems sɩda? Sẽn paas me, a sã n wɩt a tẽed-n-taag zaalem yĩnga, a pa tũud nonglem tõogã ye.—Rom dãmbã 13:8-10.
ZĨ-LIKR RASEM 14-20
D SẼN BÃNG BIIBLÃ KARENG PƲGẼ | 1 PƖYƐƐR 1-2
“Y segd n lebga sõamyã”
1 Pɩyɛɛr 1:14, 15; w17.02 9 s. a 5
A Zeezi maoongã yaa kũun sẽn yit Ba wã nengẽ
5 Bõe la tõnd tõe n maan n wilg tɩ d nonga a Zeova yʋʋrã? Tõnd tʋm-tʋmdɩ wã tõe n wilga rẽ. A Zeova ratame tɩ d modg n yɩ pʋ-peelem dãmba, n zãag d mens ne wẽnga. (Karm-y 1 Pɩyɛɛr 1:15, 16.) Woto rat n yeelame tɩ d tũ a Zeova a ye tãa, n sakd a noyã ne d sũur fãa. Baa nebã sã n wa namsd tõndo, d maanda d sẽn tõe fãa n ket n tũud a Zeova noyã la a saglsã. D sã n tũud a Zeova noyã, a yʋʋrã paamda waoogre. (Mat. 5:14-16) Wilgdame me tɩ d sakame t’a noyã yaa sõma, la t’a Sʋɩtãan yaa ziri yagda. La ned buud fãa mi n tudgame. Y sã n wa tudg bɩ y tek yam n kos sugri, la y ra le maan bũmb ning y sẽn maan tɩ paoog a Zeova wã ye.—Yɩɩn. 79:9.
D sẽn tõe n yãk reem sẽn yaa sõma to-to
6 A Zeova yeela a nebã yaa: “Yãmb segd n yɩɩ sõamyã, bala mam yaa sõngo.” (1 Pɩyɛɛr 1:14-16, MN; 2 Pɩyɛɛr 3:11) Dẽnd tõnd sẽn tũud a Zeova to-to wã segd n yɩɩ sõma. (Tõodo 15:21) La ned sã n maand bũmb a Zeova sẽn kisi, wala makre, yoobo, nen-kɛglem bɩ zĩn-dãmb yɛla, a sẽn tũud-a to-to wã pa tõe n ta a yam ye. (Rom dãmbã 6:12-14; 8:13) Yɛl a woto sã n naaga reem nins tõnd sẽn nongã me, pa na n yɩ a Zeova noog ye. Tõe n kɩtame tɩ d sẽn tũud-a to-to wã pa ta a yam, tɩ sãam tõnd ne yẽ zoodã.
D bʋgs Wẽnnaam Gomdã zug neere:
1 Pɩyɛɛr 1:10-12; w08 11/1 12 s. a 8
A Zak ne a Pɩɛɛr sɛbã vaeesgo
1:10-12. Malɛgsã ra baoodame n dat n bãng bũmb nins Wẽnnaam no-rɛɛsdbã sẽn gʋls kiris-neb nins sẽn paam vʋʋsg sõng zaeebã wɛɛngẽ wã. La yaa a Zeova sẽn wa n sɩng tigingã neb vẽnegrã la b sɩng bõn-kãens bãngre. (Ef. 3:10) D segd n dɩka malɛgsã mak-sõngã n modgd n baood n bãngd “Wẽnnaam yel-zulumsã.”—1 Kor. 2:10, NW.
1 Pɩyɛɛr 2:25; it-2 1021 s. a 4
Gũuda
Gũud sẽn ka to. Yaa goam nins sẽn be Ezayi 53:6 pʋgẽ la a Pɩyɛɛr lebg n togs 1 Pɩyɛɛr 2:25 pʋgẽ, n gom neb sẽn wẽnd “piis sẽn menem” yelle. A paasame: “La masã yãmb lebg n waa y sɩɩsã pe-kɩɩm la b gũudã nengẽ.” Yaa Wẽnnaam a Zeova yell la a sẽn gomdã, bala neb nins a sẽn tool a lɛtrã ra pa bas Kiristã ye. Pʋd n yaa ne yẽ maasem la b tõog n lebg n wa Wẽnnaam a Zeova sẽn yaa a nin-buiidã Pe-kɩɩm-kãsengã nengẽ. (Yɩɩn. 23:1; 80:2; Zer. 23:3; Eze. 34:12) A Zeova leb n yaa gũuda, bala yẽ n feesd bũmb fãa. (Yɩɩn. 17:3) B sã n gomd a Zeova feesgã yelle, (Gɛrk, episkope) tõe n yɩɩ bʋ-kaoore. Wala makre, pipi kiris-nebã wakatẽ wã, a kaoo Zerizalɛm tẽngã neb bʋʋdo, la b pa bãng b ‘bʋʋdã kaoob wakat [Gɛrk, episkopes]’ ye. (Luk 19:44) A Zeova feesgã leb n tõe n waa ne bark buud toor-toore, wa sẽn na n yɩ to-to ne neb nins sẽn na n waoog Wẽnnaam daar ning “b sẽn na n wa kao bʋʋdã [Gɛrk, episkopes].”
ZĨ-LIKR RASEM 21-27
D SẼN BÃNG BIIBLÃ KARENG PƲGẼ | 1 PƖYƐƐR 3-5
“Bũmb fãa baasg kolgame”
1 Pɩyɛɛr 4:7; w13 11/1 7 s. a 1
‘Gũus-y la y wɩng ne pʋʋsgo’
RAO a yembr sẽn da tʋmd yʋng yeela woto: “Yaa beoogã sẽn wat n kolg vẽegr la yaa toog tɩ f tõog n da gũs ye.” Sãmbg kae tɩ neb a taab sẽn tʋmd yʋng na n yeelame t’a goamã yaa sɩda. Rũndã-rũndã, kiris-nebã segda zu-loɛɛg sẽn wõnd woto, bala a Sʋɩtãan dũniyã sẽn be lik pʋgẽ wã sãoong kolgame, tɩ b segd n mao n da gũs Wẽnnaam daabã maaneg wɛɛngẽ ye. (Rom 13:12) La kiris-ned sã n gũs Wẽnnaam daabã maaneg wɛɛngẽ, tõe n tũu ne a yõore. Rẽnd yaa tɩlae tɩ d “paam yam sõma,” la d tũ Biiblã sẽn sagl-d tɩ d ket n ‘gũusdẽ la d wɩngd ne pʋʋsgã.’—1 Pɩɛ. 4:7.
1 Pɩyɛɛr 4:8; w99 15/4 22 s. a 3
D sẽn tõe n maan n bãng d pãn-komsem, la d mao ne
Sẽn na n baase, d ra yĩm bũmb ning tʋm-tʋmd a Pɩyɛɛr sẽn yeelã ye. A yeelame: “Bũmb fãa baasg kolgame. Woto yĩnga, bɩ y yɩ neb yam sẽn vẽenẽ, la y yɩ gũusdb n pʋʋsd wakat fãa. Sẽn yɩɩda, bɩ y nong taab wʋsgo, bala nonglem luta yel-wẽn wʋsgo.” (1 Pɩyɛɛr 4:7, 8) D tõe n wa basame tɩ tõnd mengã bɩ neb a taabã pãn-komsem sãam d sũurã la kɩt tɩ d tar tags-kɛga, tɩ d pa le tũud Wẽnnaam sõma ye. A Sʋɩtãan mii tõnd pãn-komsmã sõma. A makdame n dat tɩ d welg taaba, n paam n sãam-do. D tog n nonga d saam-biisã ne nonglem hakɩɩka, n yɩt tao-tao n yĩmd b kongrã, n da wa ‘kõ Sʋɩtãanã weer ye.’—Efɛɛz rãmbã 4:25-27.
1 Pɩyɛɛr 4:9; w18.03 14-15 s. a 2-3
D mao masã meng tɩ sãamb reegr lebg d minungu
2 Ad bũmb a ye a Pɩyɛɛr sẽn sagl a tẽed-n-taasã tɩ b maane: “Maan-y taab sãando.” (1 Pɩy. 4:9) Gɛrk gom-bil ning b sẽn lebg tɩ “maan sãamb sãandã” rat n yeelame tɩ “f nong sãambã, wall f maan-b neere.” La d tẽeg tɩ yaa a tẽed-n-taasã la a Pɩyɛɛr sẽn yeel tɩ b ‘maan taab sãando,’ baa b sẽn da zoe n mi taaba, la b mi n naag taab n maan bũmb kẽerã. B sã n maand taab sãando, wãn to la na n naf-ba?
3 Ra na n maneg n paasa b zoodã ne taaba. D rɩk makr ne yãmb mengã. Y tẽra ned sẽn zoe n bool yãmb a zakẽ, hal tɩ y pa tõe n yĩm sẽn yɩ-y noog to-to wã bɩ? Tõe tɩ y tẽra yãmb me sẽn bool tigingã ned y zakẽ, la rẽ sẽn paas y zoodã to-to wã. D sã n maand d tẽed-n-taasã sãando, sõngdame tɩ d maneg n bãng-b n paase. Yɛlã sẽn da tar kengr a Pɩyɛɛr dãmb wakatẽ wã kɩtame tɩ kiris-nebã ra segd n mao tɩ b zoodã ne taab paase. D sẽn be dũniyã ‘yaoolem wakatã,’ yaa tɩlɛ tɩ tõnd me maan woto.—2 Tɩm. 3:1.
D bʋgs Wẽnnaam Gomdã zug neere:
1 Pɩyɛɛr 3:19, 20; w13 15/6 23
Karemdbã sogsgo
Biiblã yetame t’a Zeezi ‘moona malɛgs nins sẽn be bãens roogẽ wã.’ (1 Pɩy. 3:19) Rat n yeelame tɩ bõe?
▪ Tʋm-tʋmd a Pɩyɛɛr wilgame tɩ yaa malɛgs nins sẽn “lebg kɩɩsdb wakat ning Wẽnnaam sẽn wa n maand sũ-mar a Nowe wakatẽ wã.” (1 Pɩy. 3:20) Vẽenega, a Pɩyɛɛr da gomda malɛgs nins sẽn naag a Sʋɩtãan n kɩɩs Wẽnnaamã yelle. A Ziid goma malɛgs yelle, n yeele: “Malɛgs nins sẽn ka pa zĩig ning b sẽn da be wã, n yi n bas zĩig ning sẽn zems ne-bã, Wẽnnaam balg-b-la wakat fãa yĩng lik bida pʋgẽ, n gũud bʋʋdã kaoob daar sẽn yaa ra-kãsengã.”—Ziid 6.
A Nowe wakatẽ wã, bõe la malɛgs maan n kɩɩs Wẽnnaam? Nand tɩ sa-kãsengã ni, malɛg-kãens teka b mens n lebg ninsaalba. Yaa bũmb sẽn pa zems ne Wẽnnaam raabã. (Sɩng. 6:2, 4) Sẽn paase, b sẽn kẽ ne pagbã yaa bũmb sẽn yaa wẽng wʋsgo. Wẽnnaam pa naan malɛgsã n kõ-b sor tɩ b kẽ ne pagb ye. (Sɩng. 5:2) Wẽnnaam sẽn yãk wakat ningã sã n ta, a na n sãama malɛg-tõatbã. La nananda, wa a Ziid sẽn yeelã, Wẽnnaam balg-b-la “lik bida pʋgẽ.”
Wakat bʋg la wãn to la a Zeezi moon malɛg-kãens “bãens roogẽ”? A Pɩyɛɛr yeelame tɩ yaa a Zeezi sẽn vʋʋg n lebg malɛkã poor la a maan dẽ. (1 Pɩy. 3:18, 19) D tẽeg t’a Pɩyɛɛr yeelame t’a Zeezi ‘kẽngame n tɩ moone.’ Gom-kãngã wilgdame t’a Pɩyɛɛr sẽn wa n gʋlsd a sebrã t’a Zeezi zoe n moona malɛgsã. Dẽnd wõnda a Zeezi vʋʋgrã poor bilfu, a taasa malɛg-wẽnsã koɛɛga, n wilg sɩbgr ning sẽn gũud-bã. Yaa koɛɛg sẽn wilgd tɩ b pa tar saagr baa bilf ye. Ra yaa bʋ-kaoor koɛɛgã. (Zon. 1:1, 2) A Zeezi sẽn kell n maan sɩd ne Wẽnnaam n tãag a kũum, tɩ Wẽnnaam vʋʋg-a wã, yaa kaset t’a Sʋɩtãan pa tar pãng a zug ye. Rẽ n so t’a tar sor n na n taas-b bʋ-kaoor koɛɛgã.—Zã 14:30; 16:8-11.
Ka la bilfu, a Zeezi na n sẽba a Sʋɩtãan ne malɛg-wẽnsã n lob bog-zulungã pʋgẽ. (Luk 8:30, 31; Vẽn. 20:1-3) Nananda, b bee lik bida pʋgẽ, la sãmbg kae tɩ b na n wa paama sãoong zãng-zãnga.—Vẽn. 20:7-10.
1 Pɩyɛɛr 4:6; w08 11/1 12 s. a 6
A Zak ne a Pɩɛɛr sɛbã vaeesgo
4:6—Kɩɩmsã bɩ kũ-rãmbã b sẽn moon koe-noogã yaa ãnda rãmba? Yaa neb nins sẽn da yaa ‘kũum b beegrã ne b yel-wẽnã yĩnga,’ bɩ n da pa tar zood ne Wẽnnaam b sẽn da pa wʋm koe-noogã yĩngã. (Ef. 2:1) B sẽn sak n kelg koe-noogã n lebg tẽedbã poore b vʋʋgame, sẽn dat n yeel tɩ b paama zood ne a Zeova.
ZĨ-LIKR RASEM 28–SƖPAOLG RASEM A 3
D SẼN BÃNG BIIBLÃ KARENG PƲGẼ | 2 PƖYƐƐR 1-3
Ningd-y “a Zeova daarã waoong” y yamẽ
2 Pɩyɛɛr 3:9, 10; w07 1/1 20 s. 11
A Zeova na n kaoa bʋʋd n sõng a nin-buiidã
11 La a Zezi sẽn yeel t’a Zeova na n sõnga a nin-buiidã “tao-tao” wã võor yaa bõe? Wẽnnaam Gomdã wilgdame tɩ baa a Zeova sẽn tar sũ-marã, a bʋ-kaoor fãa pidsda tao-tao wakat ning a sẽn yãkã bal takɩ. (Luk 18:7, 8; 2 Pɩɛɛr 3:9, 10) A Nowe wakatẽ wã, sãoong sa-kãsengã sãama nin-wẽnsã wakat ning Wẽnnaam sẽn yãkã. A Lot wakatẽ wã me, yɩɩ woto. A kɩtame tɩ bugum ni wa saag n sãam nin-wẽnsã fãa. A Zezi yeela woto: “A na n yɩɩ woto me daar ninga Ninsaal Biiga sẽn na n pukã.” (Luk 17:27-30) Rũndã-rũndã wã me, nin-wẽnsã sãoong na n ling-b lame. (1 Tesalonik rãmba 5:2, 3) D tõe n kɩsa sɩd zãng-zãng t’a Zeova tɩrlmã yĩnga, a na n sãama a Sʋɩtãan dũniyã n pa bas baa daar a ye meng tɩ rogl ye.
2 Pɩyɛɛr 3:11, 12; w07 1/1 12 s. 18
‘A Zeova ra-kãsengã kolgame’
18 Pa lingr la tʋm-tʋmd a Pɩɛɛr sẽn sagl-d tɩ d ning a Zeova raarã d yamẽ wã ye. Wãn to la d tõe n maan rẽ? Pipi, yaa ne d sẽn na n tall yel-manesem sẽn yaa sõma, n yɩ neb sẽn sakd Wẽnnaam. (2 Pɩɛɛr 3:11, 12) D sã n maand woto, na n sõng-d lame tɩ d gũ ‘a Zeova raarã’ ne d sũy fãa. Gɛrk gom-biig ning b sẽn lebg tɩ ‘ning d yamẽ’ wã rat n yeelame tɩ “kɩt tɩ wa tao-tao.” Yaa sɩd tɩ d pa tõe n sɩd kɩt tɩ wakatã loog tao-tao t’a Zeova raarã ta ye. La d sẽn gũud ra-kãngã wã, d sã n tʋmd Wẽnnaam tʋʋmdã wʋsgo, na n yaa wa wakatã loogda tao-tao.—1 Korẽnt dãmba 15:58.
D bʋgs Wẽnnaam Gomdã zug neere:
2 Pɩyɛɛr 1:19; w08 11/1 13 s. a 2
A Zak ne a Pɩɛɛr sɛbã vaeesgo
1:19—Ãnda la “yibeoog ãdgã,” wakat bʋg la a puk-yã, la wãn to la d tõe n bãng t’a zoe n pukame? Yibeoog ãdgã yaa a Zezi, a sẽn deeg naamã poore. (Wil. 22:16) Yʋʋmd 1914 tɛka, a Zezi sẽn yaa Rĩm ning sẽn yaa Mesi wã wilga bõn-naandsã fãa taoor tɩ daar sẽn yaa paalg n wate. A Zezi tedgrã wilga ziir ning a sẽn da na n talle, la a Rĩungã sẽn na n tall pãng ningã, la wilg tɩ Wẽnnaam bãngr-goamã na n sɩd pidsame. D sã n tũud bãngr-gom-kãensã, d paamda vẽenem, tɩ kɩt tɩ d bãng tɩ yibeoog ãdgã pukame.
2 Pɩyɛɛr 2:4; w08 11/1 13 s. a 3
A Zak ne a Pɩɛɛr sɛbã vaeesgo
2:4—“Bog-zulung sẽn yaa lik bida” wã yaa bõe, la wakat bʋg la b ning malɛg-tõtbã be? Yaa zĩig b sẽn tõe n ning malɛgs bala, tɩ wõnd wa b bee bãens roogẽ. B pa ningd ninsaalb be ye. Sẽn be-b beenẽ wã ye pa mi Wẽnnaam daabã, b pa tar saagr baa bilf ne beoog-daar me ye. A Nowe wakatẽ wã, Wẽnnaam kẽesa malɛg-tõtbã bog-zulung sẽn yaa lik bida wã pʋgẽ tɩ b na n pa be hal n tãag a sẽn na n sãam-ba.