Malɛgsã yaa ãnd dãmba, la bõe la b maanda?

A Zeova ratame tɩ d bãng a zakã rãmb sẽn be saasẽ wã. Wala makre, malɛgsã b sẽn boond tɩ “Wẽnnaam kom-dibli wã” naaga a zakã rãmba. (Zoob 38:7) Biiblã pʋgẽ, bõe la b yet malɛgsã zugu? Bõe la b maanda? Malɛgsã fãa naaga a Zeova zakã rãmb bɩ?

1. Malɛgsã yaa ãnd dãmba?

A Zeova naana malɛgsã n yaool n naan tẽngã. Malɛgsã bee saasẽ tɩ d pa tõe n yã-ba, wa d sẽn pa tõe n yã a Zeova wã. (Ebre-rãmbã 1:14) Malɛgs milyõ-rãmb n be, la malɛk fãa yaa toor ne a to. (Vẽnegre 5:11) B ‘kelgda [a Zeova] goamã la b sakd-a.’ (Yɩɩn-sõamyã 103:20) Pĩnd wẽndẽ wã, a Zeova ra mi n tʋma malɛgs tɩ b tɩ taas neb koeese, n tɩ sõng a nin-buiidã wall n fãag-ba. Rũndã-rũndã, malɛgsã wilgda kiris-nebã sore, sẽn na yɩl tɩ b paam neb nins sẽn dat n bãng Wẽnnaamã n taas koɛɛgã.

2. A Sʋɩtãan ne a zĩn-dãmbã yaa ãnd dãmba?

Malɛgs kẽer pa kell n maan sɩd ne a Zeova ye. Pipi malɛk sẽn kɩɩs Wẽnnaam yaa a soab ning “b sẽn boond tɩ Munaafɩɩk la Sʋɩtãanã, soab ning sẽn tudgd dũniyã fãa wã.” (Vẽnegre 12:9) A Sʋɩtãan da rat n dɩɩ naam a taabã zugu. Rẽ n so t’a belg a Ãdem ne a Awa tɩ b kɩɩs Wẽnnaam. Kaoosg zugẽ, a belga malɛgs meng tɩ b kɩɩs a Zeova wa yẽ. Yaa malɛgs nins sẽn kɩɩs Wẽnnaamã la b sẽn boond tɩ zĩn-dãmbã. A Zeova kɩtame tɩ b rig-b n yiis saasẽ tɩ b wa tẽngã zugu. B na n wa sãam-b lame.—Karm-y Vẽnegr 12:9, 12.

3. Bõe la a Sʋɩtãan ne a zĩn-dãmbã maand sẽn na yɩl n tudg nebã?

A Sʋɩtãan ne a zĩn-dãmbã tũnugda ne zĩn-dãmbã yɛl n tudg neb wʋsgo. Ned sẽn maand zĩn-dãmb yɛl yaa ned sẽn baood zĩn-dãmbã sõngre, wall a baood n na n gom ne-ba. Wala makre, neb kẽer kẽnda ãds-bagb nengẽ, bag-bʋgdb la tɩt rãmb nengẽ. Neb sãnda baooda neb sẽn maand zĩn-dãmb yɛl n tɩpd bãas sõngre. B belga neb kẽer me tɩ b tẽed tɩ b tõe n goma ne sẽn ki-bã. La a Zeova keoogda tõnd n yetẽ yaa: “Da wẽnemd-y n bao-y neb nins sẽn boond sɩɩse, wall bag-bʋgdb ye.” (Maan-kʋʋre 19:31) A yeela woto sẽn na yɩl n kogl tõnd ne a Sʋɩtãan la zĩn-dãmbã. B yaa Wẽnnaam bɛɛba, n dat n maan tõnd wẽng me.

D BAO N BÃNG N PAASE

4. Malɛgsã sõngda nebã sẽn na yɩl tɩ b bãng a Zeova

Wẽnnaam malɛgsã pa taasd nebã koɛɛgã b toor ye. La b wilgda Wẽnnaam nin-buiidã sor tɩ b paamd neb nins sẽn dat n bãng-a wã n taas koɛɛgã. Karm-y Vẽnegr 14:6, 7, tɩ rẽ poor bɩ y leok sogsgã:

• Bõe yĩng tɩ d rat malɛgsã sõngr sẽn na yɩl n moon koɛɛgã?

• Y sẽn bãng tɩ malɛgsã tõe n wilga yãmb sor tɩ y paam ned sẽn dat n kelg koɛɛg ning sẽn be Biiblã pʋgẽ wã n moonã, kengda y raood bɩ? Bõe yĩnga?

5. Zãag-y y meng ne zĩn-dãmbã yɛla

A Sʋɩtãan ne zĩn-dãmbã yaa a Zeova bɛɛba. B yaa tõnd me bɛɛba. Karm-y Luk 9:38-42, tɩ rẽ poor bɩ y leok sokrã:

• Bõe la zĩn-dãmbã tõe n maan nebã?

D pa rat n bas tɩ zĩn-dãmbã tõog tɩ d maan b raab ye. Karm-y Tõod 18:10-12, tɩ rẽ poor bɩ y leok sogsgã:

• Bõe la zĩn-dãmbã maand sẽn na yɩl n paam tõndo, wall n gom ne tõndo? Bõe la yãmb babgẽ nebã wae n maandẽ tɩ yaa zĩn-dãmb yɛla?

• Yãmb tagsdame t’a Zeova sẽn yeel tɩ d ra maan zĩn-dãmb yɛlã zemsame bɩ? Bõe yĩnga?

Ges-y VIDEO wã, tɩ rẽ poor bɩ y leok sogsgã.

VIDEO: “Kɩɩs-y Sʋɩtãanã” (5:02)

• Yãmb tagsdame tɩ zũurã a Palisa biigã sẽn ningã yaa wẽng bɩ? Bõe yĩnga?

• Bõe la a Palisa ra segd n maan n kogl a meng ne zĩn-dãmbã?

Hal pĩnd n tãag masã, kiris-neb hakɩɩkã kɩɩsda zĩn-dãmbã. Karm-y Tʋʋm 19:19 la 1 Korẽnt rãmb 10:21, tɩ rẽ poor bɩ y leok sokrã:

• Y sã n tar bũmb sẽn tar loees ne zĩn-dãmb yɛla, bõe yĩng tɩ y segd n sãam-a?

6. Y tõe n zaba ne a Sʋɩtãan la a zĩn-dãmbã n tõoge

A Sʋɩtãan n yaa zĩn-dãmbã naaba. La malɛgs nins sẽn maand sɩd ne Wẽnnaamã taoor soab yaa malɛgsã naab a Mikayɛlle. Mikayɛllã yaa a Zeezi yʋʋr a to. A Mikayɛll pãngã taa zĩ-bʋgo? Karm-y Vẽnegr 12:7-9, tɩ rẽ poor bɩ y leok sogsgã:

• Ãnd dãmb pãng n yɩɩda? A Mikayɛll ne a malɛgsã bɩ, bɩ a Sʋɩtãan ne a zĩn-dãmbã?

• Yãmb tagsdame t’a Zeezi karen-biisã segd n zoee a Sʋɩtãan ne a zĩn-dãmbã bɩ?

Yãmb tõe n zaba ne a Sʋɩtãan la a zĩn-dãmbã n tõoge. Karm-y Zak 4:7, tɩ rẽ poor bɩ y leok sokrã:

• Bõe la y tõe n maan n kogl y meng ne a Sʋɩtãan la zĩn-dãmbã?

KƲMSGO

Malɛgs nins sẽn maand sɩd ne Wẽnnaamã sõngda tõndo. A Sʋɩtãan ne a zĩn-dãmbã yaa a Zeova bɛɛba. B tũnugda ne zĩn-dãmbã yɛl n tudgd nebã.

Lebg-n-gese

• Wãn to la a Zeova malɛgsã sõngd nebã sẽn na yɩl tɩ b bãng-a?

• A Sʋɩtãan ne a zĩn-dãmbã yaa ãnd dãmba?

• Bõe yĩng tɩ y rat n zãag y meng ne zĩn-dãmbã yɛlã?

BŨMB A TAABA

Bũmb nins sẽn wilgd tɩ yaa a Zeezi la malɛgsã naab a Mikayɛlle.

“Ãnda la malɛgsã naab a Mikayɛlle?” (Bee jw.org)

Kaset toor-toor sẽn wilgd t’a Sʋɩtãan sɩd beeme.

“Sʋɩtãanã sɩd beeme bɩ?” (Bee jw.org)

Pag a ye sẽn maan to-to n paam a meng ne zĩn-dãmbã.

“A vɩɩmã tara bark masã” (Yʋʋmd 1993 sẽoog kiuug pipi daar Gũusg Gasgã)

Wãn to la a Sʋɩtãan tũnugd ne zĩn-dãmbã yɛl n belgd nebã?

“Tɩɩm maaneg la sõod sẽn sɩd yaa bũmb ninga” (Vɩɩm sẽn pa satã sore, babg a 5)