15, 16. Manesem bʋg la pag sẽn yaa kiris-ned tõe n tall n kɩt t’a sɩd sẽn da pa tẽed lebg tẽeda?

¹⁵ Manesem bʋg buud n tõe n kɩt tɩ pʋg-sɩd lebg tẽeda? Vẽenega, yaa manesem ning pagb nins sẽn yaa kiris-nebã sẽn tarã. A Pɩɛɛr yeelame: “Yãmb sã n na n maneg y mense, a ka tog n yɩ nagem zut pãnengo walla sãnem fan-teed ningr walla nagem fut yeelgr ye. La a tog n yɩɩ sũur dẽnda sẽn lilli, [bɩ nedemd ning sẽn solg sũurã pʋgẽ n pa sãamdẽ wã,] sẽn yaa sũ-bʋgsem la sũ-maasem, sẽn yaa paoong kãseng Wẽnnaam nifẽ. Kʋdemd wakate, pʋg-sõama sẽn teeg Wẽnnaam da yaa woto, la b saka b mens sɩdba wa a Saara sẽn sak a Abrahaam n boond-a t’a zu-soabã. La yãmb lebga yẽ kamba, yãmb sã n maan tʋʋm sõama n ka sak tɩ bũmb baa a ye kẽes yãmb dabeem ye.”—1 Pɩɛɛr 3:3-6.

17. Wãn to la a Saara yaa mak-sõng n kõ pagb nins sẽn yaa kiris-nebã?

¹⁷ B yeelame tɩ pagbã rɩk a Saara makrã, la kiris-nin-pogsã segd n sɩd rɩka a mak-sõngã, baa b sɩdbã sã n pa tẽedba. A Saara sɩd ra geta a Abrahaam wala a zu-soaba. A ra boola a Abrahaam a sũur pʋgẽ meng t’a “soaala.” (Sɩngre 18:12, NW ) Baasgo, rẽ pa paoogr ne-a ye. Sãmbg sẽn ka be, a Saara ra yaa pag sẽn da tar tẽeb sẽn tar pãnga, sẽn da tẽed a Zeova ne a sũur fãa. Vẽenega, a bee “kaset dãmb wʋsg” nins tẽeb sẽn segd n kɩt tɩ d “zoe zoees ninga sẽn be tõnd taoorã n da yɛ” wã sʋka. (Hebre dãmba 11:11; 12:1) Pa paoogr ne pag sẽn yaa kiris-neda, a sã n dɩk a Saara togs-n-taar ye.