SAK 28
Wilg-y tɩ y sũur nooma ne bũmb ning a Zeova ne a Zeezi sẽn maan yãmb yĩngã
Yãmb zoa sã n kõ-y kũun sẽn yaa sõma wʋsgo, y tagsg yaa wãna? Yaa vẽeneg tɩ noom-y-la hal wʋsgo, tɩ y rat n maan bũmb tɩ y zoa wã bãng tɩ kũunã noom-y lame. A Zeova ne a Zeezi kõo tõnd kũun sõmblem sẽn ka to. Yaa bõe kũuni, la wãn to la d tõe n wilg tɩ d sũur nooma ne rẽ?
1. Bõe la d tõe n maan n wilg tɩ d sũur nooma ne bũmb ning Wẽnnaam la Kiristã sẽn maan tõnd yĩngã?
B pʋlma Biiblã pʋgẽ tɩ “ned ning fãa sẽn tẽed [a Zeezi]” tõe n wa paama vɩɩm sẽn kõn sa. (Zã 3:16) Wãn to la d tõe n maan dẽ? Yaa tõnd sẽn yãkd yam ningã, la d sẽn maand bũmb ninsã n wilgd tɩ d tara tẽebo. (Zak 2:17) D sã n wilgd d tẽebã ne d tʋm-tʋmdɩ wã la d no-goamã maasem, tõnd ne a Zeezi zoodã, la tõnd ne a Ba a Zeova zoodã pãng na n paasdame.—Karm-y Zã 14:21.
2. Bõe la b maand yʋʋmd-yʋʋmd tɩ tõe n sõng-d tɩ d wilg tɩ d sũur nooma ne a Zeova la a Zeezi sẽn maan tõnd yĩngã?
Yʋng ning sẽn deng a Zeezi kũumã, a togsa a karen-biisã bũmb b sẽn tõe n maane, n wilg tɩ b sũur nooma ne a maoongã. A yeel-b lame tɩ b maand bũmb sẽn tar yõod wʋsg b sẽn boond Biiblã pʋgẽ tɩ “Zu-soabã zaabr dɩɩbo,” tɩ kẽer boondẽ me tɩ Kiristã kũumã tẽegre. (1 Korẽnt rãmb 11:20) A Zeezi ra ratame t’a tẽn-tʋmdbã, la kiris-neb hakɩɩkã fãa tẽegdẽ t’a kõ a vɩɩmã b yĩnga. Rẽ n so t’a yeel yaa: “Maand-y woto n tẽegd mam yelle.” (Luk 22:19) Y sã n wa Kiristã kũumã tẽegre, y wilgdame tɩ y sũur nooma ne a Zeova la a Zeezi, b sẽn maan bũmb ning n wilg tɩ b nonga tõnd hal wʋsgã yĩnga.
D BAO N BÃNG N PAASE
D ges bũmb a taab d sẽn tõe n maan n wilg tɩ d sũur nooma ne a Zeova la a Zeezi, b nonglem-kãsengã yĩnga, la bũmb ning sẽn kɩt tɩ Kiristã kũumã tẽegr tar yõod hal wʋsgã.
3. Bõe la d tõe n maan n wilg tɩ d sũur nooma ne bũmb b sẽn maan n kõ-do?
Mams-y wa koom sẽn na n dat n dɩ yãmb tɩ ned fãag-yã! Yãmb na n yĩma a soabã sẽn maan bũmb ningã tao-tao bɩ, bɩ y na n bao n bãnga y sẽn tõe n maan to-to, n wilg tɩ y sũur nooma ne a sẽn maanã?
Yaa a Zeova maasem yĩng la d sẽn vɩ wã. Karm-y 1 Zã 4:8-10, tɩ rẽ poor bɩ y leok sogsgã:
Bõe yĩng t’a Zeezi maoongã yaa kũun sẽn ka to?
Y tagsg yaa wãn ne bũmb ning a Zeova ne a Zeezi sẽn maan yãmb yĩngã?
Bõe la d tõe n maan n wilg tɩ d sũur nooma ne bũmb ning a Zeova ne a Zeezi sẽn maan tõnd yĩngã? Karm-y 2 Korẽnt rãmb 5:15 la 1 Zã 4:11 la 5:3. Y sã n karem vɛrse fãa n sa, bɩ y leok sokrã:
Sã n yaa ne vɛrse wã, bõe la d tõe n maan n wilg tɩ d sũur nooma ne a Zeova la a Zeezi?
4. D rɩk a Zeezi togs-n-taare
Bũmb a to d sẽn tõe n maan n wilg tɩ d sũur nooma ne bũmb ning a Zeova ne a Zeezi sẽn maanã, yaa d sẽn na n dɩk a Zeezi togs-n-taare. Karm-y 1 Pɩyɛɛr 2:21, tɩ rẽ poor bɩ y leok sokrã:
Wãn to la d tõe n tũ a Zeezi naoã neere?
A Zeezi ra nonga Wẽnnaam Gomdã, a ra moonda koe-noogã, la a ra sõngd nebã
5. Kẽnd-y Kiristã kũumã tẽegre
Sẽn na yɩl n bãng b sẽn maan Zu-soabã zaabr dɩɩbã pipi wã to-to, karm-y Luk 22:14, 19, 20. Rẽ poor bɩ y leok sogsgã:
Bõe n maan Zu-soabã zaabr dɩɩbã sasa?
Burã ne divẽ wã makda bõe?—Ges-y vɛrse 19 ne 20.
A Zeezi ra ratame t’a karen-biisã tẽegd a kũumã yell vugr yʋʋmd fãa, a sẽn ki daar ningã sã n wa ta. Rẽ n so t’a Zeova Kaset rãmbã tigimd taab yʋʋmd fãa n tẽegd Kiristã kũumã yelle, n maand wa a sẽn yeel tɩ b maan to-to wã. Sẽn na yɩl n bãng tigis-kãngã sẽn tar yõodã sẽn maand to-to, bɩ y ges VIDEO wã. Rẽ poor bɩ y leok sokrã.
Bõe la b maand Kiristã kũumã tẽegr sasa?
Burã ne divẽ wã makda bũmbu. Burã makda a Zeezi yĩngã sẽn zems zãngã a sẽn kõ tɩ yɩ maoong tõnd yĩngã. Divẽ wã makda a Zeezi zɩɩmã
KƲMSGO
Sẽn na yɩl n wilg tɩ d sũur nooma ne bũmb ning a Zeezi sẽn maan tõnd yĩngã, d segd n wilgdame tɩ d tẽed-a lame, la d kẽnd a kũumã tẽegre.
Lebg-n-gese
Tẽ a Zeezi rat n yeelame tɩ bõe?
Bõe la y rat n maane, n wilg tɩ y sũur nooma ne bũmb ning a Zeova ne a Zeezi sẽn maan yãmb yĩngã?
Bõe yĩng tɩ Kiristã kũumã tẽegr kẽnd tar yõod hal wʋsgo?
BŨMB A TAABA
Bõe la Kiristã kũumã kɩt tɩ d rat n maane?
Tẽeb yaa bõe, la wãn to la d tõe n wilg tɩ d tara tẽebo?
“Wilg-y tɩ y tẽeda a Zeova pʋlemsã ne y sũur fãa” (Yʋʋmd 2016 zĩ-likr kiuug Gũusg Gasgã)
Pag a ye kibare. A sẽn bãng Kiristã maoongã sẽn nafd-a to-to wã, sõngame t’a vɩɩmã manege.
“Biiblã toeemda neba” (Yʋʋmd 2011 sẽoog kiuug pipi daar Gũusg Gasgã)
Bõe yĩng tɩ yaa neb bilf bal n wãbd burã la b yũud divẽ wã Kiristã kũumã tẽegr sasa?