Kiris-nebã vɩɩm la b tʋʋma tigissã na-kẽndr not-rãmbã
YƲƲM-SAR RASEM A 2-8
D SẼN BÃNG BIIBLÃ KARENG PƲGẼ | VẼNEGRE 7-9
“A Zeova ninga kʋʋn-kãseng barka”
Vẽnegre 7:9; it-1 1014 2
Kʋʋn-kãsengã
Rẽ wata ne sokre: Sã n mikame tɩ kʋʋn-kãsengã yaa neb sẽn paam fãagr la sẽn na n pa tẽngã zugu, bõe yĩng tɩ b yetẽ tɩ b yasa ‘Wẽnnaam geerã taoor la Pe-bilã taoore’? (Vẽn. 7:9) Biiblã pʋgẽ, b sã n gomd ned bɩ neb sull sẽn ‘yas’ yelle, wakat ninga yaa sẽn na n wilg tɩ nin-kãng bɩ nin-kãensã tata a soab ning taoor b sẽn yasã yam. (Yɩɩn. 1:5; 5:6; Yel. 22:29, AT; Luk 1:19) Sɩd me, Vẽnegr sebrã sak a yoobã pʋgẽ, b wilgame tɩ “dũniyã rĩm-dãmbã, nanambsã, soda-nanambsã, rakãag-rãmbã, pãens rãmbã, yembsã la burkĩmbã” solga b mens ne “Sẽn zao-a geerã, la ne Pe-bilã sũ-puugrã. Bala Sẽn zao-a geerã ne Pe-bilã sũ-puugrã daar sẽn yaa ra-kãsengã taame, la ãnda n tõe n tõog toog bõn-kãng taoore?” (Vẽn. 6:15-17; ges-y Luk 21:36) Dẽnd ‘kʋʋn-kãsengã’ yaa neb nins sẽn paam n põs sũ-puugrã daarã, la b tõe n ‘yals’ Wẽnnaam la Pe-bilã taoore, b sẽn ta b yam yĩnga.
Vẽnegre 7:14; it-2 1104 4
To-kãsengã
Na maan yʋʋm 30 Zerizalɛm sãoongã poore, malɛk n gom ne tʋm-tʋmd a Zã neb sẽn yit tẽnsã fãa la buud fãa pʋsẽ, la sẽn gomd buud-goamã fãa yelle. A yeel-a lame yaa: “Nin-kãensã yaa neb nins sẽn põs to-kãsengã sasa wã.” (Vẽn. 7:13, 14) B sẽn yeel tɩ kʋʋn-kãsengã ‘põsa to-kãsengã sasa wã’ wilgdame tɩ b paama fãagre. Bũmb ning b sẽn yeel Tʋʋm 7:9, 10 sõngda tõnd tɩ d wʋm rẽ võore. Ad b sẽn yeele: “Wẽnnaam ra bee ne-a [a Zozɛf], n fãag-a a zu-loeesã fãa pʋgẽ.” B sẽn yeel tɩ b fãaga a Zozɛf a zu-loeesã fãa pʋgẽ wã rat n yeelame t’a paama sõngr n tõog toog a zu-loeesã pʋgẽ, la t’a wa paama a meng me ne a zu-loeesã.
Vẽnegre 7:15-17; it-1 1014
Kʋʋn-kãsengã
B sẽn yaa neb ninsã. D sã n ges b sẽn gomd “kʋʋn-kãsengã” yell to-to Vẽnegr sak a 7 wã la Biiblã zĩis a taabã, sõngdame tɩ d bãng b sẽn yaa neb ninsi. Vẽnegr 7:15-17 wã yeelame tɩ Wẽnnaam ‘tẽega b fu-roogã bãmb zutu,’ tɩ b na n tall-b lame n kẽng ‘vɩɩm ko-bunds zĩisẽ,’ la tɩ Wẽnnaam na n yẽesa “nintãm buud fãa bãmb ninẽ wã.” Vẽnegr 21:2-4 pʋgẽ, b yeta bũmb sẽn wõnd woto. B yeelame tɩ ‘Wẽnnaam fu-roogã bee ne ninsaalbã,’ t’a ‘na n yẽesa nintãm fãa ninsaalbã ninẽ,’ la tɩ ‘kũum pa na n le zĩnd’ ye. Vẽnegrã pʋgẽ, pa neb sẽn be saasẽ, “Zerizalɛm-paalgã” sẽn yitẽ n sigdã yell la b gomd ye. Yaa neb sẽn be tẽng zug ka, ninsaalbã sʋk yell la b gomda.
D bʋgs Wẽnnaam Gomdã zug neere:
Vẽnegre 7:1; re 115 s. a 4
B ninga Wẽnnaam Israyɛllã bãnde
4 Yaa vẽeneg tɩ malɛgs a naasã makda malɛgs sul a naase, a Zeova sẽn yãk sẽn na yɩl tɩ b ges tɩ bʋ-kaoorã daar ra yãg n ta, hal n tãag wakat ning a sẽn yãkã. Malɛgsã sã n wa bas sobdã sẽn makd Wẽnnaam sũ-puugrã tɩ fug tẽngã kɩrems a naasã, na n yɩɩ sãoong meng-menga. Na n yɩɩ wa a Zeova sẽn kɩt tɩ sobd a naasã fug n sãeeg pĩnd wẽndẽ Elam nebã, la a kʋ-b fãa zãngã. La sãoong ning sẽn watã wẽnem na n yɩɩga woto. (Zeremi 49:36-38) Na n yɩɩ sebg sẽn yaa kãseng n yɩɩd sebg ning a Zeova sẽn kɩt tɩ fug n sãam Amo nebã. (Amoos 1:13-15) A Sʋɩtãan dũniyã zug siglgã babg baa a ye pa na n tõog n põs a Zeova sũ-puugrã daar ye. Daar-n-kãng la a Zeova na n wilg tɩ yẽ n tog n yɩ yĩngr la tẽng Naab wakat sẽn kõn sa.—Yɩɩn-sõamyã 83:16, 19; Ezayi 29:5, 6.
Vẽnegre 9:11; it-1 12
Abadõ
Ãnda la bog-zulungã malɛk a Abadõ?
Vẽnegr 9:11 pʋgẽ, b yeelame tɩ “Abadõ” wã yaa “bog-zulungã malɛkã” yʋʋre. Sã n yaa ne Gɛrkã, yʋʋrã yaa Apolyõ, sẽn dat n yeel tɩ “sãamda.” Yʋʋmd 1800 wã sẽnese, neb n bao n na n wilg tɩ bãngr-gomdã pidsa ninsaalb zugu, wala makre, rĩm a Vɛspasiyẽ, a Mohamed, la a Napoleõ menga. B ra wae n yetame tɩ bãngr-gomdã malɛkã yaa malɛk-wẽnga. La Vẽnegr 20:1-3 wilgdame tɩ malɛk ning sẽn zãad ‘bog-zulungã kʋɩlen-biigã’ yaa malɛk Wẽnnaam sẽn tʋme, la pa malɛk-wẽng ye. A sẽba a Sʋɩtãana, n lob-a bog-zulungã pʋgẽ. Sebr a yembr pʋgẽ (The Interpreter’s Bible), b yeela Vẽnegr 9:11 wã wɛɛngẽ yaa: “A Abadõ pa a Sʋɩtãan malɛk ye. Yaa Wẽnnaam malɛka, t’a tʋmd-a t’a wat ne sãoongo.”
Biiblã babg ning b sẽn da gʋls ne ebre wã vɛrse nins yell d sẽn gom tɩ loogã pʋgẽ, yaa vẽeneg tɩ avaddõnã yaa yembr ne Seollã la kũumã. Vẽnegr 1:18 wã pʋgẽ, a Zeezi Kirist yeelame yaa: “Mam vɩɩ wakat fãa, n tar kũumã la Yaoogã kʋɩlen-biisi.” Luk 8:31 wã wilgdame t’a tara tõog bog-zulungã zugu. Ebre-rãmb 2:14 sõngdame tɩ d bãng t’a tara tõog n tõe n sãame, la t’a tõe n sãama a Sʋɩtãana. B yeela be t’a Zeezi lebga zɩɩm la yĩn-nemse, sẽn na yɩl t’a ‘kũumã maasem yĩnga, bɩ a kɩt tɩ soab ning sẽn tar tõog n wat ne kũumã, rat n yeel tɩ Sʋɩtãanã lebg zaalem.’ Vẽnegr 19:11-16 pʋgẽ, b wilga vẽeneg tɩ yẽ la Wẽnnaam yãk t’a na n kao a bɛɛbã bʋʋdo, la a sãam-ba.—Ges-y APOLYÕ.
YƲƲM-SAR RASEM A 9-15
D SẼN BÃNG BIIBLÃ KARENG PƲGẼ | VẼNEGRE 10-12
“B kʋʋ ‘kaset rãmb a yiibu,’ la b vʋʋgame”
Vẽnegre 11:3; w14 15/11 30
Karemdbã sogsgo
Kaset rãmb a yiibã yell b sẽn gomd Vẽnegr 11 pʋgẽ wã yaa ãnd dãmba?
Vẽnegr 11:3 wã pʋgẽ, b gomda kaset rãmb a yiib sẽn da na n togs bãngr-goam rasem tusr la kobs-yi la pis-yoob yelle. Rẽ poore, b paasa kibarã pʋgẽ tɩ we-rũng n na n ‘tõog-ba, n kʋ-ba.’ La ‘rasem a tãab la pʋɩ-sʋk loogr poore,’ kaset rãmb a yiibã na n vʋʋgame, hal tɩ ling neb nins sẽn na n yã-bã wʋsgo.—Vẽnegre 11:7, 11.
Kaset rãmb a yiibã yaa ãnd dãmba? Bũmb nins b sẽn yeel kibarã pʋgẽ wã sõngda tõnd tɩ d bãnge. Pipi, b yeelame tɩ “oliiv tɩɩs a yiibã ne fɩtl-dogends a yiibã makda nin-kãense.” (Vẽn. 11:4) Rẽ tẽegda tõnd fɩtl-dogendgã ne oliiv tɩɩs a yiibã yell a Zakari sẽn gomd a bãngr-gomdã pʋgẽ wã. B yeelame tɩ oliiv tɩɩs a yiibã ra makda “neb a yiib nins b sẽn pʋdg ka-paalgã b zutã,” rat n yeel tɩ guvɛrneer a Zorobabɛll ne maan-kʋʋdb kãsem a Zozuwe sẽn ‘yas dũni gill soaalã taoorã.’ (Zaka. 4:1-3, 14) Yiibu, b wilga bũmb toor-toor kaset rãmb a yiibã sẽn maande, tɩ wõnd bũmb nins a Moyiiz ne a Eli sẽn da maanã.—Ges-y Vẽn. 11:5, 6; ne Sõd. 16:1-7, 28-35; la 1 Rĩm. 17:1; 18:41-45.
Vɛrse-kãensã fãa gomda bũmb a yembr yelle. Bõe la rẽ? Kibar fãa pʋgẽ, yaa neb sẽn paam vʋʋsem sõngã zaeebo, n da yaa taoor lʋɩtba, wakat sẽn da pa nana yell la b gomda. Kiris-neb nins sẽn paam vʋʋsem sõngã zaeebo, n da yaa taoor lʋɩtb Wẽnnaam Rĩungã luglg sasa yʋʋmd 1914 yeelga “bot” n moon yʋʋm a tã la pʋɩ-sʋka. Rẽ yɩɩ Vẽnegr sak 11 wã sẽn yetã pidsgu.
B sẽn yeelg bot n moonã poore, b kẽesa kiris-nin-kãensã sẽn paam vʋʋsem sõng zaeebã bãens roogo, tɩ yaa wa b sẽn kʋ-ba. B pag-b-la rasem a tãab la pʋɩ-sʋka, sẽn dat n yeel tɩ wakat bilfu. Wẽnnaam nin-buiidã bɛɛb nifẽ, yaa wa b tõogame tɩ b tʋʋmdã sa, hal tɩ rẽ kɩt tɩ b ra maand sũ-noog wʋsgo.—Vẽn. 11:8-10.
La wa bãngr-gomdã sẽn wilgã, rasem a tãab la pʋɩ-sʋkã loogr poore, kaset rãmb a yiibã vʋʋgame. B yiisa kiris-neb nins sẽn paam vʋʋsem sõngã zaeebã bãens roogo. La pa rẽ bal ye. B rãmb nins sẽn kell n maan sɩdã paama tʋʋmd sẽn yaa toor zalle. Wẽnnaam n kɩt tɩ b Zu-soab a Zeezi kõ-b tʋʋm-kãngã. Yʋʋmd 1919 wã, b ra naaga neb nins b sẽn yãk tɩ b na n yɩ “tʋm-tʋmd sẽn tũud sɩd la sẽn tar yamã,” sẽn na yɩl tɩ b ges tɩ Wẽnnaam nin-buiidã paamd bũmb nins sẽn na n sõng-b tɩ b tẽebã pãng paas yaoolem wakatã.—Mat. 24:45-47; Vẽn. 11:11, 12.
Vẽnegr 11:1, 2 wã wilgdame tɩ yaa wẽnd-doog ning sẽn pa ninsaalb nus n me wã magb sasa la yel-kãensã maan-yã. Malasɩ sak a 3 wã pʋgẽ me, b gomda wẽnd-doog ning sẽn pa ninsaalb nus n me wã gesg la a yɩlgr yelle. (Mal. 3:1-4) Gesgã la yɩlgrã kaoosa wakat a wãna? Sɩnga yʋʋmd 1914 n tall n tãag yʋʋmd 1919 wã sɩngrẽ. Rasem tusr la kobs-yi la pis-yoobe (kiis 42) la rasem a tãab la pʋɩ-sʋkã yell b sẽn gomd Vẽnegr sak 11 pʋgẽ wã naaga wakat kãnga.
D sũur yaa noogo, a Zeova sẽn maan woto a tũudmã wɛɛngẽ sẽn na yɩl n yɩlg neb sẽn yaa a rẽnda, tɩ b tõogd n tʋmd tʋʋm-sõma wã! (Tɩte 2:14) Sẽn paase, d sũur nooma ne kiris-neb nins sẽn paam vʋʋsem sõngã zaeebo, n yɩ taoor lʋɩtb wakat kãngã, b sẽn kõ mak-sõng ningã yĩnga. B sẽn kell n maan sɩd ne a Zeova wakat kãng sẽn da yaa makr wakatã, yaa vẽeneg tɩ yaa bãmb la kaset rãmb a yiibã makda.
D bʋgs Wẽnnaam Gomdã zug neere:
Vẽnegre 10:9, 10; it-2 881
Seb-pindmã
Sẽn makd bũmb ninga. Biiblã pʋgẽ, zĩis wʋsg la b gomd “seb-pindem” yelle, tɩ makd bũmbu. A Ezekɩyɛll ne a Zakari fãa yãa seb-pindem tɩ b gʋls a nens a yiibã zugu. B ra wae n gʋlsda seb-pindmã neng a yembr zugu. B sẽn gʋls a nens a yiibã wilgdame tɩ bʋ-kaoor koees nins sẽn be a zugã tara pãng wʋsgo. (Eze. 2:9–3:3; Zaka. 5:1-4) Vẽnegr sebrã sẽn bilgd yãab ningã pʋgẽ, seb-pindem n be Sẽn zao-a geerã nug-rɩtgã pʋgẽ, tɩ b sog-a sõma ne sogds a yopoe, sẽn na yɩl tɩ ned ra bãng b sẽn gʋls a zugã, hal n tãag wakat ning Wẽnnaam Pe-bilã sẽn na n sok a sogdsã. (Vẽn. 5:1, 12; 6:1, 12-14) Yãabã pʋgẽ me, b wa n kõo a Zã seb-pindem, n yeel-a t’a wãbe. A Zã noorẽ wã yɩɩ noog wa sɩɩdo, la kɩtame t’a pʋgã lebg toog liga. Seb-pindmã ra pa sog ye. Ra lakame. Woto wilgdame tɩ d segd n bao n bãnga sẽn be a zugã. A Zã sẽn bãng koɛɛg ning sẽn be seb-pindmã zugã, yɩ-a-la “noog wa sɩɩdo.” La wõnda yɛl togsg sẽn yaa toog n da naag koɛɛgã b sẽn yeel-a t’a moonã. (Vẽn. 10:1-11) Bũmb sẽn wõnd a woto n paam a Ezekɩyɛlle. Seb-pindem ning b sẽn kõ-a wã goam ra yaa “wiisgu, yãbr la wõosg” goamã.—Eze. 2:10.
Vẽnegre 12:1-5; it-1 673 9-12
Rogem toogo
Tʋm-tʋmd a Zã yãabã pʋgẽ, a yãa pag sẽn be saasẽ sẽn yãbda, “rogmã toog sẽn namsd-a” yĩnga. Biig ning a sẽn dogã yaa “bi-ribla, rao sẽn na n kɩɩm buud toɛy-toɛyã neb ne kut rasaare.” Baa ne wag-bedrã sẽn modg wʋsg sẽn na yɩl n paam biigã n velã, b rɩka pagã “biigã tao-tao n kẽng Wẽnnaam nengẽ la b geerẽ wã.” (Vẽn. 12:1, 2, 4-6) Wẽnnaam sẽn deeg biigã wilgdame t’a sak n deegame tɩ yaa a biiga. Yaa woto la b ra wae n maand pĩnd wẽndẽ wã. B ra rɩkda bi-pɛɛlg n wilg a ba t’a sak n deeg tɩ yaa yẽ biiga. (Ges-y NAISSANCE.) Woto wilgdame tɩ “pagã” yaa Wẽnnaam “paga,” “yĩngr Zerizalɛmmã,” a Zeezi ne a na-rɩt-n-taasã “ma.”—Gal. 4:26; Ebre. 2:11, 12, 17.
La Wẽnnaam “pagã” sẽn be saasẽ wã tog n zemsa zãnga, a rogmã me pa tog yɩ toog ye. Dẽnd rogmã toogã yaa makre. Wilgdame bal tɩ “pagã” bãngame t’a rogmã kolgame, tɩ pa na n kaoos la a rog ye.—Vẽn. 12:2.
Ãnd n na n yɩ ‘bi-ribla, raoã’? A na n ‘kɩɩma buud toɛy-toɛyã neb ne kut rasaare.’ Yɩɩn-sõamyã 2:6-9 wã pʋgẽ, b ra pĩnd n togsame tɩ Mesi wã sẽn na n wa lebg Wẽnnaam Rĩungã Rĩmã na n maana woto. La yaa Kiristã rogmã, a kũumã la a vʋʋgrã poor la a Zã yaool n paam vẽnegrã. A Zã sẽn yã bũmb ningã makda Mesi wã Rĩungã luglgu. Wẽnnaam dɩka Rĩungã n ning a Bi-riblã a Zeezi Kirist nugẽ, la a Zeezi vʋʋgame n “tɩ zĩnd Wẽnnaam nug-rɩtgo,” n gũud “wakat ning Wẽnnaam sẽn na n dɩgl b bɛɛbã wa nao-roagendg b naoã yĩnga.”—Ebre. 10:12, 13; Yɩɩn. 110:1; Vẽn. 12:10.
YƲƲM-SAR RASEM 16-22
D SẼN BÃNG BIIBLÃ KARENG PƲGẼ | VẼNEGRE 13-16
“D ra zoe we-rũmsã sẽn kẽesd rabeemã ye”
Vẽnegre 13:1, 2; w12 6/1 10 s. a 6
Yaa Wẽnnaam a Zeova n “pukd sẽn solge”
6 Yʋʋmd 96 soabã sẽnese, a Zezi vẽnega tʋm-tʋmd a Zã t’a yã bõn-makr toor-toore. (Wil. 1:1) Bõn-makr a ye pʋgẽ, a Zã yã a Sʋɩtãan b sẽn boond tɩ dragõ wã sẽn yas ko-kãsengã noore. (Karm-y Wilgr 12:18-13:2.) A Zã yãa we-rũng sẽn tar zut a yopoe me sẽn yit koomẽ, t’a Sʋɩtãan kõ-a pãn-kãsenga. A Zã wa n yãa rũn-zẽeg sẽn tar zut a yopoe me. Rũn-kãng yaa pipi rũngã wẽnego. Malɛk n yeel a Zã tɩ rũn-zẽegã zut a yopoe wã makda “rĩm-dãmb a yopoe,” rat n yeel tɩ pãn-soaadb a yopoe. (Wil. 13:14, 15; 17:3, 9, 10) A Zã sẽn wa n gʋlsd Wilgr sebrã, tɩ pãn-soaadb kãens a nu n lʋɩ, t’a yembr beẽ, t’a to ra “nan ka wa” ye. La pãn-soaadb kãens la bʋse? Bɩ d ges rũng ning yell b sẽn gomd Wilgr sebrã pʋgẽ wã zug fãa sẽn makd bũmb ningã. D na n yã a Daniɛll sebrã sẽn gomd rĩm kãens yell to-to wã me. A Daniɛll bãngr-gomdã reng n wilga yɛl wʋsg rĩm kãens kẽer zutu, yʋʋm kobs nand tɩ b sɩng b naamã rɩɩbo.
Vẽnegre 13:11, 15; re 194 s. 26
Zabr ne we-rũms a yiibu
26 We-rũn-kãngã makda bõe? Yaa Gãrãnd Bertayn ne Etazĩni sẽn naag taab n yaa dũni gill pãn-soaadã. Yaa pipi we-rũngã zug a yopoe-n-soabã, la a tʋmda tʋʋmd sẽn yaa toor zalle. Yãabã pʋgẽ, b sẽn bak-a t’a yaa we-rũng toorã sõngda tõnd tɩ d bãng t’a soo a meng n maand a yam dũniyã gill zugu. We-rũn-kãngã sẽn tar yɩɩl a yiibã makda pãn-soaadb a yiib sẽn be wakat-yɛnga, sẽn tar lohorem n maand b yam la sẽn naag taab n tʋmdẽ. A yɩɩl a yiibã “sẽn wõnd pe-bil yɩɩlã” wilgdame t’a maanda wa rũng sẽn pa tõe n maan ned yelle, n lugl naam buud a sẽn tagsd tɩ yaa sõma n yɩɩda, n dat tɩ tẽns a taabã lugl naam a woto buud me. A gomda “wa wag-bedre,” rat n yeel t’a pẽdgdame, n bugsdi, la a pʋd n yikd zabr ne tẽns nins sẽn pa rat n sak a naamã. A pa yet nebã tɩ b sak Wẽnnaam Pe-bilã naam ye. La a pirsda nebã tɩ b maan a Sʋɩtãan sẽn yaa wag-bedrã raabo. A wata tɩ bu-welsg la kis-taab tẽnsã pʋsẽ, tɩ rẽ maneg n kɩtdẽ tɩ nebã waoogd pipi we-rũngã.
re 195 s. 30-31
Zabr ne we-rũms a yiibu
30 Tẽn-kʋdemdã yɛl sẽn yɩ to-to wã sõngda tõnd tɩ d bãng tɩ we-rũngã bõn-naandgã makda siglgu. Yaa Gãrãnd Bertayn ne Etazĩni n lugl-a, la b teend-a. Sɩngrẽ wã, b ra boonda siglgã tɩ Sosiete dɛ nasiõ. Vẽnegr sak 17 wã pʋgẽ, b sẽn bilgd bõn-naandgã to-to wã yaa toore. B wilgame tɩ yaa we-rũng sẽn yaa miuugu, n vɩ, la sẽn so a meng n maand a yam. Sosiete dɛ nasiõ wã “gomdame,” rat n yeel t’a moonda zĩig fãa tɩ yaa yẽ bal n tõe n wa ne laafɩ la bãan dũniyã gill zugu. La togs sɩdã, tẽns nins fãa sẽn be sigl-kãng pʋgẽ wã tʋʋda taab la b paoogd taaba. Tẽng ning la buud ning fãa sẽn pa rat n sak Sosiete dɛ nasiõ wã naamã wall n teel-a, b bakd-b lame n pa sõngdẽ, hal tɩ rẽ wẽnem yɩɩd kũum menga. Sosiete dɛ nasiõ wã yiisa tẽns kẽer sẽn da naag a sullã la sẽn da pa tũud a sẽn yetã. To-kãsengã sɩngrẽ, we-rũngã bõn-naandgã “yɩɩlã” tʋʋmd na n yɩɩ sãoongo.—Vẽnegre 7:14; 17:8, 16.
31 Dũni gill zabr a yiib-n-soabã tɛka, we-rũngã bõn-naandgã, b sẽn boond masã tɩ Nasiõzĩni wã kʋʋ neb vẽeneg-vẽenega. Wala makre, yʋʋmd 1950 wã, Nasiõzĩni wã sodaasã kẽesa b toog Kooredinoor ne Kooredisiid zabrã pʋgẽ. Nasiõzĩni wã sodaasã sõnga Kooredisiid sodaasã tɩ b kʋ Kooredinoor neb ne Sinoa-rãmb sẽn ta bãmb 1420000. Yʋʋmd 1960 n tãag yʋʋmd 1964 me, Nasiõzĩni wã sodaasã kẽnga Kõngo (Kinsasa) n tɩ zab n sõnge. Sẽn paase, dũniyã nanambse, wala makre, pap a Poll yoob-n-soabã ne pap a Zã Poll yiib-n-soabã ra yetame tɩ yaa we-rũngã bõn-naandgã bal n na n wa ne laafɩ la bãane. Nin-kãens yetame n yɩlemdẽ tɩ ãdem-biisã sã n pa tũ bõn-naandgã raabã, b na n wẽneg n wãa b mense. Dẽnd yaa wa b sẽn kɩtd tɩ b kʋʋd neb nins fãa sẽn pa rat n tũ bõn-naandgã raabã la b waoog-a wã.—Tõodo 5:8, 9.
Vẽnegre 13:16, 17; w09 2/1 24 s. a 3
Wilgr sebrã sak 13 n tãag sak 22 wã vaeesgo
13:16, 17. Baa vɩɩmã sã n wa keng tɩ kɩt tɩ yɩl n koos wall d da bũmb lebg toog to-to fãa, d pa segd n bas tɩ rẽ kɩt tɩ d tũ rũngã raab ye. D sã n deeg rũngã gʋlsem d nug rɩtgo, wall d rĩyẽ wã wilgdame tɩ d basame t’a soog-do.
D bʋgs Wẽnnaam Gomdã zug neere:
Vẽnegre 16:13, 14; w09 2/1 24 s. a 6
Wilgr sebrã sak 13 n tãag sak 22 wã vaeesgo
16:13-16. Sɩ-wẽnsã sẽn wẽnd wa bulumbugdã’ yaa zĩn dãmb sẽn maand bõn-bãna, n belgd dũniyã rĩm dãmb tɩ b tẽed tɩ Wẽnnaam sũ-puugrã tʋgd malɛgsã sẽn kiigã pa na n maan-b bũmbu, la b kɩtdẽ me tɩ rĩm dãmbã tigimd taab n na n wa zab ne a Zeova.—Mat. 24:42, 44.
Vẽnegre 16:21; w15 7/1 18 s. a 9
“Yãmb fãagrã kolgame”!
9 To-kãsengã sasa pa na n yɩ ‘Wẽnnaam soolmã koe-noog’ mooneg sasa ye. Wakat kãng tɩ koe-noogã mooneg wakat loogame. Bala, rẽ tɩ ‘sɛɛbã’ taame. (Mat. 24:14) Sãmbg sẽn kae, Wẽnnaam nin-buiidã na n moona bʋ-kaoor koɛɛg sẽn na n zab nebã wʋsgo. Tõe tɩ koe-kãng na n yɩɩ b sẽn na n yetẽ t’a Sʋɩtãan dũniyã sãoong zãng-zãngã wakat taame wã. Biiblã maka koe-kãens ne sapɩlma, n yeel woto: “Sapɩlem zɩslem sẽn kolg kɩlo pis-naas yii yĩngr n dʋʋg ninsaalbã zutu. La sapɩlmã toog yĩnga, nebã paooga Wẽnnaam. Bala to-kãng talla pãng tɩ looge.”—Vẽn. 16:21.
YƲƲM-SAR RASEM 23-29
D SẼN BÃNG BIIBLÃ KARENG PƲGẼ | VẼNEGRE 17-19
“Wẽnnaam zabr sẽn na n kɩt tɩ zabã fãa sa”
Vẽnegre 19:11, 14-16; w08 5/1 6 s. a 3-4
Armagedõ yaa Wẽnnaam zabr sẽn na n menes zabã fãa
Sã n ket n yaa nin-wẽnsã n so dũniyã, nin-tɩrsã ka na n tol n paam laafɩ la bãan ye. (Yelbũna 29:2; Koɛɛg Soaba 8:9) La yaa vẽeneg tɩ d pa tõe n kɩt tɩ sẽn nong-b wẽngã bas b tʋʋm-wẽnsã la wẽgbã ye. Dẽnd sẽn na yɩl tɩ laafɩ la tɩrlem zĩndi, rẽndame tɩ b menems nin-wẽnsã. A Salomo yeela woto: “Nin-wẽng na n leda nin-sõng zĩigẽ n ki.”—Yelbũna 21:18.
Sẽn mik tɩ Wẽnnaam la bʋ-kaoodã, d tõe n kɩsa sɩd tɩ nin-wẽnsã bʋ-kaoorã na n yɩɩ ne tɩrlem. A Abrahaam ra soka woto: “Dũniyã fãa bʋ-kaoodã ka na n maan tɩrg sɩda?” La a wa n bãngame tɩ wakat fãa a Zeova maanda sẽn yaa tɩrga. (Sɩngre 18:25) Sẽn paase, Biiblã wilgda vẽeneg t’a Zeova sẽn na n sãam nin-wẽnsã pa noom-a ye. La a sã n wa sãamd nin-wẽnse, mikdame tɩ yaa rẽ bal la yɛlã tɩɩm.—Ezekɩɛll 18:32; 2 Pɩɛɛr 3:9
it-1 439 5
Wed-moaaga
Tʋm-tʋmd a Zã yãabã pʋgẽ, a Zeezi Kirist sẽn vʋʋg n leb saasẽ wã zaoo wed-mo-pɛɛlga, tɩ malɛgs kʋʋng pʋgd-a. B fãa zaoo wed-mo-peelse. A Zã sẽn yã bũmb ningã wilgdame tɩ zabr ning Kirist sẽn na n zab ne bɛɛbã fãa a Wẽnnaam la a Ba a Zeova yʋʋr yĩngã, yaa zabr sẽn zemse. (Vẽn. 19:11, 14) La sẽn deng rẽ, b goma bũmb toor-toor Kiristã sẽn lebg rĩmã sẽn maande, la zu-loees nins sẽn pʋglã, n mak rẽ ne wed-rʋʋdb toor-toor zoeese.—Vẽn. 6:2-8.
Vẽnegre 19:19, 20; re 286 s. 24
Rĩmã zabame n tõog Armagedõ zabrã sasa
24 We-rũng ning sẽn yit mogrã pʋgẽ n tar yɩɩl piig la zut a yopoe, n makd a Sʋɩtãan politikã siglgã, n paas zirẽ-be-no-rɛɛsã sẽn yaa dũniyã gill pãn-soaad a yopoe-n-soabã wa n pa le beẽ ye. (Vẽnegre 13:1, 11-13; 16:13) B lob-b-la vɩɩs “bugum mogrã pʋgẽ,” rat n yeel tɩ rẽ tɩ b ket n naaga taab n namsd Wẽnnaam nin-buiidã. Yaa bugum mogr sɩd-sɩd bɩ? Ayo. We-rũngã ne zirẽ-be-no-rɛɛsã me pa sɩd-sɩd ye. Bugum mogrã makda sãoong zãng-zãng wakat sẽn kõn sa yĩnga. Yaa be la b na n wa lob kũumã ne yaoogã, la a Sʋɩtãan mengã. (Vẽnegre 20:10, 14) Yaa vẽeneg tɩ pa bugum yir tɩ b namsd nin-wẽnsã be n pa satẽ ye. Bala, woto pʋd n yaa bũmb a Zeova sẽn kisi.—Zeremi 19:5; 32:35; 1 Zã 4:8, 16.
Vẽnegre 19:21; re 286 s. 25
Rĩmã zabame n tõog Armagedõ zabrã sasa
25 B kʋʋ neb a taabã sẽn da pa tolg n be goosneema pʋgẽ, la sẽn naag dũni-wẽn-kãngã nebã ‘ne sʋ-wok ning sẽn yit sẽn zao-a wed-moaagã zugã noorẽ wã.’ A Zeezi na n wa kaoo b bʋʋdo, n yeel tɩ b zemsa ne kũum. Sẽn mik tɩ b pa yeel tɩ b lob-b-la bugum mogrã pʋgẽ wã, rẽ yĩnga, rat n yeelame tɩ b na n wa vʋʋg-b lame bɩ? Biiblã zĩig baa a ye pa wilg t’a Zeova sẽn yãk a soab t’a na n yɩ a Bʋ-kaoodã sẽn na n kʋ neb nins wakat kãnga wã na n vʋʋgame ye. Wa a Zeezi mengã sẽn yeelã, neb nins fãa sẽn pa “piisã” na n kẽnga “bugum sẽn ka kiidã pʋgẽ, b sẽn segl Sʋɩtãanã ne a malɛgsã yĩngã,” sẽn dat n yeel tɩ “sãoong sẽn ka sɛta.” (Matiye 25:33, 41, 46) Yaa woto la ‘wẽn-kɩɩsdbã bʋʋdã kaoob la b sãoongã daar’ na n baase.—2 Pɩyɛɛr 3:7; Nahuum 1:2, 7-9; Malasɩ 4:1.
D bʋgs Wẽnnaam Gomdã zug neere:
Vẽnegre 17:8; re 247-248 s. a 5-6
Yel-solemd sẽn kẽesd rabeem b sẽn welge
5 “We-rũngã . . . ra beeme.” Ra yaa Sosiete dɛ nasiõ wã sẽn zĩnd yʋʋmd 1920 yʋʋm-vẽkr kiuug rasem 10 tɛkã. Tarẽ-n-tarẽ, yaa na maan tẽns 63 n wa teend-a. La Zapõ ne Alemayn la Itali wa n pa le naag Sosiete dɛ nasiõ wã ye. B wa n yiisa pĩnd Iniyõ Sovietikã me. Yʋʋmd 1939 bõn-bɩʋʋng kiuugã pʋgẽ, Alemayn na-toaagã yika dũni gill zabr a yiib-n-soabã. Sosiete dɛ nasiõ wã sẽn pa tõog n kell n kɩt tɩ bãan zĩnd dũniyã gill zugã, ra yaa wa a sẽn lʋɩ bog-zulung pʋgẽ, n pa le tõe n maan bũmb ye. Yʋʋmd 1942 wã tɛka, a pa le be ye. Yaa yʋʋm-kãng la a Zeova sõng a nin-buiidã tɩ b tõog n wʋm a Zã sẽn yã bũmb ningã võore. Tigs-kãseng ning b sẽn bool tɩ Assemblée théocratique du monde nouveau wã sasa, a Nathan Knorr yeelame tɩ “we-rũngã . . . pa le be ye.” Rẽ poor a sokame yaa: “Sosiete dɛ nasiõ wã na n kell n paa bog-zulungã pʋgẽ bɩ?” A tika goam nins sẽn be Vẽnegr 17:8 wã, n yeel yaa: “Tẽns toɛy-toɛy na n le lagma taaba.” Sɩd yɩɩ wa a Zeova bãngr-gomdã sẽn yeelã bal kɛpɩ!
Bog-zulungã pʋgẽ yiibu
6 We-rũng ning sẽn yaa miuugã sɩd yii bog-zulungã pʋgẽ. Yʋʋmd 1945 sigr kiuug rasem 26, tẽns 50 neb n tigim taab Sãn Frãnsisko sẽn be Etazĩni wã, n na n vot n wilg tɩ b saka Nasiõzĩni wã luglgu. B lugla Nasiõzĩni wã sẽn na yɩl t’a modg tɩ “laafɩ la bãan kell n zĩnd dũniyã gill zugu.” Bũmb wʋsg pʋgẽ, Sosiete dɛ nasiõ wã ne Nasiõzĩni wã wõnda taaba. Sebr a ye pʋgẽ (The World Book Encyclopedia), b yeelame: “Bũmb kẽer pʋgẽ, Nasiõzĩni wã ne Sosiete dɛ nasiõ wã b sẽn lugl dũni gill pipi zabrã poorã wõnda taaba . . . Tẽns nins sẽn naag taab n lugl Nasiõzĩni wã wʋsg ra naag n lugla Sosiete dɛ nasiõ wã me. Wa Sosiete dɛ nasiõ wã, b sẽn lugl Nasiõzĩni wã yaa sẽn na yɩl t’a sõng tɩ laafɩ la bãan zĩnd tẽnsã sʋka. Nasiõzĩni wã ne Sosiete dɛ nasiõ wã tʋʋm-noyã wõnda taaba.” Nasiõzĩni wã sɩd yaa we-rũng ning sẽn yaa miuugã n lebg n vʋʋge. Tẽns nins sẽn naag Nasiõzĩni wã yaa bãmb 190, tɩ sẽn da naag-b Sosiete dɛ nasiõ wã yaa bãmb 63. Nasiõzĩni wã sẽn maan bũmb ninsã me yɩɩda Sosiete dɛ nasiõ wã a sẽn ledgã.
Vẽnegre 17:16, 17; w12 6/1 20 s. 17
A Zeova wilgda bũmb ning sẽn na n zĩnd ka la bilfã
17 Wẽnnaam wa ning rĩm-dãmbã yamẽ tɩ b maan bũmb yẽ sẽn date. (Karm-y Wilgr 17:16, 17.) Ka la bilfu, a Zeova na n kɩtame t’a Sʋɩtãan dũniyã nanambsã sẽn teend Nasiõzĩni wã zab ne ziri tũudmã. Woto na n kɩtame tɩ pʋg-yoodrã pa le tõe tɩ nanambsã maan a raabã ye. B na n sãama a paoongã fãa me. Yʋʋm a wãn sẽn looge, neb wʋsg ra tagsdame tɩ tũudmã na n ket n tara pãng hal tɩ b nand-a. La rũndã-rũndã, yɛlã tara toeengo. Baasgo, pʋg-yoodrã pãng pa na n boog bilf-bilf n wa sa ye. B na n wa sãam-a-la zĩig pʋgẽ.—Wil. 18:7, 8, 15-19
YƲƲM-SAR RASEM 30–YƲƲM-VẼKR RASEM A 5
D SẼN BÃNG BIIBLÃ KARENG PƲGẼ | VẼNEGRE 20-22
“Ges-y-yã! Mam maanda bũmbã fãa paalse”
Vẽnegre 21:1; re 301 s. a 2
Sa-paalg la tẽn-paalga
2 Yʋʋm kobs sẽn deng a Zã wakatã, a Zeova ra yeela a Ezayi yaa: “Sɩd me, mam na n maana yĩngr-paalga, la dũni-paalga. B kõn tol n leb n tẽeg sẽn zĩnd pĩndã yell ye, b kõn leb n tags a yell ye.” (Ezayi 65:17; 66:22) Bãngr-gom-kãngã zoe n paama pidsg yʋʋmd 537 S. D. K. R., wakat ning Zʋɩf-rãmb sẽn da sakd Wẽnnaam sẽn lebg n wa Zerizalɛmmã. Rẽ tɩ b sẽn zĩnd yembd Babilond tɩ yʋʋm 70. B sẽn lebg n wa wã, bãmb n da yaa “tẽn-paalgã,” rat n yeel tɩ nin-buiid b sẽn yɩlge, tɩ “sa-paalgã,” rat n yeel tɩ goosneema-paalg so-ba. La tʋm-tʋmd a Pɩyɛɛr wilgame tɩ bãngr-gomdã na n le pidsame. Ad a sẽn yelle: “La tõnd gũuda sa-paals la tẽn-paalg wa sẽn zems Wẽnnaam sẽn pʋlmã, tɩ tɩrlem na n zĩnd b pʋsẽ.” (2 Pɩyɛɛr 3:13) A Zã wilgame tɩ bãngr-gomdã pidsda Zu-soabã daarã sasa. “Pĩnd saasã ne pĩnd tẽngã,” rat n yeel tɩ dũniyã ne a goosneema toor-toorã sẽn be a Sʋɩtãan ne a zĩn-dãmbã nugẽ wã na n loogame. “Mogrã,” rat n yeel tɩ nin-wẽnsã sẽn yaa tõatbã la b wat ne gudgrã pa na n le beẽ ye. Rẽ poore, na n lebga “sa-paalg la tẽn-paalga,” rat n yeel tɩ neb sẽn yaa sakdb n na n vɩɩmd tẽngã zugu, tɩ Wẽnnaam Rĩungã sẽn yaa goosneema-paalgã so-ba.—Ges-y Vẽnegr 20:11.
Vẽnegre 21:3, 4; w13 12/1 30 s. a 2-4
“Gese, mam maanda bũmb fãa paalse”
“[Wẽnnaam] na n yẽesa nintãmã fãa t’a ra le zĩnd bãmb ninẽ ye.” (Wilgri 21:4) Woto rat n yeelame tɩ Wẽnnaam na n yẽesa baa sũ-noog nintãm, la nintãm nins sẽn pekd tõnd ninã bɩ? Ayo! Yaa sũ-sãangã la namsgã sẽn kɩt tɩ d raagd nintãm ninsã la a na n yẽese. Wẽnnaam pa na n yẽes d nintãmã bal ye. A pʋd n na n kɩtame tɩ bũmb nins sẽn wat ne sũ-sãang la namsgã sa, tɩ d ra le raag nintãm rẽ yĩng ye.
“Kũum ka na n le zĩnd ye.” (Wilgri 21:4) Yell bee sẽn yãbsd ãdem-biisã n ta kũumã sẽn yaa d fãa bɛ wã sɩda? Ayo! La a Zeova na n wa kɩtame tɩ wẽn-sakdbã paam b mens ne kũumã. A na n maana wãna? Yaa a Ãdem yel-wẽndã n kɩt tɩ d kiidẽ. Wẽnnaam na n basa yel-wẽn-kãng taale, tɩ kũum sa. (Rom dãmba 5:12) A Zezi sẽn ki tɩ yɩ maoongã yĩnga, a Zeova na n kɩtame tɩ sẽn sakd-b yẽ wã lebg neb sẽn pa le maand yel-wẽnd ye. Dẽ poore, a na n “sãama” kũumã sẽn yaa yaoolem bɛ wã. (1 Korẽnt dãmba 15:26) Nin-tɩrsã na n tõog n vɩɩmda ne laafɩ wakat sẽn kõn sa, wa Wẽnnaam sẽn da rat to-to hal sɩngrẽ wã.
“Toog kõn le zĩnd yɛs ye.” (Wilgri 21:4) Yel-wẽndã, n paas d sẽn pa zems zãngã sẽn wa ne naong ning fãa n kõ neb milyõ-rãmbã na n saame. Baa sẽn yaa toog ning fãa, yaa d yĩnsã pʋgẽ tɩ yaa d sũurã pʋgẽ me, na n saa fasɩ.
Vẽnegre 21:5; w03 8/1 23 s. 14
A Zeova yaa Wẽnnaam sẽn so sɩda
14 D segd n sak n deega bũmb ning a Zeova sẽn yeel tõnd a Gomdã pʋgẽ wã ne bas-m-yam zãnga. Hakɩka, a sɩd ya a sẽn yeel t’a ya a soabã, la a na n pidsa a sẽn yeel t’a na n maana bũmb ningã me. D sɩd bee bʋʋm n na n tall bas-yard ne Wẽnnaam. D segd n sɩd tẽe a Zeova sẽn yeel t’a na n “sɩbga neb nins sẽn ka mi Wẽnnaam la sẽn ka sakd tõnd Zusoab a Zezi Koe-noogã.” (2 Tesalonik rãmba 1:8) D leb n segd n tẽe a Zeova sẽn yeel t’a nonga neb nins sẽn tũud tɩrlmã, t’a na n kõo neb nins sẽn tẽedã vɩɩm sẽn ka sɛta, la t’a na n kɩtame tɩ toogo, yãbre bɩ kũum meng ra ye zĩndã. A Zeova wilga vẽeneg tɩ kãab-kãngã zemsa ne bas-yardo, n kõ tʋm-tʋmd a Zã noor woto: “Gʋlse! Tɩ bõe gom-kãens yaa sɩda la b zemsa reegre.”—Wilgri 21:4, 5; Yelbũna 15:9; Zã 3:36.
D bʋgs Wẽnnaam Gomdã zug neere:
Vẽnegre 20:5; it-2 1150 1
Vɩɩm
Noor ning Wẽnnaam sẽn kõ a Ãdmã wilgdame t’a sã n da sak n tũ, a ra pa na n tol n ki ye. (Sɩng. 2:17) Dẽnd b sã n wa kɩt tɩ kũumã sẽn yaa ninsaalbã yaoolem bɛ wã lebg zaalem, yel-wẽndã sẽn wat ne kũumã pa na n le zĩnd neb nins sẽn yaa sakdbã yĩngẽ ye. B pa na n le kiidẽ ye. (1 Kor. 15:26) Yaa Kirist naamã baasgẽ la b sẽn na n kɩt tɩ kũumã lebg zaalmã. Vẽnegr sebrã wilgdame t’a naamã na n kaoosa yʋʋm 1000. B yeela be tɩ sẽn na n naag-b Kiristã n yɩ rĩm-dãmb la maan-kʋʋdbã “vʋʋgame n lebg rĩm-dãmb n dɩ naam ne Kiristã yʋʋm tusri.” “Kũ-rãmb a taabã” sẽn pa vʋʋg ‘hal tɩ yʋʋm tusrã loogã’ tog n yaa neb nins sẽn ket n vɩ yʋʋm tusrã baasgẽ wã, la sẽn deng wakat ning b sẽn na n yiis a Sʋɩtãan bog-zulungẽ wã t’a mak ninsaalbã ne yaoolem makrã. Yʋʋm tusrã ne a na n sa tɩ neb nins sẽn be tẽngã zugã zemsa zãng wa a Ãdem ne a Awa, nand tɩ b kɩɩs Wẽnnaamã. Wakat kãng tɩ sẽn be-b tẽngã zugã vɩɩmã zemsa zãnga. B sã n wa yiis a Sʋɩtãan bog-zulungẽ wã wakat bilf yĩng t’a mak nebã, neb nins sẽn pa na n lʋɩ a makrã pʋgẽ wã na n paam n vɩɩmda ne sũ-noog wakat sẽn kõn sa yĩnga.—Vẽn. 20:4-10.
Vẽnegre 20:14, 15; it-2 101-102
Bugum mogrã
Yaa Vẽnegr sebrã pʋgẽ bal la gom-bil-kãngã be, la a makda bũmbu. Biiblã meng wilgda sẽn yaa bũmb ning la makda. Ad a sẽn yete: “Bugum mogrã makda kũum a yiib-n-soabã.”—Vẽn. 20:14; 21:8.
Vẽnegr sebrã pʋgẽ, vɛrse nins sẽn gomd bugum mogrã yellã, la vɛrse nins sẽn deng vɛrse-kãens la sẽn pʋgd vɛrse-kãensã sõngdame tɩ d bãng tɩ bugum mogrã makda bũmbu. B yeelame tɩ b loba kũumã bugum mogrã pʋgẽ. (Vẽn. 20:14, 15) Yaool n yaa vẽeneg tɩ kũumã pa bũmb b sẽn tõe n dɩk woto n lob bugum pʋgẽ ye. Sẽn paas me, b yeelame tɩ b rɩka a Sʋɩtãan sẽn yaa malɛkã n lob bugmã pʋgẽ. A sẽn yaa malɛkã yĩngã, bugum sɩd-sɩd pa tõe n dɩ-a ye.—Vẽn. 20:10; ges-y Yik. 3:2 la Bʋ. 13:20.
Sẽn mik tɩ bugum mogrã makda “kũum a yiib-n-soabã,” tɩ Vẽnegr 20:14 wilgd me tɩ b loba “kũumã ne Yaoogã” be wã, yaa vẽeneg tɩ bugum mogrã pa tõe n yɩ kũum ning a Ãdem kɩɩsgã sẽn wa ne wã (Rom. 5:12), wall Yaoogã (Seollã) ye. Dẽnd yaa vẽeneg tɩ makda kũum a to, kũum sẽn pa tar tɩɩm, bala b pa wilg zĩig baa a ye tɩ neb nins b sẽn lob “mogrã” pʋgẽ wã tõe n le yiime ye. Nebã yaool n tõe n yii kũum ning a Ãdem kɩɩsgã sẽn wa ne wã la Yaoogã (Seollã) pʋgẽ. (Vẽn. 20:13) La neb nins yʋy sẽn pa gʋls “vɩɩm sebrã” pʋgẽ wã yaa neb nins sẽn kɩɩsd Wẽnnaam naamã sẽn ka to wã. B na n loba nin-kãens bugum mogrẽ wã, rat n yeel tɩ b na n sãam-b-la wakat fãa yĩnga. Rẽ la kũum a yiib-n-soabã.—Vẽn. 20:15.